ߞߊ߲ߞߊ߲߫ ߞߣߐ߫߸ ߞߕߌ ߞߏߟߊߕߍ߮ ߣߌ߫ ߕߊ߬ߡߌ߲߬ߘߊ ߞߏߟߊߕߍ߮ ߟߎ߬ ߞߊ߬ ߝߋ߲ ߘߏ߫ ߟߎ߫ ߟߋ߬ ߦߌ߬ߘߊ߫ ߝߐ߰ߓߍ߬ߦߊ߬ߟߊ ߟߎ߬ ߟߊ߫ ߓߌߟߏ߲ ߣߌ߲߬ ߡߊ߬ ߂߀߂߆ ߘߓߊ߬ߕߊ ߕߟߋ߬ ߇߸ ߓߊߛߌ߫ ߘߏߣߌ߲ ߘߏ߫ ߟߎ߫ ߟߋ߬ ߕߋ߲߬߸ ߡߍ߲ ߠߎ߬ ߕߍ߫ ߓߍ߲߬ ߟߊ߬ߓߊ߰ߙߊ߬ߟߌ ߣߌ߫ ߕߊ߬ߟߌ ߘߊߞߎ߲ ߘߐ߫ ߡߎ߬ߕߎ߲߬߸ ߏ߬ ߟߎ߫ ߟߋ߬ ߡߌ߬ߣߊ߬ߣߍ߲߫ ߖߌ߬ߣߍ߫ ߕߊ߬ߡߌ߲߬ߘߊ ߘߏ߲߬ߞߏ ߟߎ߬ ߓߟߏ߫، ߊ߬ߟߎ߬ ߦߙߌߞߊ ߦߋ߫ ߝߎߝߎ߫ ߁߇߁ ߠߋ߬ ߘߌ߫߸ ߓߊߛߌ ߟߎ߬ ߣߌ߫ ߘߊ߲ߘߊߟߌ߫ ߖߐ߯ߙߊ߲ ߘߏ߫ ߟߎ߫ ߟߋ߬߸ ߡߍ߲ ߠߎ߬ ߓߕߐ߫ ߕߘߍ߬ ߝߙߊߣߊ߫ ߞߊ߬ ߣߊ߬ ߞߊ߲ߞߊ߲߫ ߞߣߐ߫، ߝߊ߰ߡߊ ߟߎ߬ ߟߊ߫ ߝߐߟߌ߫ ߘߐ߫߸ ߝߎߝߎ߫ ߝߌ߬ߟߊ߬ ߔߋ߫ ߟߋ߬ ߦߋ߫ ߁߇߁ ߣߌ߲߬ ߘߐ߫߸ ߡߍ߲ ߘߌ߫ ߛߋ߫ ߓߌ߬ߟߊ߬ ߟߊ߫ ߘߊ߲ߘߊߟߌ ߞߊ߬ߘߊ߲ ߞߣߐ߫߸ ߊ߬ ߕߐ߭ ߛߌ߫ ߡߊ߲߫ ߘߌ߫ ߖߊ߬ߡߊ ߟߊ߫ ߞߍ߲ߘߍߦߊ ߟߊ߫.

ߓߊߛߌ ߢߌ߲߬ ߠߎ߫ ߦߌ߬ߘߊ߬ ߘߊ߫ ߕߊ߬ߡߌ߲߬ߘߊ ߛߋ߲߬ߘߐ߬ ߓߙߌߝߐߝߐ߫ ߕߌ߲߬ߞߎ߬ߘߎ߲߬ߠߊ߬ߞߊ ߡߊߞߍ߫ ߦߌߟߊ ߟߋ߬ ߘߐ߫ ߞߊ߲ߞߊ߲ߞߎߘߊ߫߸ ߡߍ߲ ߞߍ߫ ߘߊ߫ ߞߊ߲ߞߊ߲߫ ߞߕߌߘߊ ߦߌߟߡߊ߫ ߝߟߐ ߞߊ߲ߓߍ߲ ߞߕߌߞߊ߲ߘߊ ߢߊߞߘߐ߫߸ ߞߊ߬ߙߊ߲߬ߡߐ߰ ߝߏߘߋ߬ ߓߌ߲ߕߎ߬ ߞߋߕߊ߬߸ ߊ߬ ߣߌ߫ ߞߊ߲ߞߊ߲߫ ߕߌ߲߬ߞߎߘߎ߲ ߕߊ߬ߡߌ߲߬ߘߊ ߝߘߏ߬ߓߊ߬ ߗߋߕߌ߮߸ ߘߊ߬ߝ߭ߌߘ ߞߋ߬ߡߏ ߝߍ߲߬ߘߎ߬ߣߏ߫.

