ߡߊ߲߬ߞߊ߲ ߡߍ߲ ߘߏ߲߬ ߘߊ߫ ߜߙߋߘߎ߯ ߓߙߊߣߡߊ߬ ߣߌ߫ ߛߊߣߊ߲ߠߊ߫ ߕߍ߫߸ ߣߴߊ߬ ߞߏ ߥߟߏ߫ ߘߊ߫ ߡߊ߲߬ߕߙߐ߬ ߛߌߦߊߡߊ߲߫ ߠߊ߫ ߝߊ߲߭ ߝߌ߬ߟߊ ߓߍ߯ ߝߍ߬، ߏ߬ ߟߋ ߞߕߌ ߕߍ߰ߣߍ߲߫ ߓߌ߬ ߞߐ߬ߓߊ߬ߟߏ߲ ߣߌ߲߬ ߡߊ߬ ߂߀߂߆ ߥߊ߬ߛߌ߬ߥߙߊ ߕߋ߬ߟߋ߫ ߂߂ ߡߊ߬ ߞߊ߲ߞߊ߲߫ ߞߕߌߘߊ ߦߌߟߡߊ߫ ߝߟߐ ߟߊ߫، ߞߕߌ ߏ߬ ߘߐ߫߸ ߓߌ߬ߟߊ߬ ߞߍߣߍ߲߫ ߘߏ߫ ߟߎ߫ ߞߐ߫ ߝߊ߰ߟߌ߬ ߞߏ ߟߋ߬ ߘߐ߫߸ ߘߏ߫ ߟߎ߫ ߕߊ ߦߋ߫ ߜߊ߬ߛߌ߬ߟߌ ߣߌ߫ ߡߊ߬ߘߌ߬ߡߌ߲߬ߠߌ߲ ߞߏߛߐ߲߬ ߟߊ߬ߥߟߌ߬ߒ߬ߡߊ߬ ߓߟߏ ߡߊ߬، ߒ߬ߓߊ߬߸ ߞߕߌߘߊ ߣߐ߬ ߞߕߌ ߏ߬ ߟߋ ߕߍ߰ ߟߊ߫߸ ߛߊ߲߬ ߃߀ ߟߊߣߍ߲߫ ߠߋ߬ ߘߏ߫ ߟߎ߫ ߞߊ߲߬ ߞߎ߲߬ߞߏ߬ߓߊ߬ߕߐ߬ߦߊ ߞߏߛߐ߲߬، ߊ߬ ߦߌ߬ߘߊ߬ ߘߊ߫ ߞߏ߫ ߡߍ߲ ߺ ߍ ߺ ߡߍ߲߫ ߖߊ߲߬ߞߌ߬ߣߍ߲߫߸ ߏ߬ ߟߎ߬ ߓߍ߯ ߦߋ߫ ߖߌ߬ߣߍ߬ ߕߊߡߊ߲ ߥߟߎ߬ߡߊ߬ ߄ ߛߙߊ߬߸ ߞߵߏ߬ ߞߍ߫ ߣߘߐ߬ߓߍ߲ ߣߌ߫ ߞߎ߲߬ߞߏ߬ ߟߊ߬ߘߊ߲߬ ߛߙߊ ߘߌ߫.

ߡߙߌߘߐ ߣߌ߲߬ ߞߌ߬ߦߊ߬ ߘߊ߫ ߖߊ߬ߡߊ ߡߊ߬ ߞߕߌߘߊ ߞߊ߲ߕߌ߮ ߟߋ߬ ߓߟߏ߫ ߡߊߡߊߘߎ߫ ߛߊߟߌߥߎ߬ ߖߊ߬ߞߌ߬ߕߋ߫، ߊ߬ ߟߊ߫ ߘߐ߬ߞߘߌ߬ߟߌ ߘߐ߫߸ ߞߕߌߘߊ ߞߵߊ߬ ߦߌ߬ߘߊ߬ ߞߏ߫ ߞߏ߫ ߘߏ߫ ߟߎ߫ ߦߴߊ߬ߟߎ߬ ߘߐ߫߸ ߏ߬ ߟߎ߬ ߦߋ߫ ߛߐ߲߬ߒ߬ߕߊ߲ ߠߎ߫ ߟߋ߬ ߘߌ߫، ߓߊߏ߬߸ ߞߏ ߡߍ߲ ߝߐߣߴߊ߬ߟߎ߫ ߣߐ߬ ߘߐ߫߸ ߞߌ߬ߛߍ߬ ߡߊ߫ ߦߴߏ߬ ߘߐ߫، ߝߣߊ߫߸ ߝߊߙߊ߲ߞߎ߬ߡߊ߲߬ ߞߐ߲ߘߍ߫߸ ߊ߬ ߝߐ߫ ߘߊ߫ ߞߏ߫ ߓߌ߬ߟߊ߬ ߞߍߣߴߊ߬ߟߋ߬ ߞߐ߫ ߝߊ߰ߟߌ߬ ߞߏ ߟߋ߬ ߘߐ߫، ߓߊ߬ߙߌ߬߸ ߏ߬ ߦߟߍ߬ߡߊ߲߬ ߘߊ߫ ߞߵߊ߬ ߝߐ߫ ߞߏ߫ ߝߊ߰ߟߌ ߛߎߡߊߒߘߐ.

