ߞߌ߬ߢߍ߬ߞߏ߲ߞߏ߫ ߓߊ߰ߓߊ߰ߟߌ߬ ߞߏ: ߓߊ߬ߛߌߙߎ߬ ߖߏ߬ߡߊߦߌ߬ ߝߊߦߌ߬ ߓߘߴߊ߬ ߞߊ߲ߠߊߘߌ߫ ߝߘߊ߬ߝߌ߲߬ߠߊ߫ ߡߊ߬ ߞߏ߫ ߓߍ߯ ߦߋ߫ ߘߏ߲߬ ߓߊ߰ߓߊ߰ߟߌ ߞߍ߬ߟߍ ߘߐ߫ ߝߋߝߋ߫

ߞߊ߬ ߓߍ߲߬ ߡߙߊ߬ߒ߬ߡߊ߬ߟߌ߬ ߛߌߦߊߡߊ߲ ߡߊ߬ ߞߌ߬ߢߍ߬ߞߏ߲ߞߏ߫ ߞߊ߲߬߸ ߛߣߍ߬ߜ߭ߊߟߌ߫ ߞߊ߲ߕߌ߮߮ ߓߊ߬ߛߌߙߎ߬ ߖߏ߬ߡߊߦߌ߬ ߝߊߦߌ߬ ߓߘߊ߫ ߞߟߌߟߌ ߞߍ߫߸ ߞߏ߫ ߞߊ߬ ߓߊ߰ߓߊ߰ߟߌ ߞߍ߬ߟߍ ߞߍ߫ ߝߘߊ߬ߝߌ߲߬ߠߊ߫ ߟߊ߫ ߞߏ ߓߍ߯ ߘߐ߫ ߢߍߕߊ ߘߌ߫ ߕߋ߲߬، ߊ߬ ߞߵߊ߬ ߦߌ߬ߘߊ߬ ߞߏ߫ ߝߏ߫ ߓߍ߯ ߟߋ߬ ߘߏ߲߬ ߥߏ߬ߘߊ߬ ߞߋߟߋ߲߫ ߠߊ߫߸ ߡߙߊ߬ߒ߬ߡߊ߬ߟߌ ߡߍ߲ ߞߍߣߍ߲߫ ߡߊ߬ߟߌ ߟߊ߫ ߣߌ߲߬߸ ߞߵߏ߬ ߕߊߢߐ߲߯ߓߐ ߞߍ߫ ߊ߬ ߢߊ ߖߍ߬ߘߍߖߍ߬ߘߍ ߡߊ߬߸ ߞߏ߫ ߛߣߍ߬ߜ߭ߊߟߌ߫ ߘߏ߲߬ ߦߴߏ߬ ߕߍ ߟߋ߬ ߡߊ߬ ߝߛߊߦߌ߫.

ߊ߬ ߣߌ߫ ߛߣߍ߬ߜ߭ߊߟߌ߫ ߝߐ߰ߓߍ߬ߦߊ߬ߟߊ ߟߎ߬ ߟߊ߫ ߢߐ߲߯ߦߋ߫ ߘߊߞߎ߲ ߠߋ߬ ߘߐ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ <<ߞߏ ߡߍ߲ ߓߊ߯ ߡߊ߬ߟߌ ߛߐ߬ߘߐ߲߬߸ ߏ߬ ߢߐ߲߰ ߠߋ߬ ߛߣߍ߬ߜ߭ߊ߬ߟߌ߬ ߝߣߊ߫ ߛߐ߬ߘߐ߲߬ ߠߊ߫، ߊ߬ ߦߴߏ߬ ߢߊ߫ ߞߋߟߋ߲ ߠߋ߬ ߡߊ߬߸ ߣߌ߫ ߞߏ߫ ߞߊ߬ ߛߣߍ߬ߜ߭ߊߟߌ߫ ߝߣߊ߫ ߛߐ߬ߘߐ߲߬߸ ߊ߬ ߕߍ߫ ߥߊ߫ ߞߊ߬ ߡߊ߬ߟߌ ߕߏ߫، ߊ߲ ߠߊ߫ ߞߏ ߟߎ߬ ߓߐ߫ ߢߊ߫ ߕߍ߫ ߢߐ߲߮ ߘߐ߫ ߘߐ߬ߝߐ ߞߣߐ߫، ߊ߲ ߓߊߘߋ߲ ߠߎ߬ ߟߋ߬.>> ߊ߬ ߞߵߊ߬ ߦߌ߬ߘߊ߬ ߞߏ߫ ߝߘߊ߬ߝߌ߲ ߠߎ߬ ߞߊ߫ ߞߊ߲߫ ߞߊ߬ ߞߍ߫ ߞߋߟߋ߲߫ ߘߌ߫ ߡߎ߬ߕߎ߲߬߸ ߞߊ߬ ߛߋ߫ ߞߏ߫ ߛߎ߮ ߢߌ߲߬ ߠߎ߬ ߣߴߊ߬ ߢߐ߲߰ ߘߐ ߟߎ߫ ߞߟߍ߬ ߟߊ߫.

