ߞߐߣߊߞߙߌ߫ ߝߘߏ߬ߓߊ߬ ߞߕߌߓߋߟߋ߲ ߓߘߴߊ߬ ߟߊߛߋ߫ ߛߌ߬ߣߌ߲߬ߟߏ߲ ߣߌ߲߬ ߡߊ߬ ߂߀߂߆ ߞߏ߲ߞߏߘߓߌ ߕߟߋ߬ ߁߇߸ ߞߏ߫ ߊ߬ߟߎ߬ ߓߘߴߊ߬ߟߎ߬ ߕߍ߯ ߞߍ߫ ߦߡߊ߫ ߛߋߜ߭ߊ߬ ߣߌ߫ ߡߊ߭ߦߊ߬ ߞߊ߬ߓߊ ߓߘߊ߫ ߡߌ߬ߣߊ߫ ߞߵߊ߬ߟߎ߬ ߟߊߘߏ߲߬ ߢߟߊߥߛߎ ߟߊ߫ ߜߍߘߐ߫ ߖߓߍߟߌ ߣߌ߫ ߜߍߟߊߜߍ ߞߏߛߐ߲߬، ߞߊ߬ߕߎ߲߯߸ ߞߏ߫ ߊ߬ߟߎ߫ ߣߐ߬ ߟߊ߬ߖߍ߲߬ߛߍ߲߬ߠߌ߲߫ ߠߋ߬ ߞߍ߫ ߟߊ߫ ߘߍ߬ߞߙߏߝߏ ߞߊ߲߬߸ ߡߍ߲ ߦߋ߫ ߣߊ߬ߣߌ߲߬ߠߌ߲ ߘߌ߫߸ ߓߐ߬ߘߍ߬ߓߐ߬ߞߊ߲ ߘߌ߫.

ߓߍ߯ ߟߊߘߍ߬ߣߍ߲ ߦߴߊ߬ ߞߊ߬ߟߊߡߊ߬߸ ߡߐ߰ ߝߌ߬ߟߊ ߢߌ߲߬ ߠߎ߫ ߞߊ߬ ߢߐ߲߯ ߞߘߐߡߊߕߍ߮ ߟߋ߬ ߞߍ߫ ߘߍ߬ߞߙߏߝߏ ߟߎ߫ ߞߊ߲߬߸ ߝߏ߫ ߊ߬ ߟߊߓߊ߲߫ ߢߐ߲߯ ߕߐ߯ ߘߐߕߍ߮ ߡߊ߬، ߣߊ߬ߣߌ߲߬ߠߌ߲߬ ߞߏ߬ߖߎ߰ߦߊ ߣߌ߫ ߞߎߡߊ߫ ߡߊߢߋ߰ߓߎ߬ߣߍ߲߬ ߛߌߦߊߡߊ߲߫ ߦߋ߫ ߓߐ߫ ߟߴߊ߬ߟߎ߬ ߘߊ߫ ߡߍ߲ ߘߐ߫، ߡߍ߲ ߡߊ߫ ߘߌߦߊ߫ ߡߐ߰ ߛߌߦߊߡߊ߲߫ ߦߋ߫߸ ߞߵߏ߬ ߞߎ߲߭ ߞߍ߫ ߊ߬ ߞߎߡߊ ߟߎ߬ ߡߊߛߌߟߊ߲ ߘߌ߫ ߡߐ߰ߦߊ ߞߊ߬ߣߌ߲ ߡߊ߬، ߞߎߡߊ߫ ߞߋߟߋ߲ ߏ߬ ߟߎ߬ ߘߐ߫߸ ߘߟߐ߬ߡߌ߲߬ ߞߏ߬ ߞߎߡߊ߸ ߓߌ߲߬ߘߌ߬ߓߊ߲߬ߘߊ߲߬ ߞߏ߬ ߞߎߡߊ߸ ߥߊߘߌ߫ ߓߟߋߓߟߋ߫ ߞߏ߫ ߞߎߡߊ (ߥߟߎ߬ߡߊ߫ ߛߓߊ߬) ߡߍ߲ ߛߐ߬ߘߐ߲߬ ߢߊ߬ ߖߐ߲ߖߐ߲߫ ߡߊ߫ ߝߐ߫߸ ߞߵߏ߬ ߟߊ߫ ߞߎߡߊ߫ ߡߊߢߋ߰ߓߎ߬ߣߍ߲ ߠߎ߬ ߞߊ߲߬.

