ߓߊ߯ߙߊ ߓߍ߯ ߣߴߊ߬ ߞߍߢߊ߫ ߟߋ߬߸ ߡߙߌߦߊ ߟߎ߫ ߘߏ߲߬ ߝߣߊ߫ ߕߍ߫ ߞߢߊ߫ ߟߊ߫ ߞߏ ߟߎ߬ ߡߌ߬ߣߊ߬ ߢߊ ߘߐ߫، ߏ߬ ߞߏߛߐ߲߬߸ ߊ߬ ߓߘߊ߫ ߛߊ߲߬ ߦߙߌߞߊ߫ ߓߐ߫߸ ߟߊ߬ߞߙߐ߬ߛߌ߬ߟߌ ߟߎ߬ ߦߴߊ߬ ߦߌ߬ߘߊ߬ ߟߊ߫ ߞߏ߫ ߞߎ߲߬ߘߐ߬ߓߍ߲ ߡߊ߲߫ ߘߌ߫ ߘߋ߲ߓߦߊ ߝߊ߲߬ߓߊ ߦߋ߫߸ ߞߵߏ߬ ߞߎ߲߭ ߞߍ߫ ߊ߬ ߖߊ߬ߕߋ ߘߌ߫ ߡߐ߰ ߛߌߦߊߡߊ߲߫ ߓߟߏ߫ ߘߋ߲ ߠߎ߬ ߖߏ߮ ߕߌߢߍ߫ ߦߙߐ ߘߌ߫߸ ߊ߬ ߣߌ߫ ߞߏ߫ ߓߟߏ ߦߋ߫ ߓߌ߬ߟߊ߬ ߟߊ߫ ߝߎ߬ߝߕߊ ߡߍ߲ ߘߐ߫߸ ߏ߬ ߕߍ߫ ߡߊ߰ߙߌ ߘߌ߬ߢߍ߬ߡߊ߬ ߞߏ߫ ߘߌ߫، ߏ߬ ߘߐ߫߸ ߛߌ߬ߟߡߊ߬ ߘߋ߲ ߠߊ߫ ߓߊ߯ߙߊ߫ ߕߴߊ߬ ߘߌ߫، ߣߴߊ߬ ߡߊ߫ ߢߊ߬ ߞߏ߫ ߞߏ߫ ߟߊߕߐ߲ߣߍ߲ ߠߋ߬ ߓߊ߯ߙߊ ߦߋ߫ ߞߍ߫ ߟߴߊ߬ ߞߣߐ߫.
ߏ߬ ߞߏߛߐ߲߬߸ ߛߌߟߊߓߐߛߐ߯ߣߊ߫ ߞߊ߬ ߓߍ߯ ߟߊߡߍ߲߫߸ ߞߊ߬ ߥߟߍߡߊߟߐ߫ ߞߍ߫ ߝߏ߯ߟߋ߲߫ ߕߌ߮ ߟߎ߬ ߟߊ߫߸ ߊ߬ ߣߌ߫ ߡߞߊ߬ߙߊ߲߬ߘߋ߲ ߠߎ߬ ߣߌ߫ ߘߋ߲ߓߊߕߌ߮ ߟߎ߬߸ ߞߵߊ߬ߟߎ߬ ߡߙߌߦߊ ߟߐ߲߫ ߣߌ߲߬ ߞߏ ߞߊ߲߬.
