ߖߍ߬ߣߍ߫ ߡߊ߬ߙߋ߬ߣߊ߬ ߦߋ߫ ߕߌ߲ߘߌߥߎߟߋ߲߫ ߡߊ߬ߙߊ ߟߋ߬ ߘߐ߫߸ ߞߎߘߍ߫ ߃߀ ߖߊ߬ߕߋ߫ ߟߋ߬ ߦߴߊ߬ ߣߌ߫ ߞߊ߲ߞߊ߲߫ ߕߍ߫߸ ߊ߬ ߛߌ߰ߓߊ߮ ߟߎ߬ ߦߋ߫ ߖߌ߫ ߞߏ߫ ߜߟߍߦߊ ߖߍ߬ߘߍߖߍ߬ߘߍ ߟߋ߬ ߘߐ߫، ߊ߲ ߛߋ߫ ߘߊ߫ ߛߋ߲߬ߠߊ߬ߓߐߟߌ߫ ߞߍ߫ ߟߊ߫ ߞߵߊ߲ ߢߊ ߟߴߊ߬ߟߎ߫ ߞߊ߲߬߸ ߛߙߋ ߟߎ߫ ߞߵߊ߬ ߦߌ߬ߘߊ߫ ߒ߬ ߠߊ߫ ߞߏ߫ ߥߙߏ߬ߝߋ߫ ߝߌ߬ߟߊ߬ ߘߐߙߐ߲߫ ߠߋ߬ ߛߏ ߡߎ߰ߡߍ ߓߟߏ߫߸ ߊ߬ߟߎ߬ ߦߋ߫ ߖߌ ߕߊ߬ ߟߊ߫ ߡߍ߲ ߘߐ߫، ߏ߬ ߘߏ߲߬ ߕߴߛߋ߫ ߟߴߊ߬ߟߎ߬ ߘߓߐ߫ ߟߊ߫ ߢߊ߫ ߛߌ߫ ߡߊ߬߸ ߊ߬ߟߎ߬ ߢߌߣߌ߲ߣߍ߲߫ ߥߙߏ߬ߝߋ߬ ߞߏ ߡߊ߬ ߕߋ߲߬ ߞߏߛߓߍ߫߸ ߛߊ߫ ߖߌ߫ ߞߏ ߘߌ߫ ߛߏ ߘߓߐ߫ ߢߊ ߡߍ߲ ߡߊ߬߸ ߞߵߊ߬ߟߎ߬ ߞߛߌ߫ ߖߌ߫ ߣߐ߯ߣߍ߲߫ ߡߌ߲ ߡߊ߬.

ߖߍ߬ߣߍ߫ ߡߊ߬ߙߋ߬ߣߊ߬ ߘߋ߲ߡߌߛߍ߲߫ ߞߎ߲ߕߌ߮߸ ߞߊߛߌߡ ߘߎ߲ߓߎߦߊ߫ ߞߵߊ߬ ߞߊ߲ߠߊߘߌ߫، <<ߖߌ߫ ߞߏ ߛߍ߱ ߦߴߊ߲ ߞߊ߲߬ ߦߊ߲߬ ߞߏߛߓߍ߫߸ ߞߵߏ߬ ߞߎ߲߭ ߞߍ߫ ߖߊ߬ߡߊ ߟߊ߫ ߛߌߦߊߦߊ ߘߌ߫، ߊ߲ ߧߋ߫ ߖߌ ߢߌߣߌ߲߫ ߠߊ߫ ߞߐ߬ߟߐ߲ ߠߋ߬ ߘߐ߫߸ ߊ߬ ߣߌ߫ ߥߙߏ߬ߝߋ، ߓߌ߬ ߢߐ߲߰ ߟߏ߲߫߸ ߥߙߏ߬ߝߋ߫ ߝߌ߬ߟߊ߬ ߘߐߙߐ߲߫ ߠߋ߬ ߦߊ߲߬߸ ߖߌ ߦߋ߫ ߕߊ߬ ߟߊ߫ ߡߍ߲ ߘߐ߫.>> ߊ߬ ߞߵߏ߬ ߢߊߝߐ߫.

