ߞߎߣߎ߲߬ ߛߌ߬ߣߌ߲߬ߟߏ߲߸ ߂߀߂߆ ߞߏ߲ߞߏߘߓߌ ߕߟߋ߬ ߁߁ ߡߊ߬߸ ߡߊ߲߬ߖߊ߲߬ߠߊ߫ ߞߟߍ߬ߡߐ߰ߘߊ ߞߊ߬ ߝߎߣߎ߲ߞߋ߫ ߡߐ߰ ߣߊ߯ߣߌ߲߫ ߠߋ߬ ߦߌ߬ߘߊ߫ ߝߐ߰ߓߍ߬ߦߊ߬ߟߊ ߟߎ߬ ߟߊ߫߸ ߡߍ߲ ߠߎ߬ ߡߊߝߌ߲߬ߣߍ߲߫ ߞߏ߫ ߊ߬ߟߎ߫ ߖߊ߬ߡߊ ߓߘߊ߫ ߓߋ߬ ߘߋ߲ߣߍ߲߫ ߡߛߏ߬ߡߊ߲߬ߣߍ߲߫ ߛߊ߲߬ ߁߂ ߘߏ߫ ߞߊ߲߬߸ ߞߵߏ߬ ߖߌ߬ߦߊ߬ߖߟߎ߬ߦߊ߫ ߞߵߊ߬ ߟߊߦߟߍ߬ ߘߍ߬ߞߙߏߝߏ ߟߎ߫ ߞߊ߲߬، ߞߏߢߊ ߣߌ߲߬ ߞߍ߫ ߘߊ߫ ߂߀߂߆ ߞߏ߲ߞߏߜߍ߫ ߕߊ߬ߡߌ߲߬ߣߍ߲ ߠߋ߬ ߟߊ߫߸ ߖߏ߬ߡߊ߬ ߓߊߟߊ߲ߘߎ߯ ߛߏ ߞߣߐ߫، ߊ߬ߟߎ߫ ߡߐ߰ ߟߏ߯ߟߎ߫ ߟߋ߬ ߡߊߝߌ߲߬ߣߍ߲߫ ߣߌ߲߬ ߞߏ ߘߐ߫߸ ߊ߬ߟߎ߬ ߟߏ߯ߟߎߣߊ߲ ߏ߬ ߓߘߊ߫ ߕߊ߲߫ ߛߊ߲߬ ߝߢߐ ߟߊ߫ ߡߎߣߎ߲߬.

ߣߌ߲߬ ߞߍߣߍ߲߫ ߖߏ߬ߡߊ߬ ߓߊߟߊ߲ߘߎ߯ ߡߍ߲ ߞߣߐ߫ ߣߌ߲߬߸ ߊ߬ߟߋ ߦߋ߫ ߞߏ߲߬ߖߊ߲߬ߠߊ߬ߞߘߐ߫ ߡߙߊ߬ߘߊ߬ߙߋ߲ ߠߋ߬ ߘߐ߫߸ ߡߊ߲߬ߖߊ߲߬ߠߊ߫ ߡߙߊ߬ߓߊ߰ߘߊ ߘߐ߫، ߊ߬ߟߎ߬ ߟߊ߫ ߖߌ߬ߦߊ߬ߖߟߎ ߟߋ߬ ߦߋߣߍ߲߫ ߓߟߐߟߐ ߞߊ߲߬߸ ߕߐ߲ߓߟߏߡߊ ߟߎ߬ ߝߣߊ߫ ߞߍߢߊ ߟߵߏ߬ ߘߌ߫ ߞߊ߬ ߢߊߢߌߣߌ߲ߠߌ߲߫ ߛߌ߰ ߛߋ߲߬ߠߊ߫߸ ߞߊ߬ ߕߍ߮ ߞߍ߫ ߡߐ߰ ߣߊ߯ߣߌ߲ ߢߌ߲߬ ߘߐ߫.

