ߖߋ߬ߟߌ߬ߓߟߊ߬ߞߊ߬ ߡߛߏ ߘߏ߫ ߟߋ߬ ߓߌ߬ߟߊ߬ߣߍ߲߫ ߝߘߊ ߟߊ߫ ߗߍ߬ߘߎ߯߸ ߛߣߍ߬ߜ߭ߊߟߌ߫ ߥߙߏ߬ߘߎ߰ ߕߟߋߓߐ ߘߐ߫߸ ߡߐ߱ ߕߣߐ߬ߓߌߘߌ߲ ߣߌ߫ ߞߊ߬ߝߏ߬ߢߐ߲߰ߦߊ ߕߣߐ߬ߓߐ߬ߟߌ ߞߏߛߐ߲߬، ߏ߬ ߞߍ߫ ߘߊ߫ ߢߊߢߌߣߌ߲ߠߌ߲ ߘߏ߫ ߟߋ߬ ߞߐ ߘߐ߫ ߛߣߍ߬ߜ߭ߊߟߌ߫ ߕߐ߲ߓߟߏߡߊ ߟߎ߬ ߟߊ߫ ߓߏߟߏ߲ߝߘߊ ߘߏ߫ ߓߟߏ߫߸ ߊ߰ ߝߐ߫ ߟߊ߫ ߡߍ߲ ߡߊ߬ ߞߏ߫ ߕߎ߲ߞߊߙߊ߲ߞߋ߫ ߘߓߌߘߓߌ ߞߍ߬ߟߍ ߞߐ߬ߡߐ߲߬ߞߐߡߐ߲߫ ߝߊ߬ߛߏ߬ߟߊ߬ߞߊ، ߟߊ߬ߞߊ߲߬ߘߊ߬ߟߌ ߓߐߛߎ߲ ߠߎ߬ ߟߊ߫ ߝߐߟߌ߫ ߘߐ߫߸ ߓߌ߬ߟߊ߬ ߞߍߣߴߊ߬ ߞߐ߫ ߡߎ߲߬ ߘߐ߫ ߝߣߊ߫߸ ߏ߬ ߟߋ ߦߋ߫ ߡߐ߰ߞߏ߬ߙߏ߲߬ ߘߍ ߘߌ߫.

ߞߏߢߊ ߣߌ߲߬ ߡߎ߰ߡߍ ߘߊߡߌ߬ߣߊ߬ ߘߊ߫ ߂߀߂߆ ߘߓߊ߬ߕߊ ߕߋ߬ߟߋ߫ ߂߀ ߠߋ߬ ߡߊ߬߸ ߕߐ߲ߓߟߏߡߊ ߟߎ߬ ߟߊߛߏ߬ߓߌ߬ ߘߊ߫ ߞߏ߫ ߘߋ߲ߡߛߏߣߍ߲ ߘߏ߫ ߟߎ߫ ߓߘߊ߫ ߣߊ߬ ߞߊ߬ ߓߐ߫ ߖߋ߬ߟߌ߬ߓߊ߬ߟߊ߫߸ ߡߍ߲ ߠߎ߬ ߦߋ߫ ߘߌ߫ ߟߊ߫ ߗߍ߭ ߟߎ߫ ߡߊ߬ ߞߵߊ߬ߟߎ߫ ߡߊ߬ߞߏ ߟߊߓߐ߫ ߊ߬ߟߎ߬ ߟߊ߫ ߛߊ߬ߙߊ ߟߊ߫ ߛߊ߲ߓߙߊߓߜ߭ߎ߫ ߘߎ߰ߣߍ߲ ߞߣߐ߫، ߌߞߘߐ߫߸ ߡߊ߬ߞߟߌ߬ߟߌ ߣߌ߫ ߥߌ߬ߙߌ߲߬ߘߌ߬ߟߌ ߣߌ߫ ߜߋ߬ߟߎ߲߬ߠߌ߲ ߛߓߍߘߊ (ߡߥߜߛ) ߛߋ߫ ߘߴߊ߬ ߕߍ߯ ߞߍ߫ ߟߊ߫ ߛߌߞߊߒߡߊߓߊ߯ߕߐ ߘߐ߫ ߊ߬ ߟߊ߫ ߟߎ ߡߊ߬߸ ߘߋ߲ߡߛߏߣߍ߲߫ ߡߐ߰ ߛߊ߬ߓߊ ߡߍ߲ ߠߎ߬ ߕߎ߲߬ ߦߴߊ߬ ߓߟߏ߫ ߦߋ߲߬߸ ߣߴߏ߬ ߟߎ߬ ߦߋ߫ ߖߊ߬ߕߋ߬ ߟߊ߫ ߞߏߕߐ ߟߎ߬ ߘߌ߫߸ ߏ߬ ߟߎ߬ ߝߣߊ߫ ߓߌ߬ߟߊ߬ ߘߊ߫ ߟߊ߬ߞߊ߲߬ߘߊ߬ߟߌ ߞߣߐ߫.