ߖߍ߬ߣߍ߫ ߡߊ߬ߙߋ߬ߣߊ߬ ߞߣߐ߫߸ ߖߌ ߛߐ߬ߘߐ߲߬ ߞߏ ߓߘߊ߫ ߞߍ߫ ߓߊ߲߬ߓߊ߬ ߓߏ߬ ߟߊ߬ߦߟߍ ߘߌ߫ ߦߋ߲߬، ߛߏ߫ ߞߣߐ߫ ߡߐ߮ ߟߎ߬ ߦߋ߫ ߥߎߟߊ߫ ߖߊ߲ ߠߋ߬ ߕߊ߯ߡߊ߫ ߟߊ߫ ߖߌ߫ ߕߊ ߘߐ߫߸ ߊ߬ ߣߴߊ߬ ߢߐ߲߯ ߡߊߞߐߣߐ߲߫ ߓߊ߲ߓߊߟߌ، ߞߊߛߌߡ ߘߎ߲ߓߎߦߊ߫ ߟߊ߫ ߝߐߟߌ߫ ߘߐ߫߸ ߡߐ߱ ߘߏ߫ ߟߎ߫ ߘߌ߫ ߛߋ߫ ߕߎ߬ߡߊ߬ߙߋ߲߫ ߝߌ߬ߟߊ ߞߍ߫ ߟߊ߫߸ ߖߌ߫ ߕߊ ߘߊߞߎ߲ ߡߊ߫ ߛߴߊ߬ߟߎ߫ ߡߊ߬ ߞߵߊ߬ߟߎ߬ ߟߊ߫ ߝߋ߲ ߠߎ߬ ߟߝߊ߫.

<<ߣߌ߫ ߖߊ߬ߡߊ ߘߏ߲߬ ߝߣߊ߫ ߛߌߦߊߦߊ߫ ߘߊ߫ ߥߙߏ߬ߝߋ ߏ߬ ߟߎ߫ ߡߊ߬ ߖߌ߫ ߕߊ߫ ߘߊߞߎ߲ ߘߐ߫߸ ߘߏ߫ ߟߎ߫ ߘߌ߫ ߛߋ߫ ߕߎ߬ߡߊ߬ߙߋ߲߫ ߝߌ߬ߟߊ ߞߍ߫ ߟߊ߫ ߊ߬ߟߎ߬ ߡߊ߫ ߖߌ ߛߐ߬ߘߐ߲߬، ߝߙߋߞߋ ߘߏ߲߬ ߦߋ߫ ߖߌ ߝߍ߬߸ ߊ߲ߠߎ߬ ߦߋ߫ ߦߙߐ ߡߍ߲ ߘߐ߫ ߣߌ߲߬ ߓߌ߬߸ ߊ߲ ߧߋ߫ ߖߌ߫ ߣߐ߯ ߡߌ߲߬ ߠߊ߫߸ ߡߍ߲ ߓߴߊ߬ ߝߐ߫ ߛߌߣߍ߲߬ ߞߏ߫ ߊ߬ߟߋ ߕߴߏ߬ ߡߌ߲߬ ߠߊ߫߸ ߖߌ߫ ߟߐ߮ ߘߌ߫ ߞߏ߫ ߞߴߌ ߟߊ߫.>> ߊ߬ ߞߵߏ߬ ߦߌ߬ߘߊ߬.

