ߡߊ߬ߝߊ߲߬ߞߏ߬ ߞߕߌߘߊ ߦߌߟߡߊ߫ ߝߟߐ ߣߐ߬ ߖߊ߲߬ߞߌ߬ߟߌ ߟߋ߬ ߞߍ߫ ߟߊ߫ ߓߌ߬ ߞߐ߬ߓߊ߬ߟߏ߲ ߣߌ߲߬ ߡߊ߬ ߂߀߂߆ ߞߏ߲ߞߏߘߓߌ ߕߋ߬ߟߋ߫ ߂߀ ߡߊ߬ ߞߐߣߊߞߙߌ߫، ߘߐ߲߬ߞߟߌ߬ߟߌ߬ߟߊ߫ ߡߊߙߌߦߊߡߊ߬ ߓߊ߸ ߡߍ߲ ߞߊ߲߬ߕߐ߮ ߦߋ߫ ߦߡߊ߫ ߛߋߜ߭ߊ߬ ߘߌ߫߸ ߊ߬ ߣߌ߫ ߓߟߐߟߐߛߙߏߝߋ߫ ߓߊߛߌ߫ ߝߙߋߟߊ߫ ߡߊߙߌߦߊߡߊ߬ ߞߊ߬ߓߊ߸ ߡߍ߲ ߦߋ߫ ߞߟߌ߫ ߟߊ߫ ߞߏ߫ ߡߊ߭ߦߊ߬ ߟߊ߬ ߛߏߟߎ߳ߛߌߦߐ߲߸ ߏ߬ ߟߎ߫ ߟߋ߬ ߖߊ߲߬ߞߌ߬ߣߍ߲߫ ߞߊ߬ ߛߊ߲߭ ߝߌ߬ߟߊ߬ ߥߛߎ߫ ߖߎ߬ߟߎߘߏ߲߬ ߊ߬ߟߎ߬ ߟߊ߫߸ ߞߊ߬ ߓߊ߲߫ ߞߊ߬ ߖߌ߬ߣߍ߬ ߕߊߡߊ߲ ߞߋ߲߬ߥߟߎ߬ ߓߌߣߊ߯ߣߌ߲߫ ߛߊ߬ߙߊ ߟߴߊ߬ߟߎ߫ ߞߋ߬ߟߋ߲߬ߞߋ߬ߟߋ߲߬ߠߊ ߓߍ߯ ߞߎ߲߬ ߢߍ߬ߢߌ߲߬ߘߐ߬ߓߍ߲ ߘߌ߫، ߝߣߊ߫߸ ߊ߬ ߟߊߕߐ߲ߣߍ߲߫ ߠߋ߬ ߊ߬ߟߎ߫ ߡߊ߬߸ ߞߏ߫ ߊ߬ߟߎ߬ ߞߊߣߊ߬ ߘߍ߬ߞߙߏߝߏ ߟߊߓߊ߯ߙߊ߫ ߛߊ߲߭ ߝߌ߬ߟߊ߫ ߞߎ߲߬ߕߊ߯ ߞߣߐ߫߸ ߝߏ߫ ߊ߬ߟߎ߬ ߟߊ߫ ߓߊ߯ߙߊ ߘߊߞߎ߲ ߠߎ߬ ߘߐߙߐ߲߫ ߘߋ߬، ߏ߬ ߞߍߣߍ߲߫ ߊ߬ߟߎ߬ ߟߊ߫ ߢߐ߲߯ ߖߓߍ ߞߐ ߟߋ߬ ߘߐ߫ ߘߍ߬ߞߙߏߝߏ ߞߊ߲߬߸ ߏ߬ ߟߋ ߥߟߏߣߍ߲߫ ߓߌ߲߬ߓߊߥߏ ߢߌ߲߬ ߠߎ߬ ߟߊ߫ ߕߋ߲߬.

ߞߕߌߘߊ ߟߊ߫ ߡߙߌߘߐ߫ ߕߊ߬ߣߍ߲ ߘߐ߫߸ ߡߐ߰ ߝߌ߬ߟߊ ߢߌ߲߬ ߠߎ߬ ߞߕߌ߫ ߘߊ߫߸ ߞߵߊ߬ ߦߋ߫ ߞߏ߫ ߊ߬ߟߎ߫ ߛߐ߲߭ ߦߋ߫ ߞߣߐߘߐ ߘߏ߫ ߟߎ߫ ߟߊߖߍߛߍ߲ ߘߐ߫ ߘߍ߬ߞߙߏߝߏ ߟߎ߫ ߞߊ߲߬߸ ߡߍ߲ ߘߌ߫ ߘߏ߲߬ ߡߐ߰ߦߊ ߞߊ߬ߛߌ ߘߐ߫߸ ߞߊ߬ ߓߊ߬ߛߊ߲ ߠߊߘߏ߲߬ ߖߊ߬ߡߊ ߟߊ߫ ߖߛߎ߬ߛߎߡߊ ߘߐ߫ ߓߟߐߟߐ ߛߌߟߊ ߝߍ߬، ߊ߬ߟߎ߬ ߟߊ߫ ߖߊ߲߬ߞߌ߬ߟߌ ߣߌ߲߬ ߞߎ߲߭ ߘߏ߫ ߟߋ߬ ߝߣߊ߫ ߦߋ߫߸ ߓߐ߬ߘߍ߬ߓߐ߬ ߞߎߡߊ ߝߐߟߌ ߣߌ߫ ߖߓߍߟߌ ߞߍ ߘߍ߬ߞߙߏߝߏ ߞߊ߲߬.