ߊ߬ߟߎ߬ ߟߊߥߟߍ߫ ߕߎߡߊ ߟߊ߫߸ ߘߋ߲ߡߛߏߣߍ߲߫ ߡߐ߰ ߛߊ߬ߓߊ ߏ߬ ߟߎ߫ ߞߵߊ߬ ߦߌ߬ߘߊ߬߸ ߞߏ߫ ߡߏ߬ߛߏ ߣߌ߲߬ ߦߴߊ߬ߟߎ߫ ߕߊ߬ ߟߊ߫ ߞߵߊ߬ߟߎ߬ ߟߊߓߐ߫ ߊ߬ߟߎ߬ ߟߊ߫ ߖߡߊ߬ߣߊ ߟߋ߬ ߞߣߐ߫߸ ߞߊ߬ ߣߵߊ߬ߟߎ߬ ߘߌ߫، ߞߏ߫ ߊ߬ߟߎ߫ ߣߊ߬ߣߍ߫ ߛߣߍ߬ߜ߭ߊߟߌ߫ ߞߣߐ߫ ߟߋ߬߸ ߞߵߊ߬ߟߎ߬ ߘߌߦߊߜߏߦߊ߫ ߝߊߕߎߦߊ ߟߊ߫߸ ߞߏ ߘߏ߫ ߞߎ߲߬ߞߘߐ߫߸ ߊ߰ ߝߐ߫ ߟߊ߫ ߡߍ߲ ߡߵߊ߬ߟߎ߬ ߓߟߏ߫ ߞߏ߫ "ߕߊ߯ߡߊ ߖߎ߬ߟߎ" ߡߍ߲ ߥߊߘߌ ߦߋ߫ ߓߍ߲߬ ߠߊ߫ ߛߍߝߊ ߁ ߅߀߀ ߀߀߀ ߡߊ߬ (ߕߊߡߊ߲߫ ߥߊ߯ ߗߍ߬ߡߍ߫ ߛߓߊ߬)߸ ߏ߬ ߡߍ߲ ߦߋ߫ ߓߍ߲߬ ߖߌ߬ߣߍ߬ ߕߊߡߊ߲ ߞߋ߲߬ߥߟߎ߫ ߂߅ ߖߊ߬ߕߋ߫ ߡߊ߬، ߊ߬ߟߎ߬ ߓߊ߯ ߣߊ߬ ߘߋ߲ߡߛߏߣߍ߲ ߠߎ߬ ߘߌ߫ ߒߞߘߐ߫߸ ߏ߬ ߟߋ ߛߊ߬ߙߊ ߦߋ߫ ߞߍ߫ ߟߴߊ߬ߟߎ߫ ߞߊ߲߬ ߛߋ߲ߛߋߘߋ߲ ߘߌ߫ ߡߎߣߎ߲߬.

