ߡߊ߲߬ߞߊ߲ ߡߍ߲ ߦߋ߫ ߞߟߊ߬ߝߟߌ߬ߟߊ߫ ߣߌ߫ ߓߟߐ߬ߛߏ߬ ߕߍ߫߸ ߏ߬ ߓߘߊ߫ ߥߟߌ߬ ߞߏߞߎߘߊ߫߸ ߞߵߏ߬ ߞߎ߲߭ ߞߍ߫ ߡߎ߲߬ ߘߌ߫߸ ߓߟߐ߬ߛߏ߬ߞߊ ߡߍ߲ ߠߎ߬ ߞߎ߲߭ߞߊ߬ߙߌ߬ߝߊ߬ߣߍ߲߫ ߕߘߍ߬ ߜߋ߲ߞߐ߰ߖߌ߬ߘߊ ߟߊ߫߸ ߏ߬ ߟߎ߫ ߟߋ߬ ߣߐ߬ ߊ߬ߟߎ߬ ߞߐߛߊ߬ߦߌ߲߬ ߠߊ߫߸ ߏ߬ ߞߐ ߟߋ߬ ߞߍߣߍ߲߫ ߡߊ߲߬ߞߊ߲ ߢߌ߲߬ ߠߊߥߌ߬ߟߌ߫ ߕߎ߬ߙߎ ߘߌ߫، ߞߟߊ߬ߝߟߌ߬ߟߊ߫ ߣߌ߫ ߓߟߐ߬ߛߏ߬ ߦߋ߫ ߘߎ߰ߣߍ߲߫ ߝߌ߬ߟߊ߫ ߟߋ߬ ߘߌ߫߸ ߡߍ߲ ߠߎ߬ ߦߋ߫ ߓߎߟߊ߫ ߡߙߊ߬ߘߊ߬ߙߋ߲ ߘߐ߫߸ ߞߎߘߍ߫ ߁߀߈ ߖߊ߬ߕߋ߬ ߟߊ߫ ߞߊ߲ߞߊ߲߫ ߡߙߊ߬ߘߊ߬ߓߊ ߘߐ߫، ߞߟߊ߬ߝߟߌ߬ߟߊ߬ߞߊ ߡߍ߲ ߠߎ߬ ߦߋ߫ ߛߌ߱ ߘߐ߫ ߞߊ߲ߞߊ߲߫߸ ߏ߬ ߟߎ߫ ߟߋ߬ ߞߊ߬ ߛߙߊ߬ߣߎ߲ ߕߊ߬ ߓߌ߬ ߓߌߟߏ߲ ߣߌ߲߬ ߡߊ߬ ߞߵߊ߬ߟߎ߬ ߡߙߌߦߊ ߦߌ߬ߘߊ߬، <<ߊ߲ߠߎ߬ ߦߋ߫ ߞߟߊ߬ߝߟߌ߬ߟߊ߬ߞߊ ߟߎ߫ ߟߋ߬ ߘߌ߫߸ ߊ߲ ߛߌ߰ߣߍ߲߫ ߞߊ߲ߞߊ߲߫ ߦߊ߲߬ ߠߋ߬، ߊ߲ ߠߊ߫ ߡߐ߱ ߟߋ߬ ߝߊ߰ߣߍ߲߫ ߛߊߙߏ߲߬ ߞߊߙߏ ߢߌ߲߬ ߠߊ߫߸ ߊ߲ ߠߊ߫ ߛߏ ߘߋ߲ ߘߏ߫ ߟߋ߬ ߝߊ߰ ߘߊ߫ ߓߟߐ߬ߛߏ߬ߞߊ ߟߎ߬ ߓߟߏ߫. ߡߍ߲ ߠߎ߬ ߕߎ߲߬ ߞߵߊ߲ ߠߊ߫ ߡߐ߱ ߝߊ߰߸ ߏ߬ ߟߎ߫ ߕߎ߲߬ ߓߘߴߊ߬ߟߎ߫ ߓߏ߬ߙߌ߫ ߞߊ߬ ߥߊ߫ ߝߏ߯ ߜߋ߲ߞߐ߰ߖߌ߬ߘߊ ߟߊ߫.>> ߞߎߡߟߊ ߞߵߏ߬ ߦߌ߬ߘߊ߬. ߞߕߌߓߋߟߋ߲ ߠߊ߫ ߝߐߟߌ߫ ߘߐ߫߸ ߞߏ߫ ߡߊ߲߬ߞߊ߲ ߣߌ߲߬ ߘߐ߫߸ ߘߋ߲ߡߌߛߍ߲ ߠߎ߬ ߥߟߌ߬ ߘߊ߫ ߞߊ߬ ߥߊ߫ ߓߋ߬ ߥߎߟߊ߫ ߞߣߐ߫ ߘߊ߮ ߞߊ߲߬ (ߔߋ.ߊ)߸ ߞߊ߬ ߡߊ߬ߙߌ߬ߝߊ߫ ߛߊ߬ߓߊ߫ ߕߊ߬ ߦߋ߲߬.