ߒ߬ߓߊ߬߸ ߓߌߟߏ߲ ߂߀߂߆ ߞߊ߬ߙߌ߬ߝߐ ߕߟߋ߬ ߁߄߸ ߊ߲ ߠߊ߫ ߛߋ߲߬ߠߊ߬ߓߐ߬ߟߌ ߛߋ߫ ߘߊ߫ ߦߙߐ߫ ߛߌߦߊߡߊ߲߫ ߘߐ߫، ߡߙߌߦߊ߫ ߓߐߣߍ߲߫ ߢߐ߲߰ ߡߊ ߟߎ߬ ߟߐ߲߫ ߘߊ߫، ߏ߬ ߟߋ ߞߏߛߐ߲߬߸ ߒߓߊ߬ߙߎ ߡߍ߲ ߦߋ߫ ߞߎ߲߬ߘߐ߬ߓߍ߲߬ߠߊ߫ ߘߌ߫߸ ߊ߬ ߣߌ߫ ߞߎ߲߬ߘߐ߬ߓߍ߲߬ ߝߏ߯ߟߋ߲ ߘߏ߫ ߜߙߋ߬ߡߊߕߍ߰ߓߊ߮ ߛߍ߲߬ߞߍ߬ߝߙߊ߫ ߞߌ߲߬ߘߊ ߟߊ߫߸ ߊ߬ߟߋ ߞߵߊ߬ ߡߙߌߦߊ ߦߌ߬ߘߊ߫ ߒ ߠߊ߫ ߞߎߡߊߓߘߎ ߟߊ߫، ߊ߬ ߞߊ߲߫ ߞߏ߫: <<ߓߍ߯ ߣߴߊ߬ ߟߊ߫ ߤߊߞߟߌߣߊ߲ ߠߋ߬ ߥߊ߯ߕߌ߫ ߣߌ߲߬ ߠߊ߫߸ ߌ ߘߌ߫ ߘߋ߲ ߘߏ߫ ߦߋ߫ ߛߌߛߍ߲߬ ߓߊ߯ߙߘߊ ߘߏ߫ ߘߌߡߴߊ߲ ߧߋ߫߸ ߓߊ߬ߙߌ߫߸ ߊ߬ ߛߐ߬ߘߐ߲߬ߓߊ߮ ߟߎ߬ ߕߍ߫ ߛߐ߲߬ ߊ߬ ߦߴߏ߬ ߞߍ߫߸ ߘߋ߲ߓߊߕߌ߮ ߘߏ߫ ߟߎ߫ ߝߣߊ߫ ߘߴߊ߬ ߝߐ߫ ߞߏ߫ ߊ߬ߟߎ߬ ߕߴߊ߬ߟߎ߬ ߘߋ߲ ߠߎ߬ ߓߌ߬ߟߊ߬ ߟߊ߫ ߞߎ߲߬ߘߐ߬ߓߍ߲߬ ߓߊ߯ߙߊ ߟߊ߫،ߓߊߏ߬߸ ߞߏ߫ ߞߎ߲߬ߘߐ߬ߓߍ߲߬ ߓߊ߰ߦߊ߫ ߘߌߦߊ ߦߋ߫ ߛߎ߲ߞߎߘߎ߲ߓߦߊ߫ ߦߙߐ ߟߋ߬ ߘߌ߫߸ ߊ߬ ߣߌ߫ ߞߊ߲߫ ߛߌߦߊߡߊ߲߫ ߜߘߍ߫ ߟߎ߫، ߊ߬ ߘߏ߲߬ ߸ ߛߎ߲ߞߎߘߎ߲ߓߊ ߦߋ߫ ߦߙߐ ߓߍ߯ ߘߐ߫߸ ߛߎ߲ߞߎߘߎ߲ߓߊ ߦߋ߫ ߞߌ߲߬ߘߊ ߟߎ߬ ߓߍ߯ ߞߣߐ߫߸ ߣߴߏ߬ ߕߍ߫߸ ߓߊ߯ߙߊ߫ ߣߝߊ߬ߡߊ ߟߋ߬߸ ߓߊߏ߬߸ ߒߠߋ ߕߍ߫ ߒ ߞߎ߲߬ߞߏ߬ ߝߐ߫ ߟߊ߫ ߡߐ߰ ߛߌ߫ ߦߋ߫ ߕߋ߲߬>> ߊ߬ ߞߵߏ߬ ߦߌ߬ߘߊ߬. ߒߓߊ߬ߙߎ ߞߎ߲߬ߘߊ߲߬ߠߊ. © ߛߎ߯ߟߊ߲ߘߌ߫ ߛߊ߬ߞߐ߬ ߣߌ߫ ߊߓߎߓߞߊߙ ߞߊ߬ߟߐ
