ߘߐ߲߬ߞߌ߲ ߢߊߞߘߐߟߊ ߣߌ߲߬ ߘߐ߫߸ ߞߊ߲ߞߊ߲߫ ߞߙߊߟߌ߫ ߕߏ߲ߜߏ ߟߎ߬ ߦߴߊ߬ߟߎ߬ ߕߊ߲ߣߝߌߟߊߝߟߌ ߟߋ߬ ߘߐ߫ ߕߋ߲߬، ߓߍ߯ ߛߌ߰ߣߴߊ߬ ߟߊ߫ ߞߙߊߟߌ߫ ߕߙߏߞߏ߫ ߞߕߐ߫߸ ߛߋ߲߭ ߠߎ߬ ߟߊߡߊ߱ ߦߴߌߘߐ߫߸ ߞߵߊ߬ ߛߐ߬ߘߐ߲߬ ߊ߬ߟߎ߬ ߡߊߞߎ߲߬ߣߍ߲߫ ߜߟߍ߬ߦߊ߬ߓߊ߫ ߞߊ߲߬: ߡߍ߲ ߠߎ߬ ߟߊ߫ ߝߊ߰ߣߌ߲ ߦߴߊ߬ߟߎ߬ ߓߟߏ߫߸ ߏ߬ ߟߎ߬ ߦߴߊ߬ߟߎ߬ ߞߐߜߊ߭ ߞߊ߲߬߸ ߓߊ߯ߙߊ ߘߏ߫ ߟߎ߫ ߦߋ߫ ߛߎߡߦߊ߫ ߟߴߊ߬ߟߎ߬ ߓߟߏ߫߸ ߝߊ߰ߣߌ߲ ߘߏ߫ ߟߎ߫ ߘߛߍߣߍ߲߫߸ ߢߎߡߍ߫ ߞߏߖߊ ߓߍ߯ ߦߴߊ߬ߟߎ߫ ߞߊ߲߬߸ ߊ߬ߟߎ߬ ߦߴߏ߬ ߟߋ ߞߟߊߦߊ ߕߍߡߊ߬.

ߒ߬ߓߊ߬߸ ߡߎߛߊ߫ ߛߌ߬ߛߋ߬ ߡߍ߲ ߡߊߟߐ߲ߣߍ߲߫ <<ߝߊ߯ߖ߭ߊ߫>> ߕߐ߮ ߡߊ߬߸ ߣߴߊ߬ ߟߊ߫ ߓߊ߯ߙߊ߫ ߦߌߟߊ ߦߋ߫ ߛߌ߯ߙߌ߲߫ ߓߍ߲߬ߕߍ ߘߐ߫߸ ߏ߬ ߡߴߊ߬ ߟߊ߫ ߜߟߍ߬ߦߊ ߟߎ߫ ߘߏ߲߰߸ ߡߍ߲ ߦߴߊ߬ ߣߴߊ߬ ߘߍ߬ߢߐ߲߮ ߠߎ߫ ߞߊ߲߬.

<<ߝߙߋߞߋ ߦߋ߫ ߦߙߐ ߡߍ߲߸ ߡߐ߱ ߟߎ߬ ߕߍ߫ ߣߊ߬ ߟߊ߫ ߖߏߣߊ߫، ߓߊ߯ߙߊ ߡߍ߲ ߞߊ߫ ߞߊ߲߫ ߞߊ߬ ߞߍ߫ ߞߊߙߏ߫ ߝߌ߬ߟߊ߬ ߤߊ߲߯ ߞߊߙߏ߫ ߛߊ߬ߓߊ ߞߣߐ߫߸ ߊ߬ߟߎ ߘߌߣߵߏ߬ ߘߌ߫ ߞߏ߫ ߞߵߏ߬ ߞߍ߫ ߞߎ߲߬ߢߐ߲߯ ߝߌ߬ߟߊ߬ ߥߟߊ߫ ߛߓߊ߬ ߞߘߐ߫.>> ߊ߬ ߞߵߏ߬ ߢߊߝߐ߫.