ߤߊߞߍߕߏ߫ ߓߐߘߊ߫ ߛߐ߬ߘߐ߲߬ߣߍ߲߬ ߕߍ߫ ߖߌ߫ ߞߏ ߢߌ߲߬ ߠߊ߫߸ ߟߎ߫ ߛߌߦߊߡߊ߲߫ ߛߌ߰ߣߍ߲߫ ߞߐ߬ߟߐ߲߬ ߞߎ߬ߘߎ߲߬ߣߍ߲ ߠߋ߬ ߡߊ߬߸ ߏ߬ ߡߍ߲ ߦߋ߫ ߦߋ߫ ߛߋ߲߬ ߠߊ߫ ߓߟߏ ߟߊ߫، ߏ߬ ߘߏ߲߬ ߘߌߡߊ߲߫ ߕߴߊ߬ߟߎ߬ ߦߋ߫߸ ߞߵߏ߬ ߞߎ߲߭ ߞߍ߫ ߖߌ ߟߊ߫ ߛߊߣߌ߲ߧߓߊߟߌߦߊ ߘߌ߫߸ ߊ߬ ߕߴߛߋ߫ ߟߊ߫ ߕߊ߲߬ߞߊ߬ ߟߊ߫ ߣߐ߮ ߡߊ߬ ߢߊ߫ ߛߌ߫ ߟߋ߬ ߡߊ߬، ߛߏ߫ ߞߣߐ߫ ߡߐ߮ ߟߎ߬ ߖߍ߬ߘߍ ߞߊ߲߫ ߏ߬ ߟߋ ߘߐ߫߸ ߞߏ߫ ߊ߬ߟߎ߬ ߦߋ߫ ߛߊߣߌ߲ߧߊ ߖߐ߬ߘߐ ߟߋ߬ ߕߍߡߊ߬߸ ߝߏ߫ ߊ߬ ߞߐߝߟߌ ߦߋ߫ ߛߋ߫ ߟߊ߫ ߡߐ߱ ߟߎ߫ ߡߊ߬߸ ߓߊߏ߬ ߞߣߐߓߏߙߌ ߦߴߊ߬ ߝߍ߬ ߕߎ߬ߡߊ߬ ߛߌߦߊߡߊ߲߫ ߛߐ߲߬.

<<ߖߌ ߘߌ߫ ߛߋ߫ ߞߣߐߓߏߙߌ ߓߌ߬ߟߊ߬ ߟߊ߫ ߡߐ߱ ߟߎ߬ ߟߊ߫߸ ߓߊߏ߬߸ ߖߌ ߡߍ߲ ߦߋ߫ ߡߌ߲߬ ߠߊ߫߸ ߏ߬ ߕߍ߫ ߡߊߝߟߍ߫ ߟߊ߫، ߞߣߐߓߏߙߌ ߦߋ߫ ߡߐ߱ ߟߎ߬ ߡߌ߬ߘߊ߬ ߟߊ߫߸ ߊ߲ ߡߴߊ߬ ߟߐ߲߫ ߣߌ߫ ߖߌ ߟߋ߬ ߦߴߏ߬ ߛߊߓߎ ߘߌ߫ ߓߊ߬ ߥߟߊ߫ ߝߋ߲߫ ߜߘߍ߫، ߓߊ߬ߙߌ߫߸ ߣߌ߫ ߖߌ ߞߏ߬ߣߌ߲ ߛߋ߲߬ߓߐ߬ ߘߴߊ߬ ߘߐ߫߸ ߊ߲ ߧߴߊ߲ ߛߌ߰ ߓߎ߬ߕߎ߲߫ ߞߵߊ߬ ߡߊߝߟߍ߫߸ ߏ߬ ߘߌ߫ ߘߌߦߴߊ߲ ߧߋ߫.>> ߘߋ߲ߡߌߛߍ߲߫ ߞߎ߲ߕߌ߮ ߣߌ߲߬ ߞߵߏ߬ ߦߌ߬ߘߊ߬.

ߖߍ߬ߣߍ߫ ߡߊ߬ߙߋ߬ߣߊ߬ ߞߣߐ߫߸ ߥߙߏ߬ߝߋ߬ ߝߟߐߝߟߐ ߛߋ߲߬ ߘߊ߫ ߞߊ߬ߦߌ߯ ߞߊ߲ߕߌ߯ ߟߊ߲߰ߛߣߊ߬ ߞߐߕߍ߬ ߕߋ߬ߟߋ ߟߋ߬ ߘߐ߫، ߊ߬ ߝߌߟߊߣߊ߲ ߛߋ߲߬ ߘߊ߫ ߂߀߂߅ ߟߋ߬ ߟߊ߫߸ ߥߊ߬ߣߌ߲߬ߞߋ߬ ߢߌ߬ߡߊ߬ߕߌ߮ ߟߎ߬ ߞߏߛߐ߲߬߸ ߡߌ߬ߛߙߌ ߘߊߝߍ߬، ߞߏ߬ߣߌ߲߬߸ ߛߏ߫ ߞߣߐ߫ ߡߐ߮ ߟߎ߬ ߞߊ߲߫ ߞߏ߫ ߝߌ߬ߟߊ ߏ߬ ߕߴߊ߬ߟߎ߬ ߘߓߐ߫ ߟߊ߫ ߡߎ߰ߡߍ߫߸ ߏ߬ ߘߐ߯ߡߊ߲߫ ߛߏ ߘߐ߫.

