ߓߌߟߏ߲߫ ߕߊ߬ߡߌ߲߬ߣߍ߲ ߛߎ ߟߋ߬ ߘߐ߫ ߞߵߊ߬ ߘߎ߰ߛߊ ߜߍ߫ ߛߌ߬ߣߌ߲߬ߟߏ߲ ߠߊ߫߸ ߕߊ ߥߟߌ߬ ߘߊ߫ ߛߏ߬ߣߌ ߔߍߛ߭ ߟߊ߫ ߛߌ߲߬ߓߌ߬ߓߏ߲ ߠߊ߫ ߞߊ߲ߞߊ߲߫ ߞߣߐ߫߸ ߞߊ߬ ߕߌߢߍߟߌ߫ ߛߌߦߊߡߊ߲߫ ߞߍ߫، ߒ߬ߓߊ߬߸ ߖߍ߮ ߣߌ߫ ߛߌ߬ߛߍ ߡߍ߲ ߠߎ߬ ߖߋ߬ߣߌ߲߬ ߘߊ߫ ߦߋ߲߬߸ ߡߏ߬ߛߏ ߟߎ߬ ߦߋ߫ ߝߋ߲߫ ߕߌߢߍߣߍ߲ ߏ߬ ߟߎ߫ ߟߋ߬ ߕߊ߬ ߟߊ߫ ߞߵߊ߬ߟߎ߬ ߛߊߣߌ߲ߧߊ߫ ߞߊ߬ ߣߵߊ߬ߟߎ߫ ߝߙߋ߬ ߟߐ߯ߝߍ ߘߐ߫، ߊ߬ ߘߏ߲߬߸ ߝߋ߲߫ ߠߎ߫ ߟߋ߬ ߖߍ߮ ߣߌ߫ ߛߌ߬ߛߍ ߏ߬ ߟߎ߬ ߘߌ߫߸ ߞߎ߲߬ߠߊ߬ߛߌ߮ ߟߎ߬ ߣߐ߬ ߡߍ߲ ߘߊߥߎ߲ ߠߊߕߐ߲߫ ߠߊ߫߸ ߞߵߏ߬ ߞߎ߲߭ ߞߍ߫߸ ߞߏ߫ ߊ߬ ߡߊ߲߫ ߘߌ߫ ߖߡߊ߬ߣߊ߬ߘߋ߲ ߠߎ߬ ߟߊ߫ ߞߍ߲ߘߍߦߊ ߟߊ߫، ߏ߬ ߟߋ ߘߐ߫߸ ߊ߬ߟߎ߬ ߓߘߊ߫ ߞߎߡߊ߫ ߞߵߊ߬ߟߎ߫ ߕߊ߬ߣߊ ߟߊ߫ ߘߊ߱ ߘߐ߫.

ߕߊ ߣߌ߲߬ ߓߐ߫ ߘߊ߫ ߃ ߕߎߡߊ ߟߋ߬ ߡߊ߬ ߛߏ߬ߣߌ ߔߍߛ߭ ߟߊ߫ ߓߊ߯ߙߊ߫ ߦߙߐ ߣߌ߲߬ ߘߐ߫߸ ߕߊߟߛߊߟߊ ߟߎ߫ ߞߵߊ߬ߟߎ߬ ߛߋߞߏ ߞߍ߫ ߞߊ߬ ߕߊ ߟߊߛߊ߬، ߊ߬ߟߋ ߘߏ߲߬ ߦߋ߫ ߓߊ߯ߙߊ߫ ߦߙߐ߫ ߟߋ߬ ߘߌ߫߸ ߝߋ߲߫ ߜߘߍ߫ ߕߍ߫ ߝߙߋ߬ ߟߊ߫ ߦߙߐ ߡߍ߲ ߘߐ߫ ߖߍ߮ ߣߌ߫ ߛߌ߬ߛߍ ߟߎ߬ ߞߐ߫، ߡߐ߰ ߡߊ߫ ߕߏ߫ ߊ߬ ߘߐ߫߸ ߒ߬ߞߊ߬ ߓߟߏߝߋ߲߫ ߕߌߢߍ ߞߊ߬ߛߙߊ ߥߙߊ߬ߣߍ߲߬ ߞߏߛߓߍ߫.

