ߝߙߋߞߋ ߡߍ߲ ߦߋ߫ ߘߐ߲߬ߞߟߌ߬ߟߊ߬ߟߊ߫ ߝߏߘߋ߫ ߟߊ߲߱ߛߌ߬ߣߍ߬ ߞߋߕߊ߬߸ ߡߍ߲ ߞߊ߲߬ߕߐ߮ ߦߋ߫ ߡߊ߲߬ߘߋ߲߬ ߝߏߘߋ߫ ߘߌ߫߸ ߊ߬ ߣߌ߫ ߡߙߊߡߊ߫ ߛߙߋ߫ ߞߊ߬ߓߊ ߡߍ߲ ߞߊ߲߬ߕߐ߮ ߦߋ߫ ߟߊ߬ ߟߌߦߐߣ ߘߌ߫߸ ߝߙߋߞߋ ߡߍ߲ ߦߋ߫ ߡߐ߰ ߝߌ߬ߟߊ ߏ߬ ߟߎ߬ ߣߌ߫ ߢߐ߲߰ ߕߍ߫ ߞߊ߬ ߓߍ߲߬ <<ߟߊ߬ ߜ߭ߑߙߊ߲ߘ>> ߘߐ߲߬ߞߟߌ ߟߊ߫ ߞߏ ߡߊ߬߸ ߣߌ߫ ߓߊߖߍ߯ ߟߊߞߘߎ߫ ߞߏ ߝߐߣߴߊ߬ ߞߣߐ߫، ߒ߬ߓߊ߬߸ ߏ߬ ߞߕߌ ߕߐ߭ ߕߎ߲߬ ߦߴߌߘߐ߫ ߓߌ߬ ߞߐ߬ߟߏ߲ ߣߌ߲߬ ߡߊ߬߸ ߂߀߂߆ ߥߊ߬ߛߌ߬ߥߙߊ ߕߟߋ߬ ߃߀ ߡߊ߬ ߞߊ߲ߞߊ߲߫ ߞߕߌߘߊ ߦߌߟߡߊ߫ ߝߟߐ ߟߊ߫.

ߓߍ߯ ߟߊߘߍ߬ߣߍ߲ ߞߵߊ߬ ߟߐ߲߫߸ ߞߕߌ߫ ߝߟߐ ߞߍ߫ ߘߊ߫ ߟߊ߬ߡߊ߮ ߡߍ߲ ߘߐ߫߸ ߖߊ߬ߡߊ߫ ߘߍ߬ߜߍ ߟߋ߬ ߓߐ߫ ߘߊ߫߸ ߝߏ߫ ߕߐ߲ߓߟߏߡߊ ߟߎ߫ ߟߋ߬ ߣߊ߬ ߘߊ߫ ߖߊ߬ߡߊ ߘߊߘߐߓߍ߲߬، ߞߕߌ߫ ߝߌߟߊߣߊ߲ ߡߍ߲ ߦߋ߫ ߣߌ߲߬ ߛߊ߫߸ ߏ߬ ߖߡߊ߬ ߞߏ ߡߊ߫ ߞߍ߫ ߢߊ ߏ߬ ߡߊ߬، ߏ߬ ߓߍ߯ ߣߴߊ߬ ߕߊ߫߸ ߞߕߌߘߊ ߘߊ߲߬ߞߎ߲߫ ߝߌ߬ߟߊ ߡߌ߬ߣߊ߬ߣߍ߲߫ ߠߋ߬ ߕߘߍ߬ ߟߊ߬ߞߊ߲߬ߘߊ߬ߟߌ ߘߏ߲߬ߞߏ ߟߎ߬ ߓߟߏ߫.

ߛߐ߰ߡߊ߬ߘߊ ߟߋ߬ ߟߊ߫ ߓߌ߬ ߞߐ߬ߟߏ߲ ߣߌ߲߬ ߡߊ߬߸ ߡߞߊ߬ߛߌ߬ߓߊ߰ߕߐ߫ ߟߊ߬ ߟߌߦߐߣ ߣߌ߫ ߡߞߊ߬ߛߌ߬ߒ߬ߞߊ߲߬ߓߊ߰ߕߐ߫ ߡߊ߬ߘߋ߲߬ ߝߏߘߋ߫ ߟߎ߫ ߘߏ߲߬ ߘߊ߫ ߞߕߌߘߊ ߞߏߞߏ ߞߣߐ߫߸ ߞߵߊ߬ ߛߐ߬ߘߐ߲߬ ߞߊ߲ߞߊ߲߫ ߘߋߡߌߛߍ߲߫ ߞߏߟߊߕߍ߮ ߛߌߦߊߡߊ߲߫ ߦߴߊ߬ߟߎ߬ ߞߐ߫ ߡߊ߬ߝߊ ߣߌ߫ ߖߊ߰ߡߊ߬ߝߊ ߕߊ߯ߡߊ߫ ߢߊ ߡߊ߬.

ߞߕߌ ߘߊߡߌ߬ߣߊ ߡߍ߲ ߞߍ߫ ߘߊ߫߸ ߡߙߊߡߊ߫ ߛߙߋ߫ ߞߊ߬ߓߊ ߞߵߊ߬ ߟߊ߫ ߓߟߏߓߐߟߌ߫ ߛߓߍ ߟߊ߫ ߞߕߌߘߊ ߞߊ߲ߕߌ߮ ߣߊ߰ߟߊ߫، ߏ߬ ߓߍ߯ ߣߴߊ߬ ߕߊ߫߸ ߞߕߌ ߡߊ߫ ߟߊߟߐ߬߸ ߊ߬ ߥߊ߫ ߘߴߊ߬ ߡߊ߬ ߟߋ߬ ߝߛߊߦߌ߫.

