ߞߊ߲ߞߊ߲߫ ߞߕߌߘߊ ߦߌߟߡߊ߫ ߝߟߐ ߓߘߊ߫ ߢߎߡߍ߫ ߡߟߊߡߟߊ߫ ߛߏ߲ߧߊ߫ ߞߏ ߞߕߌߕߍ߰، ߊ߬ ߝߐߣߍ߲߫ ߞߏ ߢߎߡߍ ߡߍ߲ ߞߊ߫ ߞߊ߲߫ ߞߊ߬ ߛߏ ߟߊߡߍߣߍ߲߫߸ ߏ߬ ߡߟߊߡߟߊ ߟߋ߬ ߕߍ߬ߘߍ߫ ߛߏ߲߬ߧߊ߬ ߟߊ߫، ߕߍ߮ ߞߍ߫ ߘߊ߫ ߊߓߎߓߞߊߙ ߞߡߊ߬ߙߊ߬ ߣߌ߫ ߢߍߓߊ߯ ߟߊ߱ߖߌ߬ ߡߊ߬ߡߘߎ ߞߐ߲ߘߍ߫ ߘߐ߫ ߏ߬ ߟߋ ߞߊߡߊ߲ ߞߣߐ߫، ߒ߬ߓߊ߬߸ ߊߓߎߓߞߊߙ ߞߡߊ߬ߙߊ߫ ߖߊ߲߬ߞߌ߲߬ ߘߊ߫ ߞߊߙߏ߫ ߁߈ ߥߛߎ ߟߊ߫߸ ߊ߬ ߣߌ߫ ߖߌ߬ߣߍ߬ ߕߊߡߊ߲ ߞߋ߲߬ߥߟߎ߬ ߞߋߟߋ߲߫ ߛߊ߬ߙߊ ߟߊ߫ ߛߏ߲߬ߧߊ߬ߟߌ߬ߓߊ ߞߏߛߐ߲߬.

ߞߊ߬ ߕߟߋ߬ ߘߊ߲ߘߐ߫ ߕߏ߫ ߛߊߟߌ ߟߊ߫߸ ߡߊ߲߬ߞߊ߲ ߘߏ߫ ߕߋ߬ ߘߊ߫ ߛߏ ߟߊ߫߸ ߡߐ߰ ߝߌ߬ߟߊ߫ ߡߌ߬ߣߊ ߞߐߝߍ߬، ߞߊ߬ߕߎ߲߯߸ ߊ߬ ߦߌ߬ߘߊ߬ ߘߊ߫ ߞߕߌߓߋߟߋ߲ ߓߟߏ߫߸ ߞߏ߫ ߡߐ߰ ߝߌ߬ߟߊ ߏ߬ ߟߎ߫ ߣߐ߬ ߢߎߡߍ߫ ߡߟߊߡߟߊ ߟߋ߬ ߛߏ߲߬ߧߊ߬ ߟߊ߫߸ ߡߍ߲ ߞߊ߫ ߞߊ߲߫ ߞߊ߬ ߞߊ߲ߞߊ߲߫ ߛߏߞߣߐߟߊ ߟߊߡߍߣߍ߲߫߸ ߣߴߊ߬ ߦߋ߫ ߞߏߟߊߘߍ߫ ߕߊ߫ ߓߟߏ߫ ߡߊ߬߸ ߊ߰ ߝߐ߫ ߟߊ߫ ߡߍ߲ ߡߊ߬ ߞߏ߫ ߛߖ߭ߋߟߍߞ.