ߞߕߌߞߊ߲ߘߊ ߟߊ߫ ߝߐߟߌ߫ ߘߐ߫߸ ߡߌ߬ߣߊ߬ߟߌ ߣߌ߲߬ ߞߍ߫ ߘߊ߫ (ߛߞߓߓ) ߟߋ߬ ߓߟߏ߫߸ ߣߊߟߌ߬ߡߎ߲߫ ߛߋ߲߬ߕߘߍ߬ߟߌ߬ ߞߊߟߌ߲ ߓߙߌ߬ߝߐ߬ߝߐ߬ ߓߟߏߡߊߞߊ߬ߣߍ߲ ߘߌ߫߸ ߏ߬ ߟߎ߬ ߡߍ߲ ߠߎ߬ ߦߋ߫ ߕߊ߬ߡߌ߲߬ߘߊ ߓߏߟߏ߲ ߘߏ߫ ߘߌ߫، ߊ߬ߟߎ߬ ߟߊߛߏ߬ߓߌ ߞߐ ߘߐ߫ ߞߏ߫ ߥߟߏߒߘߐ ߘߏ߫ ߟߎ߫ ߓߕߐ߫ ߖߌ߬ߣߍ߬ ߕߍߡߟߊ ߘߐ߫ ߞߵߊ߬ߟߎ߫ ߞߎ߲߬ߛߌ߲߫ ߖߌ߬ߣߍ߬ ߜߍߞߊ߲ߠߊ ߟߊ߫.

<<ߛߞߓߓ ߡߍ߲ ߦߋ߫ ߕߊ߬ߡߌ߲߬ߘߊ ߟߊ߫ ߓߙߌ߬ߝߐߝߐ ߘߏ߫ ߘߌ߫߸ ߏ߬ ߟߎ߫ ߟߋ߬ ߟߊߟߐ߲ߠߌ߲߫ ߘߊ߫ ߣߌ߲߬ ߞߏ ߟߊ߫، ߊ߬ߟߎ߬ ߝߣߊ߫ ߞߵߊ߬ߟߎ߬ ߛߊ߲ߘߐ߫ ߡߐ߮ ߟߎ߬ ߟߊߟߐ߲ߠߌ߲߫߸ ߏ߬ ߟߋ ߞߍ߫ ߘߊ߫ ߛߏߝߍߞߎߟߎ߲ ߘߏ߫ ߡߌ߬ߣߊ߬ ߘߴߊ߬ߟߎ߬ ߓߟߏ߫߸ ߥߟߏߒߘߐ ߝߎߝߎ߫ ߁߇߁ ߦߋ߫ ߡߍ߲ ߞߣߐ߫.>> ߛߊ߬ߙߌ߬ߦߊ߬ߓߊ߰ߙߊ߬ߟߊ ߣߌ߲߬ ߞߵߏ߬ ߝߐ߫.

ߞߕߌߞߊ߲ߘߊ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߛߊ߬ߙߌ߬ߦߊ߬ ߢߍߡߐ߮ ߟߎ߬ ߞߊ߬ ߞߍ߲ߘߍߦߊ ߓߊ߯ߙߟߊ ߟߎ߬ ߟߊߟߐ߲ߠߌ߲߫߸ ߖߐ߲߰ߛߴߊ߬ߟߎ߬ ߘߌ߫ ߓߊߛߌ ߢߌ߲߬ ߠߎ߬ ߡߊߝߟߍ߫߸ ߞߵߊ߬ߟߎ߬ ߛߎ߮ ߟߊ߫ ߓߘߍ߬ߦߊ ߓߙߍ߬ ߟߐ߲߫.

