ߊ߬ߟߌ߫ ߖߊߥߙߊ߫ ߛߎ߭ ߟߋ߬ ߦߋߣߍ߲߫ ߞߐ߬ߟߏ߲ ߂߀߂߆ ߥߊ߬ߛߌ߬ߥߙߊ ߕߋ߬ߟߋ߫ ߉߸ ߝߊ߬ߕߐ߬ߦߊ߫߸ ߞߌ߲߬ߕߌ߬ߢߊ߲߫ ߡߙߊ߬ߘߊ߬ߙߋ߲ ߘߐ߫، ߞߏ߲߬ߓߏ ߊߓߘߎߟߊߦߌ߫ ߓߊߛߌߙߎ߬ ߞߐ߲ߘߍ߫ ߟߊ߫ ߝߐߟߌ߫ ߘߐ߫߸ ߊ߬ߟߋ ߡߍ߲ ߞߊ߬ ߣߌ߲߬ ߞߏ ߢߊߝߐ߫ ߖߊ߬ߡߊ ߦߋ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߞߊ߲ߡߋߙߋ߲ ߠߊ߫ ߛߊ߬ߦߊ ߛߊߓߎ ߦߋ߫ ߛߌߞߊ߫ ߘߐ߫ ߛߦߊ ߟߋ߬ ߘߌ߫߸ ߡߍ߲ ߛߊߓߎ ߞߍߣߍ߲߫ ߊ߬ ߡߊߘߌߡߌ߲ ߘߌ߫ ߊ߬ ߞߎ߲߭ ߘߐ߫.

ߛߎ߭ ߣߌ߲߬ ߦߋ߫ ߘߊ߫ ߝߊ߬ߕߐ߬ߦߊ߫ ߟߋ߬߸ ߏ߬ ߦߋ߫ ߞߌ߲߬ߕߌ߬ߢߊ߲߫ ߡߙߊ߬ߘߊ߬ߙߋ߲ ߣߐ߬ߘߎ߮ ߟߋ߬ ߘߌ߫߸ ߛߌ߯ߙߌ߲߫ ߡߙߊ߬ߘߊ߬ߓߊ ߘߐ߫، ߣߊ߲߬ߕߌ߰ ߘߊ߲ߘߊߟߌߟߊ߫ ߊߓߘߎߟߊߦߌ߫ ߓߊߛߌߙߎ߬ ߞߐ߲ߘߍ߫ ߟߊ߫ ߝߐߟߌ߫ ߘߐ߫߸ ߊ߬ߟߋ ߟߊߟߐ߲ߠߌ߲߫ ߘߊ߫ ߣߌ߲߬ ߞߏ ߟߊ߫ ߛߐ߱ ߟߋ߬ ߡߊ߬߸ ߁߀ߕߎߡߊ ߝߊ߲߭ ߝߍ߬߸ ߛߎ߭ ߘߏ߫ ߦߋ ߞߐ ߘߐ߫ ߡߏ߬ߛߏ ߟߎ߬ ߟߊ߫ ߢߍ߫ ߡߊߞߏ߫ ߦߙߐ ߘߏ߫ ߘߐ߫.

