߂߀߂߄ ߞߏ߲ߞߏߜߍ ߟߋ߬ ߟߊ߫߸ ߛߙߎߓߊ߲ߣߍ߲߫ ߛߊ߲߬ ߥߐ߯ߙߐ ߘߏ߫߸ ߊ߬ ߕߐ߯ ߞߏ߫ ߖߐߛ߭ߑߟߌ߲߫ ߛߑߡߌߕ، ߏ߬ ߟߋ ߕߎߣߎ߲߫ ߘߊ߫ ߞߣߐ߬ߘߐ߬ߝߟߌ߬ ߓߟߏ ߡߊ߬ ߛߊߟߑߘߊ߲ߤߊ߫ ߓߊߦߌ߫ ߘߎ߱ ߞߣߐ߫߸ ߥߙߏ߬ߘߎ߰ ߊߝߙߌߞߌ߬ ߖߡߊ߬ߣߊ ߞߊ߲߬، ߛߊ߲߭ ߝߌ߬ߟߊ߫ ߕߊ߬ߡߌ߲ ߞߐߝߍ߬ ߏ߬ ߘߐ߫߸ ߂߀߂߆ ߢߌ߲߬ ߠߊ߫߸ ߊ߬ ߛߐ߬ߘߐ߲߬ ߣߊ ߕߊ߬ߣߍ߲ ߞߵߊ߬ ߟߴߊ߬ ߛߋ߲߬ߘߏ߲߬ߢߐ߲߯ ߡߐ߰ ߝߌ߬ߟߊ߬ ߜߘߍ߫ ߞߊ߲߬߸ ߏ߬ ߟߎ߫ ߖߊ߲߬ߞߌ߲߬ ߘߊ߫ ߞߵߊ߬ߟߎ߫ ߓߌ߬ߟߊ߬ ߥߛߎ߫ ߘߎߡߊߣߍ߲ ߠߊ߫߸ ߡߐ߱ ߟߊߕߎߣߎ߲ ߣߌ߫ ߡߐ߱ ߕߣߐ߬ߓߌߘߌ߲ ߞߏߛߐ߲߬ ߊ߬ߟߎ߬ ߓߟߏ߫، ߓߊ߬ߙߌ߬߸ ߘߋ߲ߣߍ߲ ߦߋߣߍ߲߫ ߕߍ߫ ߡߎߣߎ߲߬ ߘߋ߬.

ߘߋ߲ߣߍ߲ ߕߎߣߎ߲ ߛߊ߲߭ ߝߌ߬ߟߊ ߣߌ߲߬ ߞߣߐ߫߸ ߊ߬ ߡߊ߬ߡߊ߬ߡߛߏ߫ ߕߍ߬ߘߍ߫ ߊ߬ ߟߊ߫ ߞߏ ߢߊߢߌߣߌ߲ ߞߊ߲߬ ߏ߬ ߓߍ߯ ߞߘߐ߫، ߞߊ߬ߕߎ߲߯߸ ߊ߬ߟߎ߬ ߟߊ߫ ߛߏ ߦߋ߫ ߛߣߐ߬ߡߐ߬ ߛߏ ߟߋ߬ ߘߌ߫ ߟߌ߲ߓߊ߲߫ ߡߊ߲ߞߊ߲ ߞߐ߰ߖߌ߬ߘߊ ߟߊ߫.

ߘߋ߲ߣߍ߲ ߣߌ߲߬ ߕߎߣߎ߲߫ ߘߊ߫ ߂߀߂߄ ߞߏ߲ߞߏߜߍ ߟߋ߬ ߟߊ߫߸ ߞߊ߬ ߖߐߛ߭ߑߟߌ߲߫ ߛߑߡߌߕ ߛߌ߬ߞߛߊߓߌ ߕߏ߫ ߛߊ߲߬ ߆ ߘߐ߫، ߊ߬ ߣߊ߫ ߕߐ߯ ߞߏ߫ ߙߊߞߍߟ ߛߑߡߌߕ߸ ߡߐ߱ ߟߎ߬ ߦߴߊ߬ ߞߟߌ߫ ߟߊ߫ ߞߏ߫ <<ߞߋߟߌ߫>>، ߊ߬ ߛߐ߬ߘߐ߲߬ ߣߊ ߏ߬ ߟߋ ߖߍ߬ߘߍ ߥߊ߫ ߘߴߊ߬ ߕߎߣߎ߲߫ ߞߏ ߟߊߛߋ߫߸ ߞߊ߬ ߛߐ߬ߘߐ߲߬ ߊ߬ ߢߌߣߌ߲ ߘߐ߫ ߝߣߊ߫.