ߓߐ߬ߟߐ߲߬ߞߊ߬ ߝߊߕߎߡߊߕߊ߬ ߖߊ߰ߣߍ ߡߍ߲ ߦߋ߫ ߞߊ߲ߞߊ߲߫ ߕߌ߲߬ߞߎߘߎ߲ ߞߐ߰ߖߌ߬ߘߊ߬ߟߊ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߣߌ߫ ߓߊߡߐ߲ ߜߋ߬ߟߎ߲߬ߠߌ߲߬ߠߊ ߘߌ߫߸ ߏ߬ ߟߊߟߐ߲ߠߌ߲ ߡߍ߲ ߞߍ߫ ߘߊ߫߸ ߊ߬ ߡߊ߫ ߕߏ߫ ߛߌ߰ ߘߐ߫، ߊ߬ ߞߊ߬ ߞߣߐ߬ߜߍ߲߬ߠߌ߲߬ ߞߏ߬ ߢߌߡߊ ߟߋ߬ ߟߊߢߌߣߌ߲߫߸ ߓߊ߬ߙߵߊ߬ ߞߏ ߥߙߊ߬ ߘߴߊ߬ߟߎ߫ ߡߊ߬ ߟߋ߬.

<<ߞߊ߬ߦߌ߯ ߃ߕߎߡߊ ߟߋ߬ ߟߊ߫߸ ߞߵߊ߬ ߛߌ߰ ߛߌ߬ߣߌ߲߬ߟߏ߲ ߁߁ߕߎߡߊ ߟߊ߫߸ ߒ ߠߊ߫ ߥߛߊ߬ߘߊ߬ߕߌ߮ ߓߊߞߊ߬ߙߌ߫ ߖߊ߰ߓߌ ߕߘߍ߬ ߜߍ ߘߐ߫߸ ߞߊ߬ ߕߊ߫ ߞߏ ߣߌ߲߬ ߞߙߐ߬ߛߌ߬߸ ߞߊ߬ ߕߌߢߍߟߌ߫ ߞߍߣߍ߲ ߠߎ߬ ߓߙߍ߬ ߟߐ߲߫.>> ߊ߬ ߞߵߏ߬ ߦߌ߬ߘߊ߬.

ߕߊ ߓߊ߱ ߡߊߝߊ߰ߣߍ߲ ߞߐ ߘߐ߫ ߞߵߊ߬ ߟߊߛߊ߬߸ ߝߊ߰ߡߊ ߟߎ߫ ߞߊ߬ ߓߟߏߘߐߓߍ߲ ߠߎ߬ ߞߍ߫ ߌߞߘߐ߫، ߊ߬ߟߎ߫ ߞߊ߬ ߞߊ߲ߓߋ߲߫ ߞߏ ߢߊߢߌߣߌ߲߫߸ ߞߵߏ߬ ߘߏ߬ߣߌ߲ ߟߊ߫ ߞߏߟߊߘߍ߫ ߞߎ߲߬߸ ߡߍ߲ ߠߎ߬ ߟߊ߫ ߦߙߐ ߖߋ߬ߣߌ߲߬ߣߍ߲߬، ߖߐ߲߰ߛߊ߫ ߖߍ߮ ߣߌ߫ ߛߌ߬ߛߍ ߡߍ߲ ߠߎ߬ ߖߋ߬ߣߌ߲߬ߣߍ߲߫ ߏ߬ ߘߌ߫߸ ߣߴߊ߬ߟߎ߬ ߡߊ߲߫ ߞߊ߲߫ ߞߊ߬ ߘߊߥߎ߲߫߸ ߏ߬ ߟߎ߬ ߘߌ߫ ߟߊߓߐ߫ ߢߊ ߡߍ߲ ߡߊ߬ ߞߵߊ߬ߟߎ߫ ߖߋ߬ߣߌ߬߸ ߊ߬ߟߎ߬ ߞߊߣߊ߬ ߝߙߋ߬ ߜߘߍߞߍ߫ ߡߎ߬ߕߎ߲߬، ߊ߬ߟߎ߫ ߞߊ߬ ߕߐ߲ߓߟߏߡߊ ߟߎ߬ ߟߊߖߌ߰ ߞߣߍ ߞߊ߲߬ ߦߋ߲߬߸ ߞߊ߬ ߦߙߐ ߟߊߞߊ߲ߘߊ߫. <<ߊ߲ ߞߊ߬ ߥߟߏߒߘߐ߫ ߕߌߢߍߣߍ߲ ߠߎ߬ ߟߊߓߐ߫ ߞߏ ߛߌ߰ ߛߋ߲߬ߠߊ߫߸ ߡߍ߲ ߠߎ߬ ߡߊ߲߫ ߞߊ߲߫ ߞߊ߬ ߘߊߥߎ߲߫ ߡߎ߬ߕߎ߲߬.>> ߓߐ߬ߟߐ߲߬ߞߊ߫ ߖߊ߰ߣߍ ߟߋ߬ ߞߊ߲߫ ߕߋ߲߬.