<<ߛߐ߱ ߣߌ߲߬ ߡߊ߬߸ ߁߀ߕߎߡߊ ߝߊ߲߭ ߝߍ߬߸ ߞߟߍ߬ߡߐ߰ߘߊ ߟߊߟߐ߲ߠߌ߲߫ ߘߊ߫ ߞߏ߫ ߛߎ߭ ߘߏ߫ ߓߘߊ߫ ߦߋ߫ ߡߏ߬ߛߏ ߟߎ߬ ߟߊ߫ ߘߎ߰ߛߏ ߘߐ߫.>> ߘߊ߲ߘߊߟߌߟߊ߫ ߊߓߋ߬ߛߋ ߞߵߏ߬ ߦߌ߬ߘߊ߬. ߘߎ߰ߛߏ ߣߌ߲߬ ߦߋ߫ ߡߏ߬ߛߏ ߟߎ߬ ߟߊ߫ ߞߏ߬ߟߌ߬ ߦߙߐ ߟߋ߬ ߘߌ߫. ߡߍ߲ ߖߌ ߦߋ߫ ߘߊ߲߬ ߠߊ߫ ߜߍ߬ߟߍ߲߬ߞߘߎ ߢߐ߲߰ ߠߊ߫، ߒ߬ߓߊ߬߸ ߞߊ߲ߡߋߙߋ߲ ߣߌ߲߬ ߛߎ߭ ߦߋߣߍ߲߫ ߏ߬ ߟߋ ߖߌ ߘߐ߫ߺ ߖߌ ߣߌ߲߬ ߘߏ߲߬ ߓߊ߯ ߥߙߊ߬ ߢߊ߫ ߛߌ߫ ߡߊ߬߸ ߊ߬ ߕߊ߬ߡߌ߲߬ ߜߏߡߊ߲߫ ߛߏ߬ߙߏ ߟߊ߫.

ߒ߬ߓߊ߬߸ ߞߊ߲ߡߋߙߋ߲ ߡߍ߲ ߛߎ߭ ߦߋߣߍ߲߫ ߣߌ߲߬߸ ߊ߬ ߕߐ߯ ߟߋ߬ ߞߏ߫ ߊ߬ߟߌ ߖߊߥߙߊ߫߸ ߊ߬ ߛߌ߬ߞߛߊߓߌ ߦߋ߫ ߛߊ߲߭ ߂߉ ߖߊ߬ߕߋ߫ ߟߋ߬ ߘߌ߫߸ ߛߣߍ߬ߞߍ߬ߟߊ ߕߎ߲߬ ߦߋ߫ ߡߊ߬ߖߌ߮ ߘߐ߫ ߓߟߊߕߏ߫، ߊ߬ ߕߍ߬ߘߍ߫ ߊ߬ ߤߊ߬ߙߌ߬ߖߍ߮ ߢߌߣߌ߲߫ ߠߊ߫ ߘߊ߬ߡߊ߲ ߞߣߐ߫ ߛߐ߲߬߸ ߜߊߣߊ߲ ߠߋ߬ ߕߘߍ߬.

ߊ߬ ߛߎ߭ ߦߋ ߡߍ߲ ߞߍ߫ ߘߊ߫߸ ߛߌ߯ߙߌ߲߫ ߞߕߌߘߊ ߦߌߟߡߊ߫ ߝߟߐ ߞߊ߲ߓߍ߲ ߞߕߌߞߊ߲ߘߊ ߞߊ߬ߙߊ߲߬ߡߐ߰ ߘߏߡߣߌߞ ߟߎ߬ߥߊ߬ ߞߍ ߣߌ߲߬ ߞߏ ߞߊ߬ߟߊߡߊ߬߸ ߊ߬ ߞߊ߬ ߖߊ߬ߡߊߙߌ ߘߌ߫ ߞߏ߫ ߞߵߊ߬ ߛߊ߬ ߢߊ ߢߊߢߌߣߌ߲߫ ߞߵߊ߬ ߟߐ߲߫، ߞߏ߲߬ߓߏ߫ ߘߊ߲ߘߊߟߌߟߊ ߟߊ߫ ߝߐߟߌ߫ ߘߐ߫߸ ߞߊ߲ߡߋߙߋ߲ ߠߊ߫ ߛߊ߬ߦߊ ߦߋ߫ ߛߌߞߊ߫ ߘߐ߫ ߛߦߊ ߟߋ߬ ߘߌ߫.