ߣߊ߲ߛߎߓߊ߫ ߡߊߡߊߘߌ ߞߐ߲ߘߍ߫ ߡߍ߲ ߞߊ߲߬ߕߐ߮ ߦߋ߫ "ߟߏ߬ ߡߍߙ" ߘߌ߫߸ ߏ߬ ߛߐ߲߭ ߦߋ߫ ߘߊ߫ ߝߊ߰ߟߌ߬ ߞߏ ߘߐ߫، ߏ߬ ߟߋ ߞߏߛߐ߲߬߸ ߛߊ߲߬ ߃߀ ߥߛߎ߫ ߟߊ߫ ߘߴߊ߬ߟߋ ߞߎ߲߬ ߞߎ߲߬ߞߏ߬ߓߊ߬ߕߐ߬ߦߊ ߖߊ߲߬ߞߌ߬ߟߌ ߘߌ߫߸ ߊ߬ ߣߌ߫ ߖߌ߬ߣߍ߬ ߕߊߡߊ߲ ߞߋ߲߬ߥߟߎ߫ ߂ ߢߍ߬ߢߌ߲߬ߘߐ߬ߓߍ߲ ߛߊ߬ߙߊ، ߞߕߌߘߊ ߞߵߊ߬ ߦߌ߬ߘߊ߬ ߞߏ߫ ߡߌ߬ߣߊ߬ߟߌ߬ ߛߓߍ ߡߍ߲ ߦߴߊ߬ ߞߐ߫߸ ߏ߬ ߞߏ ߦߴߊ߬ ߡߊ߬ ߤߊߟߌ߬ߛߊ߫.

