߂߀߂߆ ߘߓߊ߬ߕߊ ߕߋ߬ߟߋ߫ ߂ ߣߴߊ߬ ߄ ߕߍߟߊ ߣߌ߲߬ ߘߐ߫߸ ߛߞߍ߬ ߥߘߎߟߊ߫ ߘߎ߰ߣߍ߲ ߡߍ߲ ߦߋ߫ ߘߞߏ߫ ߡߙߊ߬ߘߊ߬ߙߋ߲ ߘߐ߫߸ ߛߌ߯ߙߌ߲߫ ߡߙߊ߬ߘߊ߬ߓߊ ߞߣߐ߫߸ ߛߏ ߏ߬ ߝߊߣߍ߲߫ ߖߡߊ߬ ߛߌߦߊߡߊ߲߫ ߠߋ߬ ߟߊ߫ ߕߋ߲߬߸ ߞߊ߬ ߝߘߊ߫ ߞߡߊ߬ߙߊ߬ ߓߏ߲ߞߣߐ ߟߎ߬ ߟߊ߫ ߕߟߋ߬ߓߋ߬ ߊߝߙߌߞߌ߬ ߞߣߐ߫، ߖߊ߲߬ߖߏ߲ ߣߌ߲߬ ߘߐ߫߸ ߟߐ߲ߠߌ߲ߦߊ߫ ߟߊߖߊ߲ߞߏ ߦߴߊ߬ ߘߐ߫߸ ߊ߬ ߣߌ߫ ߝߊ߬ߛߏ ߞߏ߫ ߞߘߐ ߛߌߦߊߡߊ߲߫ ߠߊߞߎߣߎ߲ ߟߊ߲߬ߓߋ ߣߌ߫ ߖߘߍ߬ߞߏ ߞߊߡߊ߲ ߞߣߐ߫.

ߊ߲ ߠߊ߫ ߟߌ߬ߤߟߊ߫ ߛߐ߬ߘߐ߲߬ߣߍ߲ ߠߎ߬ ߘߐ߫ ߞߊ߬ ߝߘߊ߫ ߕߘߍ߬ߒ߬ߘߐ߬ߓߊ߮ ߘߏ߫ ߟߊ߫߸ ߏ߬߬ ߞߵߊ߬ ߦߌ߬ߘߊ߬ ߞߏ߫ ߞߡߊ߬ߙߊ߬ ߜߙߊ ߣߌ߲߬ ߦߋ߫ ߖߊ߲߬ߖߏ߲߬ ߓߟߋߓߟߋ߫ ߟߋ߬ ߘߌ߫߸ ߡߍ߲ ߥߎ߬ߘߊ߲ ߓߏ߲߬ߓߊ߬ ߞߏߛߓߍ߫، ߞߊ߬ߕߎ߲߯߸ ߛߞߍ߬ ߥߘߎߟߊ߫ ߓߏ߬ߟߏ߲߬ ߘߟߊ߬ߞߊ ߓߍߣߊ߬ ߞߍ߫ ߖߊ߲߬ߖߏ߲ ߣߌ߲߬ ߘߐ߫߸ ߞߊ߬ ߓߊ߲߫ ߞߊ߬ ߛߘߊߞߓߊ߫ ߓߐ߫ ߖߡߊ߬ߣߊ ߦߋ߫߸ ߞߡߊ߬ߙߊ ߟߎ߫ ߖߍ߬ߘߍ ߦߋ߫߸ ߊ߬ ߣߌ߫ ߝߘߊ߬ߝߌ߲߬ߠߊ߬ ߓߍ߯ ߦߋ߫.