ߞߏ߫ ߜߘߍ߫ ߟߎ߫ ߓߍ߫߸ ߦߏ߫ ߡߊ߬ߓߊ߰ߓߊ߰ߟߌ߬ ߞߏ߸ ߛߊ߬ߙߌ߬ߦߊ߫ ߞߵߊ߬ߟߎ߬ ߡߊߞߕߏ߫ ߏ߬ ߞߏ ߘߐ߫߸ ߞߏ߫ ߞߎߡߊ ߡߍ߲ ߠߎ߬ ߝߐ߫ ߘߊ߫ ߡߊ߬ߝߌ߲߬ߠߌ߲߬ ߓߟߏ ߡߵߊ߬ߟߎ߬ ߓߟߏ߫߸ ߏ߬ ߟߎ߫ ߕߎ߲߬ ߕߍ߫ ߛߥߊ߬ߓߊ߬ ߘߌ߫.

ߊߟߎ߫ ߦߴߊ߬ ߟߐ߲߫߸ ߣߌ߲߬ ߞߏ ߕߊ߬ߡߌ߲߬ ߘߊ߫ ߂߀߂߆ ߞߏ߲ߞߏߘߓߌ ߕߟߋ߬ ߁߄ ߠߋ߬ ߡߊ߬߸ ߡߏ߬ߛߏ߫ ߝߌ߬ߟߊ ߢߌ߲߬ ߠߎ߫ ߞߵߊ߬ߟߎ߬ ߘߊ ߘߏ߲߬ ߢߐ߲߮ ߘߐ߫߸ ߊ߬ߟߎ ߡߍ߲ ߠߎ߬ ߦߋ߫ ߟߊߡߍ߲߫ ߠߊ߫ ߞߵߊ߬ߟߎ߬ ߘߐߜߍ߫ ߖߡߊ߬ ߛߌߦߊߡߊ߲߫ ߓߟߏ߫ ߘߍ߬ߞߙߏߝߏ ߟߎ߫ ߞߊ߲߬ ߣߌ߲߬، ߒ߬ߓߊ߬߸ ߊ߬ߟߎ߬ ߟߊ߫ ߞߎߡߊ߫ ߝߐߣߍ߲ ߡߍ߲ ߏ߬ ߘߌ߫ ߝߍߛߑߓߎߞ ߞߊ߲߬߸ ߏ߬ ߟߋ ߞߍ߫ ߘߊ߫ ߣߊ߬ߣߌ߲߬ߠߌ߲ ߣߌ߫ ߢߐ߲߯ ߡߊߝߌ߲߫ ߞߎߡߊ ߟߎ߬ ߣߌ߫ ߞߎߡߊ߫ ߡߊߢߋ߰ߓߎ߬ߣߍ߲ ߠߎ߬ ߘߌ߫߸ ߥߊߘߌ߫ ߞߏ߫ ߞߎߡߊ߸ ߞߊ߬ߝߏ߬ߢߐ߲߰ߦߊ߬ ߞߏ߬ ߞߎߡߊ߸ ߞߵߏ߬ ߟߊ߫ ߡߐ߰ߦߊ ߢߋ߰ߓߎ߬ ߞߎߡߊ ߟߎ߫ ߞߊ߲߬߸ ߏ߬ ߟߋ ߘߏ߲߬ ߘߴߊ߬ߟߎ߬ ߣߌ߫ ߢߐ߲߯ ߕߍ߫، ߊ߬ߟߎ߬ ߟߊ߫ ߢߐ߲߯ ߞߘߐߡߊߕߍ߯ ߞߎߡߊ ߏ߬ ߟߎ߫ ߟߋ߬ ߞߊ߬ ߦߙߐ ߓߍ߯ ߟߊߡߌ߬ߣߊ߬ ߛߊ߫߸ ߝߏ߫ ߛߊ߬ߙߌ߬ߦߊ߬ ߝߣߊ߫ ߞߵߊ߬ ߢߊ ߡߊߖߌ߰ ߊ߬ ߞߏ ߝߍ߬.