ߞߊ߬ߝߏ߬ ߞߎ߲ߕߌ߮ ߞߵߊ߬ ߦߌ߬ߘߊ߬߸ ߞߏ߫ ߊ߬ߟߎ߬ ߣߌ߫ ߡߎ߲߬ ߞߊ߫ ߞߊ߲߫ ߕߋ߲߬߸ ߞߊ߬ ߘߍ߬ ߞߋߟߋ߲ߘߌ߫߸ ߞߵߊ߬ߟߎ߬ ߓߟߏ ߘߌ߫ ߢߐ߲߮ ߡߊ߬߸ ߊ߬ߟߎ߬ ߣߌ߫ ߡߊ߬ߟߌ ߦߋ߫ ߘߍ߬߸ ߞߊ߬ ߢߐ߲߮ ߠߊߟߐ߲ߠߌ߲߫ ߞߏ ߟߎ߬ ߥߊ߫ ߢߊ ߟߊ߫߸ ߞߊ߬ ߛߋ߫ ߡߊ߬ߕߊ߰ߡߊ߬ߟߌ ߟߎ߬ ߞߍ߫ ߟߊ߫ ߢߐ߲߮ ߝߍ߬ ߞߋߟߋ߲ߘߌ߫، ߊ߬ ߞߵߊ߬ ߦߌ߬ߘߊ߫ ߏ߬ ߢߊ߫ ߞߋߟߋ߲ ߠߋ߬ ߡߊ߬ ߌߞߐ߫߸ ߞߏ߫ ߛߣߍ߬ߜߵߊߟߌ߫ ߘߊ߲ߞߊ߲ ߦߋ߫ ߡߊ߬ߟߌ ߛߊ߬ߥߏ߬ ߘߐ߫ ߘߊ߬ߞߊ߯ߙߎ߫ ߞߣߐ߫߸ ߛߊ߫ ߡߊ߬ߟߌ ߞߙߊ߬ߖߊߥߏ ߟߎ߬ ߘߌ߫ ߕߊ߬ߡߌ߲߫ ߣߐ߰ߦߊ߬ ߘߐ߫.