<<ߜߊ߬ߙߊ ߣߌ߲߬ ߛߌ߰ ߓߟߏ߫ ߝߌ߬ߟߊ߫ ߟߋ߬ ߞߊ߲߬: ߞߊ߬ ߛߞߍ߬ ߥߘߎߟߊ߫ ߞߡߊ߬ߙߊ ߟߎ߬ ߟߊ߫ ߓߏ߬ߟߏ߲ ߘߟߊߞߊ߬߸ ߊ߬ ߣߌ߫ ߞߊ߬ ߛߘߊߞߊ ߓߐ߫ ߞߡߊ߬ߙߊ ߟߎ߬ ߦߋ߫ ߘߎߢߊ߫ ߢߊߝߍ߬.>> ߏ߬ ߝߐ߫ ߘߊ߫ ߞߏ߲߬ߓߏ ߡߊ߬ߡߎߘߎ߬ ߞߏߕߍߓߊ߲߫ ߞߡߊ߬ߙߊ߫ ߟߋ߬ ߓߟߏ߫߸ ߊ߬ߟߋ ߡߍ߲ ߦߋ߫ ߝߘߊ߬ߝߌ߲߬ ߘߊ߲ߘߊߟߌ ߞߟߊ߬ߡߊ߬ߓߊ߯ ߘߌ߫߸ ߊ߬ ߣߌ߫ ߞߡߊ߬ߙߊ߬ ߕߐ߲ ߕߌ߲߬ߞߎߘߎ߲ ߘߏ߲߬ߖߟߎ߬ߡߊ߬ߟߌ߬ߟߊ ߞߊ߲ߞߊ߲߫. ߊ߬ ߞߵߊ߬ ߦߌ߬ߘߊ߬ ߞߏ߫ ߓߏ߬ߟߏ߲߫ ߛߊ߬ߓߊ߫ ߟߋ߬ ߛߏ ߣߌ߲߬ ߞߣߐ߫߸ ߘߏ߫ ߖߌ߲߭ ߞߣߐ߫߸ ߝߌ߬ߟߊ ߘߊ ߕߎ߲߬ ߓߘߊ߫ ߟߊߞߊ߬ ߞߘߐ߬ߡߊ߲߬߸ ߛߓߊߣߊ߲ ߠߋ߬ ߘߟߊߞߊ ߦߋ߫ ߛߋ߲߬ߢߊ ߣߌ߲߬ ߘߌ߫.

ߛߌ߲߬ߝߏ߲߬ߧߊ߬ߟߌ߬ߟߊ ߟߎ߬ ߟߊ߫ ߝߐߟߌ߫ ߘߐ߫߸ ߖߊ߲߬ߖߏ߲ ߘߊߡߌ߬ߣߊ߬ ߘߊ߫ ߘߓߊ߬ߕߊ ߕߋ߬ߟߋ߫ ߂ ߟߋ߬ ߡߊ߬߸ ߖߡߊ߬ ߛߌߦߊߡߊ߲߫ ߣߊ߬ߣߍ߲߫ ߛߐ߬ߘߐ߲߬ ߠߊ߫ ߡߍ߲ ߘߐ߫߸ ߊ߬ߟߎ߫ ߘߏ߲߬ ߦߴߊ߬ ߞߊ߲߬ ߤߊ߲߯ ߊ߬ ߕߟߋ߬ ߣߊ߯ߣߌ߲، ߗߋߘߋ߲ ߘߏ߫ ߟߎ߫ ߓߐߣߍ߲߫ ߠߋ߬ ߡߊ߬ߟߌ ߟߊ߫߸ ߞߡߊ߬ߙߊ ߡߍ߲ ߠߎ߬ ߦߋ߫ ߦߋ߲߬߸ ߊ߬ ߣߌ߫ ߜߋ߲ߞߐ߰ߖߌ߬ߘߊ ߣߌ߫ ߓߙߎߞߌߣߊ߫ ߝߊ߬ߛߏ߬߸ ߞߵߏ߬ ߟߊ߫ ߖߌ߬ߣߍ߫ ߞߡߊ߬ߙߊ߬ ߓߏ߲ ߠߎ߬ ߞߊ߲߬ ߞߊ߲ߞߊ߲߫ ߣߌ߫ ߡߊ߲߬ߖߊ߲߬ߠߊ߬ ߣߌ߫ ߓߊ߬ߟߌ߬ߦߊ߬ ߣߌ߫ ߡߍ߰ߢߍ߬ ߣߌ߫ ߓߘߌ߬ߞߊ߬ ߓߙߊߞߊ߫ ߣߌ߫ ߓߎ߬ߙߋ߬ ߟߎ߬ ߘߐ߫߸ ߏ߬ ߟߎ߬ ߓߍ߯ ߟߋ߬ ߣߐ߬ ߢߐ߲߯ߓߍ߲߬ ߠߊ߫ ߦߋ߲߬.

ߛߌ߲߬ߝߏ߲߬ߧߊ߬ߟߌ ߞߊߡߊ߲ ߞߣߐ߫߸ ߛߌ߯ߙߌ߲߫ ߝߊ߰ߡߊ ߟߎ߫ ߟߋ߬ ߣߊ߬ߣߍ߲߫ ߖߊ߲߬ߖߏ߲ ߞߎ߲߬ߠߊߛߌ߰ ߟߊ߫، ߟߐ߲ߠߌ߲ߦߊ߫ ߟߊߖߊ߲ߞߏ ߖߍ߬ߘߍߖߍ߬ߘߍ ߦߴߌߘߐ߫ ߡߟߋߞߎߦߊ ߛߌߟߊ ߝߍ߬߸ ߘߐ߲߭ ߠߎ߬߸ ߘߎ߲߬ߘߎ߲߬ ߘߐ߲߸ ߖߊ߬ߜߊ߸ ߊ߬ ߣߌ߫ ߕߊ߲ߘߎߣߎ߲߸ ߏ߬ ߓߍ߯ ߟߋ߬ ߦߴߌߘߐ߫ ߞߵߊ߬ ߦߌ߬ߘߊ߬ ߞߏ߫ ߡߊ߲߬ߘߋ߲߫ ߕߏߟߏ߲ ߣߴߊ߬ ߛߍ߬ߓߍ ߞߍߢߊ ߣߴߊ߬ ߓߏߟߏ߲ ߠߎ߬ ߞߊ߫ ߛߌߦߊ߫.

