ߞߊ߲ߞߊ߲߫ ߓߐ߬ߙߑߘߏ߬ ߍߛߑߏߍߛ ߛߊ߬ߙߌ߬ߟߏ ߟߊߓߌ߬ߟߊ߬ߣߍ߲߫ ߠߋ߬ ߝߊߦߌߘߊ߫߸ ߊ߬ ߥߊ߯ߕߌ߫ ߦߙߌߞߊ߫ ߖߊ߲ ߠߋ߬ ߕߋ߲߬߸ ߡߊ߬ߞߏ߬ ߕߴߊ߬ ߟߊ߫، ߝߏ߫ ߛߊ߲߭ ߕߊ߬ߡߌ߲߬ߣߍ߲߸ ߞߊߓߙߎ ߘߏ߫ ߥߊߙߊ߲ߞߊ߫ ߘߊ߫ ߦߋ߲߬߸ ߏ߬ ߜߊ߬ ߘߊ߫ ߞߌ߲߬ߘߊ ߛߌ߰ߓߊ߮ ߟߎ߬ ߟߊ߫ ߞߏߛߓߍ߫، ߞߌ߲߬ߘߊ ߣߌ߲߬ ߞߣߐ߫ ߡߐ߮ ߟߎ߬ ߞߊ߲߫ ߞߏ߫ ߊ߬ߟߎ߬ ߟߊ߫ ߛߊ߬ߙߌ߬ߟߏ ߓߘߊ߫ ߞߍ߫ ߢߡߊ߬ ߟߊ߬ߝߟߌ߬ ߦߙߐ ߘߌ߫߸ ߞߵߊ ߞߍ߫ ߛߎ߬ߣߎ߲߬ߞߎ߲ ߘߌ߫ ߝߊߦߌߘߊ߫.

ߡߎߛߊ߫ ߕߙߊߥߟߋ߫ ߡߍ߲ ߦߋ߫ ߞߌ߲߬ߕߌ߰ ߛߙߍߞߍ ߘߌ߫߸ ߊ߬ ߣߌ߫ ߛߊ߬ߙߌ߬ߟߏ ߣߌ߲߬ ߘߐߓߍ߲߭ ߥߛߊ߬ߓߊ߰ߦߊ ߞߊ߲ߕߌ߮߸ ߏ߬ ߞߵߊ߬ ߦߌ߬ߘߊ߬ ߞߏ߫: <<ߊ߬ߟߎ߬ ߓߘߊ߫ ߣߵߊ߲ ߠߊ߫ ߡߐ߰ߓߊ ߘߏ߫ ߛߎ߭ ߟߊߓߐ߫ ߞߊߓߙߎ ߞߣߐ߫ ߦߊ߲߬، ߏ߬ ߞߵߊ߲ ߕߙߐ߫ ߞߏߛߓߍ߫.>> ߞߊߓߙߎ ߢߌ߲߬ ߠߎ߬ ߘߊߝߍ߬ ߜߟߊ߬ߜߟߊ߬ ߘߊ߲ߘߐ߫ ߟߊ߫߸ ߡߌ߲߬ߓߏ߲ ߘߏ߫ ߦߋ߫ ߦߋ߲߬߸ ߡߍ߲ ߡߊ߲߫ ߘߌ߫ ߞߌ߲߬ߘߊ ߞߣߐ߫ ߡߐ߮ ߟߎ߬ ߦߋ߫ ߝߋߎ߫، <<ߡߌ߲߬ߓߏ߲ ߘߏ߫ ߦߴߊ߲ ߠߊ߫ ߛߊ߬ߙߌ߬ߟߏ ߘߊߝߍ߬ ߦߊ߲߬.>> ߊ߬ ߞߵߏ߬ ߦߌ߬ߘߊ߬.