ߒ߬ߓߊ߬߸ ߞߏߢߊߢߌߣߌ߲ߠߊ ߟߎ߫ ߟߋ߬ ߞߵߊ߬ߟߎ߬ ߓߟߏ ߟߊ߫ ߞߎߡߊ ߘߏ߫ ߘߐ߫ ߛߊ߫߸ ߞߊ߬ ߥߴߊ߬ ߦߋ߫ ߞߏ߫ ߘߋ߲ߣߍ߲ ߛߐ߬ߘߐ߲߬ ߣߊ ߙߊߞߍߟ ߛߑߡߌߕ ߖߍ߬ߘߍ ߓߊ߬߸ ߊ߬ ߣߌ߫ ߡߐ߰ ߝߌ߬ߟߊ߬ ߜߘߍ߫߸ ߊ߬ ߖߋ߬ߕߌ߰ߞߍ߫ ߖ߭ߊߞߍ߲ ߊߔߏߟߌ߫߸ ߊ߬ ߣߌ߫ ߛߑߕߝ߭ߋߣߏ ߘߎߡߊߦߖ߭ߌߦߏ ߝ߭ߊ߲߭ ߙߌ߲߫، ߖߊ߰߸ ߊ߬ߟߎ߫ ߡߐ߰ ߛߊ߬ߓߊ ߟߋ߬ ߣߐ߬ ߘߋ߲ߣߍ߲ ߝߙߋ߬ ߟߊ߫ ߛߏߡߊ ߘߏ߫ ߡߊ߬ ߊ߬ߟߎ߬ ߟߊ߫ ߖߡߊ߬ߣߊ ߥߊߘߌ (ߙߊ߲ߘ) ߂߀ ߀߀߀ ߠߊ߫߸ ߏ߬ ߡߍ߲ ߦߋ߫ ߓߍ߲߬ ߠߊ߫ ߋߙߏ ߉߅߀ ߡߊ߬߸ ߥߟߊ߫ ߖߌ߬ߣߍ߬ ߕߊߡߊ߲ ߞߋ߲߬ߥߟߎ߬ ߕߊ߲߫ ߢߐ߲߰. ߞߊ߬ߕߎ߲߯߸ ߛߏߡߊߗߍ ߞߊ߬ ߘߋ߲ߣߍ߲ ߦߋ߫ ߕߐ߰ߡߊ߬ߛߙߋ߬ߡߊ߫ ߘߌ߫߸ ߡߍ߲ ߘߴߊ߬ ߡߊ߬ߞߏߢߊ߬: ߊ߬ ߢߊߞߌߛߍ ߟߊ߫ ߛߊߣߌ߲ߧߊ߸ ߊ߬ ߣߴߊ߬ ߝߊ߬ߘߌ ߞߍ ߊ߬ ߞߊ߲߬ ߖߓߊ߬ߙߊ߲߬ ߝߊߘߌ ߘߌ߫.

ߒ߬ߓߊ߬߸ ߏ߬ ߟߋ ߞߍ߫ ߊߘ߫ ߕߍ߮ ߞߍߢߊ ߘߌ߫ ߘߋ߲ߣߍ߲ ߣߊ߫ ߣߌ߫ ߡߐ߰ ߝߌ߬ߟߊ ߘߐ ߏ߬ ߟߎ߬ ߘߐ߫߸ ߞߊ߬ ߞߕߌ ߘߊߡߌ߬ߣߊ߬ ߂߀߂߅ ߕߙߊߓߊ ߟߊ߫، ߛߙߋ ߡߍ߲ ߠߎ߬ ߡߊߞߟߌ߫ ߘߊ߫ ߞߕߌ ߣߌ߲߬ ߘߐ߫߸ ߛߙߋ߫ ߡߐ߰ ߓߌߛߓߊ߬ ߣߌ߫ ߟߏ߯ߟߎ߫ ߢߐ߲߰߸ ߏ߬ ߟߎ߬ ߓߍ߯ ߞߎߡߊ߫ ߘߊ߫، ߞߕߌߕߍ߯ߟߊ߫ ߣߊߕߊ߲ ߋߙߊߡߎߛ ߞߵߊ߬ߟߎ߬ ߓߍ߯ ߟߊߡߍ߲߫߸ ߞߊ߬ ߞߏ ߟߎ߬ ߡߊߝߟߍ߫߸ ߞߊ߬ ߣߊ߬ ߞߕߌߕߍ߰، ߂߀߂߅ ߘߓߊ߬ߕߊ ߟߋ߬ ߟߊ߫߸ ߊ߬ ߞߊ߬ ߞߕߌߕߍ߰ ߞߵߊ߬ ߦߌ߬ߘߊ߬ ߞߏ߫ ߘߐ߬ߢߌ߬ߡߌ߲߬ߠߌ߲ ߓߍ߯ ߞߐߝߍ߬߸ ߙߊߞߍߟ ߛߑߡߌߕ ߣߴߊ߬ ߛߋ߲߬ߘߏ߲߬ߢߐ߲߯ ߡߐ߰ ߝߌ߬ߟߊ ߛߐ߲߭ ߓߘߊ߫ ߦߋ߫ ߞߏ߫ ߘߐ߫߸ ߊ߰ ߝߐ߫ ߟߊ߫ ߡߍ߲ ߡߊ߬ ߞߏ߫ ߡߐ߱ ߕߣߐ߬ߓߌߘߌ߲ ߣߌ߫ ߟߊ߬ߕߎ߬ߣߎ߲߬ߠߌ߲.

ߊ߬ߟߎ߬ ߟߊ߫ ߞߕߌ ߕߍ߰ ߟߏ߲߸ ߖߡߊ߬ ߛߌߦߊߡߊ߲߫ ߕߘߍ߬ ߞߣߍ ߞߊ߲߬ ߦߋ߲߬߸ ߞߊ߬ ߝߏ߮ ߝߊ߫ ߞߵߊ߬ ߘߡߊߛߙߊߓߊ ߟߊ߫، ߏ߬ ߞߍ߫ ߘߊ߫ ߝ߭ߙߋߘߋ߲ߓߎߙߖ߭ ߞߕߌߘߊ ߟߋ߬ ߟߊ߫. ߊ߬ߟߎ߫ ߞߵߊ߬ߟߎ߫ ߖߊ߲߬ߞߌ߫ ߞߊ߬ ߥߛߎ߫ ߘߎߡߊߣߍ߲ ߠߋ߬ ߟߴߊ߬ߟߎ߫ ߞߎ߲߬.

ߞߕߌ ߓߘߊ߫ ߕߍ߰ ߝߋߎ߫߸ ߓߊ߬ߙߌ߬ ߘߋ߲ߣߍ߲ ߡߊ߫ ߦߋ߫ ߡߎߣߎ߲߬، ߊ߬ ߝߊ߰ߣߍ߲߫ ߠߋ߬ ߥߟߴߊ߬ ߓߊߟߏߣߍ߲߫ ߠߋ߬߸ ߏ߬ ߟߐ߲ߣߍ߲߫ ߕߍ߫، ߊ߬ ߞߏ߬ߣߌ߲ ߂߀߂߆ ߓߌ߲ߠߊߥߎߟߋ߲ ߠߊ߫߸ ߥߙߏ߬ߘߎ߰ ߊߝߙߌߞߌ߬ ߝߊ߬ߘߌ߬ߡߊ߬ߞߟߏ ߞߏߕߌ߮߸ ߜ߭ߊߦߌߕߐ߲ ߍߡߑߛߋ ߞߋ߲ߖ߭ߌ߫ ߞߵߊ߬ ߦߌ߬ߘߊ߬ ߞߏ߫ ߊ߬ ߓߘߊ߫ ߟߌ߬ߤߟߊ ߘߏ߫ ߛߐ߬ߘߐ߲߬߸ ߊ߬ ߟߊߣߍ߲߫ ߡߍ߲ ߠߊ߫߸ ߊ߬ ߝߐߣߍ߲߫ ߏ߬ ߞߣߐ߫ ߞߏ߫ ߦߙߐ ߘߏ߫ ߓߘߊ߫ ߟߊߞߏߟߐ߲߫߸ ߘߋ߲ߣߍ߲ ߘߌ߫ ߞߍ߫ ߦߋ߲߬، ߞߏߕߌ߮ ߡߊ߫ ߢߊߝߐߟߌ߫ ߘߐߘߎ߲߬ߧߊ߬ߣߍ߲߬ ߝߏߦߌ߬ ߞߍ߫ ߣߌ߲߬ ߞߏ ߞߊ߲߬، ߊ߬ ߞߏ߬ߣߌ߲߸ ߥߍߛߑߕߍߙߣ ߞߊߔ ߕߐ߲ߓߟߏߡߊ ߟߎ߬ ߞߊ߲߫ ߞߏ߫ ߊ߬ߟߎ߬ ߦߴߊ߬ ߡߍ߲߫ ߠߊ߫ ߘߏ߫ ߟߎ߫ ߟߊ߫ ߞߏ߫ ߊ߬ ߛߎ߭ ߓߘߊ߫ ߦߋ߫، ߞߏ߫ ߥߎ߬ߣߎ߲߬ߥߎ߬ߣߎ߲߬ ߞߎߡߊ ߏ߬ ߕߍ߫ ߛߥߊ߬ߓߊ߬ ߘߌ߫.