ߓߊ߲߬ ߞߍߣߍ߲߫ ߥߟߏߒߘߐ ߤߍ߲ ߠߎ߬ ߘߐ߫ ߏ߬ ߘߌ߫ ߞߏ߫ ߊ߬ ߡߊ߲߫ ߞߊ߲߫ ߞߊ߬ ߘߊߥߎ߲߫߸ ߏ߬ ߟߎ߫ ߕߊ߬ ߘߊ߫ ߞߊ߬ ߥߴߊ߬ߟߎ߬ ߘߴߊ߬ߟߎ߫ ߖߋ߬ߣߌ߲߬ ߦߌߟߊ ߘߐ߫، ߒ߬ߓߊ߬߸ ߡߏ߬ߛߏ ߟߎ߬ ߓߐ߫ ߘߊ߫ ߝߊ߲߭ ߓߍ߯ ߘߐ߫ ߞߊ߬ ߣߊ߬ ߖߍ߮ ߣߌ߫ ߛߌ߬ߛߍ ߏ߬ ߟߎ߫ ߟߋ߬ ߕߊ߬ ߞߊ߲ߡߊ߬߸ ߛߴߊ߬ߟߎ߬ ߘߴߊ߬ ߝߙߋ߬ ߢߊ ߡߍ߲ ߡߊ߬.

<<ߝߋ߲߫ ߖߋ߬ߣߌ߲߬ߕߊ ߟߎ߬ ߦߋ߫ ߛߋ߫ ߟߊ߫ ߖߋ߬ߣߌ߲߬ߠߌ߲߬ ߦߙߐ ߘߐ߫ ߕߎ߬ߡߊ ߡߍ߲ ߠߊ߫߸ ߏ߬ ߞߵߊ߬ ߛߐ߬ߘߐ߲߫ ߠߋ߬ ߊ߬ߟߎ߬ ߓߘߊ߫ ߦߙߐ ߓߍ߯ ߟߊߝߌ߲߬ ߔߏߔߏ ߟߊ߫، ߖߋ߬ߣߌ߲߬ߠߌ߲߬ ߥߊ߯ߕߌ ߟߊ߫߸ ߥߊߦߌ߲ߕߟߎ ߣߌ߫ ߕߟߎ ߟߎ߬ ߞߍ ߞߐߝߍ߬ ߊ߬ߟߎ߫ ߞߊ߲߬ ߞߵߊ߬ߟߎ߫ ߖߋ߬ߣߌ߲߬߸ ߡߏ߬ߛߏ ߢߌ߲߬ ߠߎ߫ ߞߵߊ߬ߟߎ߬ ߞߍ߫ ߏ߬ ߞߊ߲߬ ߞߊ߬ ߝߋ߲ ߡߍ߲߬ ߠߎ߫ ߕߊ߬ ߞߵߊ߬ߟߎ߫ ߝߙߋ߬.>> ߓߐ߬ߟߐ߲߬ߞߊ߫ ߖߊ߰ߣߍ ߞߵߊ߬ ߦߌ߬ߘߊ߬߸ ߞߏ߫ ߏ߬ ߞߍ߫ ߘߊ߫ ߕߙߎ߬ ߘߌ߫ ߞߵߊ߬ ߘߊߘߐߖߊ߬ ߞߊ߲ߞߊ߲߫ ߡߏ߬ߛߏ ߟߎ߬ ߟߊ߫ ߞߏ ߘߐ߫ ߞߏߛߓߍ߫.

ߞߊ߬ ߓߍ߲߬ ߏ߬ ߟߋ ߞߏߢߊ ߡߊ߬ ߛߊ߫߸ ߊ߬ߟߎ߫ ߞߵߊ߬ߟߎ߬ ߞߊ߲ߠߊߘߌ߫ ߕߐ߲ߓߟߏߡߊ ߟߎ߫ ߡߊ߬߸ ߞߊ߬ ߓߘߌ߬ߓߘߌ ߘߏ߲߬ ߖߊ߬ߡߊ ߘߐ߫. <<ߕߐ߲ߓߟߏߡߊ ߟߎ߬ ߣߌ߫ ߣߊ߲߬ߕߌ߮ ߟߎ߫ ߣߊ߬ ߘߊ߫ ߞߊ߬ ߢߊߖߌߓߐߥߊߦߌ߲ ߠߊߓߊ߯ߙߊ߫ ߞߵߊ߬ߟߎ߬ ߘߐߖߍ߲ߛߍ߲߫، ߓߊ߬ߙߌ߬߸ ߊ߬ߟߎ߬ ߡߊ߫ ߓߐ߫ ߦߙߐ ߘߐ߫ ߝߋߎ߫.>>