ߡߌ߬ߘߊ߬ߞߊ߲߬ߝߐ ߘߐ߫߸ ߝߘߏ߬ߓߊ߬ ߞߏߕߌ߯ߘߊ ߞߵߊ߬ ߟߊߢߌߣߌ߲߫ ߞߕߌߘߊ ߝߍ߬߸ ߞߏ߫ ߞߊ߬ ߓߟߏߞߍ߫ ߡߊ߲߬ߘߋ߲߬ ߝߏߘߋ߫ ߘߐ߫߸ ߞߎ߲߬ߞߏ߬ ߞߏߛߐ߲߬߸ ߊ߰ ߝߐ߫ ߟߊ߫ ߡߍ߲ ߡߊ߬ ߞߏ߫ ߕߐ߯ߕߌߢߍ، ߏ߬ ߟߋ ߘߐ߫߸ ߊ߬ ߞߵߊ߬ ߓߊ߲ߓߊ߲߫ ߞߏߘߐߕߍ߮ ߛߊ߬ߙߌ߬ߦߊ߬ߛߋ߲ ߠߎ߬ ߞߊ߲߬، ߞߵߊ߬ ߦߌ߬ߘߊ߫ ߏ߬ ߘߐ߫ ߞߏ߫: <<ߝߘߏ߬ߓߊ߬ ߞߏߕߌ߯ߘߊ ߦߴߊ߬ ߟߊߢߌߣߌ߲߫ ߠߊ߫ ߞߕߌߘߊ ߝߍ߬߸ ߣߴߏ߬ ߘߌ߫ ߓߍ߲߬߸ ߌ ߦߴߊ߬ ߖߊ߲߬ߞߌ߲߫ ߞߊߙߏ߫ ߥߐ߯ߙߐ߫ ߥߛߎ ߟߊ߫߸ ߊ߬ ߣߌ߫ ߖߌ߬ߣߍ߬ ߕߊߡߊ߲ ߞߋ߲߬ߥߟߎ߬ ߞߋߟߋ߲߫ ߢߍ߬ߢߌ߲߬ߘߐ߬ߓߍ߲ ߛߊ߬ߙߊ.>> ߞߕߌߓߋߟߋ߲ ߠߋ߬ ߞߊ߲߫ ߕߋ߲߬.

ߞߕߌ ߞߐ ߘߐ߫߸ ߡߊ߲߬ߘߋ߲߬ ߝߏߘߋ߫ ߟߊ߫ ߟߊ߬ߝߛߊ߬ߟߌ߬ߟߊ߫ ߛߊ߬ߓߊ ߘߏ߫ ߘߐ߫ ߞߋߟߋ߲߫߸ ߞߊ߬ߙߊ߲߬ߡߐ߯ ߡߏ߬ߤߊ߬ߡߍߘ ߂߲ ߞߙߎ߬ߡߊ߫ ߞߵߊ߬ ߦߌ߬ߘߴߊ߬ ߟߊ߫ ߡߞߊ߬ߘߊ߲߬ߠߌ߲߬ ߞߊ߲߬ ߝߐ ߘߐ߫ ߘߟߊߛߎ߲ߓߎߟߌ ߘߐ߫߸ ߞߏ߫ ߞߕߌߞߊ߲ߘߊ ߣߐ߬ ߞߊ߲ ߡߍ߲ ߝߐ߫ ߟߊ߫ ߡߌ߬ߘߊ߬ߞߊ߲߫ ߘߌ߫߸ ߏ߬ ߦߋ߫ ߝߏ߬ߝߏ ߟߋ߬ ߘߌ߫߸ ߦߙߌߖߋ߫ ߓߟߎ ߟߋ߬ ߡߍ߲ ߘߐߞߏߟߏ߲ ߦߋ߫ ߝߋߎ߫، ߊ߬ ߟߊ߫ ߝߐߟߌ߫ ߘߐ߫߸ ߘߊ߬ߟߎ߬ ߛߌ߫ ߡߊ߫ ߛߐ߬ߘߐ߲߬ ߞߌߕ ߞߎ߲߬ߕߊ߮ ߡߎ߰ߡߍ ߘߐ߫߸ ߕߍ߮ ߘߌ߫ ߞߍ߫ ߊ߬ ߟߊ߫ ߟߊ߬ߝߛߊ߬ߕߊ߫ ߡߊ߲߬ߘߋ߲߬ ߝߏߘߋ߫ ߘߐ߫ ߡߍ߲ ߞߏߛߐ߲߬.

<<ߛߊ߬ߙߌ߬ߦߊ ߞߣߐ߫߸ ߘߊ߬ߟߎ߬ ߛߌ߫ ߡߊ߫ ߛߐ߬ߘߐ߲߬، ߊ߲ ߞߏ߬ߣߌ߲ ߟߊߣߴߊ߬ ߟߊ߫ ߛߋߚߋ߫߸ ߞߏ߫ ߓߟߏ߫ ߘߌ߫ ߓߐ߫ ߡߊ߲߬ߘߋ߲߬ ߝߏߘߋ߫ ߘߐ߫ ߞߏߢߊ ߣߌ߲߬ ߘߐ߫.>> ߊ߬ ߞߵߏ߬ ߝߐ߫.

ߞߕߌ ߓߘߊ߫ ߟߊߕߊ߯ ߛߌ߬ߣߌ߲߬ߟߏ߲ ߘߐ߫߸ ߂߀߂߆ ߞߊ߬ߙߌ߬ߝߐ ߕߋ߬ߟߋ߫ ߃.