ߓߏ߬ߙߌ߬ߝߋ߲߬ ߡߊ߬ߞߏ߬ ߦߙߐ ߟߎ߬ ߘߐ߫߸ ߘߋ߲ߡߌߛߍ߲ ߘߏ߫ ߟߎ߫ ߦߋ߫ ߛߋ߫ ߟߴߊ߬ߟߎ߫ ߡߎ߬ߛߊ߬ߞߊ ߟߎ߫ ߛߐ߬ߘߐ߲߬ ߠߊ߫ ߦߋ߲߬ ߠߎ߬ ߘߐ߫߸ ߞߵߊ߬ߟߎ߬ ߟߊ߫ ߞߏ߫ ߡߌߛߍ߲ ߠߎ߬ ߢߊߓߐ߫ ߊ߬ ߘߐ߫، ߞߊ߬ߙߊ߲߬ߘߋ߲߫ ߓߊ߬߸ ߞߊ߬ߙߊ߲߬ߠߊ߬ߘߋ߲߫ ߓߊ߬߸ ߏ߬ ߟߎ߬ ߛߌߦߊߡߊ߲߫ ߞߊ߲߫ ߞߏ߫ ߊ߬ߟߎ߬ ߓߘߊ߫ ߛߋ߫ ߞߏ߫ ߛߌߦߊߡߊ߲߫ ߞߍ߫ ߟߊ߫ ߕߋ߲߬߸ ߞߵߊ߬ ߛߐ߬ߘߐ߲߬ ߊ߬ ߡߊ߫ ߘߍ߲߫ ߡߐ߰ ߟߊ߫، ߓߏ߬ߙߌ߬ߝߋ߲߬ ߡߊ߬ߞߏ ߢߌ߲߬ ߠߋ߬ ߞߵߏ߬ ߟߊߛߴߊ߬ߟߎ߫ ߡߊ߬.

ߞߊ߬ߟߌߟ ߕߎ߬ߙߋ ߦߋ߫ ߞߊ߬ߙߊ߲߬ߘߋ߲ ߠߋ߬ ߘߌ߫߸ ߏ߬ ߝߣߊ߫ ߛߊ߲߭ ߛߊ߬ߓߊ ߟߋ߬ ߕߋ߲߬߸ ߊ߬ ߦߋ߫ ߓߏ߬ߙߌ߬ߝߋ߲߬ ߡߊ߬ߞߏ ߢߌ߲߬ ߠߊ߫، ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ ߦߋ߫ ߓߐ߫ ߟߊ߫ ߞߊ߬ߙߊ߲߬ ߦߌߟߊ ߟߋ߬ ߘߐ߫߸ ߞߊ߬ ߣߊ߬ ߓߊ߯ߙߊ ߣߌ߲߬ ߞߍ߫߸ ߞߊ߬ ߓߊ߲߫ ߞߊ߬ ߥߊ߫ ߟߎ ߡߊ߬.

<<ߒ ߓߊ߯ ߓߐ߫ ߞߊ߬ߙߊ߲߬ ߦߌߟߊ ߕߎ߬ߡߊ ߡߍ߲ ߠߊ߫߸ ߒ ߧߋ߫ ߣߊ߬ ߟߊ߫ ߦߊ߲߬ ߏ߬ ߟߋ ߘߐ߫، ߒ ߧߋ߫ ߦߊ߲߬ ߠߋ߬߸ ߛߊ߫ ߒ ߘߌ߫ ߥߊߘߌߣߍ߲߫ ߛߐ߬ߘߐ߲߬ ߒ ߘߏ߬ߣߌ߲ ߘߏ߫ ߓߐ߫ ߒ ߠߊ߫ ߡߐ߱ ߟߎ߫ ߞߎ߲߬.>> ߊ߬ ߞߵߏ߬ ߝߐ߫.

