ߡߊ߬ߝߊ߲߬ߞߏ߬ ߖߏ߯ߘߏ߲ ߞߕߌߘߊ ߞߵߊ߬ ߟߊ߫ ߞߕߌߕߍ߮ ߞߍ߫ ߞߐ߬ߓߊ߬ߟߏ߲ ߂߀߂߆ ߞߏ߲ߞߏߘߓߌ ߕߋ߬ߟߋ߫ ߂߀ ߡߊ߬߸ ߞߊ߬ ߓߍ߲߬ ߞߏߢߊ ߘߏ߫ ߡߊ߬߸ ߘߐ߲߬ߞߟߌ߬ߟߊ߬ߟߊ߫ ߦߡߊ߫ ߛߋߜ߭ߊ߬ ߣߌ߫ ߓߊߛߌ߫ ߝߙߋߟߊ߫ ߡߊ߭ߦߊ߬ ߞߊ߬ߓߊ ߕߐ߮ ߦߋ߫ ߡߍ߲ ߘߐ߫، ߡߐ߰ ߝߌ߬ߟߊ ߏ߬ ߟߎ߫ ߟߋ߬ ߖߊ߲߬ߞߌ߲߬ ߘߴߊ߬ߟߎ߬ ߓߟߏ߫߸ ߞߊ߬ ߛߊ߲߭ ߝߌ߬ߟߊ߬ ߥߛߎ߫ ߘߐ߲ߘߐ߫ ߊ߬ߟߎ߫ ߡߊ߬߸ ߊ߬ ߣߌ߫ ߞߵߊ߬ߟߎ߫ ߞߋ߬ߟߋ߲߬ߞߋ߬ߟߋ߲߬ߠߊ ߟߐ߬ ߖߌ߬ߣߍ߬ ߕߊߡߊ߲ ߄߀ ߀߀߀ ߀߀߀ ߛߙߊ߬ ߟߊ߫ ߢߍ߬ߢߌ߲߬ߘߐ߬ߓߍ߲ ߘߌ߫ ߖߓߍߟߌ ߣߌ߫ ߢߐ߲߯ ߟߋ߯ߓߎ ߞߏߛߐ߲߬ ߓߟߐߟߐ ߞߊ߲߬.

ߡߙߌߘߐ ߏ߬ ߟߋ ߞߍ߫ ߘߊ߫ ߕߙߎ߬ ߘߌ߫߸ ߞߕߌ߫ ߓߊ߲ߓߊߟߌ ߡߍ߲ ߘߊߡߌ߬ߣߊ߬ߕߐ߫ ߕߘߍ߬߸ ߞߵߏ߬ ߟߊߛߴߊ߬ ߘߊ߲߭ ߠߊ߫، ߊ߬ߟߎ߬ ߟߊ߫ ߞߎߡߊߢߐ߲߯ߦߊ ߡߍ߲ ߜߊ߬ߣߍ߲߫ ߕߘߍ߬ ߓߍ߯ ߟߊ߫߸ ߞߵߏ߬ ߡߐߣߍ ߓߊ߱ ߡߊߝߊ߰ ߣߍ߲ߞߍ߫، ߞߊ߬ߙߊ߲߬ߡߐ߰ ߔߏߟ ߦߏ߲߬ߓߊ߫ ߞߙߎ߬ߡߊ߬ ߡߍ߲ ߦߴߊ߬ߟߎ߬ ߟߊ߫ ߟߊ߬ߝߛߊ߬ߟߌ߬ߟߊ߫ ߡߊ߬ߞߊ߲߬ߞߊ߲߬ߠߌ߲߬ߠߊ ߘߌ߫߸ ߏ߬ ߞߊ߬ ߞߕߌߘߊ ߟߊ߫ ߡߙߌߦߊ߫ ߕߊ߬ߣߍ߲ ߕߊ߲߬ߘߏ߫ ߟߋ߬ ߝߋߝߋ߫، <<ߡߙߌߘߐ ߞߵߊ߲ ߥߛߊ߬، ߊ߬ ߞߏ ߥߎ߬ߘߊ߲ ߥߙߊ߬ߣߍ߲߫ ߠߋ߬، ߊ߲ ߞߎ߲߬ߠߊ߬ߦߋ߬ߙߋ߲߬ߣߍ߲ ߠߋ߬ ߓߐߣߍ߲߫ ߣߌ߲߬ ߞߏ ߘߐ߫، ߓߊߏ߬߸ ߊ߬ߟߎ߬ ߡߊ߫ ߖߊ߲߬ߞߌ߬ ߢߊ߫ ߡߊ߬߸ ߡߍ߲ ߘߴߊ߬ߟߎ߬ ߟߊ߫ ߖߌ߰ߣߌ߬ߦߟߍ ߘߐߛߵߊ߬ߟߎ߫ ߡߊ߬.>> ߊ߬ ߓߕߐߟߊ ߞߵߏ߬ ߦߌ߬ߘߊ߬ ߞߕߌ ߓߊ߲ ߞߐ ߘߐ߫.