<<ߌߞߏߡߌ߲߬ ߊ߲ߠߎ߬ ߕߍ߫ ߘߊ߲ߘߊߟߌ ߞߟߊ߬ߡߊ߬ߓߊ߯ ߟߎ߫ ߘߌ߫߸ ߊ߲ ߞߵߊ߬ ߢߌߣߌ߲߫ ߞߊ߲ߞߊ߲߫ ߡߙߊ߬ߘߊ߬ߓߊ ߘߊ߲ߘߊߛߏ ߗߋߕߌ߯ߘߊ ߝߍ߬߸ ߞߏ߫ ߊ߬ߟߎ߬ ߦߋ߫ ߞߍ߲ߘߍߦߊ ߓߊ߯ߙߊߞߍߟߊ߫ ߓߐ߫߸ ߡߍ߲ ߘߌ߫ ߥߟߏߒߘߐ ߢߌ߲߬ ߠߎ߬ ߡߊߝߟߍ߫ ߞߵߊ߬ ߡߙߌߦߊ ߘߌ߫ ߊ߬ ߞߊ߲߬، ߘߊ߲ߘߊߟߌߟߊ ߏ߬ ߟߎ߫ ߞߵߊ߬ ߦߋ߫߸ ߞߏ߫ ߥߟߏߒߘߐ ߢߌ߲߬ ߠߎ߬ ߣߌ߫ ߘߊߥߎ߲ߠߌ߲ ߡߊ߲߫ ߞߊ߲߫߸ ߊ߬ ߘߌ߫ ߖߊ߬ߡߊ ߟߊ߫ ߞߍ߲ߘߍߦߊ ߓߌ߬ߟߊ߬ ߥߏߦߌߞߏ߲߬ߓߊ ߘߐ߫.>> ߊ߬ ߞߵߏ߬ ߝߐ߫.

ߊ߬ ߟߊ߫ ߝߐߟߌ߫ ߘߐ߫߸ ߞߍ߲ߘߍߦߊ ߓߊ߯ߙߊߞߍߟߊ ߟߎ߬ ߓߊ߲ ߞߐ ߥߟߏߒߘߐ ߢߌ߲߬ ߠߎ߬ ߡߊߝߟߍ߫ ߟߊ߫ ߝߋߎ߫߸ ߊ߬ߟߎ߫ ߞߵߊ߬ ߦߋ߫ ߞߏ߫ ߊ߬ߟߋ߬ ߥߟߏߒߘߐ ߟߎ߬ ߡߊ߫ ߢߌ߲߬߸ ߊ߬ߟߎ߬ ߦߋ߫ ߥߟߏߒߘߐ߫ ߝߏߝߏ ߟߎ߫ ߟߋ߬ ߘߌ߫، ߏ߬ ߟߋ ߘߐ߫߸ ߛߊ߬ߙߌ߬ߦߊ߫ ߞߵߊ߬ ߓߟߏߝߘߊ߫ ߞߕߌߟߊߛߋߟߊ ߘߏ߫ ߟߊ߫߸ ߞߊ߬ ߝߎߝߎ ߟߎ߬ ߘߊ ߟߊߞߵߊ߬ ߖߍ߬ߘߍ ߟߐ߬ߣߍ߲ ߢߣߊ߫߸ ߊ߬ ߣߌ߫ ߥߟߏߒߘߐ ߡߍ߲ ߠߎ߬ ߕߍ߬ߘߍ߫ ߦߋ߲߬.

ߞߕߌߞߊ߲ߘߊ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߓߌ߬ߟߊ߬ ߞߍߣߍ߲߫ ߡߐ߱ ߡߍ߲ ߠߎ߬ ߞߐ߫ ߣߌ߲߬ ߞߏ ߘߐ߫߸ ߏ߬ ߟߎ߬ ߓߘߴߊ߬ߟߎ߫ ߓߏ߬ߙߌ߬߸ ߊ߬ߟߎ߬ ߞߍߣߍ߲ ߞߐߝߍ߬ ߞߵߊ߬ߟߎ߬ ߛߎߡߊ߲߫ ߜߋ߬ߟߎ߲߬ߠߌ߲ ߥߛߊ߬ߘߊ߬ߕߌ߮ ߟߎ߬ ߞߣߐߘߐߞߍ߫ ߟߊ߫ ߞߵߊ߬ߟߎ߬ ߓߟߏߟߊߥߛߎ߫.

