ߖߌߥߎ߫ ߞߏߖߊ ߡߍ߲ ߝߌߙߌ߲ߝߌߙߌ߲߫ ߠߊ߫ ߞߊߙߏ߫ ߘߊ߲ߘߐ ߢߌ߲߬ ߞߘߐ߫ ߖߌ߬ߣߍ߬ ߛߏ߫ ߞߎ߲ߓߊ ߣߴߊ߬ ߛߏ߫ ߡߌߛߍ߲ ߠߎ߬ ߟߊ߫ ߸ߏ߬ ߕߏߟߏ߲ߠߡߊ ߟߋ߫ ߕߎ߲߬ ߦߋ߫ ߘߊߓߏߟߊ߫ ߣߴߊ߬ ߟߊߡߌߣߌ߲ ߓߟߏ߫ ،ߞߴߏ߬ ߛߊߓߎ ߞߍ߫ ߸ߖߌߥߎ ߕߎ߲߬ ߦߋ߫ ߛߐ߬ߘߐ߲߬ ߠߊ߫ ߣߎ߲߬ ߖߌߥߎߘߊ ߟߎ߬ ߣߌ߫ ߟߐ߯ߝߌ߲ ߠߎ߬ ߘߐ߫ ߣߌ߫ ߜߟߍ߬ߦߊ߬ ߣߌ߫ ߛߍ߰ ߕߍ߫. ߓߊ߬ߙߌ߬ ߸ߓߌ߬ ߞߐ߬ߟߏ߲ ߢߌ߲߬ ߡߊ߬ ߂߀߂߆ ߥߊ߬ߛߌߥߊ߬ߙߊ ߕߋ߬ߟߋ߫ ߉ ߡߊ߬ ߸ߡߐ߱ ߟߎ߬ ߡߊߢߊ߲ߠߡߊ ߟߋ߬ ߟߐ߬ߣߍ߲߫ ߕߘߍ߬ ߢߐ߲߮ ߞߐߝߍ߬ ߡߊ߬ߡߊ߬ߘߌ߬ ߞߣߊߟ ߟߊ߫ ߖߌߥߎߘߊ ߟߊ߫ ߟߐ߬ߖߟߎ߬ߡߊ߬ ߓߟߏߡߊ߬ ߝߙߍߕߍߕߍ߫. ߊ߬ ߞߏ ߘߊߞߎ߲ ߘߐ߫ ߸ߡߊ߬ߡߊ߬ߘߌ߬ ߞߋߕߊ߬ ߞߵߊ߬ ߦߌ߬ߘߊ߬ ߞߏ߫ <<ߕߙߐߣߍ߲߫ ߠߋ߬ ߕߋ߲߬ ߝߛߊߦߌ߫ ߸ߌߞߏߡߌ߲߬ ߘߋ߲ ߓߊ߯ ߞߊ߬ߛߌ߬ ߊ߬ ߦߴߊ߬ ߣߊ߫ ߟߋ߬ ߥߟߋ߫ ߟߴߊ߬ ߕߊ߬ߞߏ ߘߐ߫ ߸ߊ߲ ߝߣߊ߫ ߦߴߊ߲ ߞߊ߲ߠߊߘߌ߫ ߟߊ߫ ߖߡߊ߬ߣߊ ߝߊ߰ߡߊ ߟߎ߬ ߡߊ߬ ߸ߞߵߊ߬ ߘߌߡߌ߬ߣߊ߬ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߡߊ߬ ߞߊ߬ ߛߋ߫ ߞߏߕߌ߯ ߝߟߐ ߣߴߊ߬ ߣߐ߬ߟߊ ߟߊ߫ ߸ ߊ߬ߟߎ߬ ߦߋ߫ ߘߍ߬ߡߍ߲߬ ߊ߲ ߞߊ߲߬ ߊ߲ ߧߋ߫ ߖߌߥߎ ߛߐ߬ߘߐ߲߬ ߸ߞߊ߬ߡߊߛߐ߬ߘߐ߲߬ ߝߋ߲ ߠߎ߫ ߛߐ߲߬ߞߐ ߘߍ߲ߣߍ߲߫ ߖߋ߬ߣߌ߲߬ߕߊ ߟߎ߫ ߟߋ߬ ߟߊ߫ ߸ߣߌ߫ ߖߋ߬ߣߌ߲߬ߕߊ ߦߟߍ߬ ߘߊ߫ ߘߏ߫ ߘߌ߫ ߟߊ߫ ߝߋ߲ ߓߍ߯ ߛߐ߲߬ߞߐ ߞߊ߲߬ ،ߏ߬ ߘߐ߫ ߸ߊ߬ߟߎ߬ ߦߴߊ߲ ߘߍ߬ߡߍ߲߫ ߢߌ߲߬ ߞߏߢߊ ߘߐ߫ ߣߴߏ߬ ߕߍ߫ ߊ߲ ߡߴߊ߬ ߞߍߢߊ߫ ߟߐ߲߫>> ߡߊ߬ߡߊ߬ߘߌ߬ ߞߋߕߊ߬ ߞߴߏ߬ ߝߐ߫.

