ߞߊ߬ߙߊ߲߬ߘߋ߲߫ ߡߐ߰ ߁߅ ߢߐ߲߰ ߠߋ߬ ߕߏߣߍ߲߫ ߕߊߓߐ ߘߏ߫ ߘߐ߫ ߘߋ߲ߡߛߏߣߍ߲ ߠߎ߬ ߟߊ߫ ߦߙߐ ߘߐ߫ ߞߊ߬ߙߊ߲߬ߕߊ߬ ߟߊ߫߸ ߞߊ߬ߙߊ߲߬ߕߊ ߡߍ߲ ߕߐ߯ ߞߏ߫ ߎߕߎߡߛ߭ߌ߫ ߖߋߙߟߖ߭ ߊߞߊߘߋߡߌ ߛߣߌߦߐߙ ߛߑߞߎߟ߸ ߏ߬ ߦߋ߫ ߖ߭ߌߟߑߖ߭ߌߟ ߘߎ߱ ߟߋ߬ ߞߣߐ߫߸ ߣߊߞߙߎ߫ ߡߊ߬ߙߊ ߘߐ߫ ߞߋߣߌߦߊ߫ ߖߡߊ߬ߣߊ ߞߊ߲߬، ߏ߬ ߟߊߛߋ߫ ߘߊ߫ ߕߐ߲ߓߟߏߡߊ ߟߎ߫ ߟߋ߬ ߓߟߏ߫ ߓߌ߬ ߓߌߟߏ߲ ߣߌ߲߬ ߡߊ߬.

ߘߌ߲߬ߞߌߙߊ ߏ߬ ߕߐ߲ߓߟߏߡߊ ߟߎ߬ ߟߊ߫ ߞߊ߲߬ߞߎߡߊ ߘߐ߫߸ ߙߋ߳ߎߕߍ߳ߙ ߝߐ߰ߓߍ߬ߘߊ ߞߵߊ߬ ߢߊ ߟߊ߫ ߡߍ߲ ߞߊ߲߬߸ ߞߏ߫ ߞߊ߬ߙߊ߲߬ߘߋ߲߬ ߛߌߦߊߡߊ߲߫ ߠߋ߬ ߖߐߞߌ߫ ߘߊ߫߸ ߛߌߦߊߡߊ߲߫ ߝߣߊ߫ ߦߋߣߍ߲߫ ߕߍ߫ ߡߎߣߎ߲߬߸ ߏ߬ ߖߍ߬ߘߍ ߖߊ߬ߕߋ߬ ߞߋߟߋ߲߫ ߟߐ߲ߣߍ߲߫ ߕߍ߫، ߕߊߓߐ ߣߌ߲߬ ߘߏ߲߬ ߞߎ߲߬ ߡߊ߫ ߟߐ߲߫ ߤߊ߲߯ ߕߋ߲߬ ߡߎߣߎ߲߬߸ ߓߌߟߏ߲ ߛߐ߰ߡߊ߬ߘߊ ߢߌ߲߬ ߠߊ߫.

ߖߌ߬ߦߊ ߡߍ߲ ߠߎ߬ ߦߋߣߍ߲߫ ߞߋߣߌߦߊ߫ ߝߐ߰ߓߍ߬ߘߊ ߟߎ߬ ߟߊ߫߸ ߝߢߐߘߊ߫ ߖߋ߬ߣߌ߲߬ߣߍ߲ ߠߎ߬߸ ߛߌ߬ߛߌ ߟߊ߫ ߘߊ߲߬ߘߊ߲߫ ߝߌ߲߬ߣߍ߲ ߠߎ߬߸ ߓߏ߲߫ ߞߣߐߟߊ ߖߋ߬ߣߌ߲߬ߣߍ߲߫ ߠߋ߬ ߝߋߝߋ߫.

ߜߍ ߘߐ߫ ߦߋ߲߬߸ ߕߐ߲ߓߟߏߡߊ ߟߎ߬ ߟߊ߫ ߡߙߊ߬ߓߊ߮ ߡߊߛߎߘ ߡߎߦߌߣߋߦߌ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߫ ߞߵߊ߬ߟߎ߬ ߓߟߏߝߘߊ߫ ߕߐ߲ߓߟߏߡߊ߫ ߅߀ ߖߊ߬ߕߋ߫ ߟߋ߬ ߟߊ߫ ߞߵߏ߬ ߟߎ߬ ߟߊߖߌ߰ ߦߋ߲߬߸ ߛߊ߫ ߞߊ߬ߙߊ߲߬ߘߋ߲߫ ߓߏ߬ߙߌ߬ߓߊ߰ߕߐ ߟߎ߬ ߘߌ߫ ߦߋ߫߸ ߡߍ߲ ߠߎ߬ ߞߵߊ߬ߟߎ߫ ߓߏ߬ߙߌ߬ ߕߊߓߐ ߜߊ߬ߟߏ߲߬ߜߊߟߏ߲ ߞߘߐ߫ ߞߊ߬ߣߌ߲߬.

