ߛߌߟߊ߫ ߞߊ߲߫ ߓߌߟߊߒߘߐߖߎ߮ ߟߋ߬ ߞߍߣߍ߲߫ ߓߌ߬ ߞߎߣߎ߲ߟߏ߲ ߣߌ߲߬ ߡߊ߬ ߞߊ߲ߞߊ߲߫ ߞߣߐ߫߸ ߂߀߂߆ ߞߊ߬ߙߌ߬ߝߐ ߕߟߋ߬ ߁߭߸ ߛߍ߲߬ߞߍ߬ߝߙߊ߬ ߂߲ ߞߌ߲߬ߘߊ ߟߊ߫߸ ߞߊ߬ ߡߐ߰ ߞߋߟߋ߲߫ ߓߐ߬ߣߐ߫ ߊ߬ ߣߌ ߘߐ߫߸ ߞߊ߬ ߛߌߦߊߡߊ߲߫ ߖߐߞߌ߫، ߓߌ߬ߟߊ߬ߒ߬ߘߐ߬ߖߎ߮ ߣߌ߲߬ ߘߐ߫߸ ߞߢߐߡߊߟߐ߫ ߘߎ߯ߞߎߟߎ߲ ߘߏ߫ ߟߋ߬ ߥߟߏߣߍ߲߫ ߞߊ߬ ߥߴߊ߬ ߛߌ߰ ߡߊ߲ߞߏߙߏ߲ߖߎ ߞߎ߲߬، ߞߊ߲ߞߊ߲߫ ߘߊ߲ߘߊߛߏߓߊ ߞߊ߲߫ ߞߏ߫ ߡߐ߰ ߞߋߟߋ߲߫ ߠߋ߬ ߝߊ߰ߣߍ߲߫߸ ߞߊ߬ ߡߐ߰ ߟߏ߯ߟߎ߫ ߖߐߞߌ߫߸ ߝߌ߬ߟߊ߬ ߦߴߏ߬ ߘߐ߫ ߡߍ߲ ߠߊ߫ ߖߐߞߟߌ ߖߎ߯ߡߊ߲߫ ߞߏߛߓߍ߫.
ߓߌ߬ߟߊ߬ߒ߬ߘߐ߬ߖߎ߮ ߣߌ߲߬ ߞߍ߫ ߘߊ߫ ߈ߕߎߡߊ ߝߊ߲߭ ߝߍ߬ ߟߋ߬߸ ߞߵߊ߬ ߛߐ߬ߘߐ߲߬ ߞߢߐߡߊߟߐߟߊ ߢߌ߲߬ ߠߎ߬ ߦߋ߫ ߕߐ߲߬ߕߐ߲ ߘߐ߫، ߘߎ߰ߞߎߟߎ߲ ߣߌ߲߬ ߕߏߣߍ߲߫ ߏ߬ ߟߋ ߕߍߡߊ߬ ߛߍߣߍ߲߬߸ ߞߊ߬ ߥߟߏ߫ ߞߊ߬ ߥߴߊ߬ ߛߌ߰ ߡߊ߲ߞߏߙߏ߲ߖߎ ߞߎ߲߬߸ ߞߵߏ߬ ߞߍ߫ ߊ߬ߟߋ ߟߊ߫ ߓߏ߬ߙߌ ߓߊ߲ߣߍ߲ ߘߌ߫.
