߂߀߂߆ ߘߓߊ߬ߕߊ ߕߟߋ߬ ߁߭ ߡߊ߬߸ ߖߌ߬ߣߍ߫ ߣߊ߲߬ߕߌ߮ ߟߎ߫ ߞߊ߬ ߡߎ߬ߙߊ߲߫ ߕߣߐ߬ߡߊ ߘߏ߫ ߟߎ߫ ߟߋ߬ ߟߊߛߐ߬ߘߐ߲߬߸ ߖߌ߬ߣߍ߬ ߛߊ߲ߡߊ߫ ߣߊ߲ߕߌ߮ ߟߎ߬ ߡߊߞߍ߫ ߦߌߟߊ ߘߐ߫ ߞߐߣߊߞߙߌ߫، ߖߊ߲߬ߖߏ߲ ߏ߬ ߡߍ߲ ߞߎ߲߬ߠߊߛߌ߰ ߘߊ߫ ߞߊ߲ߓߍ߲ ߞߊ߲ߕߌ߮ ߓߟߏ߫߸ ߡߊ߬ߡߊ߬ߘߌ߬ ߘߎ߲ߓߎߦߊ߫.

ߘߌߒߡߊߟߌ ߣߌ߲߬ ߞߍߣߍ߲߫ ߂߀߂߁-߂߀߂߆ ߛߏ߬ߙߌ߬ߡߊ߬ߘߋ߲ ߠߎ߬ ߢߍߥߟߊߦߊߟߌ ߛߊ߬ߙߌ߬ߦߊ ߟߋ߬ ߞߣߐ߫، ߢߍߥߟߊߦߊߟߌ ߏ߬ ߞߎ߲߭ ߦߋ߫ ߖߌ߬ߣߍ߫ ߛߏ߬ߙߌ߬ߡߊ߬ߘߋ߲ ߠߎ߬ ߟߊ߫ ߡߎ߬ߙߊ߲ ߠߎ߬ ߟߊߞߊ߬ߞߎ߬ߘߊ߬ߦߊ ߟߋ߬ ߘߌ߫߸ ߞߵߊ߬ߟߎ߬ ߟߊ߫ ߟߊ߬ߞߐ߰ߟߌ ߟߎ߬ ߟߊߢߊ߬߸ ߝߊ߬ߛߏ ߡߊߞߊ߲ߞߊ߲ ߘߐ߫߸ ߊ߬ ߣߌ߫ ߞߵߊ߬ߟߎ߬ ߛߋߞߏߦߊ ߡߊߞߊ߬ߝߏ߬ ߡߊ߬ߞߊ߲߬ߞߊ߲߬ߠߌ߲ ߣߌ߫ ߟߊ߬ߞߊ߲߬ߘߊ߬ߟߌ ߡߊ߬ߘߎ߮.

ߡߎ߬ߙߊ߲ ߡߍ߲ ߠߎ߬ ߘߌߣߍ߲߫ ߣߌ߲߬߸ ߣߊ߲߬ߕߌ߰ ߕߏ߲ߕߊߟߊ߲ ߠߎ߬ ߦߴߊ߬ ߘߐ߫߸ ߜߏ߲ߜߏߘߏ߲߫ ߜߌߟߌ߲ ߠߎ߬߸ ߞߌ߬ߛߍ߬ߟߊ߬ߞߊߘߌ ߟߎ߬߸ ߛߊ߬ߡߘߊ߬ߓߊ ߟߎ߬߸ ߞߎߟߎ߲ߞߎߟߎ߲ ߓߐ߫ ߛߊ߲߫ ߞߎߘߊ ߟߎ߬߸ ߊ߬ ߣߌ߫ ߞߍ߬ߟߍ ߡߊ߬ߛߘߌ ߘߏ߫ ߟߎ߫߸ ߞߵߏ߬ ߟߊ߫ ߜߋ߬ߟߎ߲߬ߠߌ߲ ߣߌ߫ ߛߊ߲ߘߐ߫ ߡߊߞߊ߲ߞߊ߲ߠߌ߲ ߞߊ߲߬، ߝߊ߰ߡߊ ߟߎ߬ ߟߊ߫ ߝߐߟߌ߫ ߘߐ߫߸ ߝߋ߲ ߡߍ߲߬ ߠߎ߫ ߛߐ߬ߘߐ߲߬ߣߍ߲߫ ߖߌ߬ߣߍ߬ ߣߌ߫ ߙߎ߬ߛߌ߬ߟߊ߬ ߞߙߎߝߊ ߟߊ߫ ߓߊ߯ߙߊߢߐ߲߯ߦߊ ߟߋ߬ ߞߣߐ߫߸ ߊ߬ ߞߏ߬ߣߌ߲ ߡߊ߫ ߦߌ߬ߘߊ߬ ߣߌ߫ ߘߌߒߡߊߟߌ ߟߋ߬ ߥߟߊ߫ ߛߊ߲߬ߠߌ߲ ߠߋ߬.