ߡߊ߲߬ߞߊ߲ ߣߌ߲߬ ߕߎ߬ߙߎ ߦߋ߫ ߘߎ߰ߞߏ߬ ߥߦߐ ߟߋ߬ ߘߌ߫߸ ߡߍ߲ ߞߐߝߟߌ ߞߍ߫ ߘߊ߫ ߡߊ߬ߡߊ߬ߘߌ߬ ߂߲ ߞߙߎ߬ߡߊ߬ ߟߊ߫ ߛߊ߬ߦߊ ߘߌ߫߸ ߏ߬ ߡߍ߲ ߕߍ߬ߘߍ߫ ߞߊ߬ߙߊ߲߬ߝߊ߬ ߘߌ߫ ߞߊ߬ߙߊ߲߬ߘߊ ߟߊ߫، ߊ߬ ߝߐߣߍ߲߫ ߞߏ߫ ߝߊ߰ߟߌ ߏ߬ ߞߍߣߍ߲߫ ߓߟߐ߬ߛߏ߬ߞߊ ߟߎ߫ ߟߋ߬ ߓߟߏ߫، ߒ߬ߓߊ߬߸ ߏ߬ ߟߋ ߞߐߝߍߟߊ ߞߍߣߍ߲߫ ߏ߬ ߟߎ߫ ߘߏ߲߰ ߢߊ ߘߌ߫ ߞߵߊ߬ߟߎ߬ ߟߊ߫ ߛߏ ߓߌ߬ߟߊ߬߸ ߞߊ߬ ߥߊ߫ ߜߋ߲ߞߐ߰ߖߌ߬ߘߊ ߝߊ߲߭ ߝߍ߬.
ߞߊ߲ߞߊ߲߫ ߞߕߌߞߊ߲ߘߊ ߦߌߟߡߊ߫ ߝߟߐ ߣߐ߬ߞߊ߲߬ߛߌ߮߸ ߡߊߡߊߘߎ߫ ߛߊߟߌߥߎ߬ ߓߊ ߝߣߊ߫ ߞߊ߬ ߓߟߐ߬ߛߏ߬ߞߊ ߟߎ߬ ߟߊ߫ ߓߏ߬ߙߌ߬ ߞߏ ߏ߬ ߟߊߛߙߋߦߊ߫: <<ߓߟߐ߬ߛߏ߬ߞߊ ߟߎ߬ ߓߐ߫ ߘߊ߫ ߓߟߐ߬ߛߏ߫ ߞߵߊ߬ߟߎ߫ ߞߎ߲߬ߛߌ߲߫ ߜߋ߲ߞߐ߰ߖߌ߬ߘߊ ߟߊ߫߸ ߖߐ߲߰ߛߊ߫ ߞߏ ߓߊ߱ ߘߌ߫ ߡߊߝߊ߰، ߖߐ߲߰ߛߊ߫ ߣߌ߫ ߞߏ ߟߎ߬ ߘߐߛߎߡߊ߫ ߘߊ߫߸ ߊ߬ߟߎ߬ ߦߋ߫ ߛߋ߫ ߛߊ߬ߦߌ߲߬ ߠߴߊ߬ߟߎ߫ ߘߌ߲߬ߞߌߙߊ ߘߐ߫.>> ߊ߬ ߞߵߏ߬ ߢߊߝߐ߫.
