ߞߛߌ߬ߘߎ߯ ߘߏ߲߬ߛߏ߬ ߕߐ߲ ߣߐ߬ ߛߘߊߞߊߓߐߓߊ߫ ߟߋ߬ ߛߌ߰ ߟߊ߫ ߛߋ߲߬ߠߊ߫߸ ߟߊ߬ߢߌ߬ߣߌ߲߬ ߞߋߟߋ߲߫ ߔߋ߫ ߞߊ߲ߡߊ߬: ߞߊ߬ ߖߛߎ߬ߛߎߡߊ ߟߊߘߏ߲߬ ߖߌ߬ߣߍ߫ ߖߡߊ߬ߣߊ ߞߣߐ߫߸ ߊ߬ ߣߌ߫ ߞߋ߬ߟߋ߲߬ߧߊ ߣߌ߫ ߓߊߛߌ߮ ߘߌ߫ ߘߏ߲߬ ߖߡߊ߬ߣߊ ߞߣߐ߫ ߢߊ ߡߍ߲ ߡߊ߬، ߖߡߊ߬ ߛߌߦߊߡߊ߲߫ ߠߋ߬ ߘߏ߲߬ ߕߘߍ߬ ߛߘߊߞߊߓߐ߫ ߘߊߞߎ߲ ߢߌ߲߬ ߘߐ߫߸ ߞߵߏ߬ ߟߊ߫ ߛߏ ߝߊ߰ߡߊ߬ ߛߌߦߊߡߊ߲߫ ߞߊ߲߬.

ߤߊߘߌߦߊߓߐ ߣߌ߲߬ ߘߐ߫߸ ߘߏ߲߬ߛߏ ߟߎ߬ ߟߊ߫ ߡߙߊ߬ߓߊ߰ߘߊ ߞߊ߲ߕߌ߮ ߕߘߍ߬ ߞߣߍ ߞߊ߲߬߸ ߊ߲߬ߛߎ߬ߡߊߣ ߞߐ߲ߘߍ߫߸ ߊ߬ ߣߌ߫ ߡߙߊ߬ߘߓߊ߬ ߛߌߦߊߡߊ߲߫ ߘߏ߲߬ߛߏ߬ ߞߎ߲ߕߌ߮ ߟߎ߬ ߣߴߊ߬ ߡߐ߰ߓߊ ߟߎ߬߸ ߡߌߦߊ߲ ߠߎ߬ ߝߣߊ߫ ߕߘߍ߬ ߜߍ ߘߐ߫ ߦߋ߲߬߸ ߣߴߏ߬ ߦߋ߫ ߘߏ߲߬ߛߏ ߟߎ߬ ߟߊ߫ ߘߊ߯ߕߌ߮ ߟߎ߬ ߣߌ߫ ߖߋ߬ߓߌ߬ߦߊ߬ߟߊ ߟߎ߬ ߘߌ߫، ߞߊ߬ߝߏ߬ߙߋ߲߬ߕߌ߮ ߕߘߍ߬ ߞߣߍ ߞߊ߲߬߸ ߞߵߏ߬ ߟߊ߫ ߘߏ߲߬ߛߏ߬ ߛߌߦߊߡߊ߲߫ ߠߎ߫ ߞߊ߲߬ ߞߊ߬ ߓߐ߫ ߝߊ߲߬ ߛߌߦߊߡߊ߲߫ ߘߐ߫.

ߞߎߡߊ ߡߍ߲ ߠߎ߬ ߞߍ߫ ߘߊ߫ ߛߘߊߞߊߓߐ߫ ߘߊߞߎ߲ ߣߌ߲߬ ߘߐ߫߸ ߘߏ߲߬ߛߏ߬ ߕߐ߲ ߢߍߡߐ߮ ߟߎ߫ ߞߎߡߊ߫ ߘߊ߫ ߘߏ߲߬ߛߏ߬ߦߊ߫ ߟߐ߬ߘߎ߮ ߣߴߊ߬ ߣߊ߬ߝߊ ߞߊ߲߬ ߖߌ߬ߣߍ߫ ߖߡߊ߬ߣߊ ߞߣߐ߫، ߊ߬ߟߎ߬ ߟߊ߫ ߝߐߟߌ߫ ߘߐ߫߸ ߘߏ߲߬ߛߏ ߟߎ߬ ߕߍ߫ ߓߋ߲ߓߊ ߟߎ߬ ߞߐ߫ ߛߌߟߊ ߘߐߙߐ߲߲߫ ߘߐ߫ ߞߏ߫ ߞߘߐ ߟߎ߬ ߞߍߟߌ ߞߊ߲߬ ߦߋ߲߬ ߕߋ߲߬ ߘߋ߬߸ ߊ߬ߟߎ߬ ߦߋ߫ ߊߘߡߊߦߊ ߘߏ߲߬ߖߟߎ߬ߡߊ߬ߓߊ߮ ߟߎ߫ ߟߋ߬ ߘߌ߫ ߞߊ߬ ߡߐ߰ߦߊ ߛߌ߰ ߢߐ߲߮ ߘߟߊ߫߸ ߞߊ߬ ߓߊߘߋ߲ߧߊ ߘߐߞߙߊ߫ ߖߡߊ߬ߣߊ߬ߘߋ߲ ߠߎ߬ ߣߌ߫ ߢߐ߲߯ ߕߍ߫.