ߞߏ߫ ߛߌߦߊߡߊ߲߫ ߦߋ߫ ߖߊ߲߬ߖߏ߲ ߣߌ߲߬ ߘߐ߫߸ ߞߎ߬ߙߣߊ߬ ߞߟߊߒߞߋ ߓߘߊ߫ ߞߊ߬ߙߊ߲߫߸ ߞߊ߬ ߡߊ߰ߙߌ ߘߊߟߌ߫ ߤߙߊ߫ ߛߐߘߐ߲ ߠߊ߫، ߘߏ߫ ߟߎ߫ ߝߣߊ߫ ߓߍߣߊ߬ ߖߌߓߐ߲ ߠߋ߬ ߕߎ߲߰ ߏ߬ ߟߊ߫߸ ߞߊ߬ ߓߋ߲ߓߊ߫ ߛߟߐߡߌ߲ ߠߎ߬ ߕߙߊ߫، <<ߞߊ߬ߦߌ߯ ߊ߲ ߣߊ߬ ߘߊ߫߸ ߛߌ߲߬ߝߏ߲߬ߧߊ߬ߟߌ ߦߴߊ߬ ߞߊ߲߬ ߞߏߛߓߍ߫߸ ߞߊ߬ ߕߊ߬ߡߌ߲߫ ߊ߬ ߢߌ߬ߡߊ ߟߊ߫، ߓߏ߬ߟߏ߲ ߘߊ ߓߘߊ߫ ߟߊߞߊ߬߸ ߞߏ ߕߐ߭ ߟߎ߬ ߝߣߊ߫ ߦߴߌߘߐ߫.>> ߞߏ߲߬ߓߏ ߞߏߕߍߓߊ߲߫ ߞߵߏ߬ ߟߴߊ߬ ߘߟߊ߫.

ߛߞߍ߬ ߥߘߎߟߊ߫ ߡߍ߲ ߦߋ߫ ߕߋ߲߬߸ ߘߊߘߐ߫ ߝߐߟߌ ߟߎ߬ ߦߴߊ߬ ߦߌ߬ߘߊ߬ ߟߊ߫ ߞߏ߫ ߝߊߙߌ߲߫ ߡߊ߬ߜ߭ߊ߲߫ ߞߡߊ߬ߙߊ߬ ߟߊ߫ ߛߏ߫ ߜߍ߲߭ߕߍ߰ߣߍ߲ ߠߋ߬߸ ߊ߬ߟߋ ߡߍ߲ ߦߋ߫ ߞߟߌ߫ ߟߊ߫ ߞߏ߫ ߝߘߋ߫ ߡߊ߬ߜ߭ߊ߲߬، ߊ߬ ߛߌ߰ߓߊ߮ ߘߌ߫ ߡߐ߰ ߂߀߀߀ ߤߊ߲߯ ߡߐ߰ ߄߀߀߀ ߓߐ߫ ߞߊ߬ ߓߍ߲߬ ߊ߲ ߞߎߡߊߢߐ߲߮ ߠߊ߫ ߝߐߟߌ߫ ߡߊ߬߸ ߞߏ߫ ߛߏ߫ ߟߋ߬ ߦߴߊ߬ ߘߌ߫ ߡߍ߲ ߦߋ߫ ߡߐ߱ ߟߎ߬ ߞߊ߲ߞߕߐߡߊ߬߸ ߓߊ߬ߙߵߊ߬ ߦߋ߫ ߛߏߓߊ߫ ߘߌ߫.

ߖߊ߲߬ߖߏ߲ ߦߋ߫ ߛߋ߲߬ߠߊ߫ ߤߊ߲߯ ߘߓߊ߬ߕߊ ߕߟߋ߬ ߄߸ ߓߌ߬ ߕߊ ߘߏ߲߬ ߝߣߊ߫ ߦߴߌߘߐ߫ ߟߋ߬ ߤߊ߲߯ ߛߎ ߦߋ߫ ߖߊ߲߬ߝߊ߫ ߕߎ߬ߡߊ ߡߍ߲ ߠߊ߫.