ߖߊ߲߬ߖߏ߲ ߣߌ߲߬ ߞߍ߫ ߘߊ߫ ߞߏߕߌ߯ ߝߟߐ ߊߡߊߘߎ߫ ߎ߯ߙߌ߬ ߓߊ ߢߣߊ߫߸ ߊ߬ ߣߌ߫ ߞߊ߲ߕߌ߯ߘߊ ߝߘߏ߬ߓߊ߬ ߞߟߊ߬ߕߌ߮߸ ߞߟߍ߬ߕߌ߰ ߊߡߙߊ߫ ߞߡߊ߬ߙߊ߬߸ ߡߊ߬ߞߊ߲߬ߞߊ߲߬ߠߌ߲ ߞߏߕߌ߮߸ ߊߓߎߓߞߊߙ ߛߘߌߞߌ߬ ߞߡߊ߬ߙߊ߬߸ ߞߎ߲߬ߠߊ߬ߛߌ߮ ߛߌ߲߬ߝߏ߲ ߠߎ߬߸ ߊ߬ ߣߌ߫ ߣߊ߲߬ߕߌ߮ ߞߎ߲ߕߌ߮ ߛߌߦߊߡߊ߲߫، ߝߣߊ߫߸ ߙߎ߬ߛߌ߫ ߡߊ߬ߞߊ߲߬ߞߊ߲߬ߠߌ߲ ߞߏߕߌ߯ߘߊ ߞߐߦߌߘߊ ߟߎ߫ ߕߘߍ߬ ߞߣߍ ߞߊ߲߬߸ ߡߍ߲ ߠߎ߬ ߟߊߣߊ߬ ߘߊ߫ ߝ߭ߑߟߊߘߡߌߙ ߔߎߕߌߣ ߓߟߏ߫، ߙߎ߬ߛߌ߬ ߟߊ߫ ߟߊ߬ߛߌ߰ߘߋ߲ ߡߍ߲ ߦߋ߫ ߖߌ߬ߣߍ߫ ߦߊ߲߬߸ ߏ߬ ߕߘߍ߬ ߞߣߍ ߞߊ߲߬.

ߖߌ߬ߣߍ߫ ߝߊ߰ߡߊ ߟߎ߫ ߞߵߊ߬ ߦߌ߬ߘߊ߬ ߞߏ߫ ߣߌ߲߬ ߦߋ߫ ߛߋ߲߬ߕߊ߬ ߞߎߘߊ߫ ߟߋ߬ ߘߌ߫ ߣߊ߲߬ߕߌ߮ ߟߎ߬ ߟߊ߫ ߓߊ߯ߙߊ ߟߊߢߊ߭ ߘߐ߫߸ ߊ߬ ߣߴߊ߬ߟߎ߬ ߟߊ߫ ߞߏ ߟߎ߬ ߡߊߝߊ߬ߟߋ߲ ߘߐ߫، ߊ߬ ߟߊߥߟߌ߬ߣߍ߲߫ ߠߋ߬߸ ߞߊ߬ ߡߎ߬ߙߊ߲߬ ߠߎ߬ ߘߌ߫ ߣߊ߲߬ߕߌ߮ ߟߎ߬ ߡߊ߬߸ ߡߍ߲ ߠߎ߬ ߘߴߊ߬ߟߎ߫ ߘߍ߬ߡߍ߲߫ ߟߊ߬ߞߊ߲߬ߘߊ߬ߟߌ ߜߟߍ߬ߦߊ ߟߎ߬ ߟߊߕߊ߲߬ߞߌ߲߬ ߠߊ߫߸ ߞߊ߬ ߖߡߊ߬ߣߊ ߟߊ߫ ߖߘߍ߬ߕߌ߰ߦߊ ߡߊߞߊ߲ߞߊ߲߫߸ ߞߊ߬ ߖߡߊ߬ߣߊ߬ߘߋ߲ ߠߎ߬ ߣߴߊ߬ߟߎ߬ ߓߟߏߝߋ߲ ߠߎ߬ ߟߊߕߊ߲߬ߞߊ߬.

ߖߊ߲߬ߖߏ߲ ߣߌ߲߬ ߘߐ߫߸ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߣߌ߫ ߙߎ߬ߛߌ߬ ߗߋߘߋ߲ ߠߎ߬ ߞߊ߬ ߢߐ߲߯ߦߋ߫ ߜߎ߲߬ߘߎ߬ ߘߐ߫ ߟߋ߬، ߞߏߕߌ߯ ߝߟߐ߫ ߊߡߊߘߎ߫ ߎ߯ߙߌ߬ ߓߊ ߝߣߊ߫ ߣߌ߫ ߙߎ߬ߛߌ߬ ߗߋߘߋ߲ ߠߎ߬ ߞߊ߬ ߘߊߘߐߖߊߥߏ߫ ߞߍ߫ ߡߊ߲߬ߕߏ߲߬ߕߍ߬ ߛߊ߲ߡߊߘߊ߲߫ ߊߤߑߡߍߘ ߛߋߞߎ߫ ߕߎ߬ߙߋ߬ ߜߊ߮ ߞߘߐ߫߸ ߞߊ߲ߕߌ߮ ߟߊ߫ ߖߊ߬ߡߊߙߌ ߞߣߐߡߊ߬.

ߝߊ߰ߡߊ ߟߎ߫ ߞߵߊ߬ ߦߌ߬ߘߊ߬ ߞߏ߫ ߣߊ߲߬ߕߌ߰ ߞߎ߲ߕߌ߮ ߟߎ߬ ߣߌ߫ ߣߊ߲߬ߕߌ߰ߡߎߣߎ߲ ߠߎ߬ ߓߌߣߍ߲߫ ߠߋ߬ ߕߎ߬ߡߊ߬ ߓߍ߯߸ ߖߐ߲߰ߛߊ߫ ߞߊ߬ ߖߡߊ߬ߣߊ ߘߎ߰ߞߟߏ ߡߊߞߊ߲ߞߊ߲ ߓߟߏߡߦߊ߫ ߕߎ߬ߡߊ߬ ߓߍ߯.