ߞߊߙߏ߫ ߦߙߌߞߊ߫ ߢߊߣߌ߲ߡߊߓߏߙߌ ߞߐ ߘߐ߫߸ ߝߊ߰ߡߊ ߟߎ߫ ߘߍ߬ߡߍ߲߬ ߘߴߊ߬ߟߎ߫ ߞߊ߲߬߸ ߊ߬ߟߎ߬ ߓߘߊ߫ ߛߴߊ߬ߟߎ߬ ߡߊߞߍ߫ ߦߌߟߊ ߘߐ߫، ߞߕߌߞߊ߲ߘߊ ߣߐ߬ߞߊ߲߬ߛߌ߮ ߞߵߊ߬ ߝߐ߫ ߏ߬ ߟߋ ߘߐ߫߸ ߞߏ߫ <<ߛߌߞߊ߫ ߞߏ߬ߣߌ߲߬ ߕߍ߫ ߡߍ߲ ߘߐ߫߸ ߊ߬ߟߎ߬ ߦߋ߫ ߖߌ߬ߣߍ߬ߞߊ ߟߎ߫ ߟߋ߬ ߘߌ߫، ߏ߬ ߘߐ߫߸ ߊ߬ ߤߊߞߍ ߦߴߊ߬ߟߎ߬ ߓߟߏ߫ ߞߵߊ߬ߟߎ߫ ߛߌ߰ ߖߌ߬ߣߍ߬ ߞߣߐ߫߸ ߞߊ߬ ߕߏ߫ ߊ߬ߟߎ߬ ߓߘߊ ߝߛߊߦߌ߫.>> ߛߊ߬ߙߌ߬ߦߊ߬ߓߊ߰ߙߊ߬ߟߊ ߞߵߏ߬ ߦߌ߬ߘߊ߬.
ߞߟߊ߬ߝߟߌ߬ߟߊ߬ ߡߊ߫ ߛߐ߲߬ ߞߐߛߊߦߌ߲ߠߌ߲ ߞߍߢߊ ߏ߬ ߟߋ ߡߊ߬ ߛߊ߫، ߞߊ߬ߕߎ߲߯߸ ߊ߬ߟߎ߬ ߞߊ߲߫ ߞߏ߫ ߛߌ߰ߞߊ߬ߝߐ߬ ߡߊ߫ ߞߍ߫߸ ߊ߬ ߞߏߢߊ ߡߊ߫ ߛߊ߬ߙߴߊ߬ߟߎ߬ ߟߊ߫ ߝߣߊ߫߸ ߊ߬ ߘߏ߲߬߸ ߕߌߢߍߟߌ ߟߋ߬ ߞߍߣߍ߲߫ ߊ߬ߟߎ߫ ߡߊ߬، ߞߎߡߟߊ ߞߵߊ߬ ߦߌ߬ߘߊ߫ ߏ߬ ߟߋ ߘߐ߫߸ ߞߏ߫ ߊ߬ߟߎ߬ ߟߊ߫ ߘߎ߰ߞߎߟߎ߲ ߘߏ߫ ߟߋ߬ ߕߌߢߍ߫ ߘߊ߫ ߞߐ߭ ߘߏ߫ ߞߣߐ߫ ߦߋ߲߬߸ ߊ߬ߟߎ߬ ߟߊ߫ ߘߋ߲ߡߌߛߍ߲ ߠߎ߬ ߥߊߣߍ߲߫ ߕߍ߬ߘߍ߫ ߏ߬ ߟߋ ߛߊ߬ߡߊ߲߬ ߞߊ߲ߡߊ߬، ߊ߬ߟߎ߬ ߥߊ߫ ߘߴߊ߬ߟߎ߬ ߢߊ ߟߊߕߊ߬ ߓߟߐ߬ߛߏ߬ߞߊ ߟߎ߬ ߟߊ߫ ߛߏ ߞߣߐ߫، ߊ߬ߟߎ߫ ߞߵߊ߬ ߝߐ߫ ߏ߬ ߟߎ߫ ߡߊ߬ ߞߏ߫ : <<ߋ߫߹ ߊߦߌ߬ ߣߊ߬ߣߍ߲߬ ߟߏ߲ ߖߐ߲߫؟ ߞߏ߫ ߡߙߊ߬ߓߊ߮ ߟߋ߬ ߞߵߊ߬ߟߎ߬ ߟߊߣߊ߬، ߡߙߊ߬ߓߊ߮ ߟߋ߬ ߞߵߊߟߎ߫ ߣߊ߬؟ ߞߏ߫ ߐ߲߰ߤߐ߲߫. ߐ߲ ߓߊ߬ߙߌ߬ ߊ߬ ߡߊ߫ ߛߊ߬ߙߴߊ߲ߠߎ߬ ߟߊ߫߸ ߊߟߎ߫ ߘߏ߲߬ ߞߵߊ߲ߠߎ߬ ߟߊ߫ ߡߐ߱ ߟߋ߬ ߝߊ߰ ߞߵߊߟߎ߫ ߓߏ߬ߙߌ߫ ߞߊ߬ ߥߊ߫، ߞߕߌ߫ ߡߊ߫ ߞߍ߫ ߝߏߦߌ߬ ߡߊ߫ ߞߍ߫߸ ߊ߬ߟߎ߬ ߓߘߊ߫ ߣߵߊߟߎ߫ ߟߊߛߌ߰>> ߓߟߐ߬ߛߏ߬ߞߊ ߣߌ߲߬ ߞߵߏ߬ ߦߌ߬ߘߊ߬.
ߞߕߌߓߋߟߋ߲ ߠߊ߫ ߝߐߟߌ߫ ߘߐ߫߸ ߘߋ߲ߡߌߛߍ߲߫ ߛߌߦߊߡߊ߲߫ ߠߋ߬ ߓߐ߫ ߘߊ߫ ߡߊ߲߬ߞߊ߲ ߘߌ߫، <<ߞߟߊ߬ߝߟߌ߬ߟߊ߬ ߘߋ߲ߡߌߛߍ߲߫ ߛߌߦߊߡߊ߲߫ ߠߋ߬ ߥߟߌ߬ ߘߊ߫߸ ߊ߬ߟߎ߬ ߣߌ߫ ߡߙߊ߬ߒ߬ߡߊ߬ߝߋ߲ ߠߎ߬߸ ߡߊ߬ߙߌ߬ߝߊ ߣߌ߫ ߡߎ߬ߙߎ ߟߎ߬߸ ߞߵߊ߬ߟߎ߫ ߞߎ߲߬ߛߌ߲߫ ߓߟߐ߬ߛߏ߬ ߟߊ߫߸ ߞߊ߬ ߥߊ߫ ߦߋ߲߬ ߡߐ߮ ߟߎ߬ ߜߍ߲߫ ߞߊ߲ߡߊ߬߸ ߞߵߊ߬ߟߎ߬ ߞߘߊߡߊ߫ ߊ߬ߟߎ߬ ߞߐߛߊ߬ߦߌ߲ ߠߊ߫ ߜߋ߲ߞߐ߬ߖߌ߬ߘߊ ߟߊ߫.>> ߡߊߡߊߘߎ߫ ߛߊߟߌߥߎ߬ ߓߊ ߞߵߏ߬ ߝߐ߫ ߞߵߊ߬ ߟߊߕߍ߰.
