ߛߌ߯ߙߌ߲߫ ߞߣߐ߫߸ ߖߌߥߎ߫ ߞߏߖߊ ߕߍ߫ ߣߐ߰ߦߊ߫߸ ߊ߬ ߦߋ߫ ߕߊ߬ߡߌ߲߬ ߠߊ߫ ߜߟߍ߬ߦߊ߬ ߟߊ߫ ߟߋ߬ ߟߏ߲ ߓߍ߯، ߖߌߥߎ߫ ߞߏߖߊ ߣߌ߲߬ ߘߊߡߌ߬ߣߊ߬ ߘߊ߫ ߞߓߊߕߟߎ߫ ߞߏߖߊ ߟߋ߬ ߡߊ߬ ߡߎߣߎ߲߬߸ ߛߏ ߓߘߊ߫ ߣߵߊ߬ ߖߘߍ߬ ߦߋ߫ ߖߌߥߎ߫ ߞߏߖߊ ߟߋ߬ ߝߣߊ߫ ߘߐ߫ ߕߋ߲߬߸ ߏ߬ ߡߍ߲ ߦߋ߫ ߞߍ߫ ߟߊ߫ ߓߏ߬ߙߌ߬ߝߋ߲ ߝߊ߲߬ߓߊ ߞߣߐ߫، ߊ߬ ߕߍ߫ ߦߋ߫ ߖߌߥߎߘߊ ߟߎ߬ ߟߊ߫ ߕߋ߲߬߸ ߊ߬ ߖߍ߬ߘߍ ߕߍ߫ ߦߋ߫ ߟߊ߫ ߟߋ߬ ߓߟߏߟߊ߫ ߝߋߎ߫.

  ߊ߬ ߞߎ߲߬ߢߐ߲߰ ߦߙߌߞߊ ߟߋ߬ ߕߋ߲߬߸ ߞߊ߬ ߓߐ߫ ߖߌߥߎߘߊ߫ ߘߊ߲ߘߐ߫ ߞߐ߫ ߕߋ߲߬߸ ߡߍ߲ ߠߎ߬ ߘߏ߲߬ ߝߣߊ߫ ߦߋ߫ ߓߊ߯ߙߊ߫ ߟߊ߫ ߕߎ߬ߡߊ߬ ߣߌ߫ ߕߎ߬ߡߊ߬ ߞߣߐ߫߸ ߖߌߥߎ ߕߍ߫ ߦߋ߫ ߟߊ߫ ߢߊ ߟߊ߫ ߛߌ߯ߙߌ߲߫ ߞߣߐ߫، ߖߌߥߎߘߊ߫ ߞߋ߬ߟߋ߲߬ߞߋߟߋ߲ ߡߍ߲ ߠߎ߬ ߦߋ߫ ߓߊ߯ߙߊ߫ ߟߊ߫ ߕߎ߬ߡߊ ߘߏ߫ ߟߎ߫ ߟߊ߫ ߛߐ߲߬߸ ߖߊ߬ߡߊ ߘߌ߫ ߟߐ߬ ߢߐ߲߮ ߞߐ߫ ߏ߬ ߟߎ߬ ߝߣߊ߫ ߘߐ߫ ߟߐ߬ߖߟߎ߬ ߖߊ߲߬ߓߊ ߘߌ߫߸ ߏ߬ ߞߏ ߓߘߊ߫ ߜߊ߬ ߓߏ߬ߙߌ߬ߝߋ߲߬ߕߌ߮ ߟߎ߬ ߟߊ߫ ߞߏߛߓߍ߫، ߞߵߊ߬ ߟߴߊ߬ ߞߊ߲߬߸ ߟߐ߮ ߖߊ߬ߣߍ߲߫߸ ߖߌߥߎ ߛߐ߲߬ߞߐ ߓߘߊ߫ ߞߍ߫ ߛߏ߬ ߛߐ߲ߞߐ ߘߌ߫.

