ߝߟߐ߫ ߕߘߍ߬߸ ߦߙߌߡߐ߯ߣߍ߲߫ ߓߊ߯ߙߊ ߕߎ߲߬ ߦߋ߫ ߥߙߎߞߌ ߣߌ߫ ߛߓߊ߬ߕߌ ߓߊ߯ߙߊ ߟߋ߬ ߘߌ߫ ߞߊ߲ߞߊ߲߫ ߞߣߐ߫، ߓߊ߬ߙߌ߬ ߓߌ߬߸ ߜߟߍ߬ߦߊ ߓߘߊ߫ ߘߏ߲߬ ߊ߬ ߘߐ߫ ߞߏߛߓߍ߫، ߞߊ߬ߕߎ߲߯߸ ߊ߬ ߕߍ߫ ߛߊ߲߬ ߠߊ߫ ߡߎ߬ߕߎ߲߫ ߞߊ߬ ߛߌߦߊߦߊ߫߸ ߊ߬ ߕߘߍ߬ ߥߊ ߡߍ߲ ߞߍ߫ ߟߊ߫ ߞߐߞߊ߲ߠߊ ߟߎ߬ ߘߐ߫߸ ߏ߬ ߓߘߊ߫ ߡߊߘߐ߯ߦߊ߫߸ ߝߊ߬ ߓߘߊ ߡߐ߱ ߟߎ߫ ߘߏ߲߬ ߓߟߏ߫ ߕߴߊ߬ ߞߘߐ߫ ߓߊߞߍ߫߸ ߊ߬ ߓߊ߯ߙߟߊ ߟߎ߬ ߖߍ߬ߘߍ ߓߘߊ߫ ߞߣߐ߬ߘߐߝߌ߬ߟߌ߫ ߟߋ߬ ߡߎ߬ߕߎ߲߬߸ ߞߏ߫ ߊ߬ߝߐ߫ ߊ߬ߟߎ߬ ߟߊ߫ ߓߊ߯ߙߊ ߣߌ߲߬ ߘߌ߫ ߕߏ߫ ߊ߬ ߡߊ߬ ߥߊ߯ߕߌ߫ ߣߊ߬ߕߐ߫ ߓߊ߬.

ߓߊ߲߬ߖߊ߲߬ ߛߘߌߡߍ߫߸ ߊ߬ߟߋ ߦߋ߫ ߦߙߌ߫ ߟߛߍߟߊ ߟߋ߬ ߘߌ߫ ߛߟߊߡߊߣߌ߲߫ ߞߌ߲߬ߘߊ ߟߊ߫، ߊ߬ ߞߊ߲߫ ߞߏ߫ ߓߊ߯ߙߊ ߣߌ߲߬ ߦߴߊ߬ߟߋ߫ ߖߋ߬ߟߌ ߟߋ߬ ߘߐ߫߸ ߞߵߊ߬ ߕߊ߬ ߓߋ߲ߓߊ ߟߎ߫ ߡߊ߬ ߞߵߊ߬ ߛߌ߰ ߝߊ߭ ߟߎ߬ ߟߊ߫. <<ߒߠߋ ߞߊ߬ ߒ ߖߘߍ߬ ߦߋ߫ ߓߊ߯ߙߊ ߣߌ߲߬ ߕߍߡߊ߬ ߟߋ߬߸ ߞߊ߬ߕߎ߲߯߸ ߓߋ߲ߓߊ ߟߎ߬ ߗߍ ߟߋ߬ ߦߋ߫ ߕߋ߲߬ (...) ߊ߬ ߘߏ߲߬ ߘߊߡߌ߬ߣߊ ߒߠߋ ߓߟߏ߫ ߊ߬ ߣߌ߫ ߛߌߛߍ߲߬ ߕߍ߸ ߏ߬ ߓߘߊ߫ ߛߊ߲߬ ߅߀ ߢߐ߲߰ ߓߐ߫.>> ߊ߬ ߞߵߏ߬ ߦߌ߬ߘߊ߬.

