ߞߎߘߊ߫ ߓߘߊ߫ ߓߌ߬ߟߊ߫ ߝߊ߬ߙߊ߲߬ߛߌ߬ ߞߊ߲ߕߌ߯ ߞߘߐ ߣߌߞߏߟߊ߫ ߛߊߙߑߞߏߖ߭ߌ߫ ߟߊ߫ ߞߏ ߘߐ߫، ߓߊߏ߬߸ ߞߕߌߓߋߟߋ߲ ߓߘߊ߫ ߖߊ߲߬ߞߟߌ߬ ߜߌߟߌ߲߫ ߝߐ߫ ߊ߬ ߝߍ߬߸ ߞߵߊ߬ ߞߍ߫ ߏ߬ ߘߐ߫ ߛߊ߫ ߦߏ߫ ߡߎ߬ߥߊ߬ߡߊߙ ߞߘߊߝߌ߫ ߣߐ߲߬ߕߐ߲ ߠߋ߬ ߦߋ߫ ߗߍ߭ ߣߌ߲߬ ߞߐ߫ ߕߋ߲߬، ߊ߬ ߟߊ߫ ߡߊ߬ߞߊ߲߬ߞߊ߲߬ߠߌ߲ ߣߴߊ߬ ߕߊ߫߸ ߊ߬ߟߎ߫ ߘߊ߬ߟߎ ߟߎ߬ ߡߊ߫ ߛߋ߫ ߝߊߘߌ߲ߧߊ߫ ߟߊ߫ ߡߎߣߎ߲߬ ߞߊ߬ ߞߕߌߟߊߟߊ ߟߎ߬ ߢߊߞߘߐߛߋ߫، ߞߕߌ߫ ߡߛߊߦߌ߲ ߣߴߊ߬ ߕߊ߫߸ ߊ߬ ߡߊߝߌ߲߬ߣߍ߲߫ ߞߏ ߡߍ߲ ߠߎ߬ ߘߐ߫߸ ߏ߬ ߟߎ߬ ߦߴߊ߬ߟߎ߬ ߢߊ ߡߊ߬ ߡߎߣߎ߲߬ ߖߐ߫߸ ߝߏ߫ ߥߛߎ߫ ߓߘߊ߫ ߝߐ߫ ߊ߬ ߝߍ߬߸ ߡߍ߲ ߢߐ߲߰ ߡߊ߫ ߝߐ߫ ߊ߬ ߝߍ߬ ߞߕߌ ߟߊ߫ ߦߙߐ߫ ߝߟߐ ߘߐ߫ ߞߕߌߘߊ ߦߌߟߡߊ߫ ߝߟߐ ߟߊ߫.

ߊ߬ ߕߎ߲߬ ߓߘߊ߫ ߖߊ߲߬ߞߌ߲߫ ߔߊ߬ߙߌ߬ ߖߏ߯ߘߏ߲ ߞߕߌߘߊ ߞߘߐ߬ߡߊ߲߬، ߣߌߞߏߟߊ߫ ߛߊߙߑߞߏߖ߭ߌ ߓߘߴߊ߬ ߕߐ߮߮ ߕߏ߫ ߝߊ߬ߙߊ߲߬ߛߌ߫ ߘߝߐ߬ ߖߎ߮ ߘߐ߫߸ ߊ߬ ߞߍ ߞߏߛߐ߲߬ ߝߊ߬ߙߊ߲߬ߛߌ߬ ߞߊ߲ߕߌ߯ ߝߟߐߝߟߐ߫ ߘߌ߫߸ ߡߍ߲ ߠߊߞߘߎ߬ ߘߊ߫ ߥߛߎ ߟߊ߫߸ ߞߊ߬ ߕߋ߬ߟߋ߫ ߡߎ߬ߥߊ߲߫ ߖߊ߬ߣߍ߲߬ ߞߍ߫ ߟߊ߬ߡߙߊ ߘߐ߫، ߞߏ߬ߣߌ߲߬ ߞߏߢߊ ߡߍ߲ ߦߋ߫ ߕߋ߲߬߸ ߊ߬ ߣߌ߫ ߓߊ߲ ߕߍ ߦߊ߫ ߖߊ߲߬ ߡߎߣߎ߲߬߸ ߊ߬ ߝߊ߬ߟߌ߬ ߞߟߍ߬ߟߊ߬ߡߊ ߟߋ߬، ߊ߬ ߞߍߣߍ߲߫ ߦߏ߫ ߊ߬ ߓߍߣߵߊ߬ ߞߐߥߟߏ߫ ߞߏߞߎߘߊ߫߸ ߦߏ߫ ߞߊ߲߬ߘߏ߬ ߞߊ߲ ߦߋ߫ ߖߊ߲߬ߝߊ߬ ߟߊ߫ ߢߊ ߡߍ߲.