ߊ߬ߟߋ ߟߊ߫ ߝߐߟߌ߫ ߘߐ߫߸ ߞߏ߫ ߡߍ߲ ߠߎ߬ ߦߋ߫ ߣߊ߬ ߟߴߊ߬ߟߎ߬ ߟߊ߫ ߝߊ߰ߣߌ߲ ߘߌ߫߸ ߏ߬ ߟߎ߬ ߦߋ߫ ߢߌ߬ߣߊ߬ ߟߊ߫ ߦߙߐ ߏ߬ ߟߋ ߞߐ߫߸ ߏ߬ ߟߋ ߢߐ߲߯ ߢߊߦߋߓߊߟߌߦߊ ߦߋ߫ ߞߙߊߟߌߟߊ ߟߎ߬ ߣߌ߫ ߝߊ߰ߣߌ߲߬ ߕߌ߮ ߟߎ߬ ߕߍ߫، <<ߊ߬ߟߎ߬ ߦߴߊ߬ ߝߐ߫ ߟߊ߫ ߏ߬ ߟߋ ߘߐ߫ ߡߎ߬ߕߎ߲߬ ߛߊ߫ ߞߏ߫ ߞߙߊߟߌߟߊ ߟߎ߬ ߦߋ߫ ߥߎߦߊ ߝߐ߫ ߟߊ߫، ߞߵߊ߬ ߛߐ߬ߘߐ߲߬߸ ߊ߬ߟߎ߬ ߦߋ߫ ߣߊ߬ ߟߊ߫ ߝߊ߰ߣߌ߲ ߘߌ߫ ߕߎ߬ߡߊ ߡߍ߲ ߠߊ߫߸ ߊ߬ߟߎ ߖߍ߬ߘߍ ߞߵߊ߬ ߟߐ߲߫ ߕߊߦߌ߫߸ ߞߏ߫ ߥߊ߯ߕߌ ߏ߬ ߛߎ߬ߘߎ߲߬ߡߊ߲߬.>> ߊ߬ ߞߵߏ߬ ߝߊ߬ߙߴߊ߬ ߞߊ߲߬.

ߞߐߜߊߟߌ߫ ߓߊ߲ߓߊߟߌ ߏ߬ ߕߊ߬ߣߍ߲߫ ߞߵߊ߬ ߟߊ߫ ߡߎ߲߬ ߞߊ߲߬߸ ߏ߬ ߟߋ ߝߊ߰ߣߌ߲ ߛߐ߬ߘߐ߲߬ ߞߏ ߟߊ߫ ߜߟߍ߬ߦߊ ߝߣߊ߫ ߘߌ߫، ߞߊ߬ߕߎ߲߯߸ ߡߐ߱ ߝߊ߲߬ߓߊ ߦߋ߫ ߓߊ߬ߛߊ߲ ߡߍ߲ ߛߊ߲߬ ߠߊ߫߸ ߏ߬ ߦߋ߫ ߣߊ߬ ߟߊ߫ ߞߊ߬ ߓߐ߫ ߡߊ߬ߟߌ ߟߋ߬ ߟߊ߫߸ ߒ߬ߞߊ߬߸ ߏ߬ ߞߏ ߛߋ߲߬ߠߊ߬ߛߎߡߦߊ߫ ߘߊ߫ ߦߊ߯ߕߌ߫ ߕߊ߬ߡߌ߲߬ߣߍ߲߫، <<ߘߏ߫ ߟߎ߫ ߡߴߊ߬ߟߎ߬ ߟߊ߫ ߛߊߟߌߡߊ߫ ߝߊ߯ߣߌ߲ ߛߊ߲߬ ߡߎߣߎ߲߬ ߖߍ߬ߘߍ>> ߞߙߊߟߌߟߊ ߣߌ߲߬ ߞߵߏ߬ ߦߌ߬ߘߊ߬߸ ߞߵߊ߬ ߟߴߊ߬ ߞߊ߲߬ ߞߏ߫ ߝߊ߰ߣߌ߲ ߠߊ߫ ߘߛߍ ߡߍ߲ ߏ߬ ߘߌ߫ ߟߐ߯ߝߍ ߟߎ߬ ߞߣߐ߫߸ ߏ߬ ߡߊ߲߬ߕߐ ߦߴߊ߬ߟߎ߫ ߞߊ߲߬، ߞߊ߬ߕߎ߲߯߸ ߤߊߟߌ߬ ߡߊߡߦߊ ߢߊߞߘߐ ߣߌ߲߬ ߘߐ߫߸ ߓߊ߯ ߝߊ߯ߣߌ߲ ߘߛߍߣߍ߲߫߸ ߏ߬ ߡߍ߲ ߦߋ߫ ߓߊ߬ߛߊ߲߬ ߜߍ ߦߋ߫ ߘߏ߲߬ ߠߊ߫ ߡߊߡߦߊ ߘߐ߫ ߓߊߞߍ߬ ߞߊ߬ߣߌ߲߬.