ߊ߬ ߞߵߊ߬ ߦߌ߬ߘߊ߬ ߞߏ߫: <<ߛߊ߬ߦߊ ߣߌ߲߬ ߓߊ߬ߟߌ ߟߋ߬ ߞߍ߫ ߘߊ߫ ߓߍ߯ ߟߊ߫، ߊ߬ ߦߋ߫ ߘߊ߫ ߞߏ߫ ߛߌߞߊ߫ ߘߐ߫ ߛߦߊ ߖߍ߬ߘߍߖߍ߬ߘߍ ߟߋ߬߸ ߜߊ߲ߞߕߊ߬ߡߊ߬ ߛߦߊ ߝߋߎ߫، ߏ߬ ߟߋ ߘߐ߫߸ ߞߕߌߞߊ߲ߘߊ ߞߊ߬ ߖߊ߬ߡߊߙߌ ߘߌ߫ ߞߟߍ߬ߡߐ߮ ߟߎ߫ ߡߊ߬߸ ߞߏ߫ ߞߵߊ߬ ߝߊ߰ ߢߊ ߢߊߢߌߣߌ߲߫ ߞߵߊ߬ ߟߐ߲߫.>> ߊ߬ ߞߵߏ߬ ߦߌ߬ߘߊ߬.

ߘߊ߲ߘߊߟߌߟߊ ߞߊ߲߫ ߞߏ߫ ߞߊ߲ߡߋߙߋ߲ ߠߊ߫ ߛߊ߬ߦߊ ߣߌ߲߬ ߞߏ߬ߣߌ߲ ߢߊߝߐ߫ ߜߏߡߊ߲߫ ߠߋ߬ ߝߋߎ߫، ߓߊߏ߬߸ ߊ߬ ߜߍ߬ߟߍ߲߬ߡߊ߲߫ ߞߏ߫ ߞߎ߲߬ߜߍ߬ ߞߘߐ ߦߋ߫ ߕߏ߫ ߖߌ߫ ߛߎ߮ ߏ߬ ߘߐ߫߸ ߡߍ߲ ߘߌ߫ ߡߐ߱ ߡߌ߬ߣߊ߬ ߌ ߜߍ߬ߟߍ߲߬ߞߘߎ ߟߊ߫.

ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߜߍ߬ߟߍ߲߬ߡߊ߲߫߸ ߞߊ߲ߡߋߙߋ߲ߞߘߐ߫ ߛߎ߮ ߣߌ߲߬ ߦߋ߫ ߛߋ߫ ߕߏ߫ ߟߊ߫ ߘߎ߰ߛߏ߬ ߖߌ ߘߐ߫ <<ߝߏ߫ ߣߌ߫ ߖߊ߲߬ߞߊ߬ߙߏ߬ ߞߍ߫ ߘߴߌ ߟߊ߫߸ ߣߴߊ߬ ߦߋ߫ ߓߋ߬ߟߌ߬ ߖߊ߲ߞߊߙߏ ߘߌ߫، ߓߍ߯ ߦߴߌ ߕߏ߫ ߌ ߞߋߟߋ߲߫ ߡߊ߬ ߢߊ ߏ߬ ߡߊ߬߸ ߊ߱ ߓߍ߲߬ ߌ ߟߊ߫ ߞߙߌ߬ߞߙߌ߬ߡߊ߬ߛߊ ߥߌ߬ߟߌ ߡߊ߬ [...] ߣߴߏ߬ ߕߍ߫߸ ߞߊ߲ߡߋߙߋ߲ߞߘߐ߫ ߛߊ߲߭ ߂߉ ߕߏ߫ ߜߏߡߊ߲߫ ߘߎ߰ߛߏ ߖߌ ߘߐ߫߸ ߣߴߌ ߖߊ߲߬ߞߊ߬ߙߏ߬ ߕߍ߫.>> ߊ߬ ߞߵߏ߬ ߦߌ߬ߘߊ߬

