ߛߙߋ߫ ߛߌߦߊߡߊ߲߫ ߠߊ߫ ߝߐߟߌ߫ ߘߐ߫߸ ߣߌ߲߬ ߞߍ߫ ߘߊ߫ ߞߎ߲߬ߠߊ߬ߛߌ߮ ߟߊ߫ ߘߊ߲ߘߊߛߏ ߘߏ߫ ߟߋ߬ ߟߊ߫ ߒߞߎߥߊߕߌߦߊ߫߸ ߦߋ߲߬ ߦߋ߫ ߜ߭ߊ߯ߣߊ߬ ߖߡߊ߬ߣߊ ߟߋ߬ ߘߐ߫، ߖߊ߲߬ߞߊ߬ߙߏ߬ߕߐ ߘߏ߫ ߟߋ߬ ߕߟߋ߬ ߦߙߌߞߊ ߟߊߟߊߣߍ߲߫ ߕߘߍ߬ ߘߊ߲ߘߊߛߏ ߟߊ߫߸ ߊ߬ ߟߊ߫ ߘߊ߲ߘߊߟߌ ߛߙߊ ߓߘߊ߫ ߥߙߊ߬ ߞߏߖߎ߯ߦߊ߫، ߊ߬ ߘߏ߲߬߸ ߊ߬ ߟߊ߫ ߡߐ߱ ߟߎ߬ ߦߴߊ߬ ߘߊ߲ߘߊ߫ ߥߊߘߌ ߛߙߊ߬ ߞߏ ߟߊߛߎߡߦߊ ߞߊ߲߬.

ߞߊ߬ ߓߍ߲߬ ߏ߬ ߟߋ ߡߊ߬ ߛߊ߫߸ ߘߊ߲ߘߊߛߏ ߓߊ߯ߙߟߊ ߘߏ߫ ߞߊ߬ ߞߍߞߌߦߊ ߘߏ߫ ߟߊߓߊ߯ߙߊ߫: ߞߵߊ߬ ߝߐ߫ ߗߍ߭ ߟߊ߫ ߡߐ߱ ߟߎ߬ ߦߋ߫ ߞߏ߫ ߊ߬ߟߎ߬ ߟߊ߫ ߖߊ߲߬ߞߊ߬ߙߏ߬ߕߐ ߓߘߊ߫ ߛߊ߬، ߊ߬ ߞߊ߬ ߞߟߌߟߌ ߞߍ߫ ߜߋߟߋ߲ߜߋߟߋ߲ ߠߋ߬ ߟߊ߫ ߞߊ߬ ߞߊ߲ߡߋߙߋ߲ ߠߊ߫ ߡߐ߱ ߟߎ߬ ߟߊߟߐ߲ߠߌ߲߫، ߏ߬ ߟߎ߫ ߖߛߎ߬ߞߊ߬ߛߌ߬ߡߍ߬ߣߍ߲߬ߕߐ ߏ߬ ߟߋ ߞߵߊ߬ߟߎ߫ ߞߎ߲߬ߛߌ߲߫ ߘߊ߲ߘߊߛߏ ߟߊ߫ ߡߎ߬ߕߎ߲߬ ߛߊ߫.

ߊ߬ߟߎ߬ ߛߋ ߦߋ߲߬߸ ߘߊ߲ߘߊߛߏ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߕߍ߫ ߛߎ߭ ߦߋ߫߸ ߊ߬ ߕߍ߫ ߘߴߊ߬ߟߎ߫ ߡߊ߬ ߝߋߎ߫߸ ߝߏ߫ ߘߊ߲ߘߊߟߌ߫ ߛߙߊ ߡߍ߲ ߠߎ߬ ߛߙߊ߬ߓߊߟߌ ߦߋ߫߸ ߝߏ߫ ߊ߬ߟߎ߬ ߓߴߏ߬ ߛߊ߬ߙߊ߫ ߕߎ߬ߡߊ ߡߍ߲ ߠߊ߫، ߊ߬ߟߎ߫ ߞߣߐ߬ߘߐߝߟߌ߬ߣߍ߲ ߏ߬ ߟߋ ߕߏ߫ ߘߊ߫ ߛߊ߫߸ ߗߍ߭ ߟߊ߫ ߡߐ߱ ߟߎ߬ ߞߵߊ߬ߟߎ߬ ߓߟߏ ߟߊ߫ ߢߐ߲߮ ߞߊ߲߬߸ ߞߊ߬ ߥߊߘߌ ߛߙߊ߬߸ ߞߊ߬ ߖߎ߬ߟߎ ߓߐ߫ ߊ߬ߟߎ߬ ߟߊ߫.

