ߡߊ߬ߛߎߓߊ ߟߋ߬ ߕߍ߰ߣߍ߲߫ ߖߟߊߞߘߐ߫ ߡߙߊ߬ߘߊ߬ߙߋ߲ ߞߣߐ߫ ߡߊ߲߬ߖߊ߲߬ߠߊ߫ ߡߙߊ߬ߘߊ߬ߓߊ ߘߐ߫ ߓߌߟߏ߲ ߣߌ߲߬ ߡߊ߬ ߂߀߂߆ ߥߊ߬ߛߌ߬ߥߙߊ ߕߋ߬ߟߋ߫ ߂߅، ߘߋ߲ߡߛߏߣߍ߲ ߛߊ߲߬ ߁߆ ߘߏ߫ ߟߋ߬ ߣߐ߬ ߊ߬ ߖߍ߬ߘߐ߫ ߓߣߐ߬ ߟߴߊ߬ ߣߌ ߘߐ߫߸ ߞߵߊ߬ ߖߍ߬ߘߍ߫ ߛߐ߰ ߡߎ߬ߙߎ ߟߊ߫، ߞߏ߫ ߓߊߏ߬߸ ߊ߬ ߕߴߊ߬ ߝߍ߬ ߞߊ߬ ߛߌ߰ ߗߍ߬ ߞߎ߲߬߸ ߊ߬ ߝߊ߬ ߣߐ߬ ߡߍ߲ ߛߎߥߊ߲ߘߌ߫ ߟߊ߫ ߞߵߊ߬ ߞߘߊߡߴߊ߬ ߟߊ߫، ߊ߲ ߠߊ߫ ߟߌ߬ߤߟߊ߬ ߟߊߘߍ߬ߣߍ߲ ߠߎ߬ ߘߐ߫߸ ߞߢߐߡߊߟߐ ߖߍ߬ߘߍ ߕߎ߲߬ ߕߎ߲߬ ߞߊ߫ ߞߊ߲߫ ߞߊ߬ ߞߍ߫ ߞߊ߲ߞߊ߲߫ ߠߋ߬ ߞߍ߲ߘߍߟߏ߲߫ ߣߊ߬ߕߐ ߣߌ߲߬ ߡߊ߬.

ߊ߲ ߠߊ߫ ߛߍߝߍ߲ߘߊ ߞߊ߬ ߟߌ߬ߤߟߊ ߡߍ߲ ߛߐ߬ߘߐ߲߬ ߞߊ߬ ߝߘߊ߫ ߛߋ߲߬ߞߐ߫ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫߸ ߊ߲ ߞߵߊ߬ߟߋ ߡߍ߲ ߥߟߋ߫ ߜߋߟߋ߲ߜߋߟߋ߲ ߠߊ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߛߊ߬ߓߊ߰ߕߐ ߣߌ߲߬ ߕߎ߲߬ ߕߴߊ߬ ߝߍ߬ ߞߊ߬ ߛߌ߰ ߗߍ߬ ߞߎ߲߬߸ ߊ߬ ߝߊ߬ ߣߐ߬ ߊ߬ ߞߘߊߡߊ߫ ߟߊ߫ ߗߍ߭ ߡߍ߲ ߠߊ߫، ߊ߬ ߝߐߣߍ߲߫ ߞߏ߫ ߊ߬ ߦߋ߫ ߛߌ߰ ߗߍ߭ ߡߍ߲߬ ߞߎ߲߬ ߏ߬ ߘߌ߫߸ ߊ߬ ߞߍߕߐ߫ ߕߍ߬ߘߍ߫ ߏ߬ ߡߛߏ߬ ߛߓߊߣߊ߲ ߠߋ߬ ߘߌ߫߸ ߊ߬ ߘߏ߲߬ ߕߎ߲߬ ߕߴߏ߬ ߝߍ߬ ߝߣߊ߫.