ߏ߬ ߟߋ ߞߏߛߐ߲߬ ߏ߬ ߘߐ߫߸ ߡߊ߬ߝߊ߲߬ߞߏ߬ ߞߕߌߓߋߟߋ߲ ߞߵߊ߬ ߝߐ߫ ߖߊ߲߭ ߣߌ߫ ߖߏ߮ ߣߌ߫ ߘߋ߲ߣߍ߲ߧߊ߫ ߟߊߕߊ߲߬ߞߊ ߛߓߍߘߊ (ߏߔߙߏߖ߭ߍߡ) ߡߊ߬߸ ߞߏ߫ ߊ߬ߟߎ߬ ߦߋ߫ ߢߊߢߌߣߌ߲ߠߌ߲߫ ߛߌ߰ ߛߋ߲߬ߠߊ߫ ߞߊ߬߸ ߞߊ߬ ߣߌ߲߬ ߞߏ ߢߊߘߐߜߍ ߓߌ߬ߟߊ߬ ߜߍ ߘߐ߫. ߒ߬ߓߊ߬߸ ߟߊ߬ߛߋ߬ߟߌ߬ ߛߓߍ ߣߌ߲߬ ߓߘߴߊ߬ ߦߌ߬ߘߊ߬ ߞߏ߫ <<ߜߍ߫ ߘߐ߫ ߖߓߍߟߌ ߦߋ߫ ߞߏ߫ ߟߊߕߐ߲ߣߍ߲ ߠߋ߬ ߘߌ߫، ߡߊ߬ߓߊ߰ߓߊ߰ߟߌ ߕߊ߬ߣߍ߲ ߞߵߊ߬ ߟߊ߫ ߡߐ߰ ߢߋ߰ߓߎ߬ ߞߎߡߊ ߟߎ߬ ߝߐߟߌ ߞߊ߲߬߸ ߏ߬ ߦߋ߫ ߡߐ߰ߦߊ ߞߊ߬ߛߌ߬ ߞߏ ߟߋ߬ ߘߌ߫، ߞߵߊ߬ ߟߴߊ߬ ߞߊ߲߬߸ߛߊ߬ߙߌ߬ߦߊ߬ ߛߐ߬ߛߐ߬ ߝߋ߲ߕߌ߯ߦߊ ߕߊ߬ߣߍ߲ ߞߵߊ߬ ߟߊ߫ ߜߍߟߊߜߍ ߞߊ߲߬߸ ߊ߬ ߣߌ߲߫ ߡߌ߲߬ߠߌ߲߬ߝߋ߲߬ ߖߎ߮ ߟߎ߬.>> ߏ߬ ߓߍ߯ ߟߋ߬ ߞߎߡߊ ߦߋ߫ ߛߓߍ ߣߌ߲߬ ߞߣߐ߫߸ ߓߌ߬ߟߊ߬ ߞߍߣߴߊ߬ߟߎ߬ ߞߐ߫ ߡߍ߲ ߠߎ߬ ߞߏߛߐ߲߬.

