ߜ߭ߊ߯ߣߊ߬ ߥߛߊ߬ߘߋ߲ ߞߑߥߊߡߋ ߏߤߍߣ ߝߌߙߌ߲ߔߐ߲߫ ߠߋ߬ ߡߌ߬ߣߊ߬ ߘߊ߫ ߛ߭ߌߔߐߟ ߛߊ߲ߡߊߘߊ߲ ߠߊ߫߸ ߊߡߛߑߕߍߙߑߘߊߡ، ߊ߬ߟߋ ߦߋ߫ ߊߛߊ߲ߕ ߊߞߌߦߋߡ ߞߐ߰ߘߎ߮ ߥߛߊ߬ߘߋ߲ ߠߋ߬ ߘߌ߫، ߒ߬ߓߊ߬߸ ߊ߲ ߞߊ߬ ߟߌ߬ߤߟߊ ߣߌ߲߬ ߛߐ߬ߘߐ߲߬ ߜ߭ߊ߯ߣߊ߬ ߞߎߡߊߞߍߓߏ߲ ߞߏߟߊߕߍ߮ ߟߎ߫ ߟߋ߬ ߟߊ߫، ߡߌ߬ߣߊ߬ߟߌ ߣߍ߲߬ ߞߍߣߍ߲߫ ߊߡߋߙߌߞߌ߬ ߟߊ߫ ߞߙߎߝߊ ߟߊ߫ ߘߐ߬ߛߏ߰ߙߋ߬ߟߌ߬ ߛߓߍߘߊ ߟߋ߬ ߓߟߏ߫ (ߞߘߛ = FBI)߸ ߊ߬ߟߎ߬ ߟߊ߫ ߡߊ߲߬ߕߏ߲߬ߕߍ߬ ߘߐ߬ߛߏ߰ߙߋ߬ߟߌ ߘߏ߫ ߛߋ߲߭ߝߍ߬.

ߡߍ߲ ߠߎ߬ ߦߋ߫ ߛߌߦߊߡߊ߲߫ ߞߊ߬ߟߊߡߊ߬ ߣߌ߲߬ ߞߏ ߘߐ߫߸ ߏ߬ ߟߎ߬ ߟߊ߫ ߝߐߟߌ߫ ߘߐ߫߸ ߞߕߌ߫ ߞߏ ߣߌ߲߬ ߢߊߢߌߣߌ߲ߠߌ߲ ߠߎ߬ ߛߊ߲߬ ߞߋߟߋ߲ ߠߋ߬ ߛߋ߲߬ߠߊ߫ ߕߋ߲߬، ߊ߬ ߘߏ߲߬ ߞߏߢߊ߫ ߛߌߦߊߡߊ߲߫ ߞߎߡߊ ߦߴߊ߬ ߘߐ߫߸ ߣߊ߲߬ߝߟߏ߬ ߞߏ ߞߎ߲߬ߞߏ߬ߕߐ߬ߦߊ ߟߎ߬ ߦߴߊ߬ ߘߐ߫߸ ߦߏ߫ ߜߍߟߊߜߍ߫ ߞߏ ߦߴߊ߬ ߘߐ߫߸ ߜߍߙߍ߲ߞߍߟߌ ߝߣߊ߫ ߦߴߊ߬ ߘߐ߫ ߓߟߐߟߐ ߞߊ߲߬، ߓߌ߬ߟߊ߬ ߞߍߣߴߊ߬ ߞߐ߫ ߞߏ ߡߍ߲ ߘߐ߫߸ ߊ߬ ߥߊߘߌ߫ ߞߏ ߘߌ߫ ߥߊ߫ ߤߊ߲߯ ߘߟߊ߫ ߞߋ߲߬ߥߟߎ߬ ߃߂߸ ߣߴߏ߬ ߦߋ߫ ߖߌ߬ߣߍ߬ ߕߊߡߊ߲ ߥߟߎ߬ߡߊ߫ ߂߇߅ ߢߐ߲߰ ߘߌ߫، ߕߋ߲߭ߕߋ߲߭ ߣߌ߲߬ ߞߏ߬ߣߌ߲ ߘߐ߫߸ ߡߊ߬ߝߌ߲߬ߞߊ߲߬ߠߊ ߏ߬ ߟߎ߬ ߞߎߡߊ߫ ߡߊ߫ ߝߐ߫ ߣߍߙߑߟߊ߲ߘ ߝߊ߰ߡߊ ߟߎ߬ ߓߟߏ߫ ߡߎߣߎ߲߬߸ ߞߎߡߊߕߍ߫ ߞߘߛ ߡߊ߬߸ ߊ߬ߟߎ߫ ߘߏ߲߬ ߡߴߊ߬ ߟߊߕߍ߰ ߣߌ߫ ߕߎ߬ߢߊ߫ ߟߋ߬ ߥߟߊ߫ ߏ߬ ߕߍ߫߸ ߗߍ߭ ߞߏ߬ߣߌ߲ ߦߴߊ߬ߟߎ߬ ߓߟߏ߫.