ߞߊ߲ߞߊ߲߫ ߕߌ߲߬ߞߎߘߎ߲ ߘߊ߲ߘߊߛߏ ߞߟߊߡߊ߲߫ ߞߏ ߟߎ߬ ߞߎ߲߬ߕߌ߮߸ ߞߏ߲߬ߓߏ߫ ߡߊ߬ߡߊ߬ߘߌ߬ ߞߐ߲ߘߍ߫ ߞߊ߬ ߢߊߝߐߟߌ߫ ߞߍ߫ ߞߊ߬ ߓߍ߲߬ ߡߊ߬ߛߎߓߊ ߣߌ߲߬ ߞߣߐߞߏ ߟߎ߬ ߡߊ߬ ߘߊ߲ߘߊߟߌ ߕߊ߫ ߝߊ߲߭ ߝߍ߬: <<ߊ߲ ߞߊ߬ ߞߏߕߐ߫ ߡߐ߰ ߥߐ߯ߙߐ߫ ߟߋ߬ ߟߊߛߐ߬ߘߐ߲߬߸ ߛߎ߬ ߞߋߟߋ߲߫ ߦߴߏ߬ ߘߐ߫، ߡߐ߰ ߝߌ߬ߟߊ߬ ߦߴߊ߬ߟߎ߬ ߘߐ߫߸ ߏ߬ ߟߎ߬ ߟߊ߫ ߖߐߞߟߌߣߐ ߖߎ߯ߡߊ߲߫ ߞߏߛߓߍ߫، ߊ߬ ߘߌ߯ߣߍ߲߫ ߞߋߟߋ߲ ߞߎ߲߭ ߠߋ߬ ߟߊ߫߸ ߏ߬ ߖߍ߬ߘߍ ߕߍ߫ ߞߎߡߊ߫ ߟߊ߫ ߕߋ߲߬ ߡߎߣߎ߲߬، ߊ߬ ߕߐ߬ ߞߋߟߋ߲ ߛߋ߲߬ ߣߎߡߊ߲ ߠߋ߬ ߞߊߘߌߣߍ߲߫ ߓߘߍߞߍ߭، ߊ߬ ߕߐ߬ ߡߐ߰ ߛߊ߬ߓߊ ߛߊ߫߸ ߏ߬ ߟߎ߬ ߟߊ߫ ߖߐߞߟߌ ߡߊ߲߫ ߖߎ߯ ߢߊ ߏ߬ ߡߊ߬߸ ߊ߬ߟߎ߬ ߓߍ߯ ߟߊߘߍ߬ߣߍ߲ ߦߋ߫ ߘߊ߲ߘߊߟߌ ߘߊߞߘߐ߫.>> ߊ߬ ߞߵߏ߬ ߦߌ߬ߘߊ߬.
ߞߊ߬ ߓߍ߲߬ ߓߌ߬ߟߊ߬ߒ߬ߘߐ߬ߖߎ߮ ߞߍߢߊ ߡߊ߬߸ ߛߙߋ ߟߎ߬ ߣߐ߬ ߊ߬ ߟߊ߫ ߟߊ߫ ߓߏ߬ߙߌ߬ߞߏ߬ߖߎ߰ߦߊ ߣߌ߫ ߢߡߊߟߐߓߊߟߌߦߊ ߟߋ߬ ߞߎ߲߬ ߖߐ߬ߘߐ ߘߝߊߣߍ߲ ߘߐ߫، ߞߊ߬ߕߎ߲߯߸ ߎߡߊߙ ߞߐ߲ߘߍ߫ ߡߍ߲ ߦߋ߫ ߛߍ߲߬ߞߍ߬ߝߙߊ߬ ߂߲ ߞߌ߲߬ߘߊ ߞߏߟߊߕߍ߯ ߛߌ߲ߝߏ߲ ߘߏ߫ ߘߌ߫߸ ߓߌ߬ߟߊ߬ߒ߬ߘߐ߬ߖߎ߮ ߞߍ߫ ߘߴߊ߬ߟߋ ߢߣߊ߫ ߟߋ߬، ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ߫ ߞߊ߬ ߘߎ߰ߞߎߟߎ߲ ߣߌ߲߬ ߦߋ߫ ߓߏ߬ߙߌ ߟߋ߬ ߞߊ߲߬ ߞߊߟߌߦߊ ߘߝߊߣߍ߲ ߘߐ߫߸ ߏ߬ ߡߊ߫ ߡߍ߲߫ ߓߌ߬ߟߊ߬ߒ߬ߘߐ߬ߖߎ߮ ߞߍ߫ ߘߊ߫.
<<ߘߎ߰ߞߎߟߎ߲ ߕߊ߬ߡߌ߲߬ ߘߊ߫ ߒ ߠߊ߫ ߓߏ߬ߙߌ ߖߍ߬ߘߍߖߍ߬ߘߍ ߟߋ߬ ߘߐ߫، ߟߊ߬ߓߏ߬ߙߟߌ߬ߟߊ ߕߎ߲߬ ߓߊ߯ ߥߊ߫ ߦߊ߲߬߸ ߊ߬ ߘߌ߫ ߥߊ߫ ߦߊ߲߬߸ ߞߵߊ߬ ߛߐ߬ߘߐ߲߬ ߖߡߊ߬ ߛߌߦߊߡߊ߲߫ ߛߌ߰ߣߍ߲߫ ߊ߬ ߞߎ߲߬، ߊ߬ߟߎ߫ ߕߊ߬ߡߌ߲߸ ߡߛߏ߬ߞߘߐ߬ߓߊ ߘߏ߫ ߞߵߊ߬ ߝߐ߫ ߞߏ߫ ߛߌ߬ߓߊ߫ ߕߍ߫ ߢߌ߲߬ ߠߎ߬ ߟߊ߫ ߡߎ߬ߕߎ߲߬߸ ߞߵߏ߬ ߞߎ߲߭ ߞߍ߫ ߊ߬ߟߎ߫ ߓߏ߬ߙߌ߬ ߢߊ ߘߌ߫، ߏ߬ ߡߊ߫ ߘߏ߲߬ ߡߌ߬ߛߍ߲߬ ߞߋߟߋ߲߫ ߘߐ߫߸ ߊ߲ ߞߊ߬ ߡߊ߲߬ߞߊ߲߬ߓߊ ߡߍ߲߫ ߕߋ߲߬، ߘߎ߰ߞߎߟߎ߲ ߞߐ߲߬ߡߘߊ ߝߏߘߏ߲߫ ߘߊ߫، ߞߵߊ߬ ߥߟߏߥߟߏ߫ ߢߊ ߏ߬ ߡߊ߬ ߞߊ߬ ߥߴߊ߬ ߛߌ߰ ߡߊ߲ߞߏߙߏ߲ߖߎ ߞߎ߲߬.>> ߊ߬ ߞߵߏ߬ ߟߊߛߙߋߦߊ߫.