ߛߌߦߊߞߊ߬ ߞߡߊ߬ߙߊ߫ ߢߌ߬ߣߌ߲߬ߞߊ߬ߣߍ߲ ߒ߬ ߠߊ߫ ߞߐߦߌߘߊߓߊ߮ ߓߟߏ߫߸ ߊ߬ߟߋ ߡߍ߲ ߦߋ߫ ߛߌ߱ ߘߐ߫ ߛߌ߯ߙߌ߲ߞߎߘߊ߫ ߁߭ ߞߌ߲߬ߘߊ ߟߊ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߣߌ߲߬ ߞߏ ߓߘߊ߫ ߞߍ߫ ߟߐ߯ߓߐ ߘߌ߫: <<ߊ߬ ߞߊߙߏ߫ ߞߋߟߋ߲߫ ߖߊ߬ߕߋ߫ ߟߋ߬ ߕߋ߲߬߸ ߊ߲ ߧߋ߫ ߖߋ߬ߣߌ߲߬ߕߊ߬ ߞߏ߬ߖߊ߬ ߓߊ߲ߓߊߟߌ ߣߌ߲߬ ߘߐ߫ ߦߊ߲߬، ߥߊߦߌ߲ߕߟߎ ߕߊ ߓߊ߲ߣߍ߲ ߞߐߝߍ߬߸ ߖߌߥߎ ߝߣߊ߫ ߓߘߴߊ߬ ߘߊߡߌ߬ߣߊ߬، ߕߏ߲ߜߊ߫ ߞߋߟߋ߲ ߦߋ߫ ߝߙߋ߬ ߟߊ߫ ߟߐ߯ߝߌ߲ ߠߎ߬ ߘߐ߫ ߕߋ߲߬ ߖߕ ߃߀ ߀߀߀، ߖߌߥߎߘߊ ߟߎ߬ ߟߊ߫ ߡߊ߬ߛߐ߬ߟߌ ߦߋ߫ ߞߍ߫ ߟߊ߫ ߟߋ߬ ߘߏߣߍ߲ߘߏߣߍ߲߫߸ ߛߊ߫ ߖߌߥߎ߫ ߞߏߖߊ ߞߊߣߊ߬ ߥߊ߫، ߓߊߏ߬߸ ߊ߬ߟߎ ߣߌ߫ ߟߐ߯ߝߌ߲ ߖߌߥߎ߫ ߖߎߟߊ ߟߎ߫ ߟߋ߬ ߓߍ߲߬ ߠߴߊ߬ ߘߐ߫߸ ߏ߬ ߟߎ߬ ߘߌ߫ ߣߵߊ߬ ߝߋ߬ߙߋ߫ ߖߡߊ߬ߣߊ߬ߘߋ߲ ߠߎ߬ ߡߊ߬ ߛߐ߲߬ߞߐ߬ ߜߍߟߍ߲ ߠߊ߫߸ ߞߏ ߓߍ߯ ߓߘߊ߫ ߜߟߍ߬ߦߊ߬.>>