ߡߊ߬ߝߌ߲߬ߓߊ߰ߕߐ߬ ߜߘߍ ߕߐ߭ ߟߎ߬ ߛߊ߫߸ ߣߌ߫ ߣߊߡߏߙߌ߫ ߞߐ߲ߘߍ߫ ߕߐ߮ ߘߏ߫ ߦߴߊ߬ ߘߐ߫߸ ߏ߬ ߡߍ߲ ߞߊ߲߬ߕߐ߮ ߦߋ߫ "ߞߐ߬ߓߏߙߌ߫" ߘߌ߫߸ ߊ߬ ߣߌ߫ ߝߊߙߊ߲ߞߎ߬ߡߊ߲߬ ߞߐ߲ߘߍ߫߸ ߏ߬ ߟߎ߫ ߓߌ߬ߟߊ߬ ߘߊ߫ ߛߊ߲߬ ߁߅ ߥߛߎ߫ ߟߋ߬ ߟߊ߫، ߡߌ߬ߣߊ߬ߓߊ߰ߕߐ߬ ߛߌߦߊߡߊ߲߫ ߝߣߊ߫߸ ߦߏ߫ ߡߊ߲߬ߓߌ߬ ߞߐ߲ߘߍ߫߸ ߏ߬ ߡߍ߲ ߦߋ߫ ߛߏߕߌ߯ ߗߍߡߐ߮ ߘߌ߫߸ ߣߴߊ߬ ߘߌ߫ ߛߊ߲߬ ߈߀ ߣߌ߫ ߞߐ߫ ߢߐ߲߰ ߓߐ߫، ߏ߬ ߓߊ߬߸ ߊ߬ ߣߌ߫ ߓߐ߫ ߛߌߣߍ ߞߐ߲ߘߍ߫߸ (ߊ߬ߟߋ ߦߋ߫ ߘߋ߲ߡߌߛߍ߲߫ ߞߎ߲ߕߌ߮ ߟߋ߬ ߘߌ߫)߸  ߘߊߎߘߊ߫ ߞߡߊ߬ߙߊ߬߸ ߟߏ߲߬ߛߋߣߌ߲߫ ߞߙߎ߬ߡߊ߬߸ ߣߊ߲ߕߍߣߍ߲߫ ߡߎߛߊ ߞߐ߲ߘߍ߫߸ ߓߊ߲߬ߓߊ߬ ߛߋߞߎ ߞߐ߲ߘߍ߫߸ ߊ߬ ߣߌ߫ ߤߥߊ߬ ߡߊߡߊߘߌ ߞߐ߲ߘߍ߫߸ ߏ߬ ߟߎ߫ ߡߐ߰ ߥߐߙߐ߲ߝߌ߬ߟߊ ߓߍ߯ ߓߌ߬ߟߊ߬ ߘߊ߫ ߛߊ߲߬ ߁߀ ߥߛߎ߫ ߟߋ߬ ߟߊ߫ ߞߎ߲߬ߞߏ߬ߓߊ߬ߕߐ߬ߦߊ ߞߏߛߐ߲߬، ߡߎ߲߬ ߞߏߛߐ߲߬߸ ߡߐ߰ ߝߊ߰ ߞߏ ߛߋ߲߬ߘߏ߲߬ߢߐ߲߰ߦߊ߸ ߊ߬ ߣߌ߫ ߜߊ߬ߛߌ߬ߟߌ ߣߌ߫ ߡߊ߬ߘߌ߬ߡߌ߲߬ߠߌ߲ ߟߊ߬ߥߟߌ߬ߒ߬ߡߊ߬ ߓߟߏ ߡߊ߬. ߊ߬ ߣߌ߫ ߞߏ߫ ߊ߬ߟߎ߬ ߦߋ߫ ߖߌ߬ߣߍ߬ ߕߊߡߊ߲ ߞߋ߲߬ߥߟߎ߫ ߝߌ߬ߟߊ߫ ߛߊ߬ߙߊ߫ ߢߍ߬ߢߌ߲߬ߘߐ߬ߓߍ߲ ߘߌ߫.

ߞߕߌߘߊ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߟߊߒߠߦߊ ߞߎ߲߬ߕߊ߮ ߦߋ߫ ߛߊ߲߬ ߅ ߟߋ߬ ߘߌ߫߸ ߊ߬ߟߋ߬ ߖߊ߲߬ߞߌ߬ߓߊ߰ߕߐ ߓߍ߯ ߟߊ߫ ߞߎ߲߬ ߠߊ߫، ߡߍ߲ ߓߍ߲߬ߣߍ߲߫ ߕߐ߬ߢߍ߰ߓߊ߰ߕߐ ߟߎ߬ ߕߊ߫ ߝߊ߲߭ ߡߊ߬߸ ߛߊ߬ߙߌ߬ߦߊ߫ ߛߐ߲߬ ߘߴߊ߬ ߡߊ߬ ߞߏ߫ ߕߐ߬ߢߍ߮ ߞߵߏ߬ ߟߎ߫ ߛߐ߬ߘߐ߲߬، ߏ߬ ߟߋ ߘߐ߫߸ ߊ߬ ߦߌ߬ߘߊ߬ ߘߊ߫ ߞߏ߫ ߡߐ߰ ߛߌ߫ ߘߏ߲߬ߣߍ߲߬ ߥߛߎ ߟߊ߫ ߣߌ߲߬߸ ߊ߬ߟߎ߬ ߓߍ߯ ߦߋ߫ ߖߌ߬ߣߍ߬ ߕߊߡߊ߲ ߥߟߎ߬ߡߊ߬ ߄ ߠߋ߬ ߛߙߊ߬ ߟߊ߫߸ ߞߵߏ߬ ߘߌ߫ ߕߐ߬ߢߍ߰ߓߊ߰ߕߐ ߟߎ߫ ߡߊ߬ ߣߘߐ߬ߓߍ߲ ߣߌ߫ ߞߎ߲߬ߞߏ߬ ߘߐ߬ߓߍ߲߬ ߛߙߊ ߘߌ߫.