ߥߊߘߌ ߏ߬ ߟߎ߬ ߓߍ߯ ߛߊ߬ߙߊ ߞߐ ߟߋ߬ ߘߐ߫߸ ߊ߬ߟߎ߬ ߟߊߕߊ߯ ߘߊ߫ ߘߊ߲ߘߊߟߌ߫ ߓߏ߲ ߞߣߐ߫، ߊ߬ߟߎ߬ ߥߊ߫ ߘߊ߫ ߘߊߘߐߖߊ߫ ߞߏ ߢߌ߬ߡߊ߲߬ ߦߋ߫ ߦߋ߲߬߸ ߊ߬ߟߎ߫ ߞߵߊ߬ ߛߐ߬ߘߐ߲߬ ߊ߬ߟߎ߬ ߟߊ߫ ߖߊ߲߬ߞߊ߬ߙߏ߬ߕߐ ߞߍ߲ߘߍ߫ ߜߋߙߋ߲ߜߋߙߋ߲߫߸ ߊ߬ ߛߌ߰ߣߍ߲߫ ߟߊߟߊ߲ ߘߐ߫߸ ߊ߬ ߓߘߊ߫ ߞߍ߲ߘߍߦߊ߫.

ߏ߬ ߟߋ ߞߎߡߊ ߓߘߊ߫ ߛߋ߫ ߘߍ߬ߞߙߏߝߏ ߟߎ߫ ߞߊ߲߬ ߛߍߣߍ߲߬߸ ߓߍ߯ ߦߴߊ߬ ߕߊ߫ ߝߐ ߞߊ߲߬، ߓߊߏ߬߸ ߘߏ߫ ߟߎ߬ ߞߊ߲߫ ߞߏ߫ ߘߊ߲ߘߊߟߌߟߊ ߟߎ߬ ߟߊ߫ ߓߊ߯ߙߊ߫ ߛߎ߮ ߏ߬ ߡߊ߫ ߢߌ߲߬߸ ߏ߬ ߦߋ߫ ߕߏߟߏ߲߫ ߞߍ ߟߋ߬ ߘߌ߫ ߡߐ߱ ߟߎ߬ ߤߊ߲ߞߟߌ ߟߊ߫، ߊ߬ ߣߌ߫ ߝߣߊ߫߸ ߞߏ߫ ߓߊ߯ߙߊ߫ ߛߎ߮ ߏ߬ ߕߍ߫ ߓߍ߲߬ ߘߊ߲ߘߊߟߌߟߊ ߟߎ߫ ߡߊ߬، ߞߊ߬ߕߎ߲߯߸ ߞߏ߫ ߞߍߢߊ߫ ߜߘߍ߫ ߟߎ߫ ߦߋ߫ ߦߋ߲߬߸ ߥߊߘߌ ߘߌ߫ ߛߋ߫ ߛߙߊ߬ ߟߊ߫ ߛߌߟߊ ߡߍ߲ ߠߎ߬ ߝߍ߬߸ ߡߍ߲ ߣߌ߫ ߞߏ߫ ߛߎ߮ ߣߌ߲߬ ߕߍ߫ ߞߋߟߋ߲߫ ߘߌ߫.