ߞߵߊ߬ ߓߍ߲߬ ߘߋ߲ߓߊߕߌ߮ ߟߎ߬ ߖߎ߬ߛߎ ߟߊ ߡߊ߬߸ ߞߵߊ߬ߟߎ߬ ߘߋ߲ ߠߊߘߏ߲߬ ߞߎ߲߬ߘߐ߬ߓߍ߲߬ ߦߙߐ ߸ ߒߓߊ߬ߙߎ ߞߵߏ߬ ߛߌߟߊ߫ ߢߌߡߊ߫ ߦߌ߬ߘߊ߬ ߘߋ߲ߓߊߕߌ߮ ߟߎ߬ ߟߊ߫ ߕߊ߲߬ ߠߋ߬ :<<ߒߠߋ ߞߏ߬ߣߌ߲ ߦߋ߫ ߡߍ߲ ߝߐ߫ ߟߊ߫ ߘߋ߲ߓߊߕߌ߮ ߟߎ߬ ߦߋ߫߸ ߌ ߓߊ߯ ߥߊ߫ ߌ ߘߋ߲ ߘߌ߫ ߞߎ߲߬ߘߐ߬ߓߍ߲߬ ߦߙߐ ߡߍ߲ ߸ ߌ ߦߴߏ߬ ߕߌ߱ ߟߊ߫ ߝߙߍߕߍ ߕߊ߬߸ ߞߊ߬ ߕߴߏ߬ ߞߟߌ߫ ߟߊ߫߸ ߞߵߊ߬ ߟߐ߲߫ ߣߴߌ ߘߋ߲ ߦߴߊ߬ ߕߋߟߋ߲߫ ߠߊ߫ ߦߋ߲߬ ߠߋ߬ ߟߊ߫߸ ߤߊߟߌ߬ ߣߴߌ ߡߊ߫ ߕߴߏ߬ ߞߍ߫ ߟߊ߫ ߥߊ߯ߕߌ ߓߍ߯߸ ߓߊ߬ߙߌ߫߸ ߌ ߦߋ߫ ߕߏ߫ ߊ߬ ߓߌ߬ߟߊ߬ ߟߴߊ߬ ߢߊߝߍ߬، ߓߊߏ߬߸ ߏ߬ ߘߌ߫ ߛߋ߫ ߞߍ߫ ߟߊ߫ ߛߊߓߎ߫ ߘߌ߫߸ ߊ߬ ߘߌ߫ ߓߊ߯ߙߊ ߡߌ߬ߣߊ߫ ߛߍ߬ߓߍ ߟߊ߫߸ ߓߊߏ߬߸ ߘߏ߫ ߟߎ߫ ߝߣߊ߫ ߦߋ߫ ߓߐ߫ ߟߴߊ߬ߟߎ߬ ߟߊ߫ ߡߐ߱ ߟߎ߬ ߢߊߞߘߐ߫ ߟߎ ߡߊ߬ ߞߏ߫ ߊ߬ߟߎ߫ ߣߊ߬ߕߐ߫ ߛߊ߬ߟߐ߲ ߠߊ߫߸ ߓߊ߬ߙߌ߫߸ ߊ߬ߟߎ߬ ߕߍ߫ ߥߊ߫ ߟߊ߫ ߛߊ߬ߟߐ߲ ߠߊ߫߸ ߌ ߘߴߊ߬ ߦߋ߫ ߘߊ ߛߐ߰ ߥߊ߯ߕߌ ߓߊ߯ ߛߋ߫߸ ߊ߬ߟߎ߬ ߘߌ߫ ߥߊ߫ ߟߎ ߡߊ߬ ߞߏ߫ ߊ߬ߟߎ߬ ߓߕߐ߫ ߞߎ߲߬ߘߐ߬ߓߍ߲߬ ߦߌߟߊ ߟߋ߬ ߘߐ߫.ߞߵߊ߬ ߛߐ߬ߘߐ߲߬ ߊ߬ߟߎ߬ ߡߊ߫ ߥߊ߫ ߦߋ߲߬߸ ߊ߬ ߣߌ߫ ߛߌߦߊߡߊ߲߫ ߜߘߍ߫ ߟߎ߫߸ ߏ߬ ߓߟߏߡߊ߬߸ ߓߍ߯ ߕߍ߫ ߓߊ߯ߙߊ߫ ߟߊ߫ ߘߌ߫߸ ߤߊߟߌ߬ ߡߍ߲ ߠߎ߬ ߦߋ߫ ߞߊ߬ߙߊ߲ ߠߊ߫߸ ߏ߬ ߓߍ߯ ߕߍ߫ ߞߊ߬ߙߊ߲߬ ߠߊ߫ ߘߌ߫߸ ߡߐ߱ ߓߴߊ߬ ߛߍ߬ߓߍߘߏ߲߬ ߓߊ߯ߙߊ ߡߍ߲ ߡߊ߬߸ ߌ ߦߴߏ߬ ߟߋ߬ ߕߐ߬ߣߐ ߛߐ߬ߘߐ߲߬ ߠߊ߫>>. ߓߊ߯ߙߊ ߣߌ߲߬ ߘߊߡߌ߬ߣߊ ߣߌ߫ ߓߌ߬ ߕߍ߫ ߊ߬ ߓߟߏ߫ ߸ߏ߬ ߓߘߊ߫ ߕߎ߬ߡߊ߬ߖߊ߲߫ ߓߐ߫ ߸ߊ߬ ߖߍ߬ߘߍ ߡߊ߫ ߡߍ߲ ߥߊ߯ߕߌ߫ ߟߊߕߍ߰ߣߍ߬ ߟߐ߲߫ ߸ߊ߬ ߖߍ߬ߘߍ ߞߵߏ߬ ߝߐ߫ ߞߏ߫:<<ߒߠߋ ߟߊ߫ ߓߊ߯ߙߊ߫ ߞߘߐ ߟߋ߬ ߦߋ߫ ߣߌ߲߬ ߘߌ߫߸ ߒ ߖߍ߬ߘߍ ߡߴߊ߬ ߘߊߡߌ߬ߣߊ߬ ߕߎߡߊ ߟߐ߲߫߸ ߣߌ߫ ߒߠߋ ߟߊ߫ ߡߐ߱ ߟߎ߬ ߕߎ߲߬ ߘߌ߬ߢߍ߬ ߘߊ߫ ߒ ߠߊ߫ ߛߊ߬ߟߐ߲߬ ߓߊ߯ߙߊ ߡߊ߬ ߖߏߣߊ߫߸ ߛߊ߫ ߓߌ߬ߡߊ߫ ߒ ߥߊ߫ ߢߍߝߍ߬߸ ߛߊ߫ ߞߊ߲ߞߊ߲ߞߊ߫ ߛߌ߫ ߕߍ߫ ߒ ߞߊ߲߬ ߓߌ߬߸ ߓߊߏ߬߸ ߊ߬ߟߎ߫ ߕߘߍ߬ ߦߴߊ߬ ߝߐ߫ ߟߊ߫ ߟߋ߬ ߞߏ߫ ߓߊ߯ߙߊ߫ ߕߴߊ߬ ߘߌ߫߸ ߓߊ߬ߙߌ߫߸ ߊ߲ ߧߋ߫ ߦߙߐ ߡߍ߲ ߘߐ߫ ߣߌ߲߬ ߸ߒߠߋ ߛߋ߫ ߘߊ߫ ߓߊ߯ߙߊ ߘߊߡߌ߬ߣߊ߬ ߟߊ߫ ߒ ߖߍ߬ߘߍ߫ ߦߋ߫ ߥߊ߯ߕߌ ߡߍ߲ ߞߊ߬ ߥߊߘߌ ߛߐ߬ߘߐ߲߬߸ ߞߐߙߍ ߖߍ߬ߘߍ ߞߵߊ߬ ߟߐ߲߫ ߞߏ߫ ߒ ߧߋ߫ ߓߊ߯ߙߊ߫ ߢߌߡߊ ߟߋ߫ ߟߊ߫>>. ߞߎ߲߬ߘߐ߬ߓߍ߲ ߡߞߊ߬ߙߊ߲߬ߘߋ߲. © ߛߎ߯ߟߊ߲ߘߌ߫ ߛߊ߬ߞߐ߬ ߣߌ߫ ߊߓߎߓߞߊߙ ߞߊ߬ߟߐ
ߖߊ߰ߞߊ ߡߍ߲ ߞߎ߲߬ߘߐ߬ߓߍ߲߬ ߡߊ߬ߞߊ߬ߙߊ߲߬ߘߋ߲ ߘߏ߫ ߘߵߊ߬ ߟߊ߫ ߞߎ߲߬ߘߐ߬ߓߍ߲߬ ߝߏ߯ߟߋ߲ ߞߣߐ߫ ߸ ߏ߬ ߝߣߊ߫ ߞߵߊ߬ ߦߌ߬ߘߊ߬ ߞߏ߫ ߕߐ߬ߣߐ ߦߋ߫ ߓߊ߯ߙߊ ߣߌ߲߬ ߡߊ߬ ،ߓߊߏ߬ ߸ ߊ߬ ߦߴߊ߬ ߕߊ߲߬ߞߊ߫ ߟߊ߫ ߡߐ߰ ߓߘߊ߬ ߞߎߡߊ ߣߌ߫ ߛߌ߬ߒ߬ߖߘߍ߬ߡߊ ߡߊ߬ ߸ ߊ߬ ߖߍ߬ߘߍ ߞߵߊ߬ ߟߊߞߊ߬ߟߌ߬ ߞߏ߫ :<< ߒߠߋ ߛߊ߲߬ ߞߋߟߋ߲߫ ߠߋ߬ ߓߊ߯ߙߊ߫ ߣߌ߲߬ ߘߊߞߎ߲ ߘߐ߫ ߦߊ߲߬ ߕߋ߲߬߸ ߡߐ߰ ߛߌ߫ ߡߊ߫ ߒߠߋ ߓߌ߬ߟߊ߬ ߣߌ߲߬ ߠߊ߫߸ ߊ߬ ߘߌߦߊ߫ ߘߊ߫ ߒ ߖߍ߬ߘߍ ߟߋ߬ ߦߋ߫߸ ߒ ߓߘߊ߫ ߕߐ߬ߣߐ߫ ߛߐ߬ߘߐ߲߬ ߊ߬ ߟߊ߫ ߞߏߛߓߍ߫߸ ߤߊߟߌ߬ ߒ ߡߊ߫ ߥߊߘߌ߫ ߡߌߣߊ ߘߊߡߌ߬ߣߊ߬ ߝߟߐ߫ ߞߵߊ߬ ߓߌ߬ߟߊ߬ ߒ ߞߎ߲߬߸ ߒ ߞߏ߬ߣߌ߲ ߕߍ߫ ߥߊ߫ ߟߊ߫ ߞߎߡߊ߫ ߢߊߝߐ߫ ߘߌߦߊ߫ ߡߐ߰ ߓߘߊ߫߸ ߞߣߍ ߓߊ߯ ߓߐ߫ ߞߊ߬ ߒ ߞߏ߬ ߞߣߊ߬ ߒ ߠߊ߫ ߓߊ߯ߙߊ߫ ߦߙߐ߸ ߒ ߘߏ߲߬ ߦߋ߫ ߣߊ߬ ߟߊ߫ ߓߊ߯ߙߊ߫ ߞߊ߲ ߠߋ߬ ߡߊ߬߸ ߏ߬ ߦߴߊ߬ ߕߐ߬ߣߐ ߟߋ߬ ߘߌ߫߸ ߓߊߏ߬߸ ߦߊ߬ߣߌ߲߫ ߌ ߦߋ߫ ߥߊ߫ ߌ ߛߌ߰ ߡߐ߰ ߟߎ߬ ߓߘߊ ߞߎߡߊ߫ ߢߊߝߐ ߟߊ߫،ߣߴߌ ߦߋ߫ ߓߊ߯ߙߊ ߦߙߐ߸ ߣߴߌ ߦߋ߫ ߌ ߟߊ߫ ߓߊ߯ߙߊ߫ ߘߊߞߎ߲ ߘߐ߫߸ ߏ߬ ߞߊ߫ ߢߌ߲߬߸ ߓߊߏ߬߸ ߊ߬ ߜߊ߬ ߘߊ߫ ߢߊ߫ ߛߌ߫ ߡߊ߬߸ ߌ ߘߌߣߊ߬ ߕߐ߬ߣߐ ߛߐ߬ߘߐ߲߫ ߊ߬ ߟߊ߫߸ ߓߊ߯ߙߊ ߣߌ߲߬ ߘߌߦߊ߫ ߘߊ߫ ߒߠߋ ߦߋ߫ ߒ ߝߘߎ ߞߐ ߟߋ߬ ߘߐ߫߸ ߊ߬ ߘߏ߲߬ ߡߊ߫ ߞߍ߫ ߒ ߗߍ߬ ߝߣߊ߫ ߓߊ߲߬ ߞߎ߲߫ ߘߌ߫߸ ߓߊߏ߬߸ ߊ߬ ߞߊ߬ ߒ ߢߌ߬ߣߌ߲߬ߞߊ߬ ߟߋ߬ ߞߏ߫ ߡߎ߲߬ ߘߌߡߊ߲߫ ߒ ߧߋ߫߸ ߒ ߞߊ߲߫ ߞߏ߫ ߞߎ߲߬ߘߐ߬ߓߍ߲ ߠߋ߬ ߘߌߡߊ߲߫ ߒ ߧߋ߫߸ ߊ߬ ߞߊ߬ ߡߍ߲ ߟߴߊ߬ ߞߊ߲߬߸ ߏ߬ ߟߋ߬ ߞߏ߫ ߊ߬ ߕߊ߬ߣߊ ߟߋ߬ ߡߣߊ߬ߡߣߊ ߘߌ߫ ߸ ߊ߬ ߞߏ߬ߣߌ߲ ߦߋ߫ ߞߟߊߓߎ ߘߏ߲߬ ߠߊ߫ ߒ ߠߊ߫ ߝߋߎ߫߸ ߓߊߏ߬߸ ߤߊߟߌ߬ ߣߌ߫ ߣߊ߬ߟߌ߬ ߟߐ߯ ߕߍ߫ ߒ ߠߊ߫ ߟߏ߲ ߡߍ߲߸ ߊ߬ ߘߌ߫ ߒ ߞߘߊߡߊ߫ ߞߏ߫ ߝߏ߫ ߒ ߧߋ߫ ߥߊ߫>>ߖߊ߰ߞߊ ߟߋ߬ ߞߊ߲߲߫ ߕߋ߲߬.
ߤߊߥߊ߬ ߞߊ߬ߓߊ. © ߛߎ߯ߟߊ߲ߘߌ߫ ߛߊ߬ߞߐ߬ ߣߌ߫ ߊߓߎߓߞߊߙ ߞߊ߬ߟߐ
ߤߊߥߊ߬ ߞߊ߬ߓߊ ߡߍ߲ ߣߊ߬ߣߍ߲߫ ߕߍ߬ߘߍ߫ ߊ߬ ߞߎ߲߬ߘߐ߬ߓߍ߲߬ ߦߌߟߊ ߦߙߐ ߣߌ߲߬ ߘߐ߫ ߸ߏ߬ ߝߣߊ߫ ߞߊ߬ ߞߟߊߓߎߘߎ߲ߠߌ߲߫ ߞߊ߲߫ ߛߌߦߊߡߊ߲߫ ߝߐ ߘߋ߲ߡߛߏߣߍ߲߫ ߞߟߊ߬ߒߕߊ߲ ߠߎ߬ ߦߋ߫ :<<ߒ ߧߋ߫ ߡߍ߲ ߝߐ߫ ߟߊ߫ ߘߋ߲ߡߛߏߣߍ߲ ߕߐ߭ ߟߎ߬ ߦߋ߫߸ ߡߍ߲ ߠߎ߬ ߦߴߊ߬ߟߎ߫ ߛߌ߰ ߟߊ߫ ߞߵߊ߬ߟߎ߬ ߓߟߏ߫ ߝߌ߬ߟߊ ߟߴߊ߬ߟߎ߫ ߛߋ߲߬ ߕߍ߫߸ ߞߵߊ߬ߟߎ߫ ߓߊ߲߬ ߓߊ߯ߙߊߞߏ ߡߊ߬߸ ߌ ߕߍ߫ ߞߊ߬ߙߊ߲߬ ߠߊ߫߸ ߌ ߕߍ߫ ߝߏߦߌ߬ ߟߊ߫߸ ߊ߬ ߘߏ߲߬ ߓߟߏߞߓߊ ߟߋ߬ ߕߋ߲߬߸ ߣߴߌ ߕߍ߫ ߞߏ߫ ߟߊ߫߸ ߣߊ߬ ߞߎ߲߬ߘߐ߬ߓߍ߲߬ ߦߙߐ ߌ ߦߋ߫ ߓߊ߯ߙߊ ߞߍ߫߸ ߤߊߟߌ߬ ߡߍ߲ ߕߍ߫ ߕߍ߫ ߣߌ߲߬ ߘߌ߫߸ ߞߏ߬ߣߌ߲߫ ߌ ߘߌ߫ ߛߋ߫ ߡߍ߲ ߠߊ߫ ߏ߬ ߞߍ߫߸ ߓߌ߬ ߕߍ߫ ߘߋ߬߸ ߛߌߣߌ߲߫، ߓߊߏ߬߸ ߡߏ߬ߛߏ ߦߋ߫ ߘߏ߲߬ߣߌ߲ ߠߋ߬ ߘߌ߫߸ ߌ ߖߍ߬ߘߍ ߦߋ߫ ߛߋ߫ ߌ ߟߊ߫ ߘߏ߲߬ߣߌ߲ ߞߘߐ߫߸ ߦߊ߬ߣߌ߲߫ ߊ߬ ߦߋ߫ ߛߋ߫ ߗߍ߭ ߕߊ߫ ߡߊ߬߸ ߡߐ߱ ߟߎ߬ ߦߋ߫ ߞߎ߲߬ߘߐ߬ߓߍ߲߬ ߓߊ߯ߙߊ߫ ߞߏ ߖߊ߬ߕߋ߬ ߟߊ߫ ߡߍ߲ ߘߌ߫߸ ߊ߬ ߕߴߏ߬ ߢߊ>>.
