ߦߋ߲߬ߜ߭ߊ߬ ߡߍ߲ ߦߋ߫ ߕߊ߬ߡߌ߲߬ ߦߙߐ ߘߌ߫ ߖߌ߬ߣߍ߬ ߣߌ߫ ߛߙߊ߬ߟߏ߲߬ ߓߐߕߏ߲ ߠߊ߫߸ ߣߴߊ߬ ߦߋ߫ ߞߊ߬ߦߌߟߊߤߎ߲߬ ߣߐ߬ߘߎ߮ ߘߐ߫، ߒ߬ߓߊ߬߸ ߏ߬ ߞߊߙߏ߫ ߦߙߌߞߊ ߟߋ߬ ߕߍ߬ߘߍ߫ ߕߋ߲߬߸ ߞߎߡߊ ߦߴߌߘߐ߫ ߖߌ߬ߣߍ߫ ߝߊ߰ߡߊ ߟߎ߬ ߣߌ߫ ߛߙߊ߬ߟߏ߲߫ ߝߊ߰ߡߊ ߟߎ߬ ߣߌ߫ ߟߌߓߋߙߌߦߊ߫ ߝߊ߰ߡߊ ߟߎ߬ ߕߍ߫، ߒ߬ߓߊ߬߸ ߖߡߊ߬ߣߊ ߛߊ߬ߓߊ ߏ߬ ߟߎ߬ ߟߊ߫ ߓߍ߲߬ߘߐ ߟߊ߫߸ ߊ߬ߟߎ߫ ߛߐ߲߬ ߘߴߊ߬ ߡߊ߬ ߞߏ߫ ߞߵߊ߬ ߡߊ߲߬ߞߊ߲ ߡߊߛߍ߬ߟߍ߲߬ߓߍ߬߸ ߞߵߊ߬ߟߎ߬ ߟߊ߫ ߓߐߕߏ߲ ߠߎ߬ ߘߐߛߎߡߊ߫.
ߞߊ߬ߦߌ߯ ߂߀߂߅ ߞߏ߲ߞߏߘߓߌ ߂߈ ߠߋ߬ ߡߊ߬߸ ߓߐߕߏ߲ ߘߌ߲߬ߞߌߙߊ ߣߌ߲߬ ߘߊߕߎ߲߯ ߘߊ߫߸ ߕߊ߬ߡߌ߲߬ ߞߍ߫ ߟߊ߫ ߦߙߐ ߡߍ߲ ߘߐ߫ ߞߊ߬ ߓߐ߫ ߞߐ߬ߍ߲߬ߘߎ߯ ߡߊ߬ ߞߊ߬ ߛߋ߫ ߣߐ߲߬ߜ߭ߐ߬ߥߊ߫ ߡߊ߬߸ ߡߊߞߐߣߊ߫ ߞߐ߭ ߝߍ߬ ߖߐ߫، ߦߋ߲߬ ߘߊߕߎ߲߯ ߛߊ߲߬ ߞߋߟߋ߲߫ ߣߌ߫ ߞߐ ߟߋ߬ ߕߍ߬ߘߍ߫ ߣߌ߲߬، ߒ߬ߓߊ߬߸ ߛߙߊ߬ߟߏ߲߫ ߝߊ߰ߡߊ ߟߎ߬ ߓߘߴߊ߬ ߦߌ߬ߘߊ߬ ߞߏ߫ ߊ߬ߟߎ߬ ߓߘߊ߫ ߖߊ߬ߡߊߙߌ ߘߌ߫ ߂߀߂߆ ߥߊ߬ߛߌ߬ߥߙߊ ߕߋ߬ߟߋ߫ ߂߄ ߢߌ߲߬ ߡߊ߬߸ ߞߊ߬ ߦߙߐ ߏ߬ ߟߊߞߊ߬߸ ߛߊ߫ ߡߐ߱ ߟߎ߬ ߣߴߊ߬ߟߎ߬ ߓߟߏߝߋ߲ ߠߎ߬ ߟߊ߫ ߖߌ߰ߣߌ߬ߦߟߍ ߘߌ߫ ߣߐ߰ߦߊ߬ ߢߊ ߡߍ߲ ߡߊ߬߸ ߏ߬ ߡߍ߲ ߞߏߢߊ ߕߎ߲߬ ߓߘߊ߫ ߝߛߏ߬ߝߛߊ߫ ߞߊ߬ߦߌ߯ ߛߌߟߊ ߕߍ߰ ߘߊ߫.