ߛߋ߲߬ߞߐ߫ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߵߊ߬ ߦߌ߬ߘߊ߫ ߒ߬ ߠߊ߫߸ ߞߏ߫: <<ߘߋ߲ߡߛߏߣߍ߲ ߘߏ߫ ߟߋ߬ ߣߐ߬ ߊ߬ ߖߍ߬ߘߍ߫ ߛߐ߰ ߟߊ߫ ߡߎ߬ߙߎ ߟߊ߫، ߊ߬ ߝߊ߬ ߟߊ߫ ߝߐߟߌ߫ ߘߐ߫߸ ߞߏ߫ ߊ߬ ߞߵߊ߬ ߘߋ߲ߡߛߏ߫ ߘߌ߫ ߗߍ߬ ߟߋ߬ ߡߊ߬߸ ߗߍ߭ ߏ߬ ߛߌ߰ߣߍ߲߫ ߞߊ߲ߞߊ߲߫ ߠߋ߬، ߌߞߏߡߌ߲߬߸ ߊ߬ ߘߋ߲ߡߛߏ߫ ߘߍ߬ߢߐ߲߰ߡߛߏ߫ ߡߍ߲ ߝߘߎߣߍ߲߫ ߞߊ߲ߞߊ߲߫߸ ߏ߬ ߕߍ߫ ߡߌ߬ߣߊ߬ ߞߏ߬ ߢߌߡߊ߫ ߘߐ߫ ߊ߬ ߟߊ߫ ߝߘߎ ߞߣߐ߫߸ ߗߍ߭ ߡߍ߲ ߘߏ߲߬ ߝߣߊ߫ ߠߊ߫ ߞߎߡߊ ߝߐߣߍ߲߫ ߞߏ߫ ߊ߬ ߦߋ߫ ߛߌ߰ ߏ߬ ߞߎ߲߬߸ ߏ߬ ߦߋ߫ ߞߊ߲ߞߊ߲߫ ߠߋ߬، ߘߋ߲ߡߛߏ ߝߣߊ߫ ߡߴߊ߬ ߞߎ߲߬ ߠߊ߬ߕߋߟߋ߲߫ ߝߘߎ߫ ߞߏ ߣߌ߲߬ ߞߣߐ߫ ߡߎ߬ߕߎ߲߬߸ ߞߏ߫ ߊ߬ ߞߊߣߊ߬ ߞߍ߫ ߊ߬ ߘߍ߬ߢߐ߲߰ߡߛߏ߫ ߕߊ ߛߎ߮ ߘߌ߫. ߝߣߊ߫߸ ߞߏ߫ ߊ߬ ߞߍߕߐ߫ ߡߛߏ߬ ߛߓߊߣߊ߲ ߠߋ߬ ߘߌ߫߸ ߊ߬ ߝߣߊ߫ ߞߵߊ߬ ߓߊ߲߬ ߝߊߦߌ߲߫߸ ߞߏ߫ ߊ߬ ߕߍ߫ ߗߍ߭ ߏ߬ ߝߍ߬.>> ߛߋ߲߬ߞߐ߫ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߋ߬ ߞߊ߲߫ ߕߋ߲߬.

ߊ߬ߟߋ߬ ߓߐߛߎ߲߫ ߞߋߟߋ߲ ߠߊ߫ ߝߐߟߌ߫ ߘߐ߫߸ ߡߐ߱ ߟߎ߫ ߞߊ߬ ߝߊ߭ ߟߊߟߌ߫ ߟߋ߬ ߞߏߛߓߍ߫߸ ߛߴߊ߬ ߘߌ߫ ߝߘߎ߫ ߞߏ ߣߌ߲߬ ߕߏ߫ ߦߋ߲߬߸ ߊ߬ ߡߊ߫ ߛߐ߲߬ ߓߐ߫ ߟߴߊ߬ ߞߊ߲ ߞߊ߲߬، ߞߢߐߡߊߟߐ ߖߍ߬ߘߍ ߕߎ߲߬ ߓߘߊ߫ ߟߐ߯ߟߊ߫߸ ߞߵߊ߬ ߕߏ߫ ߞߍ߲ߘߍߟߏ߲߫ ߣߊ߬ߕߐ ߟߊ߫.

<<ߞߢߊ߬ ߓߘߊ߫ ߞߍ߫ ߝߊ߭ ߡߊ߬ ߞߏ߫ ߞߊ߬ ߞߏߢߊ ߣߌ߲߬ ߓߟߏߡߊ߬߸ ߞߏ߬ߣߵߊ߬ ߡߊ߫ ߛߐ߲߬، ߘߋ߲ߡߛߏ ߝߣߊ߫ ߡߙߎߕߌߣߍ߲߫ ߏ߬ ߟߋ ߘߐ߫߸ ߞߵߊ߬ ߖߍ߬ߘߍ߫ ߛߐ߰ ߡߎ߬ߙߎ ߟߊ߫ ߓߌ߬߸ ߞߏ߫ ߊ߬ ߕߴߊ߬ ߝߍ߬ ߞߊ߬ ߛߌ߰ ߗߍ߭ ߏ߬ ߞߎ߲߬.>> ߊ߬ߟߋ߬ ߡߐ߰ ߞߋߟߋ߲ ߠߋ߬ ߞߊ߲߫ ߣߌ߲߬ ߓߍ߯ ߘߌ߫.