ߊ߬ߟߋ ߟߊ߫ ߝߐߟߌ߫ ߘߐ߫߸ ߓߊ߯ߙߊ ߣߌ߲߬ ߓߘߴߊ߬ ߘߍ߬ߡߍ߲߬ ߘߊߞߎ߲߫ ߛߌߦߊߡߊ߲߫ ߘߐ߫ ߞߵߊ߬ ߟߊ߫ ߘߋ߲ߓߦߊ ߟߊߛߌ߰߸ ߞߵߊ߬ ߘߋ߲ ߠߎ߬ ߟߊ߫ ߞߊ߬ߙߊ߲߬ ߞߏ ߢߊߓߐ߫ ߊ߬ ߘߐ߫.

<<ߊ߲ ߓߋ߲ߓߊ ߟߎ߬ ߞߊ߬ ߊ߲ ߝߊ߬ ߟߎ߬ ߛߐ߬ߘߐ߲߬ ߊ߬ߟߋ ߟߋ߬ ߘߐ߫߸ ߊ߲ߠߎ߬ ߝߣߊ߫ ߓߘߊ߫ ߘߋ߲ ߠߎ߬ ߛߐ߬ߘߐ߲߬ ߊ߬ ߘߐ߫߸ ߊ߬ ߣߌ߫ ߞߊ߬ ߡߏ߬ߛߏ ߟߎ߬ ߝߘߎ߫ ߊ߬ ߘߐ߫.>> ߊ߬ ߞߵߏ߬ ߝߙߊ߬ ߞߎߡߊ ߞߊ߲߬.

ߓߊ߬ߙߌ߬߸ ߓߊ߯ߙߊ ߣߌ߲߬ ߕߘߍ߬ ߛߋ߫ ߟߊ߫ ߞߏ ߡߍ߲ ߢߊ߬ ߟߴߊ߬ߟߎ߫ ߡߊ߬ ߝߟߐ߫߸ ߏ߬ ߓߘߊ߫ ߦߟߍ߬ߡߊ߲߫ ߓߌ߬ ߕߟߋ ߘߐ߫، ߦߏ߫ ߊߓߘߎߟߊߦߌ߬ ߛߊ߬ߞߐ ߦߴߏ߬ ߦߌ߬ߘߊ߬ ߟߊ߫ ߢߊ ߡߍ߲ ߡߊ߬߸ ߊ߬ߟߋ ߡߍ߲ ߦߟߍ߬ߘߐ߬ߞߍ߬ ߦߙߌߞߊ ߦߋ߫ ߦߟߌ߫ ߟߛߍ ߘߐ߫ ߕߋ߲߬.

<< ߊ߬ ߕߍ߫ ߏ߬ ߢߊ ߓߎ߬ߕߎ߲߬ ߦߏ߫ ߊ߬ ߕߘߍ߬ ߦߋ߫ ߢߊ ߡߍ߲ ߡߊ߬ ߝߟߐ߫߸ ߏ߬ ߢߐ߲߰ ߘߌߦߊ߫ ߕߴߊ߬ ߟߊ߫ ߓߎ߬ߕߎ߲߬.>> ߊ߬ ߜߏߦߊߣߍ߲ ߞߵߏ߬ ߝߐ߫.