ߊ߬ߟߋ ߟߊ߫ ߝߐߟߌ߫ ߘߐ߫߸ ߥߊߘߌߣߍ߲ ߡߍ߲ ߦߋ߫ ߛߐ߬ߘߐ߲߬ ߠߴߊ߬ ߓߟߏ߫ ߓߊ߯ߙߊ ߣߌ߲߬ ߘߐ߫߸ ߊ߰ ߛߋ߫ ߟߴߊ߬ ߖߍ߬ߘߍ ߞߎ߲߬ߞߏ߬ ߡߌߛߍ߲ ߘߏ߫ ߟߎ߫ ߢߊߓߐ߫ ߟߴߏ߬ ߘߐ߫ ߝߋߎ߫߸ ߊ߬ ߟߊ߫ ߞߊ߬ߙߊ߲߬ߕߊ ߛߓߍߕߐ߲ߛߐ߲ ߠߎ߬߸ ߛߊ߬ߡߘߊ߸ ߝߊ߰ߣߌ߲߸ ߊ߬ ߣߌ߫ ߛߌߦߊߡߊ߲߫ ߜߘߍ߫ ߟߎ߫.

ߣߴߌ ߘߏ߲߬ ߞߊ߬ ߊߓߘߎߟ ߛߟߊߡ ߛߌ߬ߛߋ ߕߊ߬߸ ߏ߬ ߞߊ߲߫ ߞߏ߫ ߊ߬ߟߋ ߣߌ߫ ߡߐ߱ ߟߎ߬ ߟߊ߫ ߛߊ߲߬ ߘߊ߲ߘߐ߫ ߓߊ߯ߙߊߢߐ߲߯ߦߊ ߞߐߝߍ߬߸ ߊ߬ ߓߘߴߊ߬ ߖߘߍ߬ߞߊ߬ߣߌ߲߬ ߓߊ߯ߙߊ߫ ߦߙߐ ߟߊߞߊ߬ ߕߋ߲߬، ߊ߬ߟߋ ߓߐߣߍ߲߫ ߛߏ߫ ߟߋ߬߸ ߞߊ߬ ߣߵߊ߬ ߟߊ߫ ߞߊ߬ߙߊ߲ ߘߊߓߊ߲߫ ߞߊ߲ߡߊ߬، ߊ߬ ߛߋ ߞߊ߲ߞߊ߲߫ ߏ߬ ߘߐ߫߸ ߊ߬ ߞߊ߬ ߓߏ߬ߙߌ߬ߝߋ߲߬ ߡߊ߬ߞߏ ߟߋ߬ ߦߋ߫ ߓߊ߯ߙߊ߫ ߘߌ߫߸ ߊ߬ ߛߋ߫ ߘߊ߫ ߡߍ߲ ߡߌ߬ߣߊ߬ ߟߊ߫߸ ߝߏ߫ ߊ߬ ߟߊ߫ ߘߏ߬ߣߌ߲߬ ߝߏߦߌ߬ߝߏߦߌ߬ ߟߋ߬ ߕߍ߫ ߊ߬ ߟߊ߫ ߡߐ߱ ߟߎ߫ ߞߎ߲߬ ߡߎ߬ߕߎ߲߬.

<<ߒߠߋ ߓߐߣߍ߲߫ ߛߏ߫ ߟߋ߬ ߞߊ߬ ߣߊ߬ ߞߊ߬ߙߊ߲߬ ߞߊ߲ߡߊ߬ ߦߊ߲߬߸ ߒ ߕߴߊ߬ ߝߍ߬ ߒ ߞߎ߲߬ߞߏ ߓߍ߯ ߦߋ߫ ߕߏ߫ ߒ ߠߊ߫ ߡߐ߱ ߟߎ߫ ߞߎ߲߬، ߏ߬ ߟߋ ߞߵߊ߬ ߞߍ߫߸ ߒ ߘߏ߲߬ ߘߊ߫ ߓߊ߯ߙߊ ߣߌ߲߬ ߘߐ߫߸ ߛߊ߫ ߒ ߞߊߣߊ߬ ߒ ߓߟߏ ߘߐߛߌ߰ ߢߊ ߡߍ߲ ߡߊ߬.>> ߊ߬ ߞߵߏ߬ ߝߐ߫.