ߖߊ߲߬ߖߏ߲ ߛߋ߫ ߘߴߊ߬ ߦߙߐ ߘߏ߫ ߘߐ߫߸ ߣߛߌ߬ ߞߊ߲߬ߠߊ߬ߕߍ߮ ߟߋ߬ ߞߍ߫ ߘߊ߫߸ ߞߊ߬ ߓߍ߲߬ ߟߊ߬ߘߍ߬ ߕߊ߯ߛߌߟߊ ߡߊ߬.

ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߣߌ߬ߛߌ ߏ߬ ߞߍߣߍ߲߫ ߛߘߊߞߊ ߟߋ߬ ߘߌ߫߸ ߞߊ߬ ߘߎ߬ߥߊ߬ߥߎ߬ ߞߟߊߒߞߋ ߢߌߣߌ߲߫߸ ߟߊ߬ߕߊ߲߬ߞߊ߬ߟߌ ߟߊ߫߸ ߊ߬ ߣߌ߫ ߖߛߎ߬ߛߎߡߊ ߣߌ߫ ߞߍߢߐ߲߯ߝߍ ߟߊ߫ ߖߡߊ߬ߣߊ ߡߎ߰ߡߍ ߦߋ߫.

ߤߊߘߌߦߊߓߐ ߣߌ߲߬ ߘߐ߫߸ ߊ߬ߟߎ߫ ߞߊ߬ ߘߎ߬ߥߊ߬ߥߎ ߞߋߟߋ߲ ߏ߬ ߢߐ߲߰ ߞߍ߫ ߘߏ߲߬ߛߏ ߟߎ߬ ߟߊ߫ ߘߍ߭ ߞߎ߲߬ߕߌ߰ ߞߎߘߊ ߟߎ߬ ߦߋ߫߸ ߡߙߊ߬ߓߊ߯ ߡߏ߬ߙߌ߬ߓߊ߬ ߞߋߕߊ߬ ߦߴߏ߬ ߟߋ ߘߌ߫߸ ߊ߬ ߣߌ߫ ߡߎߛߊ߫ ߞߎ߬ߟߌߓߊ߬ߟߌ߬.

ߘߏ߲߬ߛߏ ߟߎ߫ ߞߊ߬ ߘߎ߬ߥߊ߬ߥߎ߬ ߞߙߍߞߙߍߣߍ߲߫ ߞߍ߫ ߊ߬ߟߎ߬ ߦߋ߫߸ ߛߴߊ߬ߟߎ߬ ߘߌ߫ ߞߊ߲ߘߊ߫ ߞߎ߲߬ߕߌ߰ߦߊ ߣߌ߲߬ ߘߐ߫߸ ߞߊ߬ ߓߍ߲߭ ߠߊߛߓߊ߬ߕߌ߫ ߘߏ߲߬ߛߏ ߟߎ߬ ߣߌ߫ ߢߐ߲߯ ߕߍ߫ ߖߡߊ߬ߣߊ ߝߊ߲߭ ߓߍ߯ ߘߐ߫.

ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߤߊߘߌߦߊߓߐ ߣߌ߲߬ ߡߊ߫ ߟߊߥߟߌ߬ ߘߏ߫ ߜߘߍ߫ ߡߊ߬߸ ߖߛߎ߬ߛߎߡߊ ߘߌ߫ ߘߏ߲߬ ߖߡߊ߬ߣߊ ߞߣߐ߫ ߢߊ ߡߍ߲߸ ߓߍ߲߭߸ ߡߊ߬ߝߊ߸ ߏ߬ ߘߌ߫ ߖߌ߬ߣߍ߫ ߖߡߊ߬ߣߊ ߡߎ߰ߡߍ ߟߊߝߏ߬ ߢߊ ߡߍ߲ ߡߊ߬߸ ߞߊ߬ ߢߐ߲߯ߘߍߡߍ߲ ߣߌ߫ ߞߍߢߐ߲߯ߝߍ ߝߊ߲߬ߞߊߘߏ߲߬.