ߊ߬ߟߎ߬ ߟߊ߫ ߟߊ߬ߛߙߋ߬ߦߊ߬ߟߌ߬ ߞߊ߲ ߠߎ߬ ߘߐ߫߸ ߞߍߞߌߦߊ ߘߏ߫ ߟߋ߬ ߡߏ߬ߛߏ ߣߌ߲߬ ߓߟߏ߫ ߦߋ߲߬߸ ߞߵߊ߬ߟߎ߬ ߟߐ߬ ߕߍ߭ ߘߌߦߌߜߏߦߊ߫ ߛߙߊ ߟߊ߫߸ ߞߏ߫ ߊ߬ߟߎ߬ ߦߋ߫ ߛߋ߫ ߛߍߝߊ ߅߀ ߀߀߀ (ߕߊߡߊ߲߫ ߥߊ߯ ߕߊ߲߫) ߟߊߘߏ߲߬ ߠߊ߫ ߕߟߋ߬ ߟߏ߯ߟߎ ߓߍ߯ ߡߊ߬߸ ߣߊߟߌ߬ߡߎ߲߫ ߖߌ߬ߣߍ߬ ߕߊߡߊ߲ ߥߊ߯ ߗߡߍ߬ ߛߋߦߌ߲߫ ߣߌ߫ ߘߏ߫ ߘߌ߫.  ߊ߬ߟߎ߫ ߡߐ߰ ߛߊ߬ߓߊ ߘߐ߫߸ ߡߐ߰ ߝߌ߬ߟߊ ߕߎ߲߬ ߓߘߊ߫ ߛߍߝߊ ߇߀߀ ߀߀߀ (ߕߊߡߊ߲߫ ߁߄߀ ߀߀߀) ߛߊ߬ߙߴߊ߬ߟߎ߬ ߟߊ߫ ߖߟߎ߬ ߛߙߊ ߘߐ߫، ߊ߬ߟߎ߬ ߛߓߊߣߊ߲ ߕߎ߲߬ ߓߘߊ߫ ߓߊ߲߫ ߊ߬ ߕߊ ߡߎ߰ߡߍ ߛߙߊ߬ ߟߊ߫.

ߡߏ߬ߛߏ ߣߌ߲߬ ߡߴߊ߬ ߛߐ߬ߛߐ߫ ߊ߬ ߟߊ߫ ߡߊ߬ߞߘߐ߬ߦߊ߬ ߓߊ߯ߙߊ ߢߌ߲߬ ߠߊ߫߸ ߊ߬ ߞߵߊ߬ ߟߐ߬ ߊ߬ ߟߊ߫ ߟߋ߬، ߊ߬ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߞߙߏ߬ߝߏ ߟߋ߬ ߟߊߘߊ߲ߣߴߊ߬ߟߎ߬ ߓߟߏ߫ ߝߛߊߦߌ߫߸ ߡߍ߲ ߦߋ߫ ߓߊ߯ߙߊ߫ ߟߊ߫ ߖߡߊ߬ߣߊ߫ ߛߓߊ߬ ߕߍ߫߸ ߖߋ߬ߟߌ߬ߓߊ߬ߟߊ߫߸ ߓߋߣߍ߲߫߸ ߊ߬ ߣߌ߫ ߡߊ߬ߟߌ߸ ߡߐ߰ ߦߴߊ߬ߟߎ߬ ߓߟߏ߫ ߝߣߊ߫߸ ߡߍ߲ ߠߎ߬ ߘߐ߱ߘߏ߲߬ߣߍ߲߫ ߛߓߍ߫ ߝߏߝߏ߫ ߟߊߘߊ߲ ߠߊ߫ ߞߵߊ߬ ߘߌ߫ ߊ߬ߟߎ߬ ߟߊ߫ ߡߐ߰ ߟߊߣߊ߬ߕߊ ߟߎ߫ ߡߊ߬.