ߏ߬ ߟߋ ߞߍ߫ ߘߊ߫ ߕߐ߲߫ ߓߟߏߡߊ ߟߎ߬ ߟߊߕߊ߯ ߢߊ ߘߌ߫ ߦߋ߲߬، ߓߊ߬ߙߌ߬߸ ߞߟߊ߬ߝߟߌ߬ߟߊ߬ߞߊ ߟߎ߬ ߞߊ߲߫ ߞߏ߫ ߕߌߢߍߟߌ߫ ߛߌߦߊߡߊ߲߫ ߠߋ߬ ߞߍ߫ ߘߊ߫ ߕߐ߲߫ ߓߟߏߡߊ߫ ߟߊߕߊ߯ߣߍ߲ ߏ߬ ߟߎ߬ ߓߟߏ߫، <<ߛߏ߬ߙߌ߬ߡߊ߬ߘߋ߲ ߠߎ߫ ߞߊ߬ ߕߌߢߍߟߌ ߖߍ߬ߘߍߖߍ߬ߘߍ ߟߋ߬ ߞߍ߫، ߞߊ߬ ߡߌ߬ߣߊ߬ߟߌ ߟߎ߬ ߝߣߊ߫ ߞߍ߫، ߞߊ߬ߕߎ߲߯߸ ߘߎ߰ߕߌ߮ ߡߊ߫ ߛߐ߬ߘߐ߲߫ ߊ߬ߟߎ߬ ߓߟߏ߫ ߡߍ߲ߞߍ߬߸ ߊ߬ߟߎ߫ ߞߵߏ߬ ߡߏ߬ߛߏ ߡߌ߬ߣߊ߬߸ ߞߊ߬ ߝߋ߲߫ ߛߌߦߊߡߊ߲߫ ߘߐߕߌߢߍ߫.>> ߞߟߊ߬ߝߟߌ߬ߟߊ߬ߞߊ ߣߌ߲߬ ߞߵߏ߬ ߞߎߡߊ ߝߐ߫. ߊ߬ ߞߵߊ߬ ߟߴߊ߬ ߟߊ߫ ߞߎߡߊ ߞߊ߲߬ ߌߞߐ߫߸ ߞߏ߫ <<ߛߏ߬ߙߌ߬ߡߊ߬ߘߋ߲ ߠߎ߫ ߞߊ߬ ߕߊ ߛߎ߫ ߕߌߓߏ߲߫ ߇߀ ߟߋ߬ ߟߊ߫ ߦߋ߲߬߸ ߞߎߡߊߕߍ߫ ߕߐ߯ߟߌߓߏ߲߫ ߡߍ߲ ߠߎ߬ ߘߊ ߞߊߘߌߣߍ߲߫߸ ߏ߬ ߟߎ߬ ߞߏ߫ ߕߍ߫، ߓߏ߲ ߖߋ߬ߣߌ߲ ߡߊ߫ ߞߍ߫ ߊ߬ ߟߊ߫ ߘߋ߬߸ ߊ߬ߟߎ߬ ߓߊ߯ ߓߏ߲ ߡߍ߲ ߘߊ ߞߊߘߌ߫߸ ߊ߬ߟߎ߬ ߘߌ߫ ߥߊߘߌ ߟߎ߫ ߕߊ߬߸ ߞߵߏ߬ ߟߊ߫ ߜߋߟߋ߲ߜߋߟߋ߲߫ ߊ߲ߘߙߏߦߘߌ ߟߎ߫ ߞߊ߲߬.>>
ߊ߬ ߞߵߊ߬ ߝߙߊ߬ ߞߎߡߊ ߞߊ߲߬ ߌߞߐ߫߸ ߞߏ߫: <<ߡߛߏ߬ߞߘߐ߬ߓߊ߬ ߞߋߟߋ߲߫ ߞߊ߬ ߛߊ߬ߦߊ ߡߊߛߐ߬ߘߐ߲߬ ߢߊߖߌߓߐߥߊߦߌ߲ ߡߊ߲߬ߕߙߐ ߞߏߛߐ߲߬߸ ߡߍ߲ ߝߟߌ߬ ߘߊ߫ ߡߙߊ߬ߓߊ߮ ߟߊ߫ ߡߐ߰ ߟߊߕߊ߯ߣߍ߲ ߠߎ߬ ߓߟߏ߫.>> ߊ߬ ߞߵߏ߬ ߟߊߛߙߋߦߊ߫، ߊ߬ ߞߵߊ߬ ߝߐ߫ ߝߣߊ߫ ߞߏ߫ ߞߊ߲ߡߋߙߋ߲߫ ߞߋߟߋ߲߫ ߡߊߘߌߡߌ߲߫ ߘߴߊ߬ ߓߟߏ ߟߊ߫߸ ߞߵߏ߬ ߓߟߏߞߏ߬ߦߌ߬ߣߍ߲߫ ߝߌ߬ߟߊ߫ ߕߍ߰ ߊ߬ ߟߊ߫.