ߊߓߎߓߞߊߙ ߞߡߊ߬ߙߊ߬ ߦߋ߫ ߓߊ߯ߙߊ߫ ߟߊ߫ ߞߏߟߊߘߍ ߢߌ߲߬ ߠߋ߬ ߖߍ߬ߘߍ ߟߊ߫߸ ߊ߬ ߕߘߍ߬ ߕߏ߫ ߟߊ߫ ߡߟߊߡߟߊ ߏ߬ ߟߎ߫ ߟߋ߬ ߟߊߓߐ߫ ߟߊ߫ ߛߐ߲߬߸ ߞߊ߬ ߥߴߊ߬ ߘߌ߫ ߟߊ߱ߖߌ߬ ߡߊ߬ߡߘߎ ߞߐ߲ߘߍ߫ ߡߊ߬߸ ߊ߬ ߓߘߴߏ߬ ߞߍ߫ ߛߋ߲߬ߢߊ߫ ߝߌ߬ߟߊ߫ ߖߊ߬ߕߋ߬، ߟߊ߱ߖߌ߬ ߡߊ߬ߡߘߎ ߞߐ߲ߘߍ߫ ߏ߬ ߦߋ߫ ߢߍߓߊ߮ ߟߋ߬ ߘߌ߫߸ ߊ߬ ߣߌ߫ ߘߊ߰ ߖߌ߰ߟߊ، ߞߕߌ ߘߐ߫߸ ߊ߬ ߦߌ߬ߘߊ߬ ߘߊ߫ ߞߏ߫ ߊ߬ߟߋ ߕߎ߲߬ ߡߊ߫ ߡߟߊߡߟߊ ߢߌ߲߬ ߠߎ߬ ߟߐ߲߫ ߝߋ߲߫ ߛߏ߲߬ߧߊ߬ߣߍ߲߬ ߘߌ߫ ߡߎ߰ߡߍ߫.

ߝߘߏ߬ߓߊ߬ ߞߏߕߌ߯ߘߊ ߞߵߊ߬ ߦߌ߬ߘߊ߬߸ ߞߏ߫ ߞߊ߬ ߛߊ߲߭ ߛߓߊ߬ ߟߊ߫ ߊߓߎߓߞߊߙ ߞߡߊ߬ߙߊ߫ ߞߎ߲߬߸ ߊ߬ ߣߴߊ߬ ߦߋ߫ ߖߌ߬ߣߍ߬ ߕߊߡߊ߲ ߅߀߀ ߀߀߀ ߛߊ߬ߙߊ߫ ߢߍ߬ߢߌ߲߬ߘߐ߬ߓߍ߲ ߘߌ߫، ߓߊߏ߬߸ ߝߏߘߋ߬ ߓߌ߲ߕߎ߬ ߞߵߊ߬ ߦߌ߬ߘߊ߬ ߞߏ߫ <<ߌ ߦߋ߫ ߓߊ߯ߙߊ߫ ߟߊ߫ ߡߐ߱ ߡߍ߲ ߓߟߏ߫߸ ߣߴߌ ߞߵߏ߬ ߓߟߏߝߋ߲ ߛߏ߲߬ߧߊ߫߸ ߏ߬ ߦߋ߫ ߛߏ߲߬ߧߊ߬ߟߌ ߟߊߖߎ߯ߦߊ߫ ߟߊ߫ ߟߋ߬.>> ߏ߬ ߟߋ ߞߏߛߐ߲߬߸ ߊ߬ߟߋ ߞߵߊ߬ ߟߊߢߌߣߌ߲߫ ߞߏ߫ ߞߵߏ߬ ߟߊ߫ ߡߊ߬ߝߌ߲߬ߓߊ߰ߕߐ ߞߎ߲߬، ߓߊ߬ߙߌ߬߸ ߞߕߌߘߊ ߟߊߓߊ߲߫ ߘߴߊ߬ ߖߊ߲߬ߞߌ߲ ߠߋ߬ ߡߊ߬ ߞߊߙߏ߫ ߁߈ ߥߛߎߖߌ߲߫ ߓߊߟߊ߲ߣߍ߲ ߠߊ߫߸ ߊ߬ ߣߌ߫ ߖߌ߬ߣߍ߬ ߕߊߡߊ߲ ߞߋ߲߬ߥߟߎ߬ ߞߋߟߋ߲߫ ߛߊ߬ߙߊ ߟߊ߫ ߢߍ߬ߢߌ߲߬ߘߐ߬ߓߍ߲ ߘߌ߫.

ߡߍ߲ ߓߍ߲߬ߣߍ߲߫ ߟߊ߱ߖߌ߬ ߡߊ߬ߡߘߎ ߞߐ߲ߘߍ߫ ߟߊ߫ ߞߏ ߡߊ߬߸ ߞߕߌߓߋߟߋ߲ ߞߵߊ߬ ߦߌ߬ߘߊ߬ ߞߏ߫ ߛߏ߲߭ ߓߟߏߟߊߡߌߣߟߊ߫ ߕߴߊ߬ ߘߌ߫߸ ߏ߬ ߡߊ߫ ߦߴߊ߬ ߣߐ߬ ߘߐ߫ ߡߎ߰ߡߍ߫، ߞߊ߬ߕߎ߲߯߸ ߊ߬ ߡߊ߫ ߦߌ߬ߘߊ߫ ߢߍߓߊ߮ ߟߊ߫߸ ߞߏ߫ ߡߟߊߡߟߊ ߏ߬ ߟߎ߫ ߛߏ߲߬ߧߊ߬ߣߍ߲߫ ߠߋ߬߸ ߊ߬ ߕߎ߲߬ ߕߴߊ߬ ߛߏ߲߬ߧߊ߬ ߞߏ ߞߊ߬ߟߊߡߊ߬.