ߒ߬ߓߊ߬߸ ߟߊ߬ߛߋ߬ߟߌ߬ ߟߊߜߏ߲ߘߏߣߍ߲ ߘߏ߫ ߞߍ߫ ߘߊ߫ ߜ߭ߊ߫ߣߊ߬ ߞߎߡߊߞߍߓߏ߲ ߓߟߏ߫߸ ߏ߬ ߟߎ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߟߊߟߐ߲ߠߌ߲߫ ߘߊ߫߸ ߞߊ߬ ߝߐ߫ ߞߏ߫ ߥߛߊ߬ߘߋ߲ ߘߏ߫ ߓߘߊ߫ ߡߌ߬ߣߊ߫ ߞߵߊ߬ ߟߊߞߘߎ߬߸ ߊ߬ߟߎ߬ ߦߴߊ߬ ߞߊ߲߬ ߞߵߊ߬ ߞߏ ߢߊߢߌߣߌ߲߫ ߛߴߊ߬ߟߎ߬ ߘߴߊ߬ ߢߊߘߐߜߍ ߟߐ߲߫، ߟߊ߬ߛߋ߬ߟߌ ߏ߬ ߞߟߊ߬ߣߐ߬ߦߊ߬ ߘߊ߫ ߞߎߡߊߞߍߓߏ߲ ߞߕߌߛߓߍߟߊ ߟߋ߬ ߓߟߏ߫߸ ߋߓߍߣߑߖ߭ߍߙ ߊߤߎߡߊ ߖߌߦߋߕߙߐߙ، ߊ߬ ߦߌ߬ߘߊ߬ ߘߊ߫ ߟߊ߬ߛߋ߬ߟߌ߬ ߛߓߍ ߣߌ߲߬ ߞߣߐ߫߸ ߞߏ߫ ߞߎߡߊߞߍߓߏ߲ ߞߊ߲ߕߌ߮ ߓߊ߬߸ ߊ߬ ߣߴߊ߬ ߞߏߟߊߕߍ߮ ߟߎ߬߸ ߏ߬ ߟߎ߬ ߣߌ߫ ߜ߭ߊ߯ߣߊ߬ ߟߊ߬ߛߌ߰ߘߊ ߦߋ߫ ߢߐ߲߯ ߞߊ߬ߟߊߡߊ߬ ߣߌ߲߬ ߞߏߢߊ ߘߐ߫ ߟߊ߬ ߤߊߦߌ߬ ߟߊ߫.

ߊ߬ ߛߓߍߣߍ߲߫ ߛߓߍ ߣߌ߲߬ ߞߣߐ߫ ߞߏ߫: <<ߞߎߡߊߞߍߓߏ߲ ߦߴߊ߬ ߞߊ߲߬ ߞߊ߬ ߣߌ߲߬ ߞߏ ߢߊ߫ ߖߐ߲ߖߐ߲ ߟߎ߬ ߢߊߢߌߣߌ߲߫ ߞߵߊ߬ ߟߐ߲߫ ߊ߬ ߡߌ߬ߣߊ߬ߣߍ߲߫ ߞߎ߲߬ ߞߋߟߋ߲ ߡߍ߲ ߠߊ߫߸ ߊ߬ ߣߌ߫ ߞߵߊ߬ ߟߐ߲߫ ߣߌ߫ ߛߙߊߕߌ߫ ߖߐ߲ߖߐ߲ ߠߎ߬ ߡߊߓߏ߲߬ߧߊ߬ ߘߊ߫߸ ߞߊ߬ ߓߍ߲߬ ߥߛߊ߬ߘߋ߲ ߠߊ߫ ߓߐߒߣߘߐ ߡߊ߬ ߞߊ߬ ߕߊ߯ ߔߋߦߌߓߊ߫.>>

ߜ߭ߊ߯ߣߊ߬ ߝߊ߰ߡߊ ߟߎ߫ ߞߏ߬ߣߌ߲ ߡߴߊ߬ ߝߐ߫ ߞߵߊ߬ ߟߊߕߍ߰߸ ߣߌ߫ ߥߛߊ߬ߘߋ߲߫ ߞߑߥߊߡߋ߫ ߥߊߣߍ߲߫ ߕߍ߬ߘߍ߫ ߞߎ߲߬ߠߊ߬ߛߌ߮ ߟߊ߫ ߕߊ߯ߡߊ ߟߋ߬ ߘߐ߫߸ ߥߟߊ߫ ߘߎ߲߬ߘߎ߬ߡߊ߬ߕߊ ߟߋ߬߸ ߊ߬ ߡߌ߬ߣߊ߬ ߕߎߡߊ ߟߊ߫.

ߣߌ߲߬ ߞߏߢߊ ߞߏ߬ߣߌ߲ ߜߊ߬ߣߍ߲߫ ߠߋ߬ ߜ߭ߊ߯ߣߞߊ ߛߌߦߊߡߊ߲߫ ߠߊ߫߸ ߓߍ߯ ߢߊ ߦߴߊ߬ ߞߏ ߝߍ߬، ߝߣߊ߫߸ ߓߍ߯ ߦߋ߫ ߡߍ߲ ߢߌߣߌ߲ ߞߊ߲߬߸ ߏ߬ ߟߋ ߊ߬ ߞߏ ߟߊߕߊ߬ߡߌ߲ ߘߌ߫ ߜߍߦߊ ߞߣߐ߫، ߞߎߡߊߞߍߓߏ߲ ߞߏ߬ߣߌ߲ ߞߊ߲߫ ߞߏ߫ ߊ߬ߟߎ߬ ߦߋ߫ ߕߡߊ߬ߖߌ ߓߐ߫ ߓߍ߯ ߘߐ߫߸ ߊ߬ߟߎ߬ ߘߴߊ߬ߟߎ߬ ߞߊߘߊ߲߫ ߞߊ߬ ߟߌ߬ߤߟߊ߬ ߖߐ߲ߖߐ߲ ߠߎ߬ ߢߌߣߌ߲߫ ߊ߬ ߞߏ ߞߊ߲߬߸ ߞߵߏ߬ ߝߣߊ߫ ߞߍ߫ ߊ߬ ߕߊ߫ ߟߊ߬ߛߋ߬ߟߌ߬ ߘߍ߫ ߞߊ߬ ߓߍ߲߬ ߢߊߢߌߣߌ߲ߠߌ߲ ߥߊ߫ ߗߏ߮ ߡߊ߬.