ߘߐ߬ߛߏ߰ߙߋ߬ߟߌ ߞߵߊ߬ ߟߊߓߐ߫ ߏ߬ ߟߋ ߘߐ߫߸ ߞߏ߫ ߡߏ߬ߛߏ ߣߌ߲߬ ߕߎ߲߬ ߓߘߊ߫ ߥߊߘߌ ߘߏ߫ ߟߎ߫ ߟߊߕߊ߯ ߖߋ߬ߟߌ߬ߓߊ߬ߟߊ߫߸ ߊ߬ ߟߊ߫ ߞߐߙߍ ߡߊ߬߸ ߜߍߟߊߜߍ ߞߏߛߐ߲߬، ߖߐ߲߰ߛߊ߫ ߥߊߘߌ ߏ߬ ߟߎ߬ ߓߐ߫ ߦߙߐ߫ ߞߊߣߊ߬ ߟߐ߲߫ ߢߊ ߡߍ߲ ߡߊ߬.

ߊ߬ߟߋ߬ ߞߏ ߢߊߢߌߣߌ߲߫ ߘߊߞߎ߲ ߏ߬ ߟߋ ߘߐ߫߸ ߊ߬ ߕߊ߯ ߘߊ߫ ߦߌ߬ߘߊ߫ ߗߍ߬ߘߎ߯ ߞߕߌߘߊ ߦߌߟߡߊ߫ ߝߟߐ ߞߊ߲ߓߍ߲ ߞߕߌߞߊ߲ߘߊ ߟߊ߫߸ ߞߣߊ߬ߕߏ߫ ߊ߬ ߟߊߘߏ߲߬ ߠߊ߫ ߥߛߎ ߟߊ߫.

ߘߋ߲ߡߛߏ߫ ߡߐ߰ ߛߊ߬ߓߊ ߡߍ߲ ߠߎ߬ ߦߴߏ߬ ߟߎ߬ ߘߌ߫ ߛߊ߫߸ ߏ߬ ߟߎ߬ ߓߘߊ߫ ߘߏ߲߬ ߛߘߞ ߘߏ߫ ߓߟߏ߫߸ ߞߵߊ߬ߟߎ߫ ߘߐ߱ߘߏ߲߬ ߊ߬ߟߎ߬ ߟߊ߫߸ ߊ߬ ߣߌ߫ ߞߵߊ߬ߟߎ߬ ߛߐ߫ ߤߊ߲ߞߟߌ߫ ߟߊ߫ ߓߘߍߞߍ߭.

ߢߊߢߌߣߌ߲ߠߌ߲ ߣߌ߲߬ ߓߘߴߊ߬ ߦߌ߬ߘߊ߬߸ ߞߏ߫ ߡߐ߰ ߕߣߐ߬ߓߌߘߌ߲ ߞߙߏ߬ߝߏ ߞߊ߫ ߛߌߦߊ߫ ߓߊߟߋ߬ ߕߟߋ߬ߓߋ߬ ߊߝߙߌߞߌ߬ ߞߣߐ߫߸ ߊ߬ ߞߍ߬ߟߍ ߝߊ߲߬ߞߊߘߏ߲߭ ߣߴߊ߬ ߕߊ߫، ߛߣߍ߬ߜ߭ߊߟߌ߫ ߝߊ߰ߡߊ ߟߎ߫ ߞߏ߬ߣߌ߲ ߦߴߊ߬ ߞߊ߲߬ ߞߵߊ߬ߟߎ߬ ߛߋߞߏ ߞߍ߫߸ ߞߵߊ߬ ߞߏ߫ ߛߎ߮ ߟߎ߬ ߟߊ߫ ߕߋ߬ߟߋ ߟߊ߫߸ ߞߊ߬ ߛߋ߫ ߞߏߕߐ ߟߎ߬ ߝߣߊ߫ ߟߊߕߊ߲߬ߞߊ߬ ߟߊ߫.