ߥߛߎߟߊߘߋ߲߫ ߡߐ߰ ߕߊ߲ ߢߌ߲߬ ߠߎ߬ ߘߐ߫߸ ߡߏ߬ߦߌ߬ߓߊ߬ ߞߐ߲ߘߍ߫ ߓߌ߬ߟߊ߬ ߘߊ߫ ߟߋ߬߸ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ߫ ߛߐ߲߬ ߡߊ߫ ߦߴߊ߬ ߘߐ߫، ߊ߬ ߞߋߟߋ߲߫ ߘߏ߲߬ ߕߍ߫ ߘߋ߬߸ ߛߌߦߊߞߊ߬ ߞߐ߲ߘߍ߫ ߣߌ߫ ߡߊ߬ߡߎߘߎ߬ ߞߐ߲ߘߍ߫߸ ߏ߬ ߟߎ߬ ߦߋ߫ ߓߏ߬ߙߌ߬ ߥߊ ߟߊ߫ ߡߎߣߎ߲߬، ߊ߬ ߦߋ߫ ߞߏ߫ ߊ߬ߟߎ ߝߣߊ߫ ߛߋ߲߬ ߕߴߊ߬ ߘߐ߫߸ ߊ߬ ߝߐ߫ ߘߊ߫ ߞߏ߫ ߘߏ߬ߣߌ߲߬ ߛߌ߫ ߕߴߊ߬ߟߎ߫ ߞߎ߲߬ ߡߎ߬ߕߎ߲߬.

ߞߕߌ ߕߍ߱ ߞߐ ߟߋ߬ ߘߐ߫߸ ߞߊ߲ߞߊ߲߫ ߞߕߌߘߊ ߦߌߟߡߊ߫ ߝߟߐ ߞߕߌߞߊ߲ߘߊ ߓߕߐߟߊ ߟߊ߬ߥߟߍ߬ߟߌ߬ ߝߏ߮ ߞߣߐ߫߸ ߝߏߘߋ߬ ߓߌ߲ߕߎ߬ ߞߋߕߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ ߛߍߥߊߣߍ߲߫ ߠߋ߬ ߓߐߣߍ߲߫ ߞߕߌ߫ ߘߊߞߎ߲ ߢߌ߲߬ ߘߐ߫، ߊ߬ ߟߊ߫ ߝߐߟߌ߫ ߘߐ߫߸ ߡߙߌߦߊ ߡߍ߲ ߕߊ߬ߣߍ߲߫ ߞߕߌߕߍ߯ߟߊ ߓߟߏ߫߸ ߏ߬ ߞߵߊ߬ ߦߌ߬ߘߊ߫ ߟߋ߬ ߞߏ߫ ߊ߬ߟߎ߫ ߞߊ߬ ߣߐ߬ߝߍ߬ߜߍ߲߬ߠߌ߲ ߡߍ߲ ߞߍ߫߸ ߊ߬ߟߎ߬ ߡߊ߫ ߓߊ߰ ߡߐ߰ ߡߊ߬.

<<ߊ߲ ߓߘߐ߫ ߟߊ߬ߥߟߍ߬ߟߌ߬ ߝߏ߮ ߟߋ߬ ߞߣߐ߫ ߣߌ߲߬߸ ߛߍߥߊ ߖߍ߬ߘߍߖߍ߬ߘߍ ߘߐ߫، ߞߊ߬ߕߎ߲߯߸ ߊ߲ ߕߍ߫ ߞߊ߬ߛߌ߬ ߟߊ߫ ߕߊߖߟߎߛߙߊ߫ ߞߏ߫ ߘߐ߫، ߣߴߊ߬ ߡߊ߫ ߢߊ߬ ߞߏ߫ ߝߘߏ߬ߓߊ߬ ߞߏߕߌ߯ߘߊ ߟߋ߬ ߒ߬ ߘߌ߫߸ ߊ߲ ߧߋ߫ ߞߊ߬ߛߌ߬ ߟߊ߫ ߡߍ߲ ߞߐ߫߸ ߏ߬ ߟߋ ߛߊ߬ߙߌ߬ߦߊ ߟߊߕߊ߯ߡߊ ߘߌ߫.>> ߝߏߘߋ߬ ߓߌ߲ߕߎ߬ ߞߋߕߊ߬ ߟߋ߬ ߞߊ߲߫ ߕߋ߲߬.

