ߞߊ߯ߙߌ ߂߀߂߆ ߥߊ߬ߛߌ߬ߥߙߊ ߕߟߋ߬ ߁߄ ߡߊ߬߸ ߘߟߊ߬ߟߊ߬ߞߊ ߟߎ߬ ߣߌ߫ ߛߋ߬ߞߘߐ߬ߞߊ ߟߎ߫ ߟߋ߬ ߕߘߍ߬ ߢߐ߲߯ ߠߊ߫ ߛߣߍ߬ߞߍ߬ ߘߎ߰ ߞߏ ߘߐ߫، ߛߏ߫ ߝߌ߬ߟߊ ߣߌ߲߬ ߓߍ߯ ߦߋ߫ ߞߎ߲ߓߊ߲߫ ߡߙߊ߬ߘߊ߬ߙߋ߲ ߠߋ߬ ߘߐ߫߸ ߏ߬ ߡߍ߲ ߣߌ߫ ߞߊ߲ߞߊ߲߫ ߕߍ ߦߋ߫ ߞߎߘߍ߫ ߓߌߛߓߊ߬ ߣߌ߫ ߘߏ߫ ߘߌ߫.

ߊ߬ߟߎ߬ ߦߋ߫ ߢߐ߲߮ ߠߊ߫ ߝߊ߬ߙߊ ߡߍ߲ ߝߍ߬ ߣߌ߲߬߸ ߞߎ߲ߓߊ߲߫ ߡߙߊ߬ߓߊ߰ߘߎ߯ߟߊ ߕߎ߲߬ ߓߘߊ߫ ߦߋ߲߬ ߞߎ߬ߡߊ߲߬ߘߌ߫ ߓߍ߯ ߡߊ߬ߞߘߐ߬ߡߊ߲߬߸ ߦߊ߬ߣߌ߫ ߢߊ߫ ߛߐ߬ߘߐ߲߬ߕߐ߫ ߊ߬ ߥߐ߬ߦߐ ߡߊ߬، ߓߊ߬ߙߌ߬߸ ߏ߬ ߓߍ߯ ߣߴߊ߬ ߕߊ߫߸ ߛߣߍ߬ߞߍ ߘߊߡߌ߬ߣߊ߬ ߘߊ߫ ߦߋ߲߬߸ ߏ߬ ߞߍ߫ ߘߊ߫ ߛߊߓߎ߫ ߘߌ߫ ߞߊ߬ ߞߎ߬ߡߎ߲߫ ߢߐ߲߰ ߞߘߐ ߟߊߣߊ߬߸ ߝߏ߫ ߥߐ߬ߦߐ ߓߐ߫ ߘߴߊ߬ ߘߐ߫.

ߊ߬ ߓߘߊ߫ ߦߌ߬ߘߊ߬ ߞߏ߫ ߡߐ߰ ߟߏ߯ߟߎ߫ ߟߋ߬ ߡߊߘߌߡߌ߲ߣߍ߲߫،  ߘߟߊ߬ߟߊ߬ߞߊ߫ ߡߐ߰ ߛߓߊ߬߸ ߏ߬ ߟߎ߬ ߦߋ߫ ߞߊ߲ߞߊ߲߫ ߘߊ߲ߘߊߛߏߓߊ ߟߊ߫߸ ߊ߬ ߝߐߣߍ߲߫ ߞߏ߫ ߛߋ߬ߞߘߐ߬ߞߊ߫ ߡߐ߰ ߝߌ߬ߟߊ߫ ߟߋ߬ ߝߣߊ߫ ߡߊߘߌߡߌ߲ߣߍ߲߫.

ߣߴߌ ߞߊ߬ ߘߟߊ߬ߟߊ߬ߞߊ ߟߎ߫ ߕߊ߬߸ ߟߊ߲߱ߛߌ߬ߣߍ߬ ߞߋߕߊ߬ ߡߍ߲ ߦߋ߫ ߛߏ ߟߊ߫ ߓߋߟߋ߲ߕߌ߮ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ ߟߊ߫ ߛߏ߫ ߞߣߐ߫ ߡߐ߮ ߟߎ߬ ߡߊ߫ ߓߐ߫ ߝߊ߰ߡߊ ߟߎ߬ ߞߐ߫ ߟߏ߲߫ ߞߋߟߋ߲߫߸ ߊ߬ߟߎ߫ ߕߍ߬ߘߍ߫ ߝߊ߰ߡߊ ߟߎ߬ ߞߎߡߊ߫ ߞߊ߲ ߓߏ߲߬ߧߊ ߞߕߐ߫.