ߘߊ߯ߕߌ߮ ߟߏ߲߬ߛߋߣߍ߲߫ ߖߊߟߏ߫ ߡߍ߲ ߦߋ߫ ߡߊ߲߬ߖߊ߲߬ߠߊ߫ ߞߟߍ߬ߡߐ߰ߘߊ ߞߕߌ߫ ߘߊߞߎ߲ ߞߎ߲߬ߕߌ߮ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫: <<ߞߐ߬ߟߏ߲߫ ߕߊ߬ߡߌ߲߬ߣߍ߲߸ ߊ߲ ߕߏ߫ ߘߊ߫ ߛߓߍߘߊ ߟߋ߬ ߟߊ߫߸ ߊ߲ ߞߵߊ߬ ߡߍ߲߫ ߞߏ߫ ߖߌ߬ߦߊ߬ߖߟߎ ߘߏ߫ ߦߋ߫ ߝߌߙߌ߲ߝߌߙߌ߲ ߞߊ߲߬ ߡߐ߱ ߟߎ߬ ߟߊ߫ ߜߋߟߋ߲ߜߋߟߋ߲ ߠߎ߬ ߞߣߐ߫ ߖߏ߬ߡߊ߬ ߓߊߟߊ߲ߘߎ߯߸ ߞߏ߫ ߘߏ߫ ߟߎ߫ ߖߍ߬ߘߍ ߓߘߴߊ߬ ߟߊߦߟߍ߬ ߓߟߐߟߐ ߘߍ߬ߞߙߏߝߏ ߟߎ߫ ߞߊ߲߬.>>

ߢߊߢߌߣߌ߲ߠߌ߲ ߞߵߊ߬ ߦߌ߬ߘߊ߬ ߞߏ߫ ߞߍߞߌߦߊ ߘߏ߫ ߟߋ߬ ߓߋ߬ߒ߬ߞߊ߲߬ߠߌ߲߬ߠߊ ߢߌ߲߬ ߠߎ߬ ߓߟߏ߫߸ ߡߍ߲ ߢߊߦߋ߫ ߜߏߏߡߊ߲߫ ߞߏߛߓߍ߫، ߞߊ߬ߕߎ߲߯߸ ߊ߬ߟߎ߫ ߞߊ߬ ߘߋ߲ߡߛߏߣߍ߲ ߣߌ߲߬ ߕߊ߬ ߟߋ߬߸ ߞߏ߫ ߊ߬ߟߎ߬ ߥߊߕߐ߫ ߊ߬ ߡߊߞߊ߬ߙߊ߲߬ߧߊ߬ ߟߊ߫ ߔߏߔߏ ߟߊ߫߸ ߞߊ߬ ߥߴߏ߬ ߘߌ߫ ߦߙߐ߫ ߟߊߕߍ߰ߣߍ߲ ߘߏ߫ ߘߐ߫ ߥߊ߭ ߘߐ߫ ߛߊ߫߸ ߡߐ߰ ߕߴߊ߬ߟߎ߬ ߦߋ߫ ߦߙߐ ߡߍ߲ ߘߐ߫߸ ߞߊ߬ ߓߋ߬ ߊ߬ ߞߊ߲߬ ߦߋ߲߬.

ߘߊ߯ߕߌ߯ ߖߊߟߏ߬ ߞߵߊ߬ ߦߌ߬ߘߊ߬ ߣߌ߫ ߞߎߡߊ߫ ߟߊߕߙߎߕߙߎ߫ ߕߍ߫߸ ߞߏ߫ <<ߞߏߢߊ ߣߌ߲߬ ߞߍ߫ ߘߊ߫ ߞߏ߲ߞߏߜߍ߫ ߕߊ߬ߡߌ߲߬ߣߍ߲ ߠߋ߬ ߟߊ߫߸ ߊ߬ߟߋ߬ ߛߌߞߊߒߡߊߓߊ߰ߕߐ ߢߌ߲߬ ߠߎ߫ ߞߊ߬ ߞߏߕߐ ߕߊ߬ ߞߊ߬ ߥߴߊ߬ ߘߌ߫ ߥߊ߭ ߟߋ߬ ߘߐ߫ ߞߏ߫ ߊ߬ߟߎ߬ ߥߊߕߐ߫ ߊ߬ ߡߊߞߊ߬ߙߊ߲߬ߧߊ߬ ߟߊ߫ ߔߏߔߏ߫ ߓߏߙߌ ߟߊ߫، ߊ߬ߟߎ߫ ߓߋ߬ ߘߊ߫ ߘߋ߲ߣߍ߲ ߞߊ߲߬ ߦߋ߲߬ ߠߋ߬ ߞߋߟߋ߲ߞߋߟߋ߲߫߸ ߞߵߊ߬ ߖߌ߬ߦߊ߬ߖߟߎ߬ߦߊ߫߸ ߞߵߊ߬ ߓߌ߬ߟߊ߫ ߘߍ߬ߞߙߏߝߏ ߟߎ߫ ߞߊ߲߬، ߊ߬ ߘߏ߲߬߸ ߓߋ߬ߒ߬ߞߊ߲߬ߠߌ߲ ߦߋ߫ ߞߏ߫ ߟߊߕߐ߲ߣߍ߲ ߠߋ߬ ߘߌ߫ ߖߌ߬ߣߍ߫ ߛߊ߬ߙߌ߬ߦߊ ߘߐ߫، ߊ߬ߟߎ߫ ߡߌ߬ߣߊ߬ ߢߊ ߟߋ߬ ߞߍߣߴߏ߬ ߘߌ߫߸ ߊ߬ߟߎ߬ ߡߴߊ߬ߟߎ߫ ߛߐ߬ߛߐ߫ ߊ߬ ߞߏ ߟߊ߫ ߢߊ߫ ߜߘߍ߫ ߝߣߊ߫ ߡߊ߬.>>