ߞߕߌߞߊ߲ߘߊ ߞߵߊ߬ ߦߌ߬ߘߊ߬ ߞߏ߫ ߡߐ߰ ߁߀ ߝߋ߲ ߺ ߋ ߺ ߝߋ߲߫ ߠߊ߫ ߞߎߡߊ ߦߴߌߘߐ߫ ߣߌ߲߬߸ ߝߘߏ߬ߓߊ߬ ߞߏߕߌ߯ߘߊ ߕߎ߲߬ ߞߵߊ߬ ߝߐ߫ ߟߋ߬ ߞߏ߫ ߞߊ߬ ߛߊ߲߬ ߃߀ ߟߴߊ߬ ߡߎ߰ߡߍ ߞߎ߲߬ ߞߎ߲߬ߞߏ߬ߓߊ߬ߕߐ߬ߦߊ ߞߏߛߐ߲߬، ߓߊ߬ߙߌ߬߸ ߞߕߌߕߍ߯ߟߊ ߟߎ߬ ߡߴߏ߬ ߞߍ߫، ߓߊ߬ߙߌ߬ ߏ߬ ߣߴߊ߬ ߕߊ߫߸ ߞߕߌ߫ ߕߍ߰ߣߍ߲ ߓߍ߲߬ ߘߴߊ߬ߟߎ߫ ߡߊ߬߸ ߞߵߏ߬ ߞߎ߲߭ ߞߍ߫ ߡߎ߲߬ ߘߐ߫߸ ߊ߬ ߦߋ߫ ߘߊ߫ ߞߏ߫ ߡߊ߬ߝߌ߲߬ߓߊ߰ߕߐ ߢߌ߲߬ ߠߎ߬ ߛߌߦߊߡߊ߲߫ ߦߋ߫ ߦߋ߲߬߸ ߡߍ߲ ߠߎ߬ ߞߊ߬ ߕߌߢߍߟߌ ߖߍ߬ߘߍߖߍ߬ߘߍ ߞߍ߫.

<<ߡߐ߱ ߟߎ߫ ߟߋ߬ ߝߊ߰ߣߍ߲߫߸ ߊ߬ ߘߏ߲߬ ߦߋ߫ ߘߊ߫ ߞߏ߫ ߊ߬ߟߎ߫ ߛߐ߲߭ ߦߴߊ߬ ߘߐ߫، ߘߏ߫ ߟߎ߫ ߓߟߏ ߟߋ߬ ߕߍ߰ ߘߴߊ߬ ߟߊ߫، ߊ߲ ߞߵߊ߬ ߝߐ߫ ߏ߬ ߟߋ ߘߐ߫߸ ߒ ߞߏ߫ ߏ߬ ߛߎ߮ ߡߊ߲߫ ߞߊ߲߫ ߞߊ߬ ߞߍ߫ ߞߊ߲ߞߊ߲߫ ߞߣߐ߫ ߡߎ߬ߕߎ߲߬، ߝߏ߫ ߞߵߊ߬ ߟߊߕߐ߲߫ ߠߋ߬، ߞߕߌ ߘߏ߲߬ ߝߣߊ߫ ߕߍ߰ߣߍ߲߫ ߢߊ ߡߍ߲߸ ߏ߬ ߘߌ߫ ߡߐ߰ ߟߊߟߌ߫ ߝߋߎ߫.>> ߊ߬ ߞߵߏ߬ ߝߙߊ߬ ߞߎߡߊ ߞߊ߲߬.

