ߛߍ߬ߞߍ߫ ߞߐ߬ߟߋ߲߬ߘߊ ߦߋ߫ ߘߎ߰ ߟߋ߬ ߘߌ߫߸ ߡߍ߲ ߦߋ߫ ߘߞߏ߫ ߡߙߊ߬ߘߊ߬ߙߋ߲ ߘߐ߫، ߒ߬ߓߊ߬߸ ߡߊ߲߬ߓߌ߬ ߖߊߟߏ߫ ߦߋ߫ ߦߋ߲߬ ߛߌ߰ߓߊ߮ ߟߋ߬ ߘߌ߫߸ ߏ߬ ߟߋ ߝߊ߰ ߘߊ߫ ߂߀߂߆ ߞߏ߲ߞߏߘߓߌ ߕߟߋ߬ ߀߈ ߡߊ߬، ߊ߲ ߞߊ߬ ߟߌ߬ߤߟߊ߫ ߞߎ߲߬ߝߟߐ ߡߍ߲ ߠߎ߬ ߛߐ߬ߘߐ߲߬߸ ߊ߬ ߦߌ߬ߘߊ߬ߣߍ߲߬ ߞߏ߫ ߊ߬ ߝߊ߰ ߘߊ߫ ߡߊ߲߬ߞߊ߲ ߡߍ߲ ߘߐ߫߸ ߏ߬ ߞߍߓߊ߮ ߟߎ߬ ߓߐ߫ ߘߊ߫ ߡߊ߬ߟߌ ߝߊ߲߭ ߝߍ߬ ߟߋ߬߸ ߊ߬ ߕߌ߯ߕߌ߯ ߘߎ߱ ߡߍ߲ ߕߐ߯ ߞߏ߫ ߘߊ߲߬ߞߊ߬߸ ߦߋ߲߬ ߦߋ߫ ߖߌ߬ߣߍ߬ ߣߌ߫ ߡߊ߬ߟߌ ߓߐߕߏ߲ ߠߋ߬ ߟߊ߫، ߒ߬ߓߊ߬߸ ߞߊ߬ ߓߍ߲߬ ߡߊ߲߬ߓߌ߬ ߖߊߟߏ߫ ߟߊ߫ ߛߊ߬ߦߊ ߏ߬ ߡߊ߬ ߛߊ߫߸ ߛߍ߬ߞߍ߫ ߞߐ߬ߟߋ߲߬ߘߊ ߡߏ߬ߛߏ ߟߎ߫ ߟߋ߬ ߓߐ߫ ߘߊ߫ ߛߌߟߊ ߞߊ߲߬ ߏ߬ ߘߐ߫ ߞߊ߯ߙߌ ߣߌ߲߬ ߡߊ߬߸ ߂߀߂߆ ߞߏ߲ߞߏߘߓߌ ߕߟߋ߬ ߁߂߸ ߞߵߊ߬ߟߎ߬ ߟߊ߫ ߡߐߣߍ ߦߌ߬ߘߊ߬، ߞߵߊ߬ ߦߌ߬ߘߊ߬߸ ߞߏ߫ ߞߎ߲߬ߠߊ߬ߛߘߌ ߓߘߊ߫ ߝߊ߲߬ߞߊ߫ ߛߐ߬ߘߐ߲߫ ߡߊ߬ߟߌ ߣߌ߫ ߖߌ߬ߣߍ߬ ߓߐߕߏ߲߫ ߝߊ߲ ߏ߬ ߝߍ߬ ߦߋ߲߬߸ ߝߏ߫ ߞߎ߲߬ߠߊ߬ߛߌ߮ ߦߋ߫ ߢߊ߫ ߢߌߣߌ߲߫ ߊ߬ ߞߏ ߡߊ߬، ߊ߬ߟߎ߫ ߞߵߊ߬ߟߎ߬ ߞߊ߲ߠߊߘߌ߫ ߖߌ߬ߣߍ߫ ߞߎ߲߬ߠߊ߬ߛߌ߮ ߟߎ߫ ߡߊ߬߸ ߊ߬ ߕߌ߯ߕߌ߯ ߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫߸ ߞߏ߫ ߝߏ߫ ߞߊ߬ ߛߞߍ߬ߞߊ ߟߎ߬ ߟߊߞߊ߲ߘߊ߫ ߟߋ߬߸ ߞߵߊ߬ߟߎ߬ ߓߐ߫ ߖߐ߬ߘߐ ߘߐ߫.