ߏ߬ ߓߍ߯ ߣߴߊ߬ ߕߊ߫߸ ߖߊ߬ߡߊ ߦߋ߫ ߜߘߌ߫ ߟߴߊ߬ߟߎ߫ ߞߊ߲߬ ߕߎ߲߫، ߊߦߌߛߊ߬ ߞߐ߲ߘߍ߫߸ ߏ߬ ߣߊ߬ߣߍ߲߫ ߕߍ߬ߘߍ߫ ߊ߬ ߟߊ߫ ߝߊ߰ߣߌ߲ ߠߋ߬ ߞߙߊ߫ ߞߊ߲ߡߊ߬߸ ߏ߬ ߞߵߊ߬ ߦߌ߬ߘߊ߬ ߞߏ߫ ߞߙߊߟߌ ߕߍ߫ ߓߊ߯ߙߊ߫ ߘߋ߲ߣߍ߲߫ ߘߌ߫߸ ߜߟߍ߬ߦߊ߬ ߛߌߦߊߡߊ߲߫ ߠߋ߬ ߦߴߊ߬ ߘߐ߫، <<ߓߊ߯ߙߊ ߟߋ߬ ߥߙߊ߬ ߟߴߊ߬ߟߎ߫ ߡߊ߬ ߛߐ߲߬߸ ߏ߬ ߟߋ ߦߴߊ߬ ߞߍ߫ ߟߊ߫ ߝߊ߰ߣߌ߲߬ ߕߌ߮ ߛߌߦߊߡߊ߲߫ ߦߋ߫ ߕߊ߯ߣߌߛߊߦߌ ߞߍ߫ ߟߊ߫، ߒߠߋ ߞߏ߬ߣߌ߲߸ ߒߠߋ ߟߊ߫ ߞߙߊߟߌߟߊ ߥߊ߫ ߢߊ ߞߊ߬ ߒ ߘߌߦߊ߫ ߝߋߎ߫.>> ߊ߬ ߞߵߏ߬ ߦߌ߬ߘߊ߬.

ߝߊ߰ߣߌ߲߬ ߕߌ߮ ߘߏ߫ ߟߎ߫ ߓߍ߫߸ ߦߏ߫ ߢߊ߰ߟߋ߲ ߖߊߟߏ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߕߎ߬ߢߊ߬ ߝߐ ߟߋ߬ ߞߊ߫ ߢߌ߲߬ ߞߏ ߓߍ߯ ߘߐ߫. <<ߣߌ߫ ߞߙߊߟߌߟߊ ߞߵߊ߬ ߟߐ߲߫ ߞߏ߫ ߊ߬ ߘߌ߫ ߓߊ߲߫ ߓߊ߯ߙߊ ߟߊ߫ ߥߊ߯ߕߌ ߡߍ߲ ߞߘߐ߫߸ ߊ߬ ߦߴߏ߬ ߝߐ߫، ߣߴߊ߬ ߕߍ߫ ߓߊ߲߫ ߊ߬ ߟߊ߫߸ ߊ߬ ߦߴߏ߬ ߝߣߊ߫ ߝߐ߫.>> ߊ߬ߟߋ߫ ߞߵߏ߬ ߦߌ߬ߘߊ߬ ߞߵߊ߬ ߝߐ߫ ߞߏ߫ ߞߎߡߊ ߟߊߜߍߓߊߟߌߦߊ ߏ߬ ߦߋ߫ ߣߊ߬ ߟߊ߫ ߡߐ߰ ߛߌߦߊߡߊ߲߫ ߠߋ߬ ߟߊߡߐߣߍ߫ ߟߊ߫.