ߞߊ߬ߙߊ߲߬ߕߊ ߣߌ߲߬ ߖߍ߬ߘߍ ߞߏߟߊߕߍ߮ ߟߎ߫ ߞߵߊ߬ ߦߌ߬ߘߊ߬ ߞߏ߫: <<ߘߌ߯ߒߠߊ ߣߌ߫ ߞߣߐ߬ߜߊ ߡߊ߬߸ ߘߏ߫ ߟߎ߫ ߓߐ߫ ߘߊ߫ ߟߵߊ߬ߟߎ߫ ߞߎ߲߬ ߘߌ߫ ߛߎ ߏ߬ ߘߐ߫.>> ߏ߬ ߞߵߏ߬ ߝߐ߫ ߝߐ߰ߓߍ߬ߦߊ߬ߟߊ ߟߎ߬ ߢߣߊ߫ ߞߊ߬ߙߊ߲߬ߕߊ ߘߊ ߞߘߐ߫ ߦߋ߲߬.

ߕߊߓߐ ߣߌ߲߬ ߞߊ߫ ߛߌߦߊ߫ ߓߊߟߋ߬ ߞߋߣߌߦߊ߫ ߞߊ߬ߙߊ߲߬ߕߊ ߟߎ߬ ߟߊ߫ ߛߐ߲߬، ߞߎ߲߬ߠߊ߬ߛߌ߮ ߟߊ߫ ߖߊ߬ߕߋ߬ ߝߐߣߍ߲ ߠߎ߬ ߘߐ߫߸ ߞߵߊ߬ ߕߊ߬߂߀߁߈ ߡߊ߬ ߛߌ߰ ߛߌߛߍ߲߬ ߠߊ߫߸ ߕߊ ߓߘߊ߫ ߓߐ߫ ߞߊ߬ߙߊ߲߬ߕߊ ߡߍ߲ ߠߎ߬ ߟߊ߫߸ ߣߴߊ߬ ߖߍ߬ߘߍ ߕߊߛߎ ߟߎ߬ ߦߋ߫ ߖߊ߬ߕߋ߬ ߟߊ߫ ߞߎ߲߬ߞߏ ߘߌ߫߸ ߏ߬ ߘߌ߫ ߆߀ ߖߊ߬ߕߋ߬ ߓߐ߫.

ߢߊߢߌߣߌ߲ߠߊ ߡߍ߲ ߠߎ߬ ߣߐ߬ ߣߌ߲߬ ߞߎ߲߭ ߢߊߢߌߣߌ߲߫ ߞߎ߲߬ߝߟߐ ߟߎ߬ ߞߍ߫ ߟߊ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߞߊ߬ߙߊ߲߬ߘߋ߲ ߠߎ߫ ߖߍ߬ߘߍ ߟߋ߬ ߕߊ ߣߌ߲߬ ߛߌߦߊߡߊ߲ ߛߎ߫ ߟߊ߫߸ ߞߊ߬ ߓߍ߲߬ ߜߟߍ߬ߦߊ ߟߎ߫ ߡߊ߬߸ ߊ߬ ߣߌ߫ ߡߊ߬ߙߊ߫ ߘߊ߲߬ߠߊߕߊ߬ߢߌ߲߬ߣߍ߲.

߂߀߂߄ ߠߊ߫߸ ߕߊ߫ ߜߘߍ߫ ߓߐ߫ ߘߊ߫ ߞߊ߬ߙߊ߲߬ߕߊ ߘߏ߫ ߟߋ߫ ߢߋߙߌ߫ ߘߊߝߍ߬߸ ߞߊ߬ߙߊ߲߬ߘߋ߲߫ ߂߁ ߠߋ߬ ߝߊ߰ ߘߊ߫ ߦߋ߲߬، ߤߊߟߌ߬ ߛߌߣߌ߲߫߸ ߏ߬ ߕߊ ߓߐ߫ ߢߊ߫ ߡߊ߫ ߟߐ߲߫.