ߌߓߙߊߤߌߡߊ߫ ߞߊߟߌߟ ߞߊ߲ߕߍ߫ ߡߍ߲ ߦߋ߫ ߞߊ߲ߞߊ߲߫ ߞߕߌ߫ ߡߛߊߦߌ߲ߘߊ ߟߊ߬ߝߛߊ߬ߟߌ߬ߟߊ ߟߊ߫ ߞߌ߬ߣߊ ߘߌ߫߸ ߏ߬ ߞߊ߬ ߞߕߌߘߊ ߟߊ߫ ߡߙߌߦߊ ߕߊ߲߬ߘߏ߫ ߟߋ߬، ߊ߬ߟߋ ߛߍߥߊ߫ ߘߊ߫ ߟߋ߬ ߣߍ߲ߞߍ߫، ߞߵߏ߬ ߞߎ߲߭ ߞߍ߫ ߡߎ߲߬ ߘߌ߫߸ ߘߏ߫ ߟߎ߫ ߦߋ߫ ߘߊ߫ ߛߐ߲߬ߡߊ ߘߌ߫، ߊ߬ߟߋ ߟߊ߫ ߝߐߟߌ߫ ߘߐ߫߸ ߞߕߌ ߕߍ߰ ߘߊ߫ ߢߊ߫ ߛߌ߫ ߡߊ߬߸ ߊ߬ ߕߍ߰ ߢߊ߫ ߕߴߦߋ߲߬߸ ߡߍ߲ ߘߌ߫ ߡߐ߰ ߝߊ߮ ߢߐ߲߱ ߓߐ߫߸ ߡߍ߲ ߘߌ߫ ߡߊ߬ߘߌ߬ߡߌ߲߬ߠߌ߲ ߢߐ߲߱ ߓߐ߫.

<<ߡߐ߱ ߟߋ߬ ߝߊ߰ߣߍ߲߫߸ ߞߊ߬ ߡߐ߱ ߓߟߏ ߕߍ߰ ߊ߬ ߟߊ߫، ߞߕߌ ߡߍ߲ ߕߍ߰ߣߍ߲߫߸ ߒ ߞߊ߬ߛߌ߬ ߘߊ߫ ߢߊ ߡߍ߲ ߡߊ߬߸ ߊ߬ ߡߊ߫ ߥߊ߫ ߒ ߞߊ߬ߛߌ߬ ߞߊ߲ ߓߍ߯ ߝߍ߬، ߒ ߘߌ߫ ߛߴߊ߬ ߝߐ߫ ߟߊ߫ ߏ߬ ߘߐ߫ ߞߍ߰ ߒ ߞߏ߫ ߒ ߡߊ߫ ߓߍ߲߬ ߊ߬ ߡߊ߬، ߡߐ߱ ߟߋ߬ ߝߊ߰ߣߍ߲߬ ߒߠߋ ߡߊ߬߸ ߏ߬ ߢߐ߲߱ ߘߌ߫ ߛߋ߫ ߛߙߊ߬ ߟߊ߫؟ >> ߊ߬ ߞߵߏ߬ ߟߊߛߋ߫.

ߟߊ߬ߝߛߊ߬ߟߌ߬ߟߊ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߊ߬ߟߋ߫ ߞߵߊ߬ ߦߌ߬ߘߊ߫ ߟߋ߬ ߡߊ߬ߡߊ߬ߘߌ߬ ߞߐ߲ߘߍ߫ ߟߊ߫ ߞߏ ߘߐ߫߸ ߏ߬ ߡߍ߲ ߓߟߏ߫ ߝߌ߬ߟߊ ߓߍ߯ ߕߍ߰ߣߴߊ߬ ߟߊ߫، ߞߏ߫ ߞߊ߬ ߖߌ߬ߣߍ߫ ߖߡߊ߬ߣߊ ߟߋ߬ ߖߊ߲߬ߞߌ߲߫߸ ߏ߬ ߦߴߊ߬ ߟߐ߬ ߡߊ߬ߡߊ߬ߘߌ߬ ߞߐ߲ߘߍ߫ ߟߊ߫ ߞߏ ߞߘߐ߫߸ ߊ߬ߟߋ ߡߍ߲ ߓߟߏ߫ ߝߌ߬ߟߊ ߓߍ߯ ߕߍ߰ߣߴߊ߬ ߟߊ߫ ߡߊ߲߬ߞߊ߲ ߣߌ߲߬ ߘߐ߫، ߓߊ߬ߙߌ߬߸ ߞߕߌߘߊ ߡߊ߫ ߛߐ߲߬ ߡߙߌߦߊ ߏ߬ ߡߊ߬، ߞߊ߬ߙߊ߲߬ߡߐ߰ ߞߊ߲ߕߍ߫ ߞߵߊ߬ ߦߌ߬ߘߊ߬ ߞߏ߫ ߊ߬ ߘߌ߫ ߛߴߊ߬ ߝߐ߫ ߟߊ߫ ߏ߬ ߘߐ߫ ߞߏ߫ ߞߊ߬ ߛߊ߬ߦߌ߲߬ ߞߕߌ ߡߊ߬ ߦߙߐ ߏ߬ ߟߎ߬ ߞߏߛߐ߲߬.