ߏ߬ ߟߋ ߘߐ߫߸ ߕߍ߮ ߞߍ߫ ߘߴߊ߬ߟߎ߬ ߘߐ߫ ߞߏ߲ߞߏߘߓߌ ߕߟߋ߬ ߁߇ ߡߊ߬߸ ߞߵߊ߬ߟߎ߫ ߡߌ߬ߣߊ߬ ߜߍߘߐ߫ ߞߍߟߌ ߞߏߛߐ߲߬߸ ߞߵߊ߬ߟߎ߬ ߞߕߌ߫ ߞߏ߲ߞߏߘߓߌ ߕߋ߬ߟߋ߫ ߂߀ ߣߌ߲߬ ߡߊ߬، ߊ߬ߟߎ߬ ߟߊ߫ ߟߊ߬ߥߟߍ߬ߟߌ߬ ߘߊߞߎ߲ ߘߐ߫߸ ߊ߬ߟߎ߫ ߞߵߊ߬ߟߎ߫ ߟߐ߬ ߊ߬ߟߎ߫ ߛߐ߲߭ ߠߊ߫߸ ߞߵߊ߬ ߦߌ߬ߘߊ߬ ߞߏ߫ ߡߐߣߍ ߟߋ߬ ߞߵߊ߬ߟߎ߫ ߟߐ߬ ߊ߬ ߟߊ߫، ߊ߬ߟߎ߫ ߞߊ߬ ߦߝߊ߬ ߕߙߊ ߞߍ߫߸ ߞߏ߫ ߊ߬ߟߎ߫ ߞߊ߬ ߞߎߡߊ ߏ߬ ߓߍ߯ ߝߐ߫ ߡߐߣߍ ߟߋ߬ ߡߊ߬.

ߊ߬ߟߎ߬ ߟߊ߫ ߦߝߊ߬ ߕߙߊ ߏ߬ ߓߍ߯ ߣߴߊ߬ ߕߊ߫߸ ߞߕߌߞߊ߲ߘߊ ߞߊ߬ ߞߊ߲ ߡߍ߲ ߠߎ߬ ߝߐ߫ ߞߏߟߊߕߐ߲߫ ߓߟߏ ߡߊ߬߸ ߛߊ߬ߙߌ߬ߦߊ߬ ߝߣߊ߫ ߕߎ߲߰ ߘߊ߫ ߏ߬ ߞߐ߫߸ ߝߏ߫ ߞߊ߬ ߦߟߍ߬ ߛߊ߲ߘߐ߫ ߖߍ߬ߘߍ، ߓߊߏ߬߸ ߞߕߌߞߊ߲ߘߊ ߞߵߊ߬ ߝߐ߫ ߟߋ߬ ߞߏ߫ ߞߊ߬ ߛߊ߲߭ ߝߌ߬ߟߊ߬ ߥߛߎ߫ ߟߴߊ߬ߟߎ߫ ߞߎ߲߬ ߘߐ߲ߘߐߟߌ߫ ߓߟߏ ߡߊ߬߸ ߞߊ߬ ߞߋ߲߬ߥߟߎ߬ ߃߀ ߟߴߊ߬ߟߎ߫ ߞߋ߬ߟߋ߲߬ߞߋ߬ߟߋ߲߬ߠߊ ߞߎ߲߬ ߢߍ߬ߢߌ߲߬ߘߐ߬ߓߍ߲ ߘߌ߫، ߛߊ߬ߙߌ߬ߦߊ߬ ߝߣߊ߫ ߞߊ߬ ߛߊ߲߬ ߝߌ߬ߟߊ߬ ߞߏ ߓߐ߫ ߊ߬ ߛߌߟߊ ߝߍ߬߸ ߓߊ߬ߙߌ߬ ߊ߬ ߞߊ߬ ߞߋ߲߬ߥߟߎ߬ ߄߀ ߠߋ߬ ߟߴߊ߬ ߞߋ߬ߟߋ߲߬ߞߋ߬ߟߋ߲߬ߠߊ ߞߎ߲߬.

ߏ߬ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߛߊ߬ߙߌ߬ߦߊ߫ ߞߊ߬ ߖߡߊ߬ߙߌ߬ ߜߘߍ߫ ߟߎ߫ ߕߊ߬: ߊ߬ߟߎ߬ ߞߊߣߊ߬ ߘߍ߬ߞߙߏߝߏ ߟߊߓߊ߯ߙߊ߫ ߛߊ߲߭ ߝߌ߬ߟߊ߬ ߞߣߐ߫߸ ߞߵߏ߬ ߟߊߥߌ߬ߟߌ߫ ߣߌ߲߬ ߢߐ߲߰ ߜߘߍ߫ ߞߍߟߌ ߡߊ߬.

ߊ߬ߟߎ߫ ߣߐ߬ ߕߋ߬ߟߋ߫ ߃ ߟߋ߬ ߞߍ߫ ߟߊ߫ ߢߟߊߥߛߎ ߟߊ߫ ߖߊ߲߭ ߣߌ߫ ߖߏ߮ ߣߌ߫ ߘߋ߲ߣߍ߲ߧߊ߫ ߟߊߕߊ߲߬ߞߊ ߛߓߍߘߊ ߟߊ߫ (ߏߔߙߏߖ߭ߍߡ)، ߕߋ߬ߟߋ߫ ߃ ߏ߬ ߞߐߝߍ߬߸ ߊ߬ߟߎ߫ ߡߐ߰ ߝߌ߬ߟߊ ߓߍ߯ ߛߴߊ߬ߟߎ߬ ߟߊ߫ ߟߎ ߡߊ߬ ߡߎ߬ߕߎ߲߬߸ ߡߊ߭ߦߊ߬ ߣߌ߫ ߦߊߡߊ߬.