ߣߴߌ ߘߏ߲߬ ߞߊ߬ ߛߊ߬ߟߌ߬ߡߊߕߎ߬ ߞߙߎ߬ߡߊ߫ ߕߊ߬߸ ߏ߬ ߣߐ߬ ߣߌ߲߬ ߞߏ ߕߎ߬ߙߎ ߟߊ߫ ߟߊ߫ ߝߊ߰ߡߊ ߟߎ߬ ߟߊ߫ ߘߏߞߍߓߊߟߌߦߊ ߟߋ߬ ߞߎ߲߬߸ ߞߵߊ߬ ߦߌ߬ߘߊ߬ ߞߏ߫ ߖߌߥߎ߫ ߞߏߖߊ ߞߎ߲߭ ߠߵߏ߬ ߘߌ߫، ߊ߬ߟߋ ߢߣߊ߫߸ ߘߊ߬ߡߊ߲߬ ߓߊ߯ߙߊ ߘߊߡߌ߬ߣߊ ߡߍ߲ ߞߍߣߍ߲߫ ߣߌ߲߬߸ ߖߌߥߎ߫ ߞߏߖߊ ߣߌ߲߬ ߖߎ߬ߓߊ ߓߐߣߍ߲߫ ߦߋ߲߬ ߠߋ߬، ߞߊ߬ߕߎ߲߯߸ ߞߐߞߊ߲߫ ߘߊߡߊ߲ߛߋ߲ߠߊ ߡߍ߲ ߠߎ߬ ߦߋ߫ ߦߊ߲߬߸ ߖߌߥߎ ߝߊ߲߬ߓߊ ߦߋ߫ ߞߎ߲߬ߡߙߎ߬ ߟߊ߫ ߞߵߊ߬ ߟߊߕߊ߯ ߏ߬ ߟߎ߫ ߟߋ߬ ߡߊ߬: <<ߔߏߞߑߟߍ߲߫ ߓߊ߯ߙߊ ߘߊߡߌ߬ߣߊ ߡߍ߲ ߞߍߣߍ߲߫ ߛߣߌߥߊ ߟߎ߬ ߓߟߏ߫ ߘߊ߬ߡߊ߲ ߞߣߐ߫ ߣߌ߲߬ ߖߐ߫߸ ߏ߬ ߟߋ ߣߐ߬ ߥߊߦߌ߲ߕߟߎ߫ ߞߏߖߊ ߘߏ߲߬ ߠߊ߫، ߓߊߏ߬߸ ߝߊ߯ߞߊ߲ߓߋ߲ ߠߎ߬ ߓߊ߯ ߥߊߦߌ߲ߕߟߎ ߕߊ߬ ߞߐߣߊߞߙߌ߫߸ ߊ߬ߟߎ߬ ߦߋ߫ ߥߊ߫ ߟߴߊ߬ ߘߌ߫ ߛߣߌߥߊ ߟߎ߬ ߟߊ߫ ߓߊ߯ߙߊ߫ ߦߌߟߊ ߟߋ߬ ߘߐ߫ ߥߊ߭ ߞߣߐ߫ ߒߕߟߋߡߊ߬߸ ߞߊ߬ ߥߴߊ߬ ߝߋ߬ߙߋ߫ ߦߋ߲߬ ߖߕ ߁߆ ߀߀߀ ߤߊ߲߯ ߖߕ ߁߇ ߀߀߀ ߟߊ߫߸ ߞߊ߬ ߞߎ߲߬ ߣߌ߫ ߞߎ߲߬ ߛߐ߬ߘߐ߲߬، ߦߊ߬ߣߴߊ߬ߟߎ߬ ߦߋ߫ ߥߴߊ߬ ߘߌ߫ ߖߌߥߎߘߊ ߟߊ߫߸ ߏ߬ ߕߍ߫ ߞߍ߫ ߟߊ߫ ߘߋ߬߸ ߊ߬ߟߎ߬ ߘߌ߫ ߥߴߊ߬ ߘߌ߫ ߔߏߞߑߟߍ߲߫ ߓߊ߯ߙߊ߫ ߦߙߐ ߘߐ߫ ߦߋ߲߬، ߓߌ߬ ߢߐ߲߰ ߟߏ߲߫ ߏ߬ ߘߐ߫ ߛߊ߫߸ ߊ߲ ߓߘߊ߫ ߓߌ߬ߟߊ߬ ߖߌߥߎ߫ ߞߏߖߊ ߘߐ߫߸ ߖߌߥߎߘߊ ߟߎ߬ ߕߍ߫ ߛߐ߲߬ ߠߊ߫ ߖߌߥߎ ߞߍ߫ ߟߊ߫ ߡߐ߱ ߟߎ߬ ߞߎ߲߬ ߊ߬ ߢߌ߬ߡߊ ߟߊ߫߸ ߝߏ߫ ߞߊ߬ ߘߏߣߍ߲ߘߏߣߍ߲߫ ߞߍ߫ ߡߐ߱ ߟߎ߬ ߞߎ߲߬ ߕߋ߲߬߸ ߞߊ߬ ߕߏ߫ ߖߌߥߎ߫ ߞߏ ߜߟߍߦߊ ߟߊߖߎ߯ߦߊ߫ ߟߊ߫، ߛߌ߯ߙߌ߲߫ ߝߊ߰ߡߊ ߟߎ߬ ߝߣߊ߫ ߛߌ߰ߣߍ߲߫ ߏ߬ ߘߐ߫߸ ߞߏ߫ ߕߍ߫ ߞߍ߫ ߟߊ߫، ߐ߲߹ ߖߡߊ߬ߣߊ߬ߘߋ߲ ߠߎ߬ ߛߍߣߍ߲߬߸ ߕߙߐߦߊ ߦߴߏ߬ ߟߎ߫ ߟߋ߬ ߞߊ߲߬ ߛߊߟߌ߫ ߢߊߞߘߐߟߊ ߣߌ߲߬ ߘߐ߫ ߕߋ߲߬، ߕߊ߬ߛߙߊ߬ߟߊ ߓߍ߯ ߓߘߊ߫ ߜߟߍ߬ߦߊ߬߸ ߡߍ߲ ߦߋ߫ ߛߙߊ߬ ߟߊ߫ ߖߕ ߃߀߀߀ ߟߊ߫߸ ߏ߬ ߓߘߊ߫ ߞߍ߫ ߖߕ ߁߅ ߀߀߀ ߘߌ߫.>>

ߞߌ߲߬ߕߌ߬ߢߊ߲߬ ߡߍ߲ ߝߣߊ߫ ߦߋ߫ ߛߌ߯ߙߌ߲߫ ߡߙߊ ߘߐ߫߸ ߊ߬ߟߋ߬ ߞߏ߫ ߞߋߟߋ߲ ߠߋ߬ ߓߍ߫ ߦߋ߲߬ ߝߣߊ߫ ߘߐ߫، ߘߎߙߊ߬ ߞߋߕߊ߬ ߞߊ߬ ߖߌߥߎ ߛߐ߬ߘߐ߲ ߠߊ߫ ߜߟߍ߬ߦߊ ߢߊߝߐ߫ ߦߋ߲߬.