<<ߓߏ߬ߙߌ߬ߓߊ߰ߕߐ ߡߍ߲ ߠߎ߬ ߣߐ߬ߝߍ߬ߜߍ߲߬ߣߍ߲߫ ߣߌ߲߬ ߞߏ ߘߐ߫߸ ߊ߬ߟߎ߫ ߞߵߊ߬ߟߎ߬ ߛߎߡߊ߲߫ ߠߋ߬ ߞߕߌ ߕߐ߲ߓߟߏߡߊ ߟߎ߬ ߓߟߏߟߊߞߍ߫ ߞߏ ߘߐ߫ ߞߋ߲߬ߥߟߎ ߟߊ߫ ߝߋߎ߫، ߓߊ߬ߙߌ߬߸ ߏ߬ ߟߎ߬ ߡߊ߫ ߦߙߍߦߙߍ߫ ߥߊߘߌ ߢߊߞߘߐ߫߸ ߊ߬ߟߎ߫ ߞߵߊ߬ߟߎ߫ ߓߊ߲߬ ߘߎ߰ߡߊ߬ߟߊ ߘߐ߫ ߞߟߍߞߕߍ߫.>> ߊ߬ ߞߵߏ߬ ߦߌ߬ߘߊ߬߸ ߞߊ߬ ߓߊ߲߫ ߞߊ߬ ߕߊ߬ߡߌ߲߬ߘߊ ߘߏ߲߬ߞߏ ߏ߬ ߟߎ߫ ߝߏ߬ ߊ߬ߟߎ߬ ߟߊ߫ ߓߊ߯ߙߊ߫ ߓߘߍ ߟߊ߫.

ߞߊ߬ ߓߍ߲߬ ߞߍ߲ߘߍߦߊ ߖߐ߬ߘߐ ߡߊ߬ ߛߊ߫߸ ߛߊ߬ߙߌ߬ߦߊ߬ ߞߊ߲߫ ߞߏ߫ ߊ߬ߟߎ߬ ߓߍߣߊ߬ ߥߟߏߒߘߐ ߢߌ߲߬ ߠߎ߬ ߘߐߕߌߢߍ߫.

<<ߝߎߝߎ߫ ߁߇߁ ߡߍ߲ ߦߋ߫ ߕߋ߲߬߸ ߣߴߊ߬ߟߎ߬ ߕߍ߫ ߓߍ߲߬ ߟߊ߬ߓߊ߰ߙߊ߬ߟߌ ߘߐ߫ ߡߎ߬ߕߎ߲߬߸ ߏ߬ ߟߎ߬ ߘߌߣߊ߬ ߖߋ߬ߣߌ߲߫ ߞߎ߲߬ߢߐ߲߰ ߟߊ߬ߖߌ߮ ߣߌ߲߬ ߞߣߐ߫߸ ߊ߲ ߣߌ߫ ߡߙߊ߬ߘߊ߬ߓߊ ߘߊ߲ߘߊߛߏ ߗߋߕߌ߯ߘߊ ߟߊ߫ ߓߍ߲߬ߘߐ ߟߊ߫߸ ߖߐ߲߰ߛߊ߫ ߡߌ߬ߙߌ߲߬ߘߌ ߟߊ߫ ߢߣߊߡߦߊ ߞߊߣߊ߬ ߓߌ߬ߟߊ߫ ߖߐ߬ߘߐ ߘߐ߫.>> ߞߕߌߞߊ߲ߘߊ ߞߵߊ߬ ߖߊ߬ ߦߙߐ ߏ߬ ߞߊ߲߬.