ߞߍߞߎߛߊ߲ ߢߌ߲߬ ߠߎ߬ ߞߊ߲߫ ߞߏ߫ ߡߐ߰ ߛߌߦߊߡߊ߲߫ ߕߍ߫ ߖߡߊ߬ߣߊ ߞߣߐ߫ ߡߎ߬ߕߎ߲߬߸ ߡߍ߲ ߠߎ߬ ߡߊ߬ߞߏ ߦߋ߫ ߓߌ߬ߟߊ߬ ߟߊ߫ ߦߟߌߡߐ߯ߣߍ߲ ߠߊ߫߸ ߞߐߞߊ߲߫ ߡߐ߮ ߡߍ߲ ߠߎ߬ ߘߏ߲߬ ߝߣߊ߫ ߕߍ߬ߘߍ߫ ߊ߬ ߛߊ߲߬ߓߊ ߞߍ߫ ߟߊ߫߸ ߏ߬ ߟߎ߬ ߝߣߊ߫ ߡߊ߬ߞߏ߬ ߛߎ߮ ߏ߬ ߕߴߊ߬ ߟߊ߫ ߏ߬ ߞߐ߫.

<<ߕߎ߬ߓߊ߬ߓߎ ߟߎ߫ ߟߋ߬ ߦߴߊ߬ ߛߊ߲߬ ߠߊ߫ ߞߵߊ߬ߟߎ߬ ߟߊ߫ ߓߏ߲ ߠߎ߬ ߡߊߛߌ߬ߘߌ߫ ߊ߬ ߟߊ߫߸ ߊ߲ ߘߍ߬ߢߐ߲߮ ߡߍ߲ ߠߎ߬ ߝߣߊ߫ ߦߴߊ߬ ߝߙߋ߬ ߟߊ߫߸ ߊ߲ ߧߴߊ߬ ߟߊߘߊ߲߫ ߠߊ߫ ߞߵߊ߬ ߟߊߕߊ߯ ߏ߬ ߟߎ߫ ߝߣߊ߫ ߡߊ߬߸ ߊ߬ ߞߐߞߊ߲߫ ߠߊߕߊ߯ߟߌ ߛߌ߫ ߡߊ߫ ߣߐ߲߰ ߕߋ߲߬.>>

ߓߊ߲߬ߖߊ߲߬ ߛߘߌߡߍ߫ ߞߵߊ߬ ߦߌ߬ߘߊ߬ ߞߏ߫ ߓߍ߲߬ߒ߬ߛߋ߲߬ߡߊ߬ ߕߍ߫ ߛߐ߬ߘߐ߲߬ ߠߊ߫ ߞߐߞߊ߲߫ ߕߊ߯ߟߌ ߘߐ߫ ߡߎ߬ߕߎ߲߬. <<ߣߌ߫ ߘߏ߲߬ߘߊ߫ ߘߌ߫ ߘߴߊ߲ ߡߊ߬ ߡߍ߲ ߘߌ߫ ߞߐߞߊ߲߫ ߕߊ߯ߟߌ ߣߐ߰ߦߊ߫ ߊ߲ ߧߋ߫߸ ߏ߬ ߟߋ߬ ߘߌ߫ ߊ߬ ߛߊ߲߬ߣߌ߲ ߛߋ߲߬ߠߊ߬ߞߊߟߌߦߊ߫߸ ߡߊ߲߬ߕߙߐ ߏ߬ ߟߋ߬ ߦߋ߫ ߊ߲ ߞߊ߲߬ ߕߋ߲߬، ߣߴߏ߬ ߕߍ߫ ߟߐ߯ߓߊߟߐ߯߯ ߡߊ߲߬ߕߏ߲߬ߕߍ߬ߟߞߊ߬ ߝߟߐߝߟߐ ߡߍ߲ ߞߍ߫ ߘߊ߫ ߉߉ ߟߊ߫߸ ߊ߲ߠߎ߬ ߟߋ߬ ߟߊߞߐ߯ ߘߊ߫ ߏ߬ ߘߐ߫߸ ߞߏ߫ ߊ߲ ߧߋ߫ ߥߊ߫ ߊߟߌߡߊ߲ߘߎ߯߸ (...) ߊ߲ ߡߐ߰ ߁߀߀ ߟߋ߬ ߟߊߞߐ߯ ߘߊ߫ ߏ߬ ߘߐ߫، ߏ߬ ߖߐ߲ߓߐ߲ ߦߋ߫ ߒߠߋ ߖߍ߬ߘߍ ߓߟߏ߫߸ ߞߏ߫ ߊ߲ ߧߋ߫ ߥߊ߫ ߝߐߙ ߘߐ߫߸ ߓߊ߬ߙߌ߫߸ ߏ߬ ߡߊ߫ ߓߐ߫.>> ߊ߬ ߞߵߏ߬ ߝߐ߫ ߞߵߊ߬ ߟߊߕߍ߰.