ߜߟߍ߬ߦߊ ߏ߬ ߓߍ߯ ߣߴߊ߬ ߕߊ߫߸ ߘߋ߲ߡߌߛߍ߲߫ ߞߎ߲ߕߌ߮ ߣߌ߫ ߛߏ ߡߐ߰ߓߊ ߟߎ߬ ߟߋ߬ ߝߣߊ߫ ߘߐ߱ߘߏ߲߬ߣߍ߲߫ ߥߙߏ߬ߝߋ߫ ߝߌ߬ߟߊ ߏ߬ ߟߎ߬ ߟߊ߫ ߞߏ ߟߊ߫߸ ߛߊ߫ ߏ߬ ߟߎ߬ ߝߣߊ߫ ߞߊߣߊ߬ ߞߢߊ߬ ߓߊ߯ߙߊ߫ ߟߊ߫ ߢߊ ߡߍ߲ ߡߊ߬، ߏ߬ ߟߋ ߞߏߛߐ߲߬߸ ߖߌ ߦߋ߫ ߛߋ߫ ߟߊ߫ ߕߊ߬ ߟߊ߫ ߏ߬ ߟߎ߬ ߟߊ߫ ߓߌ߬. <<ߘߋ߲ߡߌߛߍ߲ ߠߎ߬ ߞߏ߬ߣߌ߲ ߠߊ߫ ߘߐ߬ߖߊ߬ ߣߌ߫ ߡߐ߰ߓߊ ߟߎ߬ ߟߊ߫ ߘߏ߫ ߞߍ ߛߊߓߎ߫ ߟߊ߫߸ ߥߙߏ߬ߝߋ ߏ߬ ߟߎ߬ ߟߊ߫ ߕߌߢߍߟߌ ߕߍ߫ ߞߎ߲߬ߘߐߖߊ߲߰ߧߊ߫ ߟߊ߫.>> ߞߊߛߌߡ ߘߎ߲ߓߎߦߊ߫ ߞߵߏ߬ ߦߌ߬ߘߊ߬.

ߖߌ߫ ߞߏ߫ ߜߟߍߦߊ ߣߌ߲߬ ߡߊ߲߬ߕߙߐ ߦߋ߫ ߝߊ߲߭ ߓߍ߯ ߟߋ߬ ߘߐ߫، ߞߊ߬ߙߊ߲߬ߕߊ ߡߍ߲ ߦߋ߫ ߛߏ ߣߌ߲߬ ߞߣߐ߫߸ ߖߌ߫ ߝߏߦߌ߬ ߕߍ߫ ߞߊ߬ߙߊ߲߬ߘߋ߲ ߏ߬ ߟߎ߬ ߓߟߏ߫ ߦߋ߲߬߸ ߊ߬ ߣߌ߫ ߞߊ߬ߙߊ߲߬ߡߐ߮ ߟߎ߬، ߞߊ߬ߙߊ߲߬ ߥߊ߯ߕߌ ߟߊ߫߸ ߖߌ߫ ߟߐ߮ ߓߊ߯ ߡߍ߲ ߡߌ߬ߣߊ߬߸ ߥߟߊ߫ ߖߌ߫ ߞߏ߫ ߡߊߞߏ ߓߊ߯ ߞߍ߫ ߡߍ߲ ߠߊ߫߸ ߝߏ߫ ߣߴߌ ߥߊ߫ ߘߊ߫ ߝߊ߲߬ ߜߘߍ߫ ߡߎߣߎ߲߬، ߏ߬ ߤߊߡߌ߲ ߦߋ߫ ߡߐ߱ ߟߎ߬ ߟߊ߫ ߦߋ߲߬ ߞߏߛߓߍ߫.