ߖߊ߲߬ߞߌ߬ߟߌ ߏ߬ ߛߍߥߊ ߣߴߊ߬ ߕߊ߫߸ ߟߊ߬ߝߛߊ߬ߟߌ߬ߟߊ ߞߵߊ߬ ߟߊ߫ ߛߍߥߊ߫ ߜߘߍ߫ ߦߌ߬ߘߊ߫ ߞߊ߬ ߓߍ߲߬ ߖߐ ߣߌ߫ ߖߛߎ߬ߛߎߡߊ ߡߊ߬، <<ߒ ߟߊߣߴߊ߬ ߟߊ߫߸ ߣߌ߲߬ ߦߋ߫ ߛߎߘߊ߲ ߣߌ߫ ߞߎ߲߬ߠߊ߬ߦߋߙߋ߲ ߠߋ߬ ߘߌ߫، ߊ߲ ߠߊ߫ ߛߍߥߊ ߦߋ߫ ߦߙߐ߫ ߝߟߐ ߡߍ߲ ߘߐ߫ ߡߎߣߎ߲߬߸ ߏ߬ ߟߋ ߡߐ߰ ߝߌ߬ߟߊ ߢߌ߲߬ ߠߎ߬ ߦߋ ߘߌ߫߸ ߊ߬ߟߎ߬ ߕߍ߮ ߦߋ߫ ߢߐ߲߮ ߕߍ߮ ߘߐ߫.>> ߟߊ߬ߝߛߊ߬ߟߌ߬ߟߊ ߞߵߏ߬ ߦߌ߬ߘߊ߬߸ ߞߵߊ߬ ߝߐ߫ ߞߏ߫ ߓߍ߲߭ ߓߘߊ߫ ߞߍ߫ ߛߘߊߞߊ ߘߌ߫߸ ߊ߬ ߣߴߊ߬ ߓߘߴߊ߬ߟߎ߬ ߛߐ߫ ߤߊ߲ߞߟߌ߫ ߟߊ߫ ߞߊ߬ ߓߍ߲߬ ߊ߬ߟߎ߬ ߟߊ߫ ߞߏߟߊߕߊ߯ߡߊ߫ ߢߊ ߡߊ߬ ߥߊ߯ߕߌ߫ ߣߊ߬ߕߐ ߟߎ߬ ߘߐ߫.

ߒ߬ߓߊ߬߸ ߥߛߎ ߘߐ߲ߘߐ ߡߐ߰ ߝߌ߬ߟߊ ߢߌ߲߬ ߠߎ߫ ߡߊ߬߸ ߏ߬ ߞߊ߫ ߞߊ߲߫ ߞߊ߬ ߝߘߊ߬ߝߌ߲߬ߠߊ߬ ߕߐ߯ߟߡߊ ߟߎ߬ ߣߴߊ߬ ߓߟߐߟߐ߫ ߞߊ߲߫ ߞߎߡߟߊ ߟߎ߬ ߛߐ߫ ߤߊ߲ߞߟߌ߫ ߟߊ߫߸ ߞߊ߬ ߓߍ߲߬ ߓߟߐߟߐ ߟߊߓߊ߯ߙߊ߫ ߢߊ ߡߊ߬߸ ߞߊ߬ ߓߍ߲߭ ߞߍ߫ ߛߘߊߞߊ߫ ߘߌ߫߸ ߞߊ߬ ߖߡߊ߬ߣߊ ߛߐ߫ ߕߐ߯ ߢߌߡߊ߫ ߣߌ߫ ߡߊ߲߬ߞߕߎ߬ ߢߌߡߊ߫ ߟߊ߫.