ߝߊߕߎߡߊߕߊ߬ ߛߊ߲ߞߊߙߋ߫ ߝߣߊ߫ ߞߊ߬ ߝߌߘߊ ߓߐ߫ ߞߎ߲߬ߘߐ߬ߓߍ߲ ߦߙߐ߫ ߘߐߝߌ߲߬ߣߍ߲ ߠߎ߬ ߢߊߡߊ߬߸ ߊ߬ ߝߣߊ߫ ߞߵߊ߬ ߦߌ߬ߘߊ߬ ߞߏ߫ :<<ߞߎ߲߬ߘߊ߲߬ ߓߊ߯ߙߊ ߘߌߡߊ߲߫ ߠߋ߬ ߒߠߋ ߦߋ߫ ߝߛߊߦߌ߫߸ ߓߊ߬ߙߌ߬߸ ߘߋ߲ ߡߍ߲ ߦߋ߫ ߒ ߓߟߏ߫߸ ߏ߬ ߟߋ߬ ߡߊ߬ ߛߴߊ߬ ߓߊ߯ߙߊ ߡߊ߫ ߝߟߐ߫߸ ߣߴߏ߬ ߕߍ߫ ߣߌ߫ ߒ ߞߊ߬ ߡߐ߰ ߛߐ߬ߘߐ߲߬߸ ߒ ߘߴߊ߬ ߓߌ߬ߟߴߊ߬ ߟߊ߫،ߓߊߏ߬ ߸ߡߐ߱ ߟߎ߬ ߦߴߊ߬ ߞߏ ߖߌ߰ ߟߊ߫ ߡߍ߲ ߘߌ߫߸ ߒߠߋ ߕߴߊ߬ ߖߌ߰ ߟߊ߫ ߏ߬ ߢߊ߸ ߞߊ߬ߡߊߛߐ߬ߘߐ߲߬ ߸ ߊ߬ ߘߌߡߊ߲߫ ߠߋ߬ ߒߠߋ ߦߋ߫ ߝߋߎ߫، ߒ ߘߋ߲ ߓߊ߯ ߛߴߊ߬ ߡߊ߬ ߥߊ߯ߕߌ߫ ߛߌ߫߸ ߒ ߘߴߊ߬ ߓߌ߬ߟߵߊ߬ ߟߊ߫>>. ߊ߬ ߞߵߏ߬ ߝߐ߫.