ߞߐߜߊߟߌ߫ ߛߌߦߊߡߊ߲ ߏ߬ ߟߋ ߞߏߛߐ߲߬߸ ߞߙߊߟߌߟߊ ߟߎ߬ ߦߴߊ߬ߟߎ߬ ߛߋߞߏ ߞߍ߫ ߟߊ߫߸ ߝߏ߫ ߊ߬ߟߎ߬ ߘߌ߫ ߓߊ߯ߙߊ߫ ߛߎ ߝߍ߬ ߕߎ߬ߡߊ ߘߏ߫ ߟߎ߫ ߟߊ߫، <<ߞߊ߬ ߓߍ߲߬ ߡߐ߱ ߟߎ߫ ߡߊ߬ߤߌߣߊ ߡߊ߬߸ ߓߊ ߘߏ߫ ߟߎ߫ ߘߐߜߍ߬ߘߍ߲߬ߣߍ߲ ߠߋ߬ ߦߋ߫ ߞߍ߫ ߟߊ߫، ߊ߲ ߘߴߊ߲ ߓߟߏ ߛߌ߰ ߝߊ߰ߣߌ߲ ߏ߬ ߘߏ߫ ߟߎ߫ ߞߘߐ߫߸ ߤߊߟߌ߬ ߣߴߊ߲ ߞߵߊ߬ ߟߐ߲߫ ߞߏ߫ ߥߊ߯ߕߌ ߞߊ߫ ߘߐ߯، ߊ߲ ߘߴߊ߬ ߝߐ߫ ߞߏ߫ ߊ߲ ߘߴߊ߲ ߛߋߞߏ ߞߍ߫߸ ߓߊ߬ߙߌ߬ ߘߏ߫ ߟߎ߫ ߘߴߊ߲ ߡߌ߬ߣߴߊ߲ ߓߟߏ ߡߊ߬.>> ߛߟߊߕߌ߯ ߝߊ߯ߖ߭ߊ߬ ߞߵߏ߬ ߟߊߟߐ߬.

ߜߟߍ߬ߦߊ ߘߏ߲߬ ߘߊ߲߬ ߕߴߏ߬ ߝߣߊ߫ ߘߌ߫ ߘߋ߬߸ ߢߎߡߍ߫ ߞߏ ߦߴߊ߬ߟߎ߫ ߛߍ߰ ߟߊ߫ ߛߐ߲߬ ߞߵߊ߬ߟߎ߬ ߟߊ߫ ߓߊ߯ߙߊ ߜߟߍ߬ߦߴߊ߬ߟߎ߬ ߓߟߏ߫߸ ߦߏ߫ ߛߐ߰ߟߌ߸ ߓߍ߯߯ ߡߊ߬ߞߏ ߦߴߏ߬ ߡߍ߲ ߠߊ߫ ߕߋ߲߬ ߞߊ߬ߣߌ߲߬، <<ߕߙߏ߬ߞߏ ߟߎ߬ ߕߍ߫ ߓߊ߯ߙߊ߫ ߟߊ߫ ߣߌ߫ ߢߎߡߍ ߕߍ߫، ߊ߲ ߘߌߦߊߜߏߦߊߣߍ߲߫ ߏ߬ ߘߐ߫ ߞߊ߬ ߣߌߘߐ ߟߋ߬ ߟߊߓߊ߯ߙߊ߫߸ ߓߊ߬ߙߌ߬ ߖߌߥߎ ߛߐ߬ߘߐ߲ ߝߣߊ߫ ߜߍ߬ߟߍ߲߬ߡߊ߲߬.>> ߊ߬ ߞߵߏ߬ ߦߌ߬ߘߊ߬.