ߊ߬ߟߎ߫ ߞߵߊ߬ ߦߌ߬ߘߊ߬ ߝߣߊ߫ ߞߏ߫ ߦߙߌ߫ ߟߛߍ ߣߌ߲߬ ߕߐ߬ߣߐ ߞߊ߫ ߓߏ߲߬߸ ߊ߬ߟߎ߬ ߟߊ߫ ߛߌ߲ߞߐ߲߫ ߟߛߍߣߍ߲ ߓߍ߯ ߦߋ߫ ߞߎߡߊ߫ ߟߊ߫ ߟߋ߬߸ ߞߘߐ ߦߋ߫ ߡߍ߲ ߠߎ߬ ߟߊ߫ ߢߣߊߡߦߊ ߖߍ߬ߘߍ ߞߣߐ߫. << ߊ߲ ߠߊ߫ ߝߋ߲߫ ߠߊߘߊ߲ߣߍ߲ ߡߍ߲߬ ߠߎ߬ ߓߍ߯ ߦߋ߫ ߞߎߡߊ߫ ߟߊ߫ ߟߋ߬߸ ߣߴߌ ߞߵߊ߬ ߦߋ߫߸ ߌ ߦߴߊ߬ ߝߐ߫ ߟߊ߫ ߟߋ߬ ߞߏ߫ ߦߙߌ߫ ߞߎߘߎ߲ ߠߊ߫ ߊ߬ߟߎ߬ ߘߌ߫߸ ߣߴߊ߬ ߡߊ߫ ߢߊߝߐ߫ ߌ ߦߋ߫߸ ߌ ߕߍ߫ ߣߵߊ߬ ߢߊߦߋ߫ ߟߊ߫߸ ߣߴߏ߬ ߕߍ߫߸ ߊ߬ ߓߍ߯ ߦߋ߫ ߞߎߡߊ߫ ߟߊ߫ ߟߋ߬>> ߓߊ߲߬ߖߊ߲߬ ߛߘߌߡߍ߫ ߟߋ߬ ߞߊ߲߫ ߕߋ߲߬.

ߛߐ߬ߘߐ߲ ߜߟߍ߬ߦߊ ߢߌ߲߬ ߠߎ߫ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߞߍߞߎߛߊ߲ ߠߎ߬ ߛߌߟߊ߲ߣߍ߲߫ ߊ߬ߟߎ߬ ߟߊ߫ ߓߊ߯ߙߊ ߛߌߣߌ߲ߠߡߊ ߘߌ߫.

<<ߊ߲ ߧߴߊ߬ ߘߐ߫ ߕߌߡߌ߲ߠߊߘߌߦߊ ߟߋ߬ ߡߊ߬߸ ߥߊ߯ߕߌ߫ ߘߌߣߊ߬ ߛߋ߫ ߖߍ߬ߘߍ߸ ߊ߬ ߘߌ߫ ߛߋ߫ ߕߎߣߎ߲߫ ߠߊ߫߸ ߓߊߏ߬߸ ߓߐ߲ߛߐ߲ߘߊ ߡߍ߲ ߠߎ߬ ߦߴߊ߬ ߘߊߘߐ߫߸ ߞߎߘߊ߫ ߕߍ߫ ߟߊ߫ ߟߊ߫ ߏ߬ ߟߎ߫ ߞߊ߲߬ ߓߎ߬ߕߎ߲߬، ߥߊ߯ߕߌ ߣߌ߲߬ ߘߋߣߍ߲ ߠߎ߬ ߕߴߊ߬ ߖߊ߬ߕߋ߫ ߟߊ߫.>> ߊߓߘߎߟߊߦߌ߬ ߛߊ߬ߞߐ ߟߋ߬ ߞߊ߲߫ ߕߋ߲߬.