ߊ߬ ߞߵߊ߬ ߦߌ߬ߘߊ߬ ߞߏ߫ <<ߞߊ߬ߦߌ߯ ߣߌ߲߬ ߞߏ ߘߊߡߌ߬ߣߊ߬ ߘߊ߫߸ ߊ߲ ߕߏ߫ ߘߊ߫ ߛߊ߬ߙߌ߬ߦߊ߫ ߟߋ߬ ߞߕߐ߫߸ ߊ߲ ߡߊ߫ ߛߐ߲߬ ߞߍ߬ߟߍ߫ ߡߊ߬.>> ߊ߬ ߞߵߏ߬ ߦߌ߬ߘߊ߬ ߞߵߊ߬ ߞߊ߲ߠߊߘߌ߫ ߊ߬ ߝߊ߬ ߓߘߊ ߘߋ߲ߡߌߛߍ߲ ߠߎ߬ ߡߊ߬߸ ߞߏ߫ ߞߊ߬ ߕߊߛߙߊߟߌ ߡߊߕߊ߲߬ߞߊ߬.

ߊ߬ ߞߎߡߊ߫ ߘߊ߫ ߓߊ߲߬ߞߊߟߌ߬ ߞߋߕߊ߬ ߟߊ߫ ߞߏ ߞߊ߲߬߸ ߏ߬ ߡߍ߲ ߡߊߘߌߡߌ߲ߣߍ߲߫ ߊ߬ߟߋ߬ ߡߊ߲߬ߞߊ߲ ߘߐ߫߸ ߣߴߊ߬ ߦߋ߫ ߞߊ߲ߞߊ߲߫ ߘߊ߲ߘߊߛߏߓߊ ߟߊ߫߸ ߊ߬ ߣߌ߫ ߡߐ߰ ߝߌ߬ߟߊ߬ ߜߘߍ߫، ߡߐ߰ ߞߋߟߋ߲߫ ߖߍ߬ߘߍ ߦߴߏ߬ ߘߐ߫߸ ߏ߬ ߢߌ߲ ߘߏ߫ ߞߊߘߌ߫ ߘߊ߫ ߟߋ߬ ߝߐߢߐ߲߯ߞߐ ߣߌ߲߬ ߝߍ߬، ߔߏߔߏ߫ ߞߋߟߋ߲߫ ߣߌ߫ ߣߛߌ߬ߘߓߊ߬ ߞߋߟߋ߲߫ ߝߣߊ߫ ߕߎߣߎ߲߫ ߘߊ߫ ߟߋ߬ ߊ߬ߟߋ߬ ߡߊ߲߬ߞߊ߲ ߘߐ߫߸ ߏ߬ ߟߎ߬ ߦߋߣߍ߲߫ ߕߍ߫.

ߟߊ߲߱ߛߌ߬ߣߍ߬ ߞߋߕߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߞߏ ߘߊߡߌߣߊ ߞߏ߬ߣߌ߲߬ ߡߊ߫ ߞߍ߫ ߊ߬ߟߋ߬ ߢߣߊ߫، ߊ߬ ߞߵߊ߬ ߝߐ߫ ߏ߬ ߟߋ ߘߐ߫ ߞߏ߫: <<ߒ ߕߍ߫ ߛߴߊ߬ ߝߐ߫ ߟߊ߫ ߕߞߌߕߞߌ߫߸ ߊ߬ߟߎ߫ ߞߊ߬ ߢߌ߲߬ ߠߋ߬ ߝߐ߫߸ ߓߊߏ߬ ߒ ߕߎ߲߬ ߕߍ߫ ߜߍ߫ ߘߐ߫ ߦߋ߲߬.>>. ߊ߬ ߞߵߏ߬ ߦߌ߬ߘߊ߬.