ߛߎ߭ ߡߊߝߟߍ ߡߍ߲ ߞߍ߫ ߘߊ߫ ߡߎ߬ߕߎ߲߬ ߛߊ߫߸ ߊ߬ߟߎ߫ ߞߊ߬ ߕߐ߰ߡߊ߬ߛߙߋ߬ ߛߌߦߊߡߊ߲߫ ߦߴߊ߬ ߝߊ߬ߘߌ ߡߊ߬߸ ߖߋ߬ߟߌ ߕߘߍ߬ ߓߐ߫ ߟߴߊ߬ ߕߟߏ ߘߐ߫߸ ߊ߬ ߣߴߊ߬ ߣߎ߲ ߝߍ߬، ߊ߬ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫: <<ߊ߬ ߞߎ߲߬ ߠߊ߬ ߝߊ߲߬ߝߍ߬ߟߊ ߡߊߡߌߘߌ߲ߣߍ߲߫ ߕߘߍ߬߸ ߖߋ߬ߟߌ ߦߋ߫ ߓߐ߫ ߟߴߊ߬ ߣߎ߲ ߠߊ߫߸ ߖߋ߬ߟߌ ߦߋ߫ ߓߐ߫ ߟߴߊ߬ ߕߟߏ ߟߊ߫، ߊ߬ ߝߌߟߊߣߊ߲ ߞߍ߫ ߘߊ߫ ߡߎ߲߬ ߘߌ߫߸ ߘߊ ߦߋ߫ ߘߊ߫ ߞߊ߲ߡߋߙߋ߲ ߕߌ߲ ߠߊ߫߸ ߌߞߏߡߌ߲߬ ߡߐ߰ ߓߊ߯ ߜߟߋ߬ߞߋ ߕߊ߬ ߞߵߊ߬ ߝߙߊ߫ ߡߐ߱ ߞߎ߲߬.>> ߞߏ߲߬ߓߏ ߊߓߋ߬ߛߋ ߞߵߏ߬ ߦߌ߬ߘߊ߬.

ߊ߬ ߟߊ߫ ߝߐߟߌ߫ ߘߐ߫߸ ߞߏ߫ ߞߊ߲ߡߋߙߋ߲ ߦߋ߫ ߦߋ߫ ߟߊ߫ ߥߊ߯ߕߌ ߡߍ߲ ߠߊ߫߸ ߊ߬ ߟߊ߫ ߛߊ߬ߦߊ ߕߎ߲߬ ߡߊ߫ ߕߎ߬ߡߊ߬ߙߋ߲߫ ߝߌ߬ߟߊ߬ ߓߐ߫، ߏ߬ ߟߋ ߘߐ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߛߊ߬ߦߊ ߣߌ߲߬ ߞߍߣߍ߲߫ ߠߋ߬ ߦߏ߫ ߝߋ߲ ߓߊ߯ ߕߊ߬ ߞߊ߬ ߡߐ߰ ߜߊ߬ߛߌ߫ ߊ߬ ߟߊ߫، ߏ߬ ߟߋ ߘߐ߫߸ ߢߊߢߌߣߌ߲ߠߌ߲߫ ߓߘߊ߫ ߛߌ߰ ߛߋ߲߬ߠߊ߫߸ ߤߊ߲߯ ߊ߬ ߞߍߓߊ߮ ߦߋ߫ ߟߐ߲߫ ߕߎ߬ߡߊ ߡߍ߲ ߠߊ߫.

ߏ߬ ߘߐ߫߸ ߞߕߌߞߊ߲ߘߊ ߓߘߊ߫ ߢߊߢߌߣߌ߲ߠߌ߲ ߘߊ ߟߊߞߊ߬߸ ߖߐ߲߰ߛߊ߫ ߊ߬ߟߌ ߖߊߥߙߊ߫ ߝߊ߰ ߢߊ ߘߌ߫ ߟߐ߲߫߸ ߝߐ߫ ߢߊ߫ ߜߘߍ߫ ߘߐ߫߸ ߞߵߊ߬ ߞߍߓߊ߮ ߟߐ߲߫.