ߊ߲ ߧߋ߫ ߦߙߐ ߡߍ߲ ߞߏ߬ߣߌ߲ ߘߐ߫ ߕߋ߲߬߸ ߘߋ߲ߣߍ߲ ߡߊ߬ (ߊ߬ ߝߊ߬ ߣߊ߫) ߞߊ߲߫ ߞߏ߫ ߊ߬ ߕߴߊ߬ ߓߟߏ ߟߴߊ߬ ߛߋ߲߭ ߞߊ߲߬ ߣߌ߲߬ ߞߏ ߘߐ߫߸ ߝߏ߫ ߘߋ߲ߣߍ߲ ߦߋ߫ ߦߋ߫ ߟߋ߬، ߊ߬ ߘߏ߲߬ ߟߊߣߴߊ߬ ߟߊ߫߸ ߊ߬ ߘߌ߫ ߦߋ߫ ߟߋ߬ ߘߍ߯.

ߞߏ߫ ߛߎ߮ ߢߌ߲߬ ߠߎ߬ ߞߍߟߌ ߞߊ߫ ߛߌߦߊ߫ ߓߊߟߋ߬ ߥߙߏ߬ߘߎ߰ ߊߝߙߌߞߌ߬ ߞߊ߲߬ ߦߋ߲߬߸ ߞߊ߬ ߘߋ߲ߣߍ߲ ߠߎ߬ ߕߊ߬ ߛߐ߲߬ ߞߵߊ߬ߟߎ߫ ߘߏ߲߬ ߓߊߛߌ߫ ߞߏ ߘߊ ߟߊ߫، ߏ߬ ߟߋ ߘߐ߫߸ ߘߋ߲ߣߍ߲ ߠߎ߬ ߣߌ߫ ߟߐ߬ߦߙߌ߬ߕߐ ߟߎ߬ ߡߞߊߘߊ߲߫ ߕߐ߲ ߡߍ߲ ߠߎ߬ ߦߋ߫ ߖߡߊ߬ߣߊ ߞߣߐ߫߸ ߏ߬ ߟߎ߫ ߞߵߊ߬ ߦߌ߬ߘߊ߬ ߞߏ߫ ߝߏ߫ ߞߊ߬ ߣߌ߲߬ ߞߕߌ ߞߍ߫ ߟߋ߬߸ ߞߊ߬ ߥߛߎ߫ ߜߌߟߌ߲ ߓߋ߬ ߡߏ߬ߛߏ ߣߴߊ߬ ߞߏߟߊߘߍߢߐ߲߮ ߠߎ߬ ߞߊ߲߬.

ߊ߬ ߞߏ߬ߣߌ߲߸ ߖߡߊ߬ߣߊ ߓߘߴߊ߬ ߛߋߞߏ ߞߍ߫ ߞߊ߬ ߞߕߌ ߟߊ߫߸ ߞߊ߬ ߡߏ߬ߛߏ ߓߌ߬ߟߊ߬ ߥߛߎ߫ ߘߎߡߊߣߍ߲ ߠߊ߫، ߒ߬ߞߊ߬߸ ߊ߬ߟߎ߬ ߡߊ߫ ߛߋ߫ ߘߋ߲ߣߍ߲ ߢߌߣߌ߲߫ ߠߊ߫ ߛߊ߲߭ ߝߌ߬ߟߊ ߣߌ߲߬ ߞߣߐ߫ ߞߵߊ߬ ߟߊߓߐ߫ ߝߋߎ߫.