ߞߊ߲ߞߊ߲߫ ߕߊ߬ߡߌ߲߬ߘߊ ߝߘߏ߬ߓߊ߬ ߗߋߕߌ߮߸ ߘߊ߬ߝ߭ߌߘ ߞߋ߬ߡߏ ߝߍ߲߬ߘߎ߬ߣߏ߫ ߞߵߊ߬ ߦߌ߬ߘߊ߬ ߞߏ߫ ߦߙߍߞߍߟߌ ߣߌ߲߬ ߞߍߣߍ߲߫ ߊ߬ߟߎ߬ ߟߊ߫ ߝߘߏ߬ߓߊ߬ ߗߋߕߌ߯ߘߊ ߟߊ߫ ߟߊ߬ߛߌ߲߬ߠߌ߲ ߠߋ߬ ߞߣߐߡߊ߬߸ ߞߵߊ߬ ߟߊߥߌ߬ߟߌ߫ ߞߊ߬ߙߏ߲ ߣߌ߫ ߥߟߏߒߘߐ߫ ߡߊߛߌߟߊ߲ߣߍ߲ ߠߎ߬ ߞߍ߬ߟߍ ߝߊ߲߬ߞߊߘߏ߲߭ ߡߊ߬.

ߊ߬ ߞߵߊ߬ ߦߌ߬ߘߊ߬ ߞߏ߫ ߝߘߏ߬ߓߊ߬ ߗߋߕߌ߮ ߞߟߍ߬ߕߌ߯ ߛ߭ߍߞ ߜ߭ߊߘߙߌ߫ ߞߐ߲ߘߍ߫ ߓߊ߲߫ ߛߊ߲ ߠߋ߬ ߛߏ߬ߓߌ߬ߟߊ߬ߞߎ߬ߣߎ߲߬ߠߌ߲ ߟߊ߬ߘߍ߬ ߛߌߦߊߡߊ߲߫ ߛߌ߰ ߟߊ߫ ߛߋ߲߬ߠߊ߫ ߕߋ߲߬߸ ߞߊ߬ ߕߊ߬ߡߌ߲߬ߘߊ ߓߊ߯ߙߟߊ ߟߎ߬ ߟߊߞߐ߯ ߞߵߊ߬ߟߎ߬ ߦߟߌߓߌ߬ߟߊ߬.

<<ߝߏ߫ ߡߐ߱ ߦߋ߫ ߓߊ߯ߙߊ߫ ߟߋ߬߸ ߌ ߓߊ߯ ߓߊ߯ߙߊ߫ ߊ߬ ߢߌ߬ߡߊ ߟߊ߫߸ ߌ ߘߌ߫ ߛߙߊ߬ ߢߌߡߊ ߛߐ߬ߘߐ߲߬.>> ߊ߬ ߞߵߏ߬ ߦߌ߬ߘߊ߬߸ ߞߵߊ߬ ߝߐ߫ ߞߏ߫ ߡߌ߬ߣߊ߬ߟߌ ߣߌ߲߬ ߦߴߊ߬ߟߎ߬ ߟߊ߫ ߕߟߏߡߊߟߐ߫ ߞߏߢߌߡߊ ߞߐߝߟߌ ߟߋ߬ ߘߌ߫߸ ߝߘߏ߬ߓߊ߬ ߗߋߕߌ߮ ߞߊ߬ ߛߙߊ߬ߒ߬ߞߊ߲߬ߠߊ ߡߍ߲ ߞߍ߫ ߊ߬ߟߎ߬ ߟߊ߫߸ ߏ߬ ߟߋ ߓߐߣߍ߲߫ ߜߍߟߊ߫ ߣߌ߲߬.

ߕߌ߲߬ߞߎߘߎ߲ ߕߊ߬ߡߌ߲߬ߘߊ߬ ߞߎ߲ߕߌ߮ ߣߌ߲߬ ߞߵߊ߬ ߞߊ߲ߠߊߘߌ߫ ߘߎ߰ߘߋ߲ ߠߎ߬ ߡߊ߬߸ ߊ߬ߟߎ߬ ߦߋ߫ ߛߐ߲߬ ߞߵߊ߬ߟߎ߬ ߞߣߐߘߐߘߌߦߊ߫ ߞߏ߫ ߞߏߙߏ߲ ߠߎ߬ ߞߍ߬ߟߍ ߘߐ߫، ߓߊߏ߬߸ ߞߏ߫ ߞߏߙߏ߲߫ ߛߌ߫ ߕߴߦߋ߲߬߸ ߊ߬ߟߎ߬ ߕߍ߫ ߞߍ߫ ߟߊ߫ ߡߍ߲ ߞߊ߬ߟߊߡߊ߬.