ߕߍ߮ ߞߍ߫ ߘߴߊ߬ߟߎ߬ ߘߐ߫ ߞߏ߲ߞߏߘߓߌ ߕߟߋ߬ ߁߇ ߣߌ߲߬ ߡߊ߬߸ ߞߊ߬ ߕߟߏߡߊߟߐ߫ ߞߍ߫ ߊ߬ߟߎ߬ ߟߊ߫߸ ߞߊ߬ ߓߊ߲߫ ߞߵߊ߬ߟߎ߫ ߓߌ߬ߟߊ߬ ߢߟߊߥߛߎ ߟߊ߫، ߏ߬ ߟߋ ߘߐ߫߸ ߟߊ߬ߛߋ߬ߟߌ߬ ߛߓߍ ߣߌ߲߬ ߞߵߊ߬ ߝߐ߫ ߞߏ߫ : <<ߊ߬ ߕߌ߰ߟߊ߬ߡߐ߮ ߟߎ߬ ߓߘߊ߫ ߡߊߞߟߌ߫ ߓߌ߬ ߢߐ߲߰ ߟߏ߲߫ [...] ߊ߬ߟߎ߬ ߣߌ߫ ߦߌ߬ߘߊ߫ ߡߊ߬ߝߊ߲߬ߞߏ߬ ߞߕߌߘߊ ߦߌߟߡߊ߫ ߝߟߐ ߟߊ߫ ߞߏ߲ߞߏߘߓߌ ߕߋ߬ߟߋ߫ ߂߀ ߣߊ߬ߕߐ ߡߊ߬߸ ߞߊ߬ ߞߕߌ߫ ߞߏߢߊ ߕߐ߭ ߟߎ߬ ߓߐ߫ ߊ߬ ߛߌߟߊ ߝߍ߬.>>

ߏ߬ ߘߐ߫߸ ߛߌ߰ ߞߍߣߍ߲߫ ߞߊ߬ ߞߐ߬ߓߊ߬ߟߏ߲߫ ߣߊ߬ߕߐ ߟߋ߬ ߡߊߞߐ߬ߣߐ߲߬߸ ߞߏ߲ߞߏߘߓߌ ߕߋ߬ߟߋ߫ ߂߀߸ ߞߵߊ߬ߟߎ߬ ߣߌ߫ ߞߕߌߞߊ߲ߘߊ ߢߊ ߟߊߓߐ߫ ߜߍ߫ ߞߋߟߋ߲߫ ߘߐ߫ ߞߊ߬ ߓߍ߲߬ ߓߟߐߟߐߕߋ߯ߙߋߦߊ ߣߌ߫ ߜߍߟߊߜߍ ߞߏߢߊ ߟߎ߬ ߡߊ߬߸ ߦߏ߫ ߖߡߊ߬ߣߊ ߛߊ߬ߙߌ߬ߦߊ ߞߵߊ߬ ߝߐ߫ ߢߊ ߡߍ߲ ߡߊ߬، ߖߌ߬ߣߍ߬ ߞߕߌߘߊ ߟߊ߫ ߓߊ߯ߙߊ߫ ߓߟߋߓߟߋ ߣߌ߲߬ ߦߴߊ߬ ߦߌ߬ߘߊ߬ ߟߊ߫ ߟߋ߬ ߞߏ߫ ߊ߬ߟߎ߬ ߢߊ ߦߋ߫ ߓߟߐߟߐ߫ ߞߊ߲ߠߊ ߝߍ߬ ߞߏߛߓߍ߫߸ ߞߊ߬ ߡߐ߰ߦߊ ߟߊ߲߬ߓߋ ߟߊߕߊ߲߬ߞߊ߬، ߞߐ߬ߓߊ߬ߟߏ߲߫ ߣߊ߬ߕߐ ߟߋ߬ ߞߍߕߐ߫ ߞߍߕߊ ߕߐ߭ ߟߎ߬ ߟߊ߲ߞߣߍߡߊ߫߸ ߞߵߊ߬ ߟߐ߲߫ ߡߐ߰ ߝߌ߬ߟߊ ߢߌ߲߬ ߠߎ߬ ߟߊ߫ ߞߏ ߓߍߣߊ߬ ߞߍ߫ ߛߊ߬ߙߌ߬ߦߊ߬ ߓߟߏ߫ ߘߌ߬؟