ߟߊ߬ߛߋ߬ߟߌ ߣߌ߲߬ ߘߐ߫߸ ߛߙߊ߬ߟߏ߲߫ ߞߎ߲߬ߠߊ߬ߛߌ߮ ߞߵߊ߬ ߦߌ߬ߘߊ߬ ߞߏ߫ ߓߐߕߏ߲ ߦߙߐ ߣߌ߲߬ ߘߊߕߎ߲߮ ߕߎ߲߬ ߓߘߊ߫ ߞߍ߫ ߛߊߓߎ߫ ߘߌ߫߸ ߞߊ߬ ߛߏ߰ߟߊ ߟߊߛߋ߫ ߦߋ߲߬ߜ߭ߊ߫ ߛߌ߰ߓߊ߮ ߟߎ߫ ߡߊ߬߸ ߘߏ߫ ߟߎ߫ ߟߊ߫ ߓߐߟߌ ߞߐ߬ߍ߲߬ߘߎ߯ ߞߊ߬ ߥߴߊ߬ߟߎ߬ ߟߊߡߌߣߌ߲߫ ߛߏ ߟߎ߬ ߟߊ߫߸ ߏ߬ ߓߍ߯ ߕߎ߲߬ ߓߘߊ߫ ߞߍ߫ ߓߊ߯ߙߊ ߘߌ߫.
ߊ߬ߟߋ߬ ߝߊ߰ߡߊ ߟߎ߬ ߞߊ߲߫ ߌߞߐ߫߸ ߞߏ߫ ߘߊߦߟߍߟߌ ߓߘߊ߫ ߞߍ߫ ߊ߬ߟߎ ߓߟߋ߫ ߝߛߊߦߌ߫، ߓߊ߬ߙߌ߬߸ ߛߙߊ߬ߟߏ߲߫ ߟߊ߲ߞߎ߲߫ ߞߏ ߞߏߟߊߕߍ߯ߘߊ߫ ߝߊ߬ߛߏ߬ߟߊ߬ߞߊ ߘߌ߫ ߕߏ߫ ߟߊ߲ߞߎ߲ ߡߌ߬ߣߊ߬ ߟߴߊ߬ ߟߊ߫ ߘߎ߰ߞߟߏ ߞߊ߲߬߸ ߦߋ߲߬ߜ߭ߊ߬ ߦߴߏ߬ ߟߋ ߘߐ߫، ߝߣߊ߫߸ ߊ߬ߟߎ߬ ߟߊ߫ ߕߐ߲ߓߟߏߡߊ ߡߍ߲ ߠߎ߬ ߘߐ߱ߘߏ߲߬ߣߍ߲ ߕߊ߯ߡߊߘߋ߲ ߠߎ߬ ߟߊ߫ ߞߏ ߟߊ߫߸ ߏ߬ ߟߎ߬ ߕߏߕߐ߫ ߟߋ߬ ߦߋ߲߬߸ ߞߊ߬ ߡߐ߱ ߟߎ߬ ߟߊ߫ ߘߏ߲߬ߣߌ߬ߞߊ߬ߓߐ ߟߎ߬ ߜߋ߬ߟߎ߲߬، ߊ߬ߟߎ߫ ߞߵߊ߬ ߦߌ߬ߘߊ߬ ߌߞߐ߫߸ ߞߏ߫ ߣߌ߫ ߊ߬ߟߎ߫ ߖߡߊ߬ߣߊ߫ ߝߌ߬ߟߊ ߣߌ߲߬ ߝߏߦߌ߬߸ ߖߌ߬ߣߍ߬ ߥߟߊ߫ ߛߙߊ߬ߟߏ߲߬߸ ߣߌ߫ ߡߍ߲ ߞߍ߫ ߘߴߊ߬ ߝߍ߬ ߞߊ߬ ߘߊߕߎ߲߯ߠߌ߲ ߞߍ߫߸ ߞߊ߬ ߛߌߟߊ ߕߍ߰߸ ߏ߬ ߦߋ߫ ߕߎ߬ߡߊ߬ߙߋ߲߬ ߄߈ ߕߏ߫ ߊ߬ ߟߊ߫߸ ߞߵߊ߬ ߞߎߡߊ ߝߐ߫.