ߝߘߊ߬ߝߌ߲߬ߠߊ߫ ߕߟߋ߬ߓߋ߬ ߞߊߝߏ ߟߎ߬ ߟߊ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߘߍ߬ߓߊ ߞߣߐ߫ (ߛߘߋߦߊߥߏ)߸ ߛߣߍ߬ߜ߭ߊߟߌ߫ ߞߊ߲ߕߌ߮ ߞߵߊ߬ ߦߌ߬ߘߊ߬ ߞߏ߫ ߛߘߋߦߊߥߏ ߦߴߊ߬ ߞߊߘߊ߲߫߸ ߣߊ߲߬ߕߌ߮ ߡߍ߲ ߠߎ߬ ߦߋ߫ ߢߍߞߐߣߐ߲ߠߌ߲ ߘߊߞߘߐ߫߸ ߏ߬ ߟߎ߬ ߦߋ߫ ߛߋ߫ ߟߛߊߙߌ߫ ߟߊ߫ ߡߊ߬ߟߌ ߞߣߐ߫، ߊ߬ ߞߊ߲߫ ߞߏ߫ ߤߊߟߌ߬ ߣߴߊ߬ ߦߋ߫ ߛߐ߬ߘߐ߲߬߸ ߞߏ߫ <<ߡߊ߲߬ߞߊ߲>> ߦߋ߫ ߦߋ߲߬߸ ߞߵߏ߬ ߞߎ߲߭ ߞߍ߫ ߞߌ߬ߢߍ߬ߞߏ߲߬ߞߏ߬ ߞߊߝߏ ߟߎ߬ ߟߊ߫ ߢߌ߲߬ߘߍ ߟߊ߫ ߓߐߟߌ ߘߌ߫ ߛߘߋߦߊߥߏ ߞߣߐ߫߸ ߓߊ߬ߙߌ߬ ߝߏ߫ ߓߍ߯ ߟߋ߬ ߘߍ߬ ߞߊ߬ ߓߊ߰ߓߊ߰ߟߌ ߣߌ߲߬ ߞߟߍ߬.

ߊ߬ ߞߵߊ߬ ߦߌ߬ߘߊ߬ ߞߏ߫ ߓߍ߯ ߞߊ߫ ߞߊ߲߫ ߞߊ߬ ߣߌ߲߬ ߞߏ ߞߟߍ߬߸ <<ߡߐ߰ ߡߊ߫ ߞߏ߫ ߓߐ߫ ߦߌߟߊ߫ ߟߐ߲߫ ߘߋ߬߸ ߖߡߊ߬ߣߊ ߓߍ߯ ߦߋ߫ ߖߐ߬ߘߐ ߟߋ߬ ߘߐ߫ ߕߋ߲߬>> ߊ߬ ߖߍ߬ߘߍ߸ ߓߊ߬ߛߌߙߎ߬ ߞߊ߬ ߞߊ߬ߝߏ߫ ߘߍ߬ߣߍ߲ ߕߊ߬ ߟߊߒߡߊ ߘߌ߫߸ ߞߵߊ߬ ߦߌ߬ߘߊ߬ ߞߏ߫ ߂߀߀߁ ߕߎߟߊߝߌ߲ ߁߁ ߡߙߊ߬ߒ߬ߡߊ߬ߟߌ ߦߋ߫ ߟߊߒߡߊ߫ ߘߌ߫߸ ߞߵߊ߬ ߦߌ߬ߘߊ߬ ߞߏ߫ ߓߊ߰ߓߊ߰ߟߌ߬ߟߊ ߟߎ߬ ߘߌ߫ ߛߋ߫ ߡߙߊ߬ ߟߊ߫ ߦߙߐ ߓߍ߯ ߡߊ߬߸ ߘߏ߫ ߡߊ߫ ߓߐ߫ ߘߏ߫ ߘߐ߫.

ߥߊ߯ߕߌ ߣߌ߲߬ ߡߍ߲ ߞߍߣߍ߲߫ ߓߊ߰ߓߊ߰ߟߌ߬ߟߊ ߟߎ߬ ߖߊߡߊ߲߫ ߕߎߡߊ ߘߌ߫ ߞߌ߬ߢߍ߬ߞߏ߲ߞߏ߫ ߞߊ߲߬߸ ߊ߬ߟߋ ߟߊ߫ ߞߎߡߊ ߣߌ߲߬ ߦߋ߫ ߖߌ߰ߡߝߊ߬ ߞߎߡߊ߫ ߘߌ߫ ߏ߬ ߘߐ߫߸ ߛߊ߫ ߓߍ߯ ߘߌ߫ ߛߋ߫ ߘߏ߲߬ ߠߊ߫ ߥߏ߬ߘߊ߬ ߞߋߟߋ߲߫ ߠߊ߫ ߢߊ ߡߍ߲ ߡߊ߬߸ ߞߊ߬ ߟߊߞߊ߲ߘߊ ߜߟߍ߬ߦߊ ߟߎ߬ ߞߐ ߞߊߘߌ߫.