ߡߊ߬ߛߎߓߊ ߏ߬ ߟߋ ߞߐߝߍ߬߸ ߊ߬ߟߎ߫ ߞߊ߬ ߘߋ߲ߡߛߏ ߕߊ߬ ߞߊ߬ ߥߴߊ߬ ߘߌ߫ ߞߊߟߌߦߊ߫ ߓߟߏ ߡߊ߬ ߘߊ߲ߘߊߛߏ ߟߊ߫߸ ߛߊ߫ ߞߊ߬ ߡߞߊ߬ߘߊ߲߬ߠߌ߲߫ ߞߎ߲߬ߝߟߐ ߟߎ߬ ߞߍ߫، ߓߊ߬ߙߌ߬߸ ߘߊ߲ߘߊߛߏ߫ ߟߊ߫ ߡߐ߮ ߟߎ߬ ߟߊ߫ ߘߐ߬ߖߊ ߓߍ߯ ߣߴߊ߬ ߕߊ߫߸ ߊ߬ ߡߊ߫ ߛߋ߫ ߓߐ߫ ߟߴߊ߬ ߘߐ߫.

<<ߊ߬ ߕߊ߬ ߘߊ߫ ߖߏߣߦߊ߫ ߓߟߏ ߡߊ߬ ߞߊ߬ ߥߴߊ߬ ߘߌ߫ ߘߊ߲ߘߊߛߏ ߟߊ߫، ߏ߬ ߞߍ߫ ߘߊ߫ ߁߄ ߕߎߡߊ ߟߋ߬ ߟߊ߫߸ ߦߊ߬ߣߌ߫ ߁߆ߕߎߡߊ ߟߊ߫ ߏ߬ ߘߐ߫߸ ߊ߬ ߞߊ߬ ߛߊ߬ߦߊ ߡߊߛߐ߬ߘߐ߲߬ ߊ߬ ߟߊ߫ ߡߊ߬ߘߌ߬ߡߌ߲߬ߠߌ߲ ߞߏߛߐ߲߬، ߊ߬ ߕߎ߲߬ ߓߘߊ߫ ߝߐ߫ ߞߏ߫ ߞߍ߲ߘߍߟߏ߲߫ ߣߊ߬ߕߐ߸ ߊ߬ ߕߎ߲߬ ߘߌ߫ ߕߊ߬ ߞߊ߬ ߥߴߊ߬ ߡߊߟߐ߬ ߊ߬ ߗߍ߬ ߟߊ߫߸ ߊ߬ ߝߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߕߍ߫ ߓߐ߫ ߟߴߊ߬ ߡߙߌߦߊ ߞߊ߲߬.>> ߛߋ߲߬ߞߐ߫ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߵߏ߬ ߝߙߊ߬ ߞߎߡߊ ߞߊ߲߬.

ߊ߲ ߠߊ߫ ߛߍߝߍ߲ߘߊ ߞߵߊ߬ ߡߊߝߟߍ߫߸ ߛߴߊ߲ ߘߌ߫ ߛߏ ߝߊ߰ߡߊ ߘߏ߫ ߟߊߞߎߡߊ߫ ߞߵߊ߬ ߝߣߊ߫ ߡߙߌߦߊ ߟߐ߲߫ ߣߌ߲߬ ߞߏ ߞߊ߲߬߸ ߏ߬ ߡߊ߫ ߛߋ߫ ߓߍ߲߬ ߠߊ߫ ߢߊ߫ ߛߌ߫ ߡߊ߬.

ߣߌ߲߬ ߞߍߣߍ߲߫ ߛߏ߰ߟߊ߬ ߞߏ߬ߓߊ߫ ߟߋ߬ ߘߌ߫ ߖߟߊߞߘߐ߫ ߛߏ ߞߣߐ߫ ߓߌ߬߸ ߡߍ߲ ߓߘߊ߫ ߝߘߎ ߞߍߢߊ߫ ߛߎ߮ ߣߌ߲߬ ߞߎߡߊ ߛߌߦߊߦߊ߫ ߞߏߛߓߍ߫، ߊ߲ ߞߎߡߊߢߐ߲߮ ߞߏ߬ߣߌ߲ ߞߵߊ߬ ߦߌ߬ߘߊ߬߸ ߞߏ߫ ߣߌ߲߬ ߢߐ߲߰ ߝߣߊ߫ ߞߍ߫ ߘߊ߫ ߖߟߊߞߘߐ߫ ߛߏ ߞߣߐ߫ ߦߋ߲߬ ߂߀߁߇ ߟߊ߫߸ ߊ߬ ߓߍ߯ ߞߍߣߍ߲߫ ߢߊ߫ ߞߋߟߋ߲߫ ߠߋ߬ ߡߊ߬.