ߞߌ߬ߕߊ߬ߜߍ ߞߐ߲ߘߍ߫. © ߛߎ߯ߟߊ߲ߘߌ߫ ߛߊ߬ߞߐ߬ ߣߌ߫ ߊߓߎߓߞߊߙ ߞߊ߬ߟߐ
ߘߋ߲ߡߛߏߣߍ߲ ߠߊ߫ ߞߊ߬ߙߊ߲ ߘߌߡߊ߲߫ ߒߠߋ ߦߋ߫ ߊ߬ ߟߊ߫ ߛߊ߬ߟߐ߲߬ ߠߊߕߊ߮ ߘߌ߫߸ ߓߊߏ߬߸ ߊ߬ ߘߤߊ߬ߣߍ߲߫ ߕߍ߫،ߞߵߏ߬ ߞߍ߫ ߛߌ ߘߏ߫
ߕߎ߲߱ ߘߌ߫ ߞߎ߲߭ ߠߊ߫ ߞߵߊ߬ ߞߙߴߊ߬ ߡߊ߬߸ ߏ߬ ߘߏ߲߬ ߓߍ߯ ߦߴߊ߬ߟߋ߬ ߞߋߟߋ߲ ߠߋ߬ ߘߌ߫ ߸ ߞߌ߬ߕߊ߬ߜߍ ߞߐ߲ߘߍ߫ ߞߵߏ߬ ߢߊߝߐ߫ ߕߊ߲߬ ߠߋ߬: <ߛߊ߬ߟߐ߲߬ ߓߊ߯ߙߊ ߘߌߡߊ߲߫ ߒߠߋ ߦߋ߫߸ ߊ߬ ߡߊ߲߫ ߘߌ߫ ߒ ߧߋ߫߸ ߓߊ߬ߙߌ߫߸ ߌߞߏߡߌ߲߬ ߓߊ߯ߙߊ߫ ߜߘߍ߫ ߕߍ߫ ߖߡߊ߬ߣߊ ߞߣߐ߫߸ ߝߏ߫ ߞߍߢߊ߫ ߛߎ߮ ߏ߬ ߟߎ߬߸ ߏ߬ ߟߋ߬ ߦߋ߫ ߘߋ߲ߓߊߕߌ߯ ߛߌߦߊߡߊ߲߫ ߓߌ߬ߟߊ߬ ߟߴߊ߬ ߘߐ߫߸ ߣߴߏ߬ ߕߍ߫ ߣߌ߫ ߓߊ߯ߙߊ ߦߋ߫ ߖߡߊ߬ߣߊ ߞߣߐ߫߸ ߌ ߘߌ߫ ߛߋ߫ ߘߋ߲ߡߛߏߣߍ߲ ߓߌ߬ߟߊ߬ ߟߴߏ߬ ߟߊ߫߸ ߣߴߏ߬ ߕߍ߫߸ ߘߋ߲ߡߛߏ ߓߊ߯ߙߊ ߞߊ߫ ߛߌߦߊ߫߸ ߞߙߊߟߌ ߏ߬ ߟߎ߬ ߣߴߊ߬ ߢߐ߲߰ߘߐ ߟߎ߬߸ ߤߊߟߌ߬ ߞߊ߬ߙߊ߲ ߦߋ߫ ߘߏ߫ ߟߋ߬ ߘߌ߫߸ ߣߌ߫ ߘߋ߲ߡߛߏߣߍ߲ ߞߊ߬ ߞߊ߬ߙߊ߲ ߢߊߦߋ߫߸ ߏ߬ ߝߣߊ߫ ߕߐ߬ߣߐ ߞߊ߫ ߓߏ߲߬߸ ߊ߬ ߟߊ߫ ߛߊ߬ߟߐ߲߬ ߠߊ߬ߕߊ߮ ߘߌ߫߸ ߣߴߊ߬ ߤߊߞߟߌ ߛߋ߫ ߘߊ߫ ߞߊ߬ߙߊ߲ ߏ߬ ߢߊߦߋ߫ ߟߊ߫߸ ߞߊ߬ ߓߊ߯ߙߊ ߘߏ߫ ߛߐ߬ߘߐ߲߬ ߏ߬ ߞߣߐ߫߸ ߊ߬ ߘߌ߫ ߛߴߊ߬ ߟߊ߫ ߛߌߣߌ߲ߢߍߛߌ߰ ߟߊ߫߸ ߊ߬ ߘߴߊ߬ ߛߐ߬ߘߐ߲߬ߓߊ߮ ߟߎ߬ ߝߣߊ߫ ߕߊ߬. ߝߊߕߎߡߊߕߊ߬ ߛߊ߲ߜ߭ߊߙߋ߫. © ߛߎ߯ߟߊ߲ߘߌ߫ ߛߊ߬ߞߐ߬ ߣߌ߫ ߊߓߎߓߞߊߙ ߞߊ߬ߟߐ
Aucun commentaire pour le moment.