ߡߐ߰ ߟߏ߯ߟߎ߫ ߟߋ߬ ߕߐ߮ ߦߋ߫ ߣߌ߲߬ ߞߏ ߘߊ ߝߍ߬، ߕߍ߮ ߓߘߊ߫ ߞߍ߫ ߣߊ߯ߣߌ߲߫ ߘߐ߫߸ ߏ߬ ߟߎ߫ ߦߌ߬ߘߊ߬ ߘߊ߫ ߝߐ߰ߓߍ߬ߦߊ߬ߟߊ ߟߎ߬ ߟߊ߫ ߛߌ߬ߣߌ߲߬ߟߏ߲ ߣߌ߲߬ ߡߊ߬، ߊ߬ߟߎ߫ ߡߐ߰ ߣߊ߯ߣߌ߲ ߏ߬ ߟߎ߫ ߟߋ߬: ߍߡ.ߛߋ، ߍߟ.ߞ ߡߍ߲ ߞߊ߲߬ߕߐ߮ ߦߋ߫ ߓߎ߬ߥߊ߬ߘߋ߬ߣߌ߲ ߘߌ߫߸ ߊ߬ ߣߌ߫ ߏ.ߛߋ߸ ߏ߬ ߞߊ߲߬ߕߐ߮ ߦߋ߫ ߗߍ߭ߞߎ߲߬ߓߊ ߘߌ߫߸ ߊ߬ ߟߊߓ߲ߊ ߦߋ߫ ߍߡ.ߛߋ ߘߌ߫߸ ߏ߬ ߝߣߊ߫ ߞߊ߲߬ߕߐ߮ ߟߋ߬ ߔߙߏ ߡߊߞߛ ߘߌ߫، ߊ߬ ߟߏ߯ߟߎߣߊ߲ ߛߊ߫߸ ߏ߬ ߦߋ߫ ߞ.ߍߛ ߟߋ߬ ߘߌ߫߸ ߏ߬ ߦߋߣߍ߲߫ ߕߍ߫ ߡߎߣߎ߲߬، ߞߟߍ߬ߡߐ߰ߘߊ ߞߵߊ߬ ߦߌ߬ߘߊ߫ ߏ߬ ߟߊ߫ ߞߏ ߘߐ߫ ߞߏ߫: <<ߊ߲ ߘߴߊ߲ ߕߍ߯ ߞߍ߫ ߏ߬ ߝߣߊ߫ ߘߐ߫ ߖߐ߫.>>