ߞߊ߬ ߓߍ߲߬ ߊ߬ߟߎ߬ ߟߊ߫ ߓߊ߯ߙߊ ߛߌ߰ߝߊߘߌ ߏ߬ ߟߋ ߡߊ߬ ߛߊ߫߸ ߊ߬ߟߎ߫ ߞߵߊ߬ߟߎ߬ ߞߊ߲ߠߊߘߌ߫ ߞߎ߲߬ߠߊ߬ߛߌ߮ ߟߎ߫ ߡߊ߬، ߞߵߊ߬ ߟߴߊ߬ ߞߊ߲߬߸ ߞߏ߫ ߊ߬ߟߎ߬ ߟߊ߫ ߓߊ߯ߙߊ ߣߌ߲߬ ߛߌ߰ߣߍ߲߫ ߞߎ߲ߝߊ߲ߓߐߟߌ ߟߋ߬ ߡߊ߬߸ ߏ߬ ߟߎ߫ ߟߋ߬ ߞߵߊ߬ ߕߐ߬ߣߐ ߟߐ߲߫ ߓߊߞߍ߬.

<<ߊ߲ ߞߏ߬ߣߌ߲ ߦߴߊ߲ ߞߊ߲ߠߊߘߌ߫ ߟߊ߫ ߝߊ߰ߡߊ ߟߎ߫ ߡߊ߬ ߣߴߊ߬ߟߎ߬ ߢߊ߫ ߞߍ߫ ߘߴߊ߲ ߘߐ߫߸ ߊ߬ߟߎ߬ ߦߴߊ߲ ߘߍ߬ߡߍ߲߬ ߖߐ߲߰ߛߊ߫ ߞߎ߲ߝߊ߲ߓߐߟߌ ߘߌ߫ ߖߘߌߥߊ߫ ߖߡߊ߬ߣߊ ߞߣߐ߫>> ߊߓߘߎߟߊߦߌ߬ ߛߊ߬ߞߐ ߟߋ߬ ߞߊ߲߫ ߕߋ߲߬.

ߓߋ߲ߓߊ߫ ߗߍ߫ ߟߘߊߙߏ ߣߌ߫ ߜߟߍ߬ߦߊ ߓߊ߯ ߓߍ߲߬߸ ߘߏ߫ ߟߋ߬ ߛߋ߫ ߟߊ߫ ߘߏ߫ ߟߊ߫، ߒ߬ߓߊ߬߸ ߞߊ߲ߞߊ߲߫ ߦߙߌߡߐ߯ߣߍ߲߫ ߓߊ߯ߙߊ ߣߌ߫ ߛߍ߱ ߏ߬ ߟߋ ߓߘߊ߫ ߢߐ߲߯ߓߍ߲߬ ߛߌߟߊ߫ ߞߋߟߋ߲߫ ߠߊ߫ ߣߌ߲߬߸ ߝߏ߫ ߊ߬ ߓߘߊ߫ ߓߌ߬ߟߊ߬ ߓߊ߯ߙߊ߫ ߕߎߣߎ߲ߕߐߟߊ ߟߎ߫ ߞߊ߬ߛߊ߲ ߘߐ߫߸ ߞߵߊ߬ ߛߐ߬ߘߐ߲߬ ߕߣߐ߬ ߛߌߦߊߡߊ߲߫ ߘߌ߫ ߛߋ߫ ߛߐ߬ߘߐ߲߬ ߠߴߊ߬ ߟߊ߫ ߡߎߣߎ߲߬.