<<ߓߌ߲߬ߘߌߓߊ߲߬ߘߊ߲ ߛߐ߬ߘߐ߲߬ ߘߌߡߊ߲߫ ߖߌߥߎ ߘߌ߫ ߞߌ߲߬ߕߌ߬ߢߊ߲߬ ߞߣߐ߫ ߕߋ߲߬߸ ߊ߬ ߕߍ߫ ߦߋ߫ ߟߊ߫ ߓߟߏߟߊ߫ ߝߋߝߋ߫، ߖߌߥߎߘߊ ߟߎ߬ ߕߍ߫ ߡߊ߬ߛߐ߬ߟߌ߬ ߞߍ߫ ߟߊ߫߸ ߟߐ߯ߝߌ߲߫ ߖߎߟߊ ߟߎ߬ ߝߍ߬ ߕߋ߲߬߸ ߖߌߥߎ ߦߋ߫ ߢߌߣߌ߲߫ ߠߴߊ߬ߟߎ߬ ߟߊ߫ ߘߓߌ߬ ߘߐ߫ ߟߋ߬ ߦߏ߫ ߓߌ߲߬ߘߌߓߊ߲߬ߘߊ߲߸ ߞߵߊ߬ ߕߊ߬ ߖߕ ߃߀ ߀߀߀ ߡߊ߬ ߞߵߊ߬ ߛߌ߰ ߅߀ ߀߀߀ ߟߊ߫߸ ߊ߬ ߘߏ߲߬ ߕߍ߫ ߝߙߋ߬ ߟߊ߫ ߓߍ߯ ߡߊ߬ ߘߋ߬߸ ߝߏ߫ ߟߐ߲ߓߊ߯ߦߊ.>> ߊ߬ߟߋ߫ ߞߵߏ߬ ߦߌ߬ߘߊ߬.

ߖߌߥߎ߫ ߞߏߖߊ ߣߌ߲߬ ߓߘߊ߫ ߘߌ߯ ߓߍ߯ ߟߋ߬ ߟߊ߫ ߕߋ߲߬߸ ߞߊ߬ ߞߏ ߟߎ߬ ߜߟߍ߬ߦߊ߬، ߛߌ߯ߙߌ߲߫ ߞߋߟߋ߲߫ ߘߏ߲߬ ߕߍ߫ ߘߋ߬߸ ߊ߬ ߞߏߢߊ ߦߋ߫ ߞߊ߲ߞߊ߲߫ ߝߣߊ߫ ߘߐ߫߸ ߡߍ߲ ߖߎ߯ߡߊ߲߫ ߓߌ߬ ߢߐ߲߰ ߟߏ߲߫ ߞߏߛߓߍ߫߸ ߓߊߏ߬߸ ߊ߬ ߦߋ߫ ߝߙߋ߬ ߟߊ߫ ߦߋ߲߬ ߝߣߊ߫ ߘߐ߫ ߖߕ ߂߀ ߀߀߀ ߣߌ߫ ߂߅ ߀߀߀ ߟߋ߬ ߕߍ߫.

ߕߟߋ߬ ߘߊ߲ߘߐ߫ ߟߋ߬ ߞߏ߬ߣߌ߲ ߦߋ߫ ߘߐ߲߬ߞߌ߲߬ ߛߊߟߌ ߟߊ߫ ߡߎ߬ߕߎ߲߬߸ ߣߴߏ߬ ߣߌ߫ ߜߟߍ߬ߦߊ߬ ߛߎ߮ ߣߌ߲߬ ߞߊ߬ ߢߐ߲߯ߓߍ߲߬ ߏ߬ ߘߐ߫߸ ߝߏ߫ ߝߊ߰ߡߊ ߟߎ߬ ߦߴߊ߬ߟߎ߬ ߢߊ ߡߊߖߌ߰ ߊ߬ ߞߏ ߞߘߐ߫߸ ߛߊ߫ ߖߡߊ߬ߣߊ߬ߘߋ߲ ߠߎ߬ ߘߴߊ߬ ߟߐ߲߫߸ ߞߎ߲߬ ߞߋߟߋ߲ ߡߍ߲ ߦߴߊ߬ ߟߊ߫.