ߞߊ߬ߙߊ߲߬ߡߐ߯ ߡߏ߬ߤߊ߬ߡߍߘ ߂߲ ߞߙߎ߬ߡߊ߬ ߡߍ߲ ߦߋ߫ ߟߊ߬ߝߛߊ߬ߟߌ߬ߟߊ߫ ߘߌ߫ ߖߌ߬ߣߍ߫ ߟߊ߬ߝߛߊ߬ߟߌ߬ ߕߐ߲ ߘߐ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߟߐ߯ ߦߴߊ߬߬ ߟߊ߫ ߞߊ߬ ߞߕߌ ߣߌ߲߬ ߡߊߛߊ߬ߦߌ߲߬، ߊ߬ߟߋ ߟߊ߫ ߝߐߟߌ߫ ߘߐ߫߸ ߞߕߌߘߊ ߣߐ߬ ߞߕߌ ߡߍ߲ ߕߍ߰ ߟߊ߫߸ ߊ߬ ߕߍ߫ ߞߏ߫ ߊ߬ ߓߊ߲ߣߍ߲߫ ߠߵߏ߬ ߘߌ߫߸ ߊ߬ ߘߌ߫ ߛߋ߫ ߡߊߛߊ߬ߦߌ߲߬ ߠߊ߫، ߝߣߊ߫߸ ߞߏ߫ ߞߕߌ ߡߊ߫ ߕߍ߰ ߊ߬ ߕߍ߰ ߢߊ ߡߊ߬، ߞߊ߬ߕߎ߲߯߸ ߊ߬ ߞߊ߲߫ ߞߏ߫: <<ߛߊ߬ߙߌ߬ߦߊ߫ ߖߍ߬ߘߍ ߞߏ߫ ߟߋ߬߸ ߞߏ߫ ߣߌ߫ ߞߕߌߕߍ߯ߟߊ ߞߍ߫ ߘߊ߫ ߡߐ߱ ߖߊ߲߬ߞߌ߲߬ ߠߊ߫߸ ߝߏ߫ ߊ߬ ߦߴߊ߬ ߛߐ߬ߘߐ߲߬ ߘߊ߬ߟߎ߬ ߖߐ߲ߖߐ߲߫ ߦߴߊ߬ ߓߟߏ߫، [...] ߥߟߎ߬ߡߊ߬ ߣߊ߰ߣߌ߲߬ ߞߏ ߡߍ߲ ߝߐߣߍ߲߫߸ ߛߊ߬ߙߌ߬ߦߊ߫ ߞߏ߬ߣߌ߲߬ ߕߍ߫ ߟߐ߯ߝߍ߫ ߘߌ߫߸ ߥߊߘߌ߫ ߢߌߣߌ߲߫ ߦߙߐ߫ ߕߍ߫، ߊ߲ ߞߏ߬ߣߌ߲ ߓߌߣߍ߲߫ ߞߊ߬ ߞߕߌ ߣߌ߲߬ ߡߊߛߊ߬ߦߌ߲߬ ߞߏ ߟߊߢߌߣߌ߲߫.>> ߊ߬ ߞߵߏ߬ ߝߐ߫.

ߛߊߣߊ߲ߠߞߊ ߘߏ߫ ߕߘߍ߬ ߞߣߍ ߞߊ߲߬߸ ߞߏ߫ ߡߎߛߊ߫ ߦߎ߭ ߞߐ߲ߘߍ߫߸ ߊ߬ߟߋ ߛߍߥߊ߫ ߘߊ߫ ߞߕߌ ߢߌ߲߬ ߠߊ߫߸ ߞߊ߬ ߓߊ߲߫ ߞߵߊ߬ ߞߊ߲ߠߊߘߌ߫ ߊ߬ ߟߊ߫ ߛߏ ߡߐ߱ ߟߎ߬ ߡߊ߬ ߛߓߊߙߌ ߡߊ߬߸ ߡߊ߬ߝߊ ߡߊ߬߸ ߊ߬ ߣߌ߫ ߓߟߏ߫ ߘߌ߫ ߢߐ߲߰ ߡߊ ߡߊ߬، ߊ߬ ߟߊ߫ ߖߛߎ߬ߞߊߛߌ ߣߴߊ߬ ߕߊ߫߸ ߊ߬ ߞߊ߬ ߛߊ߬ߙߌ߬ߦߊ߫ ߝߏ߬ ߞߊ߬ ߓߍ߲߬ ߞߕߌ ߕߍ߰ ߢߊ ߡߊ߬.