ߖߐ߲߰ߛߊ߫ ߏ߬ ߞߏ߫ ߛߎ߮ ߟߎ߬ ߓߍ߯ ߛߴߊ߬ ߘߊ߲߭ ߠߊ߫߸ ߞߌ߲߬ߘߊ ߡߐ߰ߓߊ ߟߎ߬ ߣߴߊ߬ ߘߋ߲ߡߌߛߍ߲ ߠߎ߬ ߓߘߊ߫ ߓߍ߲߬ ߊ߬ ߡߊ߬߸ ߞߏ߫ ߞߊ߬ ߞߏߞߏ ߘߏ߲߬ ߛߊ߬ߙߌ߬ߟߏ ߡߊ߬، ߒ߬ߓߊ߬߸ ߏ߬ ߟߋ ߞߓߊ߫ ߝߟߐ߫ ߛߌ߮ ߞߍߣߍ߲߫ ߓߐ߬ߙߑߘߏ߬ ߍߛߑߏߍߛ ߞߌ߲߬ߘߊ ߟߊ߫.

ߞߊ߬ ߓߍ߲߬ ߘߍ߬ߡߍ߲߬ߠߌ߲ ߛߐ߬ߘߐ߲߬ߓߊߟߌߦ߬ ߡߊ߬ ߡߎߣߎ߲߬߸ ߞߌ߲߬ߘߊ ߞߣߐ߫ ߡߐ߮ ߟߎ߫ ߖߍ߬ߘߍ ߟߋ߬ ߓߊ߯ߙߊ ߣߌ߲߬ ߞߊ߲߬ ߊ߬ߟߎ߬ ߞߐߞߟߏ ߣߴߊ߬ߟߎ߬ ߖߎߝߊ߫ ߞߣߐߟߊ ߟߊ߫ ߝߟߐ߫، <<ߊ߲ ߞߵߊ߬ ߥߊ߬ߣߌ߲߬ߞߋ߫ ߟߋ߬ ߞߏ߫ ߊ߲ ߧߋ߫ ߞߏߞߏ߫ ߟߐ ߣߌ߲߬ ߘߊߡߌ߬ߣߴߊ߲ ߖߎߝߊ߫ ߞߣߐ߫ ߥߊߘߌ ߟߊ߫، ߛߋ߫ ߓߘߍ߫ ߕߴߊ߲ ߧߋ߫߸ ߓߊ߬ߙߌ߬ ߊ߲ ߖߌ߱ ߦߋ߫ ߥߊ߬ߣߌ߲߬ߞߋ߬ ߢߌ߬ߡߊ߬ߕߌ߮ ߟߎ߬ ߟߊ߫ ߓߐߒߖߘߍߘߐ ߞߊ߲߬.>> ߞߊ߱ߓߌ߬ߣߍ߫ ߛߎ߬ߥߊ߬ߙߋ߫ ߟߋ߬ ߞߵߏ߬ ߝߐ߫߸ ߞߌ߲߬ߕߌ߮.

ߞߌ߲߬ߘߊ ߞߏߟߊߕߍ߮ ߟߎ߫ ߞߵߊ߬ߟߎ߬ ߞߊ߲ߠߊߘߌ߫ ߓߐ߬ߙߑߘߏ߬ ߍߛߑߏߍߛ ߛߌ߰ߓߊ߮ ߟߎ߫ ߡߊ߬߸ ߡߍ߲ ߠߎ߬ ߦߴߊ߬ ߞߣߐ߫߸ ߊ߬ ߣߌ߫ ߡߍ߲ ߠߎ߬ ߦߴߊ߬ ߞߐߞߊ߲߬߸ ߞߵߏ߬ ߟߊ߫ ߓߐߒߝߘߎߘߐ߫ ߓߐߟߊ ߟߎ߫ ߞߊ߲߬߸ ߞߏ߫ ߓߍ߯ ߦߴߊ߬ ߛߋߞߏ߫ ߞߍ߫߸ ߖߐ߲߰ߛߊ߫ ߓߊ߯ߙߊ ߣߌ߲߬ ߘߌ߫ ߟߊߓߊ߲߫.