ߘߊߓߏߟߞߊ ߟߎ߫ ߞߏ߬ߣߌ߲ ߦߋ߫ ߖߌߥߎ߫ ߞߏߖߊ ߦߌߟߊ߲ߦߌߟߊ߲ ߣߴߊ߬ ߛߐ߬ߘߐ߲߬ߓߊ߬ߟߌ߬ߦߊ ߖߍ߬ߘߍߖߍ߬ߘߍ ߟߋ߬ ߕߍߡߊ߬ ߕߋ߲߬ ߸ߦߏ߫ ߖߌ߬ߣߍ߫ ߝߊ߲߬ ߛߌߦߊߡߊ߲߫ ߦߴߊ߬ߟߋ ߜߟߍ߬ߦߊ ߕߍߡߊ߬ ߢߊ ߡߍ߲ ߸ߝߏߘߋ߫-ߣߍ߬ߣߍ߬ ߞߐ߲ߘߍ߫ ߞߊ߬ ߓߐ߫ ߝߌ߬ߣߊ߬ߟߊ ߘߐ߫ ߸ߏ߬ ߞߏ߬ߣߌ߲ ߝߣߊ߫ ߞߵߊ߬ ߦߌ߬ߘߊ߬ ߞߏ߫ <<ߓߌ߬ ߡߴߊ߲ ߟߐ߬ߣߍ߲ ߓߌ߬ߟߊ߬ ߖߌߥߎߘߊ ߟߊ߫ ߦߊ߲߬ ߓߌ߬ ߸ߊ߲ ߡߊ߫ ߖߌߥߎ߫ ߛߐ߬ߘߐ߲߬ ߝߐ߫ ߣߌ߬ߟߊ߬ߝߌ߲ ߣߌ߫ ߞߎߡߊ߫ ߓߘߎߓߘߎ ߟߎ߬ ߢߐ߲߮ ߡߊ߬ ߸ߊ߲ߠߎ߬ ߘߏ߲߬ ߓߐߣߍ߲߫ ߝߐ߫ ߝߌ߬ߣߊ߬ߟߊ ߘߐ߫ ߟߋ߬ ߞߊ߬ ߣߊ߬ ߖߌߥߎ߫ ߞߏ ߘߐ߫ ،ߓߊ߬ߙߌ߬ ߸ߊ߬ߟߎ߬ ߕߍ߫ ߛߐ߲߬ ߠߴߊ߬ ߞߍ߫ ߟߊ߫ ߔߏߔߏ ߟߎ߬ ߘߐ߫ ߞߎߡߊߕߍ߫ ߘߎ߲(ߓߌ߬ߘߏ߲) ߠߎ߬ ߡߊ߬ ߸ߦߊ߲߬ ߣߴߊ߬ ߟߊߡߌߣߌ߲ ߓߍ߯ ߖߌߥߎߘߊ ߦߋ߫ ߢߊ߫ ߞߋߟߋ߲ ߏ߬ ߟߋ ߡߊ߬ ߕߋ߲߬>> ߝߏߘߋ߫-ߣߍ߬ߣߍ߬ ߟߊ߫ ߝߐߟߌ ߟߴߏ߬ ߘߌ߫.

ߞߊ߬ ߓߍ߲߬ ߖߌߥߎ ߛߐ߲߬ߞߐ߬ ߞߏ ߡߊ߬ ߛߍߣߍ߲߬ ߸ߓߍ߯ ߦߴߌ ߓߋ߭ ߟߋ߬ ߘߐ߫ ߏ߬ ߘߌ߲߬ߞߌߙߊ ߘߐ߫ ،ߞߵߊ߬ ߘߊߡߌ߬ߣߊ߫ ߂߀ ߡߊ߬ ߞߊ߬ ߕߊ߯ ߤߊ߲߯ ߆߀ ߸ߏ߬ ߓߍ߯ ߦߋ߫ ߝߐ߫ ߟߴߊ߬ ߝߍ߬ ߕߋ߲߭ߕߋ߲߬ ߟߐ߯ߝߌ߲ ߠߎ߬ ߘߐ߫߸ ߞߴߏ߬ ߞߎ߲߭ ߞߍ߫ ߊ߬ ߦߋߓߊߟߌߦߊ ߘߌ߫ ߢߊ ߟߊ߫. ߦߊ߯ߟߊ߫ ߸ߖߌߥߎ߫ ߞߏߖߊ ߢߌ߲߬ ߦߋ߫ ߖߡߊ߬ߣߊ߬ߘߋ߲ ߠߎ߫ ߟߋ߬ ߓߊ߰ ߖߡߊ߬ߣߊ ߝߊ߰ߡߊ ߟߎ߬ ؟ߏ߬ ߞߏ߬ߣߌ߲ ߞߣߐ߬ߘߐ߬ߝߟߌ ߦߋ߫ ߡߐ߰ ߛߌߦߊߡߊ߲߫ ߠߊ߫ ،ߣߴߊ߬ ߞߏ ߞߏ߬ߣߌ߲ ߕߊ߬ߡߌ߲߬ ߘߊ߫ ߢߊ߫ ߛߌ߫ ߡߊ߬ ߸ߊ߲ ߘߴߏ߬ ߛߍ߯ߛߍ߯ ߞߵߊ߬ ߞߌ߬ߛߍ ߞߍ߫ ߊߟߎ߯ ߕߍ߫.