ߛߊ߬ߙߌ߬ߦߊ߬ ߓߟߏ ߡߊ߬߸ ߡߐ߱ ߛߊ߲߬ߞߊ ߟߊߕߋ߭ ߥߎߦߊ ߞߎ߲߬ߠߊ߬ ߢߊ߫ ߛߎ߮ ߣߌ߲߬ ߡߊ߬߸ ߏ߬ ߦߋ߫ ߡߐ߱ ߟߎ߫ ߕߐ߬ߢߍ߮ ߟߋ߬ ߘߴߊ߬ߟߎ߬ ߤߊ߲ߞߟߌ߫ ߘߐ߫߸ ߞߵߊ߬ߟߎ߫ ߞߣߐ߬ߘߐߝߌ߬ߟߌ߫ ߞߵߊ߬ߟߎ߬ ߦߌߟߊ߲ߦߌߟߊ߲߫، ߞߟߊ߬ߡߊߓߊ߮ ߘߏ߫ ߟߎ߫ ߖߍ߬ߘߍ ߦߴߊ߬ ߦߌ߬ߘߊ߬ ߞߏ߫ ߊ߬ ߡߊ߫ ߡߐ߰ ߘߊ߬ߟߎ߬ ߓߐ߫߸ ߞߊ߬ ߡߐ߱ ߛߊ߲߬ߞߊ ߟߊߕߋ߬ ߥߎߦߊ ߞߎ߲߬ߠߊ߫߸ ߓߊ ߞߏ߫ ߌ ߟߊ߫ ߥߊߘߌ ߡߊ߫ ߛߙߊ߬، ߏ߬ ߘߐ߫߸ ߞߏ߫ ߟߵߏ߬ ߘߌ߫߸ ߡߍ߲ ߕߍ߫ ߓߍ߲߬ ߊߘߡߊߦߊ ߞߣߐ߫߸ ߛߊ߬ߙߌ߬ߦߊ߫ ߘߏ߲߬ ߝߣߊ߫ ߡߊ߫ ߛߐ߲߬ ߊ߬ ߡߊ߬.

ߒ߬ߓߊ߬߸ ߣߌ߲߬ ߞߏ ߟߋ߬ ߡߐ߰ ߛߌߦߊߡߊ߲߫ ߘߊ߫ ߕߋ߲߬߸ ߞߵߊ߬ ߦߌ߬ߘߊ߬ ߞߏ߫ ߥߊߘߌ ߛߙߊ߬ ߢߊ߬ ߛߌߦߊߡߊ߲߫ ߦߋ߫ ߘߊ߲ߘߊߟߌߟߊ ߟߎ߬ ߞߣߐ߫، ߊ߬ ߘߏ߲߬߸ ߝߘߊ߬ߝߌ߲߬ ߖߡߊߣߊ ߛߌߦߊߡߊ߲߫ ߓߍ߫߸ ߘߊ߲ߘߊߟߌߟߊ ߟߎ߬ ߦߋ߫ ߥߊߘߌ ߓߐ߫ ߟߊ߫ ߡߐ߱ ߟߎ߬ ߞߎ߲߬ ߢߊ߫ ߜߘߍ߫ ߟߎ߫ ߡߊ߬߸ ߡߍߍ߲ ߣߌ߫ ߢߌ߲߬ ߝߣߊ߫ ߕߍ߫ ߞߋߟߋ߲߫ ߘߌ߫، ߌ ߘߏ߲߬ ߓߊ߯ ߘߏ߫ ߟߎ߫ ߝߣߊ߫ ߦߋ߫ ߞߢߊ߬ ߟߊ߫ ߥߊߘߌ ߛߙߊ߬ ߟߊ߫ ߣߌ߲߬ ߢߊ߸ ߌ ߓߊ߯ ߖߊ߲߬ߞߊߙߏ߫ ߕߋ߲߬߸ ߛߏ߬ ߓߐ ߟߋ߬ ߓߘߊ߫ ߓߌ߬ߟߊ߬ ߌ ߡߊ߬ ߏ߬ ߘߌ߫߸ ߘߊ߲ߘߊߟߌ߫ ߛߙߊ ߓߘߊ߫ ߞߍ߫ ߛߏ߬ ߛߐ߲ߞߐ ߘߌ߫ ߘߊ߲ߘߊߛߏ ߛߌߦߊߡߊ߲߫ ߠߊ߫߸ ߝߏ߫ ߊ߬ ߓߘߊ߫ ߞߍ߫ ߞߣߐ߬ߘߐ߬ߝߟߌ ߘߌ߫ ߖߊ߲߬ߞߊ߬ߙߏ߬ߕߐ ߟߎ߬ ߣߴߊ߬ߟߎ߬ ߟߊ߫ ߡߐ߱ ߟߎ߬ ߕߍ߫.