ߓߌ߬ ߢߐ߲߰ ߟߏ߲߫߸ ߘߋ߲ߡߌߛߍ߲߫ ߛߌߦߊߡߊ߲߫ ߦߴߊ߬ߟߋ ߓߟߏߞߘߐ߫ ߦߋ߲߬߸ ߓߊ߯ߙߊ ߣߌ߲߬ ߞߍ߫ ߞߊ߲ߡߊ߬، ߊ߬ ߞߵߊ߬ ߦߌ߬ߘߊ߬ ߞߏ߫ ߥߊߘߌ ߡߍ߲ ߓߊ߯ ߛߐ߬ߘߐ߲߫ ߓߏ߬ߙߌ߬ߝߋ߲߬ ߞߋߟߋ߲ ߞߏ߬ ߛߙߊ ߘߐ߫߸ ߏ߬ ߦߋ߫ ߘߐߕߟߊ߫ ߟߴߊ߬ ߕߍߡߊ߬ ߟߋ߬߸ ߦߙߐ߫ ߕߌ߮ ߕߊ߫߸ ߞߏ߬ߟߌ߬ߟߊ ߕߊ߫.

ߞߏ߬ߣߌ߲߬߸ ߓߊ߯ߙߊ߫ ߛߌ߫ ߕߴߦߋ߲߬߸ ߜߟߍ߬ߦߊ ߕߍ߫ ߡߍ߲ ߘߐ߫، ߒ߬ߓߊ߬߸ ߊߓߘߎߟ ߛߟߊߡ ߛߌ߬ߛߋ ߞߊ߲߫ ߞߏ߫ ߊ߬ߟߎ߬ ߦߋ߫ ߜߟߍ߬ߦߊ߬ ߞߋߟߋ߲ ߏ߬ ߟߋ ߘߐ߫ ߕߋ߲߬߸ ߖߌߥߎ߫ ߞߏߖߊ ߓߘߊ߫ ߕߊ߬ߡߌ߲߫ ߊ߬ ߕߐ߭ ߣߐߣߌ߲߫ ߠߊ߫.

<<ߕߎ߬ߡߊ ߘߏ߫ ߟߎ߫ ߟߊ߫߸ ߓߊ߯ߙߊ ߦߋ߫ ߞߍ߫ ߟߊ߫ ߞߊ߬ ߛߌߦߊߦߊ߫߸ ߘߏ߫ ߟߎ߫ ߝߣߊ߫ ߟߊ߫߸ ߊ߬ ߡߊߛߌ߬ߣߍ߲߫، ߞߏ߬ߣߵߊ߲ ߧߋ߫ ߓߌ߭ߓߌ߭ ߡߍ߲ ߘߐ߫ ߣߌ߲߬߸ ߖߌߥߎ߫ ߞߏߖߊ ߝߣߊ߫ ߓߘߴߊ߲ ߛߍ߰߰ ߊ߬ ߕߐ߭ ߓߍ߯ ߘߌ߫، ߓߏ߬ߙߌ߬ߝߋ߲߬ߕߌ߮ ߟߎ߬ ߘߏ߲߬ ߕߍߣߊ߬ ߛߐ߲߬ ߠߊ߫ ߞߏ߫ ߞߊ߬ ߘߏ߫ ߟߊ߫ ߞߏ߬ߟߌ߬ ߛߙߊ ߞߊ߲߬߸ ߓߊߏ ߖߌߥߎ߫ ߞߏ ߜߍ߬ߟߍ߲߬ߡߊ߲߬، ߏ߬ ߓߘߊ߫ ߞߍ߫ ߊ߲ ߞߊ߲߬ ߕߙߐߦߊ ߖߍ߬ߘߍߖߍ߬ߘߍ ߟߋ߬ ߘߌ߫ ߕߋ߲߬.>> ߊ߬ ߞߵߏ߬ ߝߣߊ߫ ߦߌ߬ߘߊ߬.