<<ߊ߲ ߞߵߊ߬ ߢߊߦߋ߫ ߞߕߌ ߣߌ߲߬ ߘߐ߫߸ ߞߏ߫ ߛߏ߲߭ ߓߟߏߟߊߡߌߣߟߊ߫ ߕߴߊ߬ ߘߌ߫ ߝߋߎ߫، ߓߊߏ߬߸ ߛߏ߲߭ ߖߍ߬ߘߍ ߞߊ߲߫ ߞߏ߫ ߢߍߓߊ߮ ߡߴߊ߬ ߟߐ߲߫ ߞߏ߫ ߝߋ߲߫ ߛߏ߲߬ߧߊ߬ߣߍ߲߫ ߠߋ߬߸ ߊ߬ߟߋ߫ ߘߏ߲߬ ߝߣߊ߫ ߡߴߊ߬ ߝߐ߫ ߊ߬ ߦߋ߫، ߊ߲ ߞߵߊ߬ ߝߐ߫ ߞߕߌߘߊ ߡߊ߬ ߏ߬ ߟߋ ߘߐ߫߸ ߒ ߞߏ߫ ߞߊ߬ ߟߊ߱ߖߌ߬ ߡߊ߬ߡߘߎ ߞߐ߲ߘߍ߫ ߓߌ߬ߟߊ߬߸ ߊ߬ ߛߐ߲߬ ߕߴߊ߬ ߘߐ߫.>> ߞߕߌߞߊ߲ߘߊ ߝߏߘߋ߬ ߓߌ߲ߕߎ߬ ߞߋߕߊ߬ ߞߵߏ߬ ߦߌ߬ߘߊ߬.

ߞߕߌߘߊ ߝߣߊ߫ ߞߍߢߊ ߟߵߏ߬ ߘߌ߫ ߞߵߊ߬ ߢߊ ߡߊߖߌ߰ ߟߊ߱ߖߌ߬ ߡߊ߬ߡߘߎ ߟߊ߫ ߞߏ ߞߘߐ߫߸ ߞߵߊ߬ߟߎ߬ ߓߟߏߓߐ߫ ߊ߬ ߘߐ߫߸ ߓߊߏ߬ ߊ߬ ߡߌ߬ߣߊ߬ ߞߎ߲ߧߊ ߡߊ߫ ߛߋ߫ ߟߊߟߐ߬ ߟߴߊ߬ ߘߐ߫ ߊ߬ ߛߐ߲߭ ߞߍߓߊߟߌߦߊ ߞߏߛߐ߲߬ ߊ߬ ߘߐ߫، ߏ߬ ߘߐ߫߸ ߞߕߌߓߋߟߋ߲ ߞߵߊ߬ ߓߌ߬ߟߊ߬ ߞߏ ߖߊ߬ߡߊߙߌ ߘߌ߫.

ߝߘߏ߬ߓߊ߬ ߞߏߕߌ߯ߘߊ ߞߵߊ߬ ߝߙߊ߬ ߞߎߡߊ ߞߊ߲߬ ߏ߬ ߟߋ ߘߐ߫߸ ߞߏ߫: <<ߡߐ߱ ߡߍ߲ ߓߊ߯ ߕߌߢߍߟߌ ߞߍ߫ ߖߡߊ߬ߣߊ ߡߊ߬߸ ߏ߬ ߟߋ ߣߌ߫ ߞߊ߬ߛߏ ߞߢߊߡߊ߲߫، ߣߌ߫ ߡߍ߲ ߡߊ߫ ߕߌߢߍߟߌ߫ ߞߍ߫߸ ߏ߬ ߞߊ߫ ߞߊ߲߫ ߠߋ߬ ߞߊ߬ ߓߌ߬ߟߊ߬߸ ߊ߬ ߦߋ߫ ߥߊ߫ ߟߎ ߡߊ߬.>> ߊ߬ ߞߵߏ߬ ߦߌ߬ߘߊ߬.