ߡߊ߬ߞߕߌ߬ߟߌ ߏ߬ ߟߎ߬ ߓߊ߯ ߓߐ߫ ߊ߬ ߟߊ߫߸ ߓߊ߯ߙߘߊ ߣߌ߲߬ ߦߋ߫ ߛߌߦߊߡߊ߲߫ ߠߋ߬ ߞߍ߫ ߟߊ߫ ߓߊ߯ߙߓߊߟߌߦߊ ߞߍ߬ߟߍ ߘߐ߫߸ ߊ߬ ߕߌ߯ߕߌ߯ ߘߋ߲ߡߌߛߍ߲ ߠߎ߬ ߟߊ߫ ߞߎ߲߬ߠߊ߫.

ߣߎ߲߰ߡߎߛߏ ߞߐ߲ߘߍ߫ ߦߋ߫ ߞߙߊߟߌ ߡߊߞߊ߬ߙߊ߲ ߠߋ߬ ߞߊ߲߬߸ ߏ߬ ߘߌ߫ ߛߊ߲߬ ߣߊ߯ߣߌ߲߫ ߓߐ߫ ߕߋ߲߬߸ ߊ߬ߟߋ ߦߋ߫ ߞߙߊߟߌ ߦߋ߫ ߟߊ߫ ߓߍ߲߬ߒ߬ߛߋ߲߬ߡߊ߬ߓߊ߫ ߟߋ߬ ߘߌ߫، <<ߊ߬ ߦߋ߫ ߒ ߘߍ߬ߡߍ߲߬ ߠߊ߫ ߞߏߛߓߍ߫، ߒ ߧߋ߫ ߛߋ߫ ߟߊ߫ ߒ ߡߊ߬ߞߏ߬ ߓߘߎߓߘߎ ߟߎ߬ ߢߊߓߐ߫ ߟߴߊ߬ ߘߐ߫، ߒߠߋ ߦߴߊ߬ ߝߍ߬ ߟߋ߬߸ ߞߊ߬ ߛߋ߫ ߒ ߖߘߍ߬ߞߊ߬ߣߌ߲߬ ߓߊ߯ߙߊ߫ ߦߌߟߊ߫ ߟߋ߬ ߟߊߞߊ߬ ߟߊ߫.>> ߊ߬ ߞߵߏ߬ ߦߌ߬ߘߊ߬.

ߣߕߊ߬ ߛߎ߮ ߏ߬ ߟߋ ߝߣߊ߫ ߦߋ߫ ߊߦߌߛߊ߬ ߖߊ߰ߓߌ ߟߊ߫߸ ߊ߬ߟߋ ߝߣߊ߫ ߦߋ߫ ߡߞߊ߬ߙߊ߲߬ߘߋ߲ ߠߋ߬ ߘߌ߫: <<ߣߴߌ ߞߊ߬ ߓߊ߯ߙߊ ߣߌ߲߬ ߢߊߟߐ߲߫ ߊ߬ ߢߌ߬ߡߊ ߟߊ߫߸ ߌ ߘߴߌ ߖߍ߬ߘߍ߫ ߘߍ߬ߡߍ߲߫߸ ߞߵߊ߬ ߟߊ߫ ߡߐ߱ ߟߎ߫ ߘߍ߬ߡߍ߲߬، ߡߏ߬ߛߏ ߘߌ߫ ߛߴߊ߬ ߟߊ߫ ߞߏ߫ ߛߌߦߊߡߊ߲߫ ߞߍ߫ ߟߴߊ߬ ߖߘߍ߬ ߦߋ߫ ߞߙߊߟߌ ߘߐ߫߸ ߊ߬ ߡߊ߲߫ ߊ߬ ߗߍ߬ ߟߊ߫.>> ߊ߬ߟߋ߫ ߞߵߏ߬ ߟߋ ߦߌ߬ߘߊ߬.