ߞߕߌߓߋߟߋ߲ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ ߡߊ߫ ߞߎߡߊ߫ ߖߐ߲ߖߐ߲߫ ߝߏߦߌ߬ ߛߐ߬ߘߐ߲߬߸ ߡߍ߲ ߦߴߊ߬ ߦߌ߬ߘߊ߬ ߟߊ߫ ߞߏ߫ ߕߎ߬ߢߊ ߟߵߊ߬ߟߎ߬ ߟߊ߫ ߞߎߡߊ߫ ߝߐߣߍ߲ ߏ߬ ߟߎ߬ ߘߌ߫، <<ߡߍ߲ ߓߍ߲߬ߣߍ߲߫ ߡߐ߰ ߝߊ߰ ߞߏ ߡߊ߬߸ ߒ ߕߍ߫ ߛߴߊ߬ ߝߐ߫ ߟߊ߫ ߞߋߟߋ߲ߘߌ߫ ߒ ߞߏ߫ ߥߎߦߊ߫ ߦߋ߫ ߛߊ߫، ߓߊ߬ߙߌ߬߸ ߕߐ߲߫ ߓߟߏߡߊ ߡߍ߲ ߠߎ߬ ߟߊߕߊ߯ߣߍ߲߫ ߦߋ߲߬߸ ߏ߬ ߟߎ߬ ߓߘߴߊ߬ ߝߐ߫ ߞߵߊ߬ ߟߊߜߍ߫ ߝߋߝߋ߫ ߞߏ߫ ߡߐ߰ ߛߌ߫ ߡߊ߫ ߝߊ߰.>> ߞߕߌߞߊ߲ߘߊ ߣߐ߬ߞߊ߲߬ߛߌ߮ ߟߋ߬ ߞߊ߲߫ ߕߋ߲߬، ߊ߬ ߞߵߊ߬ ߦߌ߬ߘߊ߬ ߝߣߊ߫ ߞߏ߫ ߕߊ߫ ߡߊ߫ ߓߌ߬ߟߊ߬ ߓߏ߲߫ ߛߌ߫ ߟߊ߫.