ߣߴߌ ߘߏ߲߬ ߞߊ߬ ߛߋ߬ߞߘߐ߬ߞߊ ߟߎ߫ ߕߊ߬߸ ߟߊ߲߱ߛߌ߬ߣߍ߬ ߞߐ߲ߘߍ߫ ߞߊ߬ ߞߎߡߊ ߡߍ߲ ߝߐ߫߸ ߏ߬ ߣߌ߫ ߘߐ ߣߌ߲߬ ߕߊ ߡߊ߫ ߞߢߊ߫، ߓߊߏ߬߸ ߊ߬ߟߋ߫ ߞߵߊ߬ ߦߌ߬ߘߊ߬ ߞߏ߫ ߛߋ߬ߞߘߐ߫ ߕߎ߲߬ ߓߘߊ߫ ߥߊ߫ ߡߙߊ߬ߓߊ߰ߘߎ߯ߟߊ ߦߋ߫ ߞߘߐ߬ߡߊ߲߬߸ ߊ߬ ߝߐ߫ ߘߊ߫ ߞߏ߫ ߞߊ߬ ߓߊ߯ߙߊ ߓߍ߯ ߟߊߟߐ߬ ߝߊ߬ߙߊ ߞߣߐ߫.

ߒ߬ߓߊ߬߬߸ ߊ߬ߟߋ ߟߊ߫ ߝߐߟߌ߫ ߘߐ߫߸ ߞߏ߫ ߘߟߊ߬ߟߊ߬ߞߊ ߟߎ߫ ߣߊ߬ ߘߊ߫ ߛߍ߬ߣߍ ߘߊߡߌ߬ߣߊ߬ ߦߙߐ ߞߊ߲߬߸ ߟߊ߬ߕߐ߲߬ߠߌ߲ ߏ߬ ߓߍ߯ ߞߐ ߘߐ߫، ߟߊ߲߱ߛߌ߬ߣߍ߬ ߞߐ߲ߘߍ߫ ߞߊ߲߫߸ ߞߏ߫ ߊ߬ߟߋ߫ ߖߍ߬ߘߍ ߟߋ߬ ߥߊ߫ ߘߊ߫ ߝߊ߬ߙߊ ߘߐ߫߸ ߞߊ߬ ߥߊ߫ ߓߊ߲߬ߞߊߟߌ߬ ߞߋߕߊ߬ ߛߐ߬ߘߐ߲߬߸ ߊ߬ ߦߋ߫ ߓߊ߯ߙߊ ߞߊ߲߬، ߊ߬ ߞߵߊ߬ ߝߐ߫ ߊ߬ ߦߋ߫ ߞߏ߫ ߊ߬ ߦߋ߫ ߓߐ߫ ߦߙߐ ߏ߬ ߘߐ߫ ߦߋ߲߬.

ߊ߬ ߞߊ߲߫ ߞߏ߫: <<ߒ ߞߵߊ߬ ߝߐ߫ ߊ߬ ߦߋ߫ ߒ ߞߏ߫ ߊ߬ ߦߋ߫ ߓߊ߯ߙߊ ߟߊߟߐ߬߸ ߓߊߏ߬ ߡߙߊ߬ߓߊ߰ߘߎ߯ߟߊ ߞߵߊ߬ ߝߐ߫ ߟߋ߬ ߞߏ߫ ߓߊ߯ߙߊ߫ ߞߊߣߊ߬ ߞߍ߫ ߦߋ߲߬.>> ߊ߬ ߞߵߏ߬ ߦߌ߬ߘߊ߬.

ߊ߬ߟߋ ߟߊ߫ ߝߐߟߌ߫ ߘߐ߫߸ ߓߊ߲߬ߞߊߟߌ߬ ߞߋߕߊ߬ ߡߊ߫ ߛߐ߲߬، ߞߎߡߊߢߐ߲߯ߦߊ ߡߍ߲ ߘߏ߲߬ ߘߴߊ߬ ߣߴߏ߬ ߕߍ߫ ߡߎ߬ߕߎ߲߬ ߛߊ߫߸ ߏ߬ ߟߋ ߞߍ߫ ߘߊ߫ ߡߊ߲߬ߞߊ߲ ߘߌ߫.