ߞߊ߬ ߓߍ߲߬ ߜߟߍ߬ߦߊ ߢߌ߲߬ ߠߎ߫ ߟߋ߬ ߓߍ߯ ߡߊ߬߸ ߖߍ߬ߣߍ߫ ߡߊ߬ߙߌ߬ߣߊ߫ ߘߎ߰ߘߋ߲ ߠߎ߬ ߦߴߊ߬ߟߎ߬ ߞߊ߲ߠߊߘߌ߫ ߟߊ߫ ߝߊ߰ߡߊ ߟߎ߫ ߡߊ߬߸ ߊ߬ ߣߌ߫ ߡߐ߰ߦߊ ߡߊߘߍ߬ߡߍ߲߬ ߘߍߞߙߎ ߟߎ߫ ߡߊ߬߸ ߞߵߏ߬ ߟߊ߫ ߥߊ߬ߣߌ߲߬ߞߋ߬ ߢߌ߬ߡߊ߬ߕߌ߮ ߟߎ߫ ߞߊ߲߬߸ ߊ߬ߟߎ߬ ߦߴߊ߬ߟߎ߬ ߡߊߘߍ߬ߡߍ߲߫ ߥߙߏ߬ߝߋ߬ ߞߏ ߘߐ߫߸ ߊ߬ߟߎ߬ ߟߊ߫ ߖߌ߫ ߞߏ ߤߊߡߌ߲ ߦߋ߫ ߛߋ߫ ߡߊߓߍ߲߬ ߠߊ߫߸ ߊ߬ ߣߴߊ߬ߟߎ߬ ߦߋ߫ ߖߌ߫ ߛߊߣߌ߲ߡߊ߲ ߛߐ߬ߘߐ߲߬.

<<ߊ߲ ߞߏ߬ߣߌ߲ ߦߴߊ߲ ߞߊ߲ߠߊߘߌ߫ ߟߊ߫ ߝߊ߰ߡߊ ߟߎ߬ ߣߌ߫ ߓߐߒߖߘߍߘߐ߫ ߡߐ߮ ߟߎ߫ ߡߊ߬߸ ߊ߬ߟߎ߬ ߦߴߊ߲ ߘߍ߬ߡߍ߲߬ ߖߌ߫ ߞߏ ߛߌߟߊ ߝߍ߬߸ ߖߐ߲߰ߛߴߊ߲ ߘߌ߫ ߛߋ߫ ߖߌ߫ ߛߊߣߌ߲ߡߊ߲ ߡߊߛߐ߬ߘߐ߲߬.>> ߞߊߛߌߡ ߘߎ߲ߓߎߦߊ߫ ߞߵߏ߬ ߡߞߊ߬ߛߌ߬ߟߌ ߞߍ߫.

ߘߎ߱ ߣߌ߲߬ ߞߣߐ߫ ߞߊ߲ߞߊ߲߫ ߘߊߝߍ߬߸ ߖߌ߫ ߞߏ ߟߎ߬ ߤߊߡߌ߲ ߦߴߊ߬ߟߎ߬ ߟߊ߫ ߦߋ߲߬ ߕߋ߲߬ ߓߘߍߓߘߍߞߍ߬، ߊ߬ߟߎ߬ ߤߊߡߌ߲ ߕߍ߫ ߘߏ߫ ߜߘߍ߫ ߘߌ߫߸ ߊ߬ߟߎ߬ ߦߋ߫ ߛߋ߫ ߥߙߏ߬ߝߋ߬ ߓߘߍߓߘߍ ߟߎ߫ ߛߐ߬ߘߐ߲߬ ߠߊ߫، ߞߊ߬ߕߎ߲߯߸ ߏ߬ ߟߋ ߘߴߊ߬ߟߎ߬ ߞߛߌ߫ ߖߌ߫ ߣߐ߯ߣߍ߲߫ ߡߌ߲ ߡߊ߬.