ߤߊߞߍߕߏ߫ ߡߏ߬ߛߏ ߟߎ߬ ߣߌ ߦߴߊ߬ ߞߏ ߞߊ߲߬߸ ߘߏ߫ ߟߎ߫ ߕߍ߬ߘߍ߫ ߛߌ߬ ߟߊ߫ ߟߋ߬ ߦߙߐ߫ ߖߋ߬ߣߌ߲߬ߣߍ߲ ߏ߬ ߘߊ ߞߘߐ߫ ߦߋ߲߬߸ ߛߴߊ߬ߟߎ߬ ߘߌ߫ ߛߋ߫ ߝߋ߲ ߠߎ߬ ߡߊߛߐ߬ߘߐ߲߬ ߠߊ߫ ߢߊ ߡߍ߲ ߡߊ߬.

ߊ߲ ߓߴߊ߲ ߞߐߘߏ߲߬߸ ߊ߬ߟߎ߬ ߘߌ߫ ߣߵߊ߬ߟߎ߬ ߟߊߘߍ߬߸ ߞߊ߬ ߥߴߊ߬ߟߎ߬ ߛߊߣߌ߲ߧߊ߫ ߞߵߊ߬ߟߎ߫ ߓߌ߬ߟߊ߬ ߟߐ߮ ߘߐ߫.>> ߓߐ߬ߟߐ߲߬ߞߊ߫ ߖߊ߰ߣߍ ߟߋ߬ ߞߊ߲߫ ߕߋ߲߬.

ߕߋ߲߭ߕߋ߲߭ ߣߌ߲߬ ߘߐ߫߸ ߡߐ߰ ߟߎ߬ ߓߘߊ߫ ߓߐ߫߸ ߡߍ߲ ߠߎ߬ ߘߌ߫ ߖߌ߰ ߟߐ߯ߝߍ ߞߣߐ߫߸ ߞߊ߬ ߝߋ߲߫ ߕߌߢߍߣߍ߲ ߢߌ߲߬ ߠߎ߬ ߟߊ߫ ߞߏ ߢߊߢߌߣߌ߲߫ ߞߵߊ߬ߟߎ߬ ߟߊߓߐ߫ ߟߐ߮ ߘߐ߫، ߓߊ߬ߙߵߊ߬ ߞߣߐ߬ߘߐߝߟߌ߬ߣߍ߲ ߞߵߊ߬ ߦߌ߬ߘߊ߬ ߞߏ߫: <<ߞߏ߬ߣߌ߲߬ ߊߟߊ߫ ߟߊ߫߸ ߣߌ߲߬ ߞߏ ߥߙߊ߬ߣߴߊ߲ ߡߊ߬߸ ߡߏ߬ߛߏ ߘߏ߫ ߟߎ߫ ߞߏ߫ ߞߍߢߊ ߣߌ߲߬ ߘߓߊ߬ߙߌ߬ ߓߊ߲ ߠߋ߬ ߊ߲ ߞߊ߲߬.>>

ߞߏ߫ ߛߎ߮ ߣߌ߲߬ ߘߏ߲߬ ߡߊ߲߫ ߘߌ߫ ߝߘߏ߬ߓߊ߬ ߞߍ߲ߘߍߦߊ ߟߊ߫، ߏ߬ ߟߋ ߘߐ߫߸ ߝߊ߰ߡߊ ߟߎ߬ ߞߊ߲߫ ߞߏ߫: <<ߊ߲ ߧߋ߫ ߦߊ߲߬ ߠߋ߬߸ ߞߊ߬ ߝߘߏ߬ߓߊ߬ ߞߍ߲ߘߍߦߊ ߟߊߕߊ߲߬ߞߊ߬، ߞߵߊ߬ ߕߊ߬ ߞߊ߲ߞߊ߲߫ ߡߊ߬ ߞߵߊ߬ ߛߌ߰ ߞߐߣߊߞߙߌ߫ ߟߊ߫߸ ߓߍ߯ ߓߘߴߊ߬ ߟߐ߬ ߊ߬ ߛߋ߲߭ ߞߎ߲߬ߘߐ߫߸ ߛߊ߫ ߝߋ߲߫ ߕߌߢߍߣߍ߲ ߢߌ߲߬ ߠߎ߬ ߞߊߣߵߊ߬ߟߎ߬ ߞߐߛߊ߬ߦߌ߲߬ ߟߐ߯ߝߍ ߘߐ߫ ߢߊ ߡߍ߲ ߡߊ߬.>> ߓߐ߬ߟߐ߲߬ߞߊ߫ ߖߊ߰ߣߍ ߟߋ߬ ߞߊ߲߫ ߕߋ߲߬.