ߟߊ߲߱ߛߌ߬ߣߍ߬ ߞߐ߲ߘߍ߫ ߞߊ߬ ߛߎ߬ߟߋ߬ߡߊ߬ߣ ߞߋ߬ߕߊ߬ ߕߐ߮ ߘߏ߫ ߟߋ߬ ߡߊߝߌ߲߬߸ ߏ߬ ߞߍ ߘߐ߫ ߞߵߊ߬ ߘߐ߯ߞߍ߫ ߓߙߋߡߊ߬ ߜߊ߬ߛߌ߬، ߞߊ߬ߕߎ߲߯߸ ߞߏ߫ ߡߙߊ߬ߒ߬ߡߊ߬ߝߋ߲ ߖߍ߬ߘߍ ߕߍ߬ߘߍ߫ ߏ߬ ߓߟߏ߫ ߡߊ߲߬ߞߊ߲ ߥߊ߯ߕߌ ߟߊ߫، ߊ߬ ߞߵߊ߬ ߦߌ߬ߘߊ߫ ߏ߬ ߟߋ ߘߐ߫߸ ߞߏ: <<ߊ߲ ߣߊ߬ߣߍ߲߫ ߠߋ߬ ߕߘߍ߬ ߞߏ߫ ߞߊ߬ ߓߊ߯ߙߊ ߟߊߟߐ߬߸ ߊ߲ ߡߊ߫ ߣߊ߬ ߞߟߍ߬ ߞߊ߲ߡߊ߬.>> ߊ߬ ߞߵߏ߬ ߝߐ߫.

ߊ߬ߟߋ ߟߊ߫ ߞߎߡߊ ߡߍ߲ ߠߎ߬ ߞߏ߬ߣߌ߲ ߦߋ߫ ߕߋ߲߬߸ ߘߟߊ߬ߟߊ߬ߞߊ ߟߎ߬ ߞߵߏ߬ ߓߍ߯ ߡߊߛߐ߬ߛߐ߫ ߟߋ߬. ߏ߬ ߘߐ߫߸ ߊ߬ߟߎ߬ ߝߏߦߌ߬ ߟߊ߫ ߞߎߡߊ ߟߎ߬ ߟߊߣߍ߲߫ ߕߍ߫ ߢߐ߲߮ ߞߊ߲߬.

ߞߊ߲ߞߊ߲߫ ߡߙߊ߬ߓߊ߮ ߞߊ߬ ߗߋߦߊߟߌ ߡߍ߲ ߠߎ߬ ߟߊߥߟߌ߬ ߞߊ߬ ߕߊ߯ ߛߋ߫ ߣߌ߲߬ ߘߊߞߎ߲ ߘߐ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߞߟߍ߬ ߞߘߐߞߘߐ ߟߋ߬ ߣߌ߲߬ ߘߌ߫ ߘߊ߬ߟߊ ߺ ߟߊ ߣߌ߫ ߛߋ߬ߞߘߐ߬ ߕߍ߫، ߡߍ߲ ߞߎ߲߭ ߦߋ߫ ߞߌ߬ߢߍ߬ ߕߊ߬ ߞߏ ߘߌ߫ ߛߐ߲߬.

ߏ߬ ߟߋ ߘߐ߫߸ ߗߋߘߋ߲ ߠߎ߬ ߟߊ߫ ߛߌߟߊ߫ ߢߍߟߐ߸ ߛߎ߬ߟߋ߬ߡߊߣ ߞߐ߲ߘߍ߫߸ ߊ߬ߟߋ ߡߍ߲ ߦߋ߫ ߝߘߏ߬ߓߊ߬ ߞߟߊ߬ߕߌ߯ ߘߌ߫ ߞߊ߲ߞߊ߲߫ ߡߙߊ߬ߘߊ߬ߓߊ ߡߙߊ߬ߓߊ߰ߘߊ ߟߊ߫߸ ߣߴߊ߬ ߗߋߟߦߊ߫ ߘߊ߫ ߝߊߙߌ߲߫ ߡߏ߬ߤߊ߬ߡߍ߬ߘ ߢߊ߲ߜ߭ ߓߟߏ߫߸ ߡߙߊ߬ߓߊ߮، ߏ߬ ߕߊ߯ ߘߊ߫ ߛߋ߫ ߛߏ߫ ߝߌ߬ߟߊ ߣߌ߲߬ ߓߍ߯ ߟߊ߫߸ ߞߵߊ߬ ߓߍ߯ ߛߏ ߡߐ߰ߓߊ ߟߎ߬ ߦߋ߫.