ߊ߬ߟߎ߫ ߝߌ߬ߟߊ ߓߍ߯ ߓߍ߲߬ߣߍ߲߬ ߞߎߡߊ߫ ߞߋߟߋ߲߫ ߡߊ߬߸ ߏ߬ ߟߋ ߘߋ߲ߡߌߛߍ߲ ߥߊ ߘߌ߫ ߞߊ߬ ߥߴߊ߬ߟߎ߬ ߞߍ߫ ߥߎߟߊ߫ ߞߣߐ߫ ߘߊ߮ ߞߊ߲߬߸ ߞߵߊ߬ߟߎ߬ ߟߊ߫ ߡߐ߰ ߡߌ߬ߣߊ߬ߣߍ߲ ߠߎ߫ ߓߌ߬ߟߊ߬، <<ߘߋ߲ߡߌߛߍ߲ ߠߎ߬ ߖߛߎ߬ߟߊߕߍ߰ ߘߊ߫ ߣߊ߲߬ߕߌ߮ ߟߎ߬ ߞߊ߲ߡߊ߬߸ ߞߊ߬ ߥߊ߫ ߔߋ ߊ ߘߊ ߞߊߘߌ߫ ߞߊ߬ ߡߐ߰ ߡߌ߬ߣߊ߬ߣߍ߲ ߠߎ߬ ߟߊߓߐ߫߸ ߡߍ߲ ߠߎ߬ ߕߍ߬ߘߍ߫ ߟߊ߬ߡߙߊ ߘߐ߫ ߦߋ߲߬.>> ߞߟߊ߬ߝߟߌ߬ߟߊ߬ߞߊ ߣߌ߲߬ ߞߵߏ߬ ߦߌ߬ߘߊ߬.
ߡߊ߬߬ߙߌ߬ߝߊ߫ ߛߊ߬ߓߊ߫ ߕߊ߬ ߘߊ߫ ߏ߬ ߟߋ ߛߋ߲߭ߝߍ߬. <<ߊ߲ ߕߏ߫ ߘߊ߫ ߟߊ߬ߘߍ߬ ߘߊߞߎ߲ ߏ߬ ߟߋ ߘߐ߫ ߌߞߘߐ߫߸ ߞߊ߬ ߞߏ ߓߍ߯ ߟߴߊ߬ ߘߐ߫߸ ߡߊ߬ߙߌ߬ߝߊ ߓߍ߯ ߥߊ߫ ߘߊ߫ ߟߊߞߎ߲߫ ߘߋ߲ߡߌߛߍ߲߫ ߞߎ߲ߕߌ߮ ߓߘߊ، ߊ߬ߟߎ߫ ߞߵߏ߬ ߝߐ߫ ߡߙߊ߬ߓߊ߮ ߦߋ߫߸ ߏ߬ ߝߣߊ߫ ߞߵߊ߬ ߦߌ߬ߘߊ߬ ߞߏ߫ ߡߐ߱ ߘߌ߫ ߥߊ߫ ߡߙߊ߬ߒ߬ߡߊ߬ߝߋ߲ ߏ߬ ߟߎ߫ ߕߊ߬ ߦߋ߲߬.>> ߞߕߌߓߋߟߋ߲ ߞߊ߲߫ ߏ߬ ߟߋ ߘߐ߫ ߛߊ߫߸ ߞߏ߫ ߡߊ߬ߙߌ߬ߝߊ ߏ߬ ߟߎ߬ ߟߊߞߎ߲߫ ߘߊ߫ ߘߋ߲ߡߌߛߍ߲߫ ߞߎ߲ߕߌ߮ ߡߍ߲ ߓߘߊ ߏ߬ ߘߌ߫߸ ߛߊ߬ߙߌ߬ߦߊ߫ ߡߊ߬ߞߏ ߦߴߏ߬ ߟߊ߫، ߖߐ߲߰ߛߊ߫߸ ߡߍ߲ ߠߎ߬ ߞߊ߬ ߡߊ߬ߙߌ߬ߝߊ ߕߊ߬߸ ߡߍ߲ ߠߎ߬ ߞߵߊ߬ ߘߴߊ߬ ߡߊ߬߸ ߛߊ߫ ߏ߬ ߟߎ߬ ߘߌ߫ ߟߐ߲߫.