ߊ߲ ߠߊ߫ ߟߌ߬ߤߟߊ߫ ߛߐ߬ߘߐ߲߬ߣߍ߲ ߠߎ߬ ߘߐ߫߸ ߡߏ߬ߛߏ ߟߎ߬ ߞߊ߲߫ ߠߋ߬ ߊ߬ߟߎ߬ ߟߊ߫ ߡߞߊ߬ߛߌ߬ߟߌ ߟߎ߬ ߘߐ߫߸ ߞߏ߫ ߝߏ߫ ߞߊ߬ ߖߌ߬ߣߍ߬ ߣߌ߫ ߡߊ߬ߟߌ ߕߍߟߊ ߓߐߕߏ߲ ߏ߬ ߞߏ ߟߎ߬ ߢߊߓߐ߫ ߟߋ߬߸ ߞߊ߬ ߝߋ߲ ߠߎ߬ ߟߊߕߊ߯ ߦߋ߲߬߸ ߖߐ߲߰ߛߊ߫ ߥߊ߬ߥߎߟߋ ߞߊߣߊ߬ ߕߍ߰ ߢߊ ߡߍ߲ ߡߊ߬، ߊ߬ߟߎ߬ ߞߊ߲߫ ߞߏ߫ ߞߎ߲߬ߠߊ߬ߛߌ߮ ߟߎ߬ ߞߍ ߞߵߊ߬ߟߎ߫ ߛߌ߰ ߞߵߊ߬ߟߎ߬ ߢߊ ߓߍ߲߬ ߣߌ߲߬ ߞߏ ߡߊ߬߸ ߊ߬ߟߎ߬ ߡߊ߫ ߝߋ߲߫ ߝߐ߫߸ ߏ߬ ߓߘߴߊ߬ߟߎ߬ ߕߙߐ߫ ߞߏߛߓߍ߫.

ߡߏ߬ߛߏ ߘߏ߫ ߞߎߡߊ߫ ߘߊ߫߸ ߊ߬ߟߋ ߡߍ߲ ߞߵߊ߬ ߦߌ߬ߘߊ߬ ߞߏ߫ ߞߵߊ߬ ߕߐ߮ ߕߏ߫ ߜߎ߬ߕߙߎ ߞߣߐ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߘߋ߲ߞߍ ߟߋ߬ ߝߊ߰ߣߍ߲߫ ߝߊ߰ ߞߏ߬ߖߎ߰ߦߊ ߛߎ߮ ߓߍ߯ ߘߏ߫ ߘߐ߫.