ߊ߬ ߞߵߊ߬ ߦߌ߬ߘߊ߬ ߞߏ߫ ߡߊ߲߬ߞߊ߲ ߦߋ߫ ߝߊ߬ߙߊ ߡߍ߲ ߝߍ߬ ߣߌ߲߬߸ ߘߊ߲߫ ߜߘߍ߫ ߟߋ߬ ߝߣߊ߫ ߦߋ߫ ߦߋ߲߬߸ ߣߌ߫ ߞߌ߬ߢߍ ߦߋ߫ ߕߊ߬ ߟߊ߫ ߦߋ߲߬߸ ߡߊ߲߬ߞߊ߲ ߦߴߌߘߐ߫ ߏ߬ ߝߣߊ߫ ߝߍ߬، ߝߊߦߌߘߊ߫߸ ߊ߬ ߖߎ߬ߓߊ ߟߵߏ߬ ߘߌ߫، ߕߎ߬ߡߊ ߘߏ߫ ߟߎ߫ ߟߊ߫߸ ߡߊ߲߬ߞߊ߲ ߓߊ߯ ߥߟߌ߬߸ ߦߋ߲߬ ߣߴߊ߬ ߟߊߡߌߣߌ߲߫ ߛߏ ߟߎ߬ ߦߋ߫ ߘߏ߫ ߝߐ߫ ߟߴߊ߬ ߘߐ߫߸ ߞߵߊ߬ ߘߐߛߎߡߊ߫.

ߞߊ߬ߕߎ߲߯߸ ߛߋ߬ߞߘߐ߬ߞߊ ߟߎ߬ ߞߊ߲߫ ߠߋ߬ ߞߏ߫ ߦߋ߲߬ ߦߴߊ߬ߟߎ߬ ߕߊ ߟߋ߬ ߘߌ߫߸ ߘߟߊ߬ߟߊ߬ߞߊ ߟߎ߬ ߝߣߊ߫ ߛߐ߲߬ߣߍ߲߬ ߕߍ߫ ߞߎߡߊ ߏ߬ ߟߋ ߡߊ߬ ߛߊ߫.

ߞߵߊ߬ ߟߊߥߟߌ߬ ߞߏ ߘߐߛߎߡߊ ߡߊ߬ ߡߎߣߎ߲߬߸ ߦߊ߬ߣߌ߫ ߢߊ߫ ߛߐ߬ߘߐ߲߬ߕߐ߫ ߕߌ߰ߦߊ߬ ߞߏ ߡߊ߬߸  ߞߎ߲ߓߊ߲߫ ߡߙߊ߬ߓߊ߰ߘߎ߯ߟߊ߸ ߘߊ߯ߕߌ߯ ߝߌ߬ߣߊ߲߬ߘߏ߫ ߕߌ߬ߖߊߣ ߞߊ߬ߓߊ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ ߕߎ߲߬ ߓߘߊ߫ ߦߙߐ ߏ߬ ߓߊ߯ߙߊ ߟߊߕߐ߲߫ ߞߘߐ߬ߡߊ߲߬߸ ߛߊ߫ ߕߊ߲߬ߞߊ߬ ߘߌ߫ ߞߍ߫ ߥߊ߬ߥߎߟߋ ߡߊ߬ ߢߊ ߡߍ߲ ߡߊ߬.

ߡߙߊ߬ߓߊ߮ ߟߊ߫ ߗߋߘߋ߲ ߠߎ߬ ߞߊ߬ ߖߙߊ߬ߞߌ߬ߟߌ ߟߊߛߋ߫ ߛߏ߫ ߝߌ߬ߟߊ ߣߌ߲߬ ߓߍ߯ ߡߊ߬߸ ߊ߬ߟߎ߬ ߞߍߓߊߟߌߦߊ ߘߐ߫ ߞߊ߬ ߝߊ߰ߡߊ ߟߎ߬ ߟߊ߫ ߞߎߡߊ ߏ߬ ߡߊߓߏ߲߬ߧߊ߬߸ ߝߏ߫ ߞߵߊ߬ ߝߐ߫ ߞߏ߫ ߊ߬ߟߎ߬ ߦߴߏ߬ ߞߏ ߘߊ߲ߘߊ߫ ߟߴߊ߬ߟߎ߫ ߖߘߍ߬ ߦߋ߫.