<<ߊ߬ߟߎ߬ ߦߴߊ߲ ߠߊߟߐ߲ߠߌ߲߫߸ ߣߴߊ߬ߟߎ߫ ߞߵߊ߬ ߦߌ߬، ߓߊߏ߬߸ ߊ߬ ߓߍ߯ ߦߋ߫ ߞߍ߫ ߟߊ߫ ߟߋ߬ ߡߌ߬ߙߌ߲߬ߘߌ ߢߊߞߘߐ߫. ߘߏ߫ ߟߎ߫ ߘߐ߫߸ ߊ߬ ߞߏ ߟߎ߬ ߦߋ߫ ߘߐߓߍ߲߬ ߠߊ߫ ߟߎ ߟߎ߬ ߟߋ߬ ߞߣߐ߫، ߏ߬ ߘߐ߫߸ ߊ߬ߟߎ߬ ߦߴߊ߲ ߠߊߟߐ߲ߠߌ߲߫߸ ߊ߲ ߓߊ߯ߙߊ ߟߵߏ߬ ߘߌ߫.>> ߊ߬ ߞߵߏ߬ ߦߌ߬ߘߊ߬.

ߊ߬ߟߋ ߟߊ߫ ߝߐߟߌ߫ ߘߐ߫߸ ߓߊߛߌ߫ ߞߏߙߏ߲ ߢߌ߲߬ ߠߎ߬ ߟߊ߫ ߞߎߟߎ߲ߞߎߟߎ߲ߠߌ߲ ߡߐ߱ ߟߎ߬ ߓߟߏ߫ߟߊ߫ ߕߋ߲߬߸ ߏ߬ ߦߋ߫ ߖߘߐ߬ߓߊ߫ ߟߋ߬ ߘߌ߫߸ ߤߊߟߌ߬ ߖߊ߲߬ߞߊ߬ߙߏ߬ߕߐ ߟߎ߫ ߡߊ߬.

<<ߌ ߘߌ߫ ߥߊ߫ ߘߊ߲ߘߊߛߏ ߟߊ߫߸ ߊ߬ߟߎ߬ ߘߌ߫ ߓߊߛߌ ߛߓߍ ߌ ߞߎ߲߬، ߌ ߞߊ߫ ߞߊ߲߫ ߞߊ߬ ߓߊߛߌ߫ ߓߘߍ ߟߋ߬ ߛߊ߲߬߸ ߓߊ߬ߙߵߌ ߘߌ߫ ߥߊ߫ ߓߍ߲߬ ߓߊߛߌ߫ ߞߏߙߏ߲ ߡߊ߬، ߦߊ߬ߣߴߊ߬ ߦߴߌ ߟߊߞߍ߲ߘߍߦߊ߫ ߏ߬ ߘߐ߫߸ ߊ߬ ߦߴߌ ߟߊߖߊ߲߬ߞߊ߬ߙߏ߬ ߟߊ߫ ߟߋ߬.>> ߊ߬ ߞߵߏ߬ ߝߙߊ߬ ߞߎߡߊ ߞߊ߲߬.

ߛߊ߬ߙߌ߬ߦߊ߬ ߞߏߟߊߕߍ߮ ߟߎ߬ ߣߌ߫ ߕߊ߬ߡߌ߲߬ߘߊ ߞߏߟߊߕߍ߮ ߟߎ߬ ߞߏ߬ߣߌ߲ ߓߘߴߊ߬ ߦߌ߬ߘߊ߬߸ ߞߏ߫ ߊ߬ߟߎ߬ ߘߌ߫ ߥߊ߫ ߢߊߢߌߣߌ߲ߠߌ߲ ߡߊ߬߸ ߖߐ߲߰ߛߴߊ߬ߟߎ߬ ߘߴߊ߬ ߕߌ߱ ߟߎ߬ ߟߐ߲߫߸ ߞߵߊ߬ߟߎ߬ ߟߊ߫ ߞߙߏ߬ߝߏ ߥߦߊ߬߸ ߡߍ߲ ߠߎ߬ ߗߋ ߦߋ߫ ߞߏ߫ ߞߏߙߏ߲߫ ߛߎ߮ ߢߌ߲߬ ߠߎ߬ ߘߌ߫.