ߞߎߡߊ߫ ߛߌߦߊߡߊ߲߫ ߦߋ߫ ߡߌ߲߫ ߡߎ߬ߕߎ߲߬ ߛߊ߫߸ ߏ߬ ߟߋ ߦߋ߲߬ߜ߭ߊ߫ ߞߏߢߊ ߘߌ߫، ߞߊ߬ߕߎ߲߯߸ ߡߌߞߊߦߍߟ ߞߊߟߏ߲߫ ߡߍ߲ ߦߋ߫ ߞߌ߬ߛߌ߫ ߓߍ߲߬ߘߎ߯ ߞߐߦߌߘߊߓߊ߮ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߦߋ߲߬ߜ߭ߊ ߟߊߞߊ߭ ߕߋ߲߬߸ ߏ߬ ߞߍߣߍ߲߫ ߠߋ߬ ߖߏߣߊ߫߸ ߏ߬ ߓߘߊ߫ ߟߞߊߟߌߦߊ߫، ߓߊߏ߬߸ ߊ߬ߟߋ ߞߊ߲߫ ߞߏ߫ : <<ߖߌ߬ߣߍ߫ ߣߊ߲߬ߕߌ߮ ߟߎ߬ ߦߋ߫ ߦߋ߲߬ߜ߭ߊ߫ ߤߊ߲߯ ߕߋ߲߬߸ ߦߋ߲߬ ߦߴߊ߬ߟߎ߬ ߕߊ߫ ߓߟߏ ߟߋ߬ ߡߊ߬، ߏ߬ ߟߵߊ߬ ߦߌ߬ߘߊ߬ ߟߊ߫ ߞߏ߫ ߦߋ߲߬ ߡߐ߮ ߟߎ߬ ߕߴߊ߬ߟߎ߫ ߖߘߍ߬ ߕߊ߫ ߓߟߏ ߡߊ߬ ߘߋ߬.>> ߊ߬ߟߎ߫ ߞߵߏ߬ ߝߐ߫.
ߊߟߎ߫ ߦߴߊ߬ ߟߐ߲߫߸ ߞߊ߬ߦߌ߯ ߂߀߀߁ ߠߋ߬ ߟߊ߫߸ ߦߙߐ ߣߌ߲߬ ߞߎߡߊ ߦߋ߫ ߖߌ߬ߣߍ߬ ߣߌ߫ ߛߙߊ߬ߟߏ߲߬ ߕߍ߫، ߓߊߏ߬߸ ߖߌ߬ߣߍ߫ ߣߊ߲߬ߕߌ߮ ߘߏ߫ ߟߎ߫ ߟߋ߬ ߕߊ߯ ߘߊ߫ ߦߋ߲߬ ߛߏߞߣߐߞߟߍ ߕߎ߬ߡߊ ߟߊ߫߸ ߞߊ߬ ߥߊ߫ ߡߙߎߕߌߓߊ߮ ߟߎ߬ ߕߎ߲߬ߕߎ߲߬ ߞߊ߲ߡߊ߬، ߓߍ߲߬ߞߊ߲ ߘߏ߫ ߞߟߊ߬ߣߐ߬ߦߊ߬ ߘߴߊ߬ߟߎ߬ ߓߟߏ߫ ߂߀߀߂ ߟߊ߫߸ ߞߵߊ߬ ߦߌ߬ߘߊ߬ ߞߏ߫ ߛߏ ߦߋ߫ ߕߏ߫ ߛߙߊ߬ߟߏ߲߬ ߠߊ߫ ߡߊ߬ߙߊ ߞߣߐ߫، ߓߊ߬ߙߌ߬ ߤߊ߲߯ ߕߋ߲߬߸ ߊ߬ ߞߏߢߊ ߡߊ߫ ߓߊ߲߫ ߟߊߜߍ߫ ߟߊ߫.
ߕߙߊߓߊ ߡߍ߲ ߕߊ߬ߡߌ߲߬ߣߍ߲߫ ߣߌ߲߬߸ ߡߊ߬ߡߊ߬ߘߌ߬ ߘߎ߲ߓߎߦߊ߫ ߓߊ߬߸ ߗ߭ߎ߳ߟߌߛ ߡߊ߯ߘߊ߫ ߓߌߦߏ߫ ߓߊ߬߸ ߊ߬ ߣߌ߫ ߗ߭ߏ߬ߖ߭ߍߝ ߢߎ߬ߡߊ ߓߏߥߊߞߍ߫߸ ߏ߬ ߟߎ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߓߘߊ߫ ߓߍ߲߬ ߞߋߟߋ߲߫ ߘߐ߫ ߕߍߓߊ߯ߦߊ ߞߏߛߐ߲߬، ߖߌ߬ߣߍ߫ ߞߎ߲߬ߠߊ߬ߛߌ߮ ߣߌ߫ ߛߙߊ߬ߟߏ߲߫ ߞߎ߲߬ߠߊ߬ߛߌ߮ ߓߍ߲߬ ߘߴߊ߬ ߡߊ߬߸ ߞߏ߫ ߊ߬ߟߎ߬ ߦߋ߫ ߕߏ߫ ߟߊ߫ ߘߊߘߐߖߊߥߏ ߟߋ߬ ߞߐߝߍ߬ ߛߎߣߎ߲߬߸ ߛߊ߫ ߓߐߘߊ߫ ߖߐ߲ߖߐ߲߫ ߘߌ߫ ߛߐ߬ߘߐ߲߬ ߛߌ߰ߢߐ߲߰ߦߊ ߞߣߐ߫ ߖߡߊ߬ߣߊ߫ ߝߌ߬ߟߊ ߕߍ߫.
Aucun commentaire pour le moment.