ߊ߬ ߞߵߊ߬ ߦߌ߬ߘߊ߫ ߏ߬ ߟߋ ߘߐ߫߸ ߞߏ߫ : <<ߝߊ߰ߡߊ߬ ߞߎ߲ߘߊ߫߸ ߘߎ߰ ߞߏ߬ ߡߊ߲ߞߊ߲߫ ߛߌ߫ ߕߴߛߋ߫ ߢߊߓߐ߫ ߟߊ߫ ߞߍ߬ߟߍ ߘߐ߫߸ ߡߙߊ߬ߒ߬ߡߊ߬ߝߋ߲߬ ߕߊ ߘߐ߫߸ ߥߟߊ߫ ߖߊ߬ߡߊ ߟߊ߫ ߖߘߍ߬ߡߊ߬ ߞߕߌߕߍ߮ ߘߐ߫.>>

ߏ߬ ߟߋ ߘߐ߫߸ ߊ߬ߟߎ߫  ߞߵߊ߬ ߦߌ߬ߘߊ߬ ߞߏ߫ ߡߐ߰ ߛߌ߫ ߞߊߣߊ߬ ߛߋ߫ ߝߊ߬ߙߊ ߘߐ߫ ߦߋ߲߬߸ ߤߊ߲߯ ߝߊ߰ߡߊ ߟߎ߬ ߦߋ߫ ߖߡߊ߬ߙߌ߬ ߞߎߘߊ߫ ߕߊ߬ ߟߏ߲ ߡߍ߲، ߣߌ߫ ߛߌߞߊ߫ ߞߍ߫ ߘߊ߫ ߞߏ߫ ߡߍ߲ ߞߊ߬ ߕߐ߲ ߏ߬ ߕߌߢߍ߫߸ ߊ߬ߟߎ߬ ߘߌ߫ ߞߏߟߊߕߐ߲߫ ߏ߬ ߟߊ߫߸ ߞߵߊ߬ ߟߊߛߋ߫ ߛߊ߬ߙߌ߬ߦߊ߬ ߟߊ߫.

<<ߡߍ߲ ߠߎ߬ ߝߣߊ߫ ߣߐ߬ ߡߊ߲߬ߞߊ߲ ߢߌ߲߬ ߠߊߥߟߌ߬ ߟߊ߫߸ ߞߊ߬ ߡߊ߬ߘߌ߬ߡߌ߲߬ߠߌ߲ ߞߍ߫߸ ߏ߬ ߟߎ߬ ߘߴߊ߬ߟߎ߬ ߟߊ߫ ߓߊ߯ߙߊ ߏ߬ ߕߐ߬ߣߐ ߛߐ߬ߘߐ߲߫ ߛߊ߬ߙߌ߬ߦߊ߬ ߟߊ߫.>> ߛߎ߬ߟߋ߬ߡߊߣ ߞߐ߲ߘߍ߫ ߞߵߏ߬ ߦߌ߬ߘߊ߬.

ߗߋߦߊߟߌ ߞߏ߬ߣߌ߲ ߕߊ߬ߡߌ߲ ߞߐ ߘߐ߫ ߦߋ߲߬߸ ߡߊ߬ߝߊ ߘߏ߲߬ ߘߊ߫ ߛߏ ߟߎ߬ ߞߣߐ߫، ߓߊ߬ߙߌ߬߸ ߊ߬ ߞߏ ߘߊ߲ߘߊ ߓߕߐ߫ ߝߊ߰ߡߊ ߟߎ߬ ߟߊ߫ ߓߊ߯ߙߊ ߘߊ߲߬ ߦߙߐ ߟߋ߬ ߘߐ߫، ߣߴߊ߬ߟߎ߬ ߛߋ߫ ߘߴߊ߬ ߞߏ ߢߊߢߌߣߌ߲߫ ߠߴߊ߬ ߢߌ߬ߡߊ ߟߊ߫ ߞߊ߬ ߡߙߌߘߐ߫ ߞߋߟߋ߲߫ ߕߊ߬߸ ߏ߬ ߟߋ.