ߊ߬ ߞߵߊ߬ ߟߴߊ߬ ߞߊ߲߬ ߞߏ߫ ߛߌߟߊ߫ ߘߊߝߍ߫ ߡߐ߮ ߟߎ߫ ߟߋ߬ ߞߊ߬ ߘߎ߰ߞߎߟߎ߲ ߞߣߐ߫ ߡߐ߮ ߟߎ߬ ߡߞߊߘߊ߲߫، <<ߊ߬ ߞߣߐ߫ ߡߐ߮ ߓߍ߯ ߡߊߘߌߡߌ߲ߣߍ߲߫ ߠߋ߬ ߕߘߍ߬.>> ߞߏ߫ ߡߐ߱ ߟߎ߫ ߟߋ߬ ߞߊ߬ ߘߊ ߟߊߞߊ߬ ߞߐ߲߬ߛߏ ߞߣߐ߫ ߡߐ߮ ߟߎ߫ ߞߵߊ߬ߟߎ߬ ߟߊߓߐ߫.
ߊߓߘߎߙߊߤߑߡߊ߯ߣ ߡߎ߯ߡߌߣ ߞߐ߲ߘߍ߫ ߣߐ߬ ߘߎ߰ߞߎߟߎ߲ ߡߊ߲߬ߞߊ߲ ߏ߬ ߟߋ ߡߍ߲߫ ߠߊ߫߸ ߊ߬ߟߋ ߡߍ߲ ߝߣߊ߫ ߦߋ߫ ߞߌ߲߬ߘߊ ߘߋ߲ߡߌߛߍ߲߫ ߛߓߍߘߊ ߛߌ߲߬ߝߏ߲ ߘߏ߫ ߘߌ߫߸ ߊ߬ ߝߣߊ߫ ߛߐ߬ߘߐ߲߬ ߘߊ߫ ߟߋ߬ ߡߞߊ߬ߘߊ߲߬ߠߌ߲ ߓߊ߯ߙߊ ߘߐ߫.
<<ߊ߲ ߞߊ߬ ߡߊ߲߬ߞߊ߲߬ߓߊ ߟߋ߬ ߡߍ߲߫ ߕߋ߲߬، ߒ ߛߋ ߦߋ߲߬߸ ߒ ߞߵߊ߬ ߦߋ߫ ߡߐ߰ ߛߌߦߊߡߊ߲߫ ߖߊ߬ߣߍ߲߫ ߘߎ߰ߞߎߟߎ߲ ߞߣߐ߫، ߊ߲ ߣߌ߫ ߘߋ߲ߡߌߛߍ߲ ߘߏ߫ ߟߎ߫ ߝߙߊ߬ ߘߊ߫ ߢߐ߲߮ ߞߊ߲߬߸ ߞߵߊ߬ߟߎ߬ ߟߊߓߐ߫، ߛߋ߲߬ߘߐ߬ߞߎߟߎ߲ ߞߟߌ߫ ߘߊ߫߸ ߓߊ߬ߙߵߊ߬ ߡߊ߫ ߣߊ߬ ߞߊߟߌߦߊ߫ ߓߟߏ ߡߊ߬، ߊ߬ߟߎ߫ ߘߍ߬ߢߐ߲߮ ߠߎ߫ ߟߋ߬ ߞߵߊ߬ߟߎ߫ ߕߊ߬ ߘߎ߰ߞߎ߬ߟߎ߲߬ ߜߘߍ߫ ߞߣߐ߫ ߞߊ߬ ߥߴߊ߬ߟߎ߬ ߘߌ߫ ߘߊ߲ߘߊߛߏ ߟߊ߫.>> ߊ߬ ߞߵߏ߬ ߢߊߝߐ߫.
Aucun commentaire pour le moment.