ߊߓߎߓߞߊߙ ߛߊ߬ߞߐ ߦߋ߫ ߥߊ߫ ߟߴߊ߬ ߟߊ߫ ߔߏߔߏ ߞߏ߬ ߟߊ߫ ߦߋ߲߬߸ ߏ߬ ߞߵߊ߬ ߦߌ߬ߘߊ߬ ߞߏ߫ ߓߊ߯ߙߊ߫ ߛߎ߮ ߣߌ߲߬ ߞߐߡߊߓߌ߲ߓߌ߲ߕߊ ߟߋ߬߸ ߞߊ߬ ߓߟߏ ߘߏ߲߬ ߊ߬ ߞߘߐ߫، ߊ߬ߟߋ߫ ߞߵߊ߬ ߦߌ߬ߘߊ߬ ߞߏ߫ ߊ߬ ߥߊߣߴߊ߬ ߟߊ߫ ߔߏߔߏ ߞߏ߬ ߟߊ߫ ߦߋ߲߬ ߊ߬ߟߎ߬ ߟߊ߫ ߓߊ߯ߙߊ ߞߍ߫ ߞߏߢߌߡߊ ߟߋ߬ ߞߏߛߐ߲߬߸ ߊ߬ߟߎ߬ ߦߋ߫ ߔߏߔߏ ߜߍ߫ ߟߊ߫.

<<ߓߊ߯ߙߊ ߣߌ߲߬ ߞߍߟߌ ߦߋ߫ ߞߏ߫ ߓߘߍߓߊ߫ ߟߋ߬ ߘߌ߫، ߊ߬ ߞߊ߫ ߝߌ߬ߛߊ߫ ߛߏ߲߬ߧߊ߬ߟߌ ߣߌ߫ ߓߣߊߓߣߊߦߊ ߘߌ߫ ߛߋ߲߬ߢߊ߬ ߥߊ߯ ߞߋߟߋ߲߫.>> ߊ߬ߟߋ߫ ߞߵߏ߬ ߟߊߛߋ߫.

ߊ߬ߟߋ߫ ߝߍ߬߸ ߘߋ߲ߡߌߛߍ߲ ߠߎ߬ ߞߊ߫ ߞߊ߲߫ ߞߊ߬ ߓߊ߯ߙߓߊߟߌߦߊ ߕߏ߫ ߦߋ߲߬߸ ߓߊ߯ߙߊ߫ ߝߎ߮ ߘߏ߫ ߞߊ߫ ߝߌ߬ߟߊ߫ ߛߌ߰ߟߌ߬ ߝߎ߮ ߘߏ߫ ߘߌ߫، ߊ߬ ߞߊ߲߫ ߏ߬ ߟߋ ߘߐ߫߸ <<ߊ߲ ߧߴߊ߲ ߥߟߌ߬߸ ߞߊ߬ ߛߌߣߌ߲߫ ߢߍߛߌ߰߸ ߞߊ߬ ߞߟߊߓߎ ߕߊ߬، ߊ߲ ߕߍߣߊ߬ ߞߍ߫ ߟߊ߫ ߝߋ߲߫ ߘߌ߫߸ ߣߴߊ߲ ߡߊ߫ ߓߊ߯ߙߊ߫.>> ߊ߬ߟߋ߫ ߞߵߏ߬ ߟߋ ߞߍ߫ ߞߟߌߟߌ߫ ߞߊ߲ߠߊ߫ ߘߌ߫߸ ߞߵߊ߬ ߝߐ߫ ߘߋ߲ߡߌߛߍ߲ ߠߎ߬ ߦߋ߫.