ߞߕߌߞߊ߲ߘߊ ߣߐ߬ߞߊ߲߬ߛߌ߮ ߞߵߊ߬ ߦߌ߬ߘߊ߬߸ ߞߏ߫ ߡߐ߰ ߞߋߟߋ߲߫ ߡߊߝߌ߲߬ߣߍ߲߫߸ ߡߍ߲ ߕߘߍ߬ ߦߙߌ ߕߍ߰ ߟߊ߫ ߦߙߌߕߍ߯ ߕߙߏߞߏ ߟߊ߫ ߞߊ߬ ߛߌߟߊ ߕߍ߰߸ ߏ߬ ߓߘߊ߫ ߛߋ߫ ߓߟߏ߫ ߘߐ߫. <<ߊ߬ߟߎ߫ ߕߘߍ߬ ߦߙߌ߫ ߕߍ߯ ߡߊ߲ߛߌߣߌ߲ ߠߋ߬ ߕߊ߬ ߟߊ߫ ߞߊ߬ ߦߙߌߓߊ ߟߎ߫ ߕߍ߰ ߞߵߊ߬ߟߎ߬ ߟߊߓߋ߬ ߕߐ߲߫ ߓߟߏߡߊ ߟߎ߬ ߢߍ߫ ߛߌߟߊ ߘߐ߫߸ ߞߊ߬ ߛߌߟߊ ߕߍ߰.>> ߛߊ߬ߙߌ߬ߦߊ߬ߓߊ߰ߙߊ߬ߟߊ ߞߵߏ߬ ߦߌ߬ߘߊ߬.
ߞߟߊ߬ߝߟߌ߬ߟߊ߬ߞߊ ߟߎ߫ ߞߵߊ߬ ߦߌ߬ߘߊ߬ ߞߎߡߊ߫ ߟߊߓߊ߲߫ ߘߐ߫߸ ߞߏ߫ ߞߊ߬ ߛߏ߬ߙߌ߬ߡߊ߬ߘߋ߲ ߠߎ߬ ߓߐ߫ ߊ߬ߟߎ߬ ߞߊ߲ߞߊ߲߬ ߦߋ߲߬ ߖߊ߱ߣߌ߲߬، <<ߊ߲ ߧߋ߫ ߝߊ߰ߡߊ ߟߎ߬ ߘߋߟߌ߫ ߟߊ߫߸ ߊ߬ߟߎ߬ ߦߋ߫ ߢߌ߲߬ ߠߊߟߐ߬، ߞߵߊ߬ߟߎ߬ ߡߊߘߌߦߊ߫߸ ߊ߬ߟߎ߬ ߦߋ߫ ߦߙߍߞߍߟߌ ߢߌ߲߬ ߠߊߟߐ߬߸ ߡߐ߱ ߟߎ߬ ߦߴߊ߬ߟߎ߬ ߟߊ߫ ߛߣߍ߬ߞߍ ߢߊߛߐ߬ߘߐ߲߬، ߞߟߊ߬ߝߟߌ߬ߟߊ߬ ߓߘߊ߫ ߕߙߐ߫.>> ߊ߬ߟߎ߫ ߞߵߏ߬ ߡߞߊ߬ߛߌ߬ߟߌ ߞߍ߫، ߞߕߌߓߋߟߋ߲ ߞߏ߬ߣߌ߲ ߞߵߊ߬ ߦߌ߬ߘߊ߬߸ ߞߏ߫ ߊ߬ߟߎ߬ ߓߘߊ߫ ߢߊߢߌߣߌ߲ߠߌ߲߫ ߛߌ߰ ߛߋ߲߬ߠߊ߫߸ ߖߐ߲߰ߛߊ߫ ߡߍ߲ ߠߎ߬ ߥߊߣߍ߲߫ ߓߋ߬ ߟߊ߫ ߣߊ߲߬ߕߌ߮ ߟߎ߬ ߡߊߞߍ߫ ߦߌߟߊ ߞߊ߲߬߸ ߞߊ߬ ߕߌߢߍߟߌ ߞߍ߫߸ ߞߊ߬ ߡߙߊ߬ߒ߬ߡߊ߬ߝߋ߲ ߠߎ߬ ߕߊ߬߸ ߛߊ߫ ߞߏ߫ ߘߌ߫ ߟߊߕߐ߲߫ ߏ߬ ߟߎ߬ ߟߊ߫ ߢߊ ߡߍ߲ ߡߊ߬.
Aucun commentaire pour le moment.