ߊ߬ߟߎ߫ ߞߊ߬ ߘߎ߬ߥߊ߬ߥߎ߬ ߞߋߟߋ߲ ߏ߬ ߢߐ߲߰ ߞߍ߫ ߞߊ߲ߓߍ߲ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߦߋ߫߸ ߊ߬ ߣߌ߫ ߞߎ߲߬ߠߊ߬ߛߌ߮ ߛߌ߲߬ߝߏ߲ ߠߎ߬، ߊ߬ߟߎ߫ ߞߵߊ߬ ߣߕߊ߬߸ ߞߏ߫ ߊߟߊߓߍ߫ ߊߟߊ߫ ߞߊ߬ ߞߎ߲߬ߠߊ߬ߛߌ߮ ߞߊ߲ߘߊ߫ ߞߵߊ߬ߟߎ߫ ߟߐ߬ ߡߙߌߦߊ߫ ߟߎ߫ ߕߊ߬ ߟߊ߫߸ ߡߍ߲ ߘߌ߫ ߖߡߊ߬ߣߊ ߟߊߥߙߎߞߌ߫߸ ߊ߬ ߣߌ߫ ߡߍ߲ ߘߌ߫ ߘߌߦߊ߫ ߖߡߊ߬ߣߊ߬ߘߋ߲ ߠߎ߬ ߟߊ߫.

ߖߊ߲߬ߖߏ߲ ߣߌ߲߬ ߕߣߐ߬ߡߊ߬ ߦߙߐ ߘߏ߫ ߞߍ߫ ߘߊ߫ ߡߎ߲߬ ߘߌ߫߸ ߏ߬ ߟߋ ߞߍ߫ ߘߊ߫ ߞߊ߬ߝߏ߬ߙߋ߲߬ߕߌ߮ ߟߊ߫ ߞߎߡߊ ߘߌ߫߸ ߊ߬ߟߋ ߡߍ߲ ߣߴߊ߬  ߟߊ߫ ߗߋߘߋ߲ ߠߎ߬ ߕߘߍ߬ ߞߣߍ ߞߊ߲߬، ߞߵߊ߬ ߟߊߥߌ߬ߟߌ߫ ߘߏ߲߬ߛߏ ߟߎ߬ ߡߊߘߍ߬ߡߍ߲ ߡߊ߬߸ ߝߊ߰ߡߊ ߟߎ߫ ߞߊ߬ ߘߎ߱ ߓߋ߬ߝߘߍ߫ ߝߌ߬ߟߊ߬ ߘߌ߫ ߘߏ߲߬ߛߏ ߟߎ߫ ߡߊ߬، ߞߊ߬ߝߏ߬ߙߋ߲ ߠߊ߫ ߝߐߟߌ߫ ߘߐ߫߸ ߦߙߐ ߏ߬ ߘߌ߫ ߞߍ߫ ߘߏ߲߬ߛߏ ߟߎ߬ ߟߊ߫ ߖߡߊ߬ ߟߊ߬ߘߍ߬ ߦߙߐ ߘߌ߫߸ ߊ߬ߟߎ߬ ߟߊ߫ ߘߏ߲߬ߛߏ߬ߦߊ߬ ߓߊ߯ߙߊ ߟߎ߬ ߘߐ߫ ߛߐ߲߬߸ ߊ߬ ߣߌ߫ ߟߐ߲ߠߌ߲ߦߊ ߟߊߖߊ߲ߞߏ߫ ߦߙߐ߫ ߘߌ߫ ߘߏ߲߬ߛߏ ߟߎ߬ ߓߟߏ߫.

ߓߊߘߋ߲ ߠߎ߬߸ ߛߘߊߞߊߓߐߓߊ ߡߍ߲ ߦߋ߫ ߕߋ߲߬߸ ߞߛߌ߬ߘߎ߯ ߘߏ߲߬ߛߏ ߟߎ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߦߴߊ߬ ߝߍ߬ ߞߵߊ߬ߟߎ߬ ߛߋߞߏ ߞߍ߫ ߖߡߊ߬ߣߊ ߦߋ߫ ߢߊ ߓߍ߯ ߘߏ߫ ߡߊ߬߸ ߛߊ߫ ߓߍ߲߭ ߣߌ߫ ߕߍߓߍ߲߸ ߏ߬ ߘߌ߫ ߛߓߊ߬ߕߌ߬ ߢߊ ߡߍ߲ ߡߊ߬߸ ߞߊ߬ ߖߌ߬ߣߍ߬ ߥߙߎߞߌ߫ ߞߊ߬ ߕߊ߯ ߊ߬ ߝߍ߬.