ߊ߬ߟߎ߫ ߞߵߊ߬ߟߎ߫ ߞߊ߲߬ߞߊߙߌ ߟߊ߫߸ <<ߕߍ߮ ߞߍ߫ ߘߊ߫ ߡߐ߰ ߛߌ߫ ߘߐ߫ ߣߌ߲߬ ߖߊ߲߬ߖߏ߲ ߘߐ߫߸ ߞߏ߫ ߘߌ߫ ߟߊߕߐ߲߫ ߏ߬ ߕߌ߰ ߟߊ߫.>>

ߊ߲ ߣߌ߫ ߡߏ߬ߛߏ ߟߊ߫ ߢߐ߲߯ߦߋ ߞߐ ߘߐ߫߸ ߁߉ߕߎߡߊ ߝߊ߲߭ ߝߍ߬߸ ߝߋ߲߫ ߕߌߢߍߣߍ߲ ߠߎ߬ ߕߊ߬ ߘߊ߫ ߞߊ߬ ߥߴߊ߬ߟߎ߫ ߖߋ߬ߣߌ߲߬ ߞߊ߲ߡߊ߬ ߞߎߣߊ߲ߞߏߙߏ߲߫.

ߓߊ߬ߙߌ߬߸ ߤߊߟߌ߬ ߦߙߐ߫ ߞߎߘߊ ߏ߬ ߘߐ߫ ߦߋ߲߬߸ ߞߟߊߦߊ ߘߏ߲߬ ߘߊ߫ ߦߋ߲߬، ߡߏ߬ߛߏ ߟߎ߬ ߣߴߊ߬ߟߎ߬ ߟߊ߫ ߥߊߟߌߥߊߟߌ߫ ߓߏߙߌߟߊ ߟߎ߫ ߞߵߊ߬ߟߎ߫ ߞߎ߲߬ߛߌ߲߫ ߦߋ߲߬ ߌߞߐ߫߸ ߞߊ߬ ߥߊ߫ ߝߋ߲߫ ߕߌߢߍߣߍ߲ ߢߌ߲߬ ߠߎ߫ ߕߊ߬ ߞߊ߲ߡߊ߬.

ߊ߲ ߠߊ߫ ߟߞߊ߬ߟߌ߬ߕߊ߬ ߢߌ߬ߣߌ߲߬ߠߊ ߡߍ߲ ߕߘߍ߬ ߜߍ ߘߐ߫ ߦߋ߲߬߸ ߏ߬ ߞߵߊ߬ ߦߌ߬ߘߊ߬ ߞߏ߫ ߛߙߋߦߊ ߟߎ߬ ߟߊ߫ ߝߐߟߌ߫ ߘߐ߫߸ ߕߐ߲ߓߟߏߡߊ ߕߊ߯ ߘߊ߫ ߡߏ߬ߛߏ ߘߏ߫ ߟߎ߫ ߕߊ߬ ߜߋ߬ߕߋߜߋ߭ ߘߐ߫ ߦߋ߲߬߸ ߞߊ߬ ߥߴߏ߬ ߟߎ߬ ߘߌ߫.

ߛߋ߫ ߞߍ ߕߐ߲ߓߟߏߡߟߊ߫߸ ߖߐ߲߰ߛߊ߫ ߡߌ߬ߣߊ߬ߓߊ߰ߕߐ ߏ߬ ߟߎ߬ ߟߊ߫ ߞߏ ߟߌ߬ߤߟߊ ߘߌ߫ ߟߐ߲߫߸ ߏ߬ ߟߎ߬ ߡߊ߫ ߛߐ߲߬ ߞߎߡߊ߫ ߛߌ߫ ߝߐ߫ ߟߊ߫، ߊ߬ߟߎ߫ ߞߵߊ߬ ߦߌ߬ߘߊ߫ ߟߋ߬ ߕߋ߲߬߸ ߞߏ߫ ߊ߬ߟߎ߬ ߕߴߛߋ߫ ߝߋ߲߫ ߜߘߍ߫ ߝߐ߫ ߟߊ߫ ߣߌ߫ ߛߐ߰ߡߊ߬ߟߊ ߕߍ߫ ߡߎߣߎ߲߬.