<<ߞߕߌ ߘߐ߫߸ ߞߏ ߘߏ߫ ߟߎ߫ ߘߌ߫ ߞߍ߫߸ ߊ߬ ߕߍ߫ ߘߌߦߊ߫ ߌ ߦߋ߫، ߓߊ߬ߙߌ߬߸ ߞߕߌ ߡߍ߲ ߕߍ߰ߣߍ߲߫ ߣߌ߲߬߸ ߊ߬ ߞߍ߫ ߘߊ߫ ߟߊߒߡߊ ߟߋ߬ ߘߌ߫߸ ߡߍ߲ ߢߐ߲߱ ߞߊ߫ ߘߐ߯ ߦߊ߲߬، ߏ߬ ߘߐ߫߸ ߒߠߋ ߞߎ߲߬ߠߊ߬ߦߋ߬ߙߋ߲߬ߣߍ߲߫ ߞߏߛߓߍ߫.>> ߊ߬ ߞߵߏ߬ ߦߌ߬ߘߊ߬.

ߟߊ߬ߓߊ߲ ߘߐ߫߸ ߊ߬ ߞߵߊ߬ ߞߊ߲ߠߊߘߌ߫ ߛߏ߫ ߞߣߐ߫ ߡߐ߮ ߟߎ߫ ߡߊ߬߸ ߞߏ߫ ߊ߬ߟߎ߬ ߦߋ߫ ߓߍ߲߭ ߠߊߘߏ߲߬ ߊ߬ߟߎ߬ ߣߌ߫ ߢߐ߲߯ ߕߍ߫ ߜߙߋߘߎ߯ ߡߙߊ ߘߐ߫، <<ߞߍ߬ߟߍ ߕߍ߫ ߝߏߦߌ߬ ߢߊ߬ ߟߊ߫ ߡߐ߱ ߡߊ߬߸ ߝߏ߫ ߣߡߌߛߊ، ߊ߲ ߓߋ߲ߓߊ߫ ߟߎ߬ ߞߊ߬ ߛߌ߱ ߞߍ߫߸ ߏ߬ ߟߎ߫ ߓߍ߲߬ ߘߊ߫߸ ߊ߲ ߝߊ߬ ߟߎ߬ ߞߊ߬ ߛߌ߱ ߞߍ߫ ߏ߬ ߟߎ߫ ߓߍ߲߬ ߘߊ߫߸ ߡߎ߲߬ ߠߊ߫ ߞߏ߫ ߊ߲ߠߎ߬ ߕߍ߫ ߓߍ߲߬ ߊ߬ ߘߐ߫، ߊ߲ ߧߴߊ߲ ߓߟߏ ߘߌ߫ ߢߐ߲߮ ߡߊ߬߸ ߊ߲ ߧߋ߫ ߘߏ߲߬ ߞߋߟߋ߲ߘߌ߫ ߞߊ߬ ߓߐ߫ ߞߋߟߋ߲߫ ߘߌ߫.>> ߡߎߛߊ߫ ߦߎ߭ ߞߐ߲ߘߍ߫ ߞߵߏ߬ ߟߋ ߞߍ߫ ߊ߬ ߟߊ߫ ߞߎߡߊ ߟߊߓߊ߲ ߘߌ߫.

ߊ߬ ߦߌ߬ߘߊ߬ ߘߊ߫ ߞߕߌ ߕߍ߱ ߞߐ ߘߐ߫߸ ߞߏ߫ ߕߟߋ߬ ߁߅ ߦߋ߫ ߝߊ߲߭ ߝߌ߬ߟߊ ߓߍ߯ ߓߟߏ߫߸ ߞߵߊ߬ߟߎ߬ ߡߊߞߊ߬ߛߌ߬ ߞߕߌ ߡߊߛߊ߬ߦߌ߲߬ ߞߏ ߘߐ߫߸ ߣߴߊ߬ߟߎ߬ ߡߊ߫ ߓߍ߲߬ ߊ߬ ߡߊ߬.