ߎߡߊߙߎ߫ ߛߌ߬ߛߋ ߡߍ߲ ߛߊ߲߬ ߕߊ߲ ߦߋ߫ ߞߙߊߟߌ ߘߊߞߘߐ߫ ߕߋ߲߬߸ ߏ߬ ߞߵߊ߬ ߦߌ߬ߘߊ߬ ߞߏ߫ ߓߊ߯ߙߊ ߣߌ߲߬ ߕߍ߫ ߥߊߘߌ߫ ߢߌߣߌ߲߫ ߘߊߞߎ߲ ߞߋߟߋ߲߫ ߘߌ߫ ߘߋ߬߸ <<ߊ߬ ߦߴߊ߲ ߞߛߌ߫ ߟߊ߫ ߓߊ߯ߙߓߊߟߌߦߊ ߡߊ߬، ߝߏ߫ ߞߵߊ߲ ߛߋ߫ ߊ߲ ߠߊ߫ ߘߋ߲ߓߦߊ ߘߏ߬ߣߌ߲ ߞߘߐ߫، ߞߙߊߟߌ ߦߋ߫ ߓߊ߯ߙߊ߫ ߟߋ߬ ߘߌ߫߸ ߡߍ߲ ߕߐ߬ߣߐ ߞߊ߫ ߛߌߦߊ߫ ߞߏߛߓߍ߫.>> ߊ߬ ߞߵߏ߬ ߝߐ߫.

ߕߟߋ߬ ߘߊ߲ߘߐ߫ ߟߋ߬ ߕߏߣߍ߲߫ ߛߊߟߌ ߟߊ߫ ߡߎ߬ߕߎ߲߬߸ ߞߙߊߟߌ߫ ߕߏ߲ߜߏ ߓߍ߯ ߝߊߣߍ߲߫ ߠߋ߬ ߕߋ߲߬، ߝߊ߰ߣߌ߲߬ ߕߌ߮ ߟߎ߬ ߣߌ ߦߴߊ߬ߟߎ߬ ߟߊ߫ ߝߊ߰ߣߌ߲ ߞߊ߲߬߸ ߜߟߍ߬ߦߊ ߟߎ߬ ߦߋ߫ ߞߙߊߟߌߟߊ ߟߎ߬ ߝߣߊ߫ ߞߊ߲߬߸ ߓߊ߯ߙߊ ߞߍߢߊ߫ ߞߏ ߘߐ߫، ߓߊ߬ߙߌ߬ ߏ߬ ߓߍ߯ ߣߴߊ߬ ߕߊ߫߸ ߊ߬ߟߎ߬ ߘߴߊ߬ߟߎ߬ ߖߌߖߊ߬߸ ߞߊ߬ ߛߋ߫ ߡߐ߱ ߟߎ߫ ߡߊ߬ߞߏߢߊ߬ ߟߊ߫ ߖߐ߫.

ߞߙߊߟߌߟߊ ߟߎ߬ ߘߌ߫ ߓߊ߯ߙߊ߫ ߟߊߛߎߡߦߊ߫ ߝߋ߫߸ ߒ߬ߞߊ߬ ߤߌߣߊ ߦߋ߫ ߞߍ߫ ߟߴߊ߬ ߘߏ߫ ߟߎ߫ ߛߓߊߓߎ ߘߌ߫߸ ߊ߬ ߣߌ߫ ߞߊ߬ ߓߍ߲߬ ߞߏ߫ ߛߌߦߊߡߊ߲߫ ߘߝߊߓߊߟߌߦߊ ߘߌ߫، ߓߊ߯ߙߊ߫ ߟߋ߬ ߦߴߊ߬ ߘߌ߫߸ ߡߍ߲ ߦߋ߫ ߡߊߞߕߌ߫ ߟߊ߫߸ ߞߏ߬ߣߵߊ߬ ߕߐ߬ߦߋ ߡߐ߱ ߟߎ߫ ߞߊ߲߬ ߛߐ߬ߘߐ߲ ߛߌߟߊ ߝߍ߬.