<<ߊ߬ߟߎ߫ ߞߵߊ߲ ߘߋ߲ߞߍ߫ ߟߋ߬ ߞߊ߲ߠߊߕߍ߰߸ ߞߵߊ߬ ߝߊ߬ߘߌ ߝߊ߲߭ ߕߍ߰ ߊ߬ ߟߊ߫߸ ߊ߬ ߓߟߏ߸ ߊ߬ ߞߎ߲߭߸ ߊ߬ ߟߊ߫ ߞߙߎ߬ߛߌ߬ ߖߟߊ߸ ߞߵߏ߬ ߓߍ߯ ߕߍ߰ ߊ߬ ߟߊ߫، ߞߊ߬ ߓߊ߲߫ ߞߊ߬ ߕߊ ߛߎ߫ ߊ߬ ߞߎ߲߭ ߠߊ߫߸ ߞߵߏ߬ ߘߎ߲߫ ߛߊ߲ߝߍ߬ ߞߵߏ߬ ߞߍ߫ ߢߊ߰ߢߊ߰ ߘߐ߬ ߞߏ ߘߌ߫، ߊ߬ߟߋ߬ ߡߐ߱ ߟߎ߬ ߦߋ߫ ߓߐ߫ ߟߊ߫ ߡߊ߬ߟߌ ߟߋ߬ ߟߊ߫߸ ߞߊ߬ ߣߊ߬ ߛߣߌߥߊ ߟߎ߬ ߡߊߘߍ߬ߡߍ߲߬ ߞߊ߲ߡߊ߬߸ ߞߵߊ߲ ߠߊ߫ ߘߎ߱ ߘߐߛߋ߲߬ ߔߏߞߑߟߍ߲ ߠߊ߫، ߊ߬ߟߎ߬ ߞߊ߲߫ ߞߏ߫ ߤߊߟߌ߬ ߊ߲ ߠߊ߫ ߖߡߊ߬ߣߊ ߞߊ߲ߕߌ߮߸ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߋ߬ ߓߊ߯ ߣߊ߬߸ ߊ߬ߟߎ߬ ߘߴߊ߲ ߠߊ߫ ߘߎ߰ߞߟߏ ߓߊ߯ߙߊ߫ ߔߌߢߊ߲߫.>> ߔߊߞߌߛߦߊߟߊ ߘߏ߫ ߟߋ߬ ߞߊ߲߫ ߕߋ߲߬.

ߊ߬ߟߎ߫ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߢߌ߬ߣߊ߬ ߞߍߣߍ߲߫ ߊ߬ߟߎ߬ ߞߐ߫ ߟߋ߬ ߞߎ߲߬ߠߊ߬ߛߌ߮ ߓߟߏ߫، ߝߊߦߌߘߊ߫߸ ߡߐ߰ ߘߴߊ߬ ߝߐ߫ ߞߏ߫ ߊ߬ߟߎ߬ ߟߊߓߌ߬ߟߊ߬ߣߍ߲߫ ߠߋ߬، ߏ߬ ߟߋ ߘߐ߫߸ ߊ߬ߟߎ߬ ߞߊ߲߫ ߞߏ߫ ߣߴߊ߬ߟߎ߬ ߟߊ߫ ߘߎ߱ ߦߙߐ ߏ߬ ߡߊ߫ ߢߊ߬ ߓߊ߯ߙߊ ߞߐ߫߸ ߝߏ߫ ߣߴߊ߬ߟߎ߫ ߛߐ߰ ߘߴߊ߬ߟߎ <<ߡߏ߬ߛߏ ߟߎ߬ ߝߟߐ߫ ߝߊ߱ ߟߋ߬ ߡߊ߬ ߡߎߣߎ߲߬߸ ߞߣߊ߬ߕߏ߫ ߘߎ߰ߞߟߏ ߓߊ߯ߙߊ߫ ߟߊ߫.>>

ߡߏ߬ߛߏ ߢߌ߲߬ ߠߎ߫ ߞߏ߬ߣߌ߲ ߠߊ߫ ߓߐߟߌ ߞߍ߫ ߘߊ߫ ߟߊ߬ߡߊ߰ߓߊ߫ ߘߌ߫ ߞߐ߬ߟߋ߲߬ߘߊ ߟߊ߫ ߞߎߣߎ߲߬ ߞߊ߯ߙߌ ߡߊ߬߸ ߡߍ߲ ߡߊ߫ ߘߏ߲߰ ߛߏ ߝߊ߲߬ ߛߌ߫ ߡߊ߬، ߊ߬ߟߎ߬ ߟߊ߫ ߓߐߟߌ ߣߌ߲߬ ߦߴߊ߬ ߦߌ߬ߘߊ߬ ߟߊ߫ ߟߋ߬ ߝߣߊ߫߸ ߞߏ߫ ߢߊ߫ ߞߊ߫ ߞߊ߲߫ ߞߊ߬ ߢߌߣߌ߲߫ ߦߙߐ ߏ߬ ߘߐߛߎߡߊ߫ ߞߏ ߡߊ߬ ߞߊߟߌߦߊ߫ ߘߐ߫ ߕߋ߲߬ ߞߏߛߓߍ߫.