ߞߌ߲߬ߘߊ ߘߋ߲ߡߌߛߍ߲ ߠߎ߬ ߓߘߴߊ߬ߟߎ߫ ߟߐ߬ ߊ߬ߟߎ߫ ߟߐ߬ ߦߌߟߊ߸ ߞߵߊ߬ߟߎ߬ ߛߋߞߏ ߞߍ߫ ߞߏߞߏ߫ ߟߐ߫ ߞߏ ߣߌ߲߬ ߘߐ߫، ߊ߬ ߣߌ߫ ߞߊ߬ ߘߐ߰ߘߏ߲߬ ߞߍ߫ ߛߊ߬ߙߌ߬ߟߏ ߟߊ߫߸ ߣߌ߫ ߞߏߞߏ ߓߊ߲߫ ߘߊ߫ ߟߐ߬ ߟߊ߫.

ߌߓߙߊߤߌߡߊ߬ ߞߐ߲ߘߍ߫ ߡߍ߲ ߦߋ߫ ߘߋ߲ߡߌߛߍ߲ ߠߎ߬ ߞߐߦߌߘߊ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫: <<ߛߊ߬ߙߌ߬ߟߏ ߣߌ߲߬ ߕߎ߲߬ ߓߘߊ߫ ߞߍ߫ ߦߙߐ߫ ߘߌ߫߸ ߓߍ߯ ߕߍ߬ߘߍ߫ ߊ߬ ߛߊ߬ߥߏ ߛߎ߮ ߓߍ߯ ߞߍ߫ ߟߊ߫ ߦߙߐ ߡߍ߲ ߘߐ߫߸ ߞߏ߫ ߞߏߙߏ߲߫ ߛߌߦߊߡߊ߲߫ ߕߎ߲߬ ߓߘߊ߫ ߟߊߞߙߐ߬ߛߌ߬.>> ߊ߬ ߞߵߊ߬ ߟߴߊ߬ ߟߊ߫ ߛߙߊ߬ߣߎ߲ ߞߊ߲߬ ߝߣߊ߫ ߞߏ߫ <<ߊ߲ ߓߘߴߊ߲ ߥߊ߬ߞߊߟߌ߫ ߦߙߐ ߣߌ߲߬ ߓߊ߯ߙߊ ߣߵߊ߬ ߛߊߣߌ߲ߧߊ ߟߊ߫߸ ߓߍ߯ ߟߊ߫ ߦߙߐ ߟߋ߬ ߦߊ߲߬ ߘߌ߫߸ ߓߍ߯ ߟߊߓߊ߲ߕߐ߫ ߦߊ߲߬ ߠߋ߬ ߡߊ߬.>>

ߒ߬ߓߊ߬߸ ߓߐ߬ߙߑߘߏ߬ ߍߛߑߏߍߛ ߞߣߐ߫ ߕߋ߲߬߸ ߓߊ߯ߙߊ ߓߘߊ߫ ߘߊߡߌ߬ߣߊ߫ ߥߊ߬ߣߌ߲߬ߞߋ߬ ߜߍߣߍ߲ ߠߊ߫߸ ߒ߬ߞߊ߬ ߥߊߘߌ߫ ߜߍߣߍ߲߫ ߞߏ ߟߋ߬ ߦߴߊ߬ ߟߊ߫ ߡߎ߬ߕߎ߲߬ ߛߊ߫، ߞߌ߲߬ߘߊ ߞߣߐ߫ ߡߐ߮ ߟߎ߫ ߘߏ߲߬ ߓߘߴߊ߬ ߦߌ߬ߘߊ߬߸ ߞߏ߫ ߝߏ߫ ߊ߬ߟߎ߬ ߦߴߊ߬ߟߎ߫ ߟߐ߬ ߊ߬ߟߎ߫ ߟߐ߬ ߦߙߐ ߟߋ߬ ߘߐ߫߸ ߞߊ߬ ߛߋ߫ ߛߊ߬ߙߌ߬ߟߏ ߟߊߕߊ߲߬ߞߊ߬ ߟߊ߫߸ ߞߊ߬ ߛߎ߭ ߟߎ߬ ߟߊߞߊ߲ߘߊ߫.