ߞߕߌ ߡߍ߲ ߦߋ߫ ߣߌ߲߬߸ ߊ߬ ߞߊߙߏ߫ ߝߌ߬ߟߊ ߟߋ߬ ߕߋ߲߬߸ ߊ߬ ߞߏ ߦߋ߫ ߛߋ߲߬ߠߊ߫߸ ߊ߬ ߞߏ߬ߣߌ߲ ߘߌߣߊ߬ ߞߎ߲߭ߘߏ߲߬ ߞߎ߲߬ߢߐ߲߯ ߝߌ߬ߟߊ߬ ߞߣߐ߫߸ ߣߌ߫ ߡߞߊ߬ߛߌ߬ߒ߬ߞߊ߲߬ߓߊ߰ߕߐ ߟߊ߫ ߟߊ߬ߝߛߊ߬ߟߌ߬ߟߊ߫ ߡߐ߰ ߕߊ߲ ߓߊ߲߫ ߘߊ߫ ߡߞߊ߬ߘߊ߲߬ߞߊ߲߬ߝߐ ߟߊ߫ ߕߎ߬ߡߊ ߡߍ߲ ߠߊ߫ ߞߊ߬ߣߌ߲߬، ߞߕߌ߫ ߡߛߊߦߌ߲ߘߊ ߟߊ߫ ߞߕߌ߫ ߕߍ߮ ߡߊߞߐ߬ߣߐ߲߬ߣߍ߲߫ ߣߍߣߍߓߊ ߕߟߋ߬ ߃߀ ߣߊ߬ߕߐ ߟߋ߬ ߡߊ߬، ߊ߬ ߘߏ߲߬ ߓߘߊ߫ ߦߋ߫߸ ߞߏ߫ ߊ߬ ߣߌ߫ ߟߓߌ߫ ߞߊ߬ ߓߍ߲߬ߞߊ߲߫ ߠߋ߬ ߘߐߛߘߊ߫ ߘߓߌ߬ ߘߐ߫ ߝߛߊߦߌ߫߸ ߏ߬ ߟߋ ߓߘߊ߫ ߕߊ߬ߡߌ߲߫ ߢߊ߬ߡߊ߲ ߟߊ߫ ߟߊ߫ ߣߌ߲߬ ߞߏ ߟߊ߫ ߕߋ߲߬.

ߞߕߌ߫ ߞߋߟߋ߲ ߣߌ߲߬ ߘߐ߫߸ ߝߘߏ߬ߓߊ߬ ߞߕߌߓߋߟߋ߲ ߞߵߊ߬ ߝߐ߫ ߟߋ߬ ߞߏ߫ ߞߊ߬ ߛߊ߲߬ ߥߐ߯ߙߐ߫ ߥߛߎ ߟߊ߫ ߞߑߟߏߘ ߖߋߦߊ߲߫ ߞߎ߲߬߸ ߞߊ߬ ߛߊ߲߭ ߝߌ߬ߟߊ߬ ߟߊ߫ ߓߙߌߛ ߤߐߙߑߕߝߋ߫ ߞߎ߲߬، ߝߘߏ߬ߓߊ߬ ߞߕߌߓߋߟߋ߲ ߞߵߊ߬ ߟߊߢߌߣߌ߲߫ ߝߣߊ߫߸ ߞߏ߫ ߓߌ߲߬ߓߊߥߏ ߡߍ߲ ߠߎ߬ ߝߐ߫ ߘߊ߫ ߞߕߌߘߊ ߦߌߟߡߊ߫ ߝߟߐ ߟߊ߫߸ ߞߏ߫ ߞߵߏ߬ ߟߋ ߟߊߕߊ߯ߡߊ߫ ߛߊߙߑߞߏߖ߭ߌ߫ ߞߙߍ߬ߝߍ߬ ߡߐ߮ ߟߎ߫ ߞߊ߲߬ ߖߐ߫.