ߊ߬ߟߎ߫ ߦߌ߬ߘߊ߬ߣߍ߲ ߝߐ߰ߓߍ߬ߦߊ߬ߟߊ ߟߎ߬ ߟߊ߫߸ ߘߏ߫ ߟߎ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߫ ߛߐ߬ߘߐ߲߬ ߘߴߊ߬ ߘߐ߫ ߟߋ߬ ߝߛߊߦߌ߫، ߊ߬ߟߎ߬ ߕߍߡߊ߬ ߦߋ߲߬߸ ߍߡ.ߛߋ ߕߍ߬ߘߍ߫ ߊ߬ ߝߍ߬ ߞߵߊ߬ ߖߍ߬ߘߍ߫ ߘߏ߬ߣߌ߲ ߘߐߝߍߦߊ߫߸ ߊ߬ ߞߏ߬ߣߌ߲ ߡߴߊ߬ ߛߐ߬ߛߐ߫ ߊ߬ ߟߊ߫ ߞߏ߫ ߊ߬ ߕߎ߲߬ ߕߴߊ߬ ߘߐ߫، ߊ߬ ߟߊ߫ ߝߐߟߌ߫ ߘߐ߫߸ ߊ߬ ߘߍ߬ߢߐ߲߮ ߠߎ߫ ߟߋ߬ ߞߵߊ߬ߟߋ ߓߌ߬ߟߴߊ߬ ߘߐ߫، <<ߊ߲ ߘߍ߬ߢߐ߲߰ߞߍ߫ ߟߋ߬ ߞߊ߬ ߘߋ߲ߡߛߏ ߕߊ߬߸ ߞߏ߫ ߞߊ߬ ߥߴߊ߬ ߡߊߞߊ߬ߙߊ߲߬ߧߊ߬ ߔߏߔߏ ߟߊ߫، ߊ߬ߟߎ߫ ߕߊ߬ߡߌ߲߬ ߘߊ߫ ߒߠߋ ߞߐ߫ ߊ߲ ߓߘߊ߸ ߞߏ߫ ߒ ߧߋ߫ ߥߴߊ߬ߟߎ߬ ߡߊߟߐ߬.>> ߊ߬ ߞߵߏ߬ ߦߌ߬ߘߊ߬ ߞߎߡߊ ߘߐ߫، ߊ߬ ߞߵߊ߬ ߝߐ߫ ߞߏ߫ ߊ߬ߟߋ ߞߊ߬ ߖߌ߬ߦߊ߬ߖߟߎ߬ߦߊ߬ߟߌ ߞߍ߫ ߊ߬ߟߎ߫ ߘߍ߬ߢߐ߲߰ ߜߘߍ߫ ߟߋ߬ ߟߊ߫ ߞߎߡߊ ߞߏߛߐ߲߬، ߊ߬ ߡߊ߫ ߘߊ߲߬ ߖߌ߬ߦߊ߬ߖߟߎ߬ߦߊ߬ߟߌ ߏ߬ ߘߐߙߐ߲߫ ߡߊ߬ ߘߋ߬߸ ߊ߬ߟߋ߫ ߖߍ߬ߘߍ ߝߣߊ߫ ߛߐ߬ߘߐ߲߬ ߘߴߊ߬ ߞߏߢߊ ߘߐ߫ ߟߋ߬ (ߞߊ߬ ߘߏ߫ ߞߍ߫)، <<ߒ ߞߵߊ߬ ߝߐ߫ ߊ߬ ߦߋ߫ ߒ ߞߏ߫ ߊ߬ ߦߴߊ߬ ߖߏ߰ߛߌ߬߸ ߞߏ߬ߣߵߊ߬ ߡߊ߫ ߛߐ߲߬.>> ߊ߬ ߞߵߏ߬ ߟߋ ߝߙߊ߬ ߞߎߡߊ ߞߊ߲߬.

ߍߟ.ߞ ߟߊ߫ ߝߐߟߌ߫ ߘߐ߫߸ ߊ߬ߟߋ ߡߍ߲ ߝߣߊ߫ ߡߊߝߌ߲߬ߣߍ߲߫ ߣߌ߲߬ ߞߏ ߘߐ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߫ ߛߋ߲߬ߢߊ߬ ߝߟߐ߫ ߕߍ߫ ߣߌ߲߬ ߘߌ߫. <<ߣߌ߲߬ ߛߎ߮ ߞߍ߫ ߞߏ߫ ߝߟߐ߫ ߕߍ߫ ߣߌ߲߬ ߘߋ߬، ߟߏ߲ ߘߏ߫߸ ߞߵߊ߬ ߛߐ߬ߘߐ߲߬ ߊ߲ ߧߋ߫ ߘߐ߲߬ߓߏ߲ ߘߊ ߞߘߐ߫߸ ߞ ߞߵߊ߬ ߝߐ߫ ߘߋ߲ߡߛߏߣߍ߲ ߘߏ߫ ߡߊ߬ ߞߏ߫ ߊ߬ ߦߴߊ߬ ߛߌ߰ ߔߏߔߏ ߞߊ߲߬ ߞߊ߬ ߥߴߊ߬ ߡߊߟߐ߬، ߊ߲ ߓߍ߯ ߦߟߍ߬ ߘߊ߫ ߔߏߔߏ ߞߊ߲߬߸ ߊ߲ ߥߊ߫ ߘߊ߫، ߊ߲ ߛߋ ߦߙߐ ߘߏ߫ ߘߐ߫߸ ߊ߬ ߞߊ߬ ߛߌߟߊ ߝߘߊ߫߸ ߞߊ߬ ߘߋߡߛߏߣߍ߲ ߡߥߊߙߊ߲ߞߊ߫߸ ߞߊ߬ ߜߋߟߋ߲ߜߋߟߋ߲ ߘߌ߫ ߒߠߋ ߡߊ߬߸ ߒ ߞߵߊ߬ߟߎ߫ ߖߌ߬ߦߊ߬ߖߟߎ߬ߦߊ߫، ߕߎ߬ߢߊ ߞߏ߬ߣߌ߲ ߦߋ߫ ߡߍ߲ ߘߌ߫߸ ߊ߲ ߓߍ߯ ߛߋ߫ ߘߊ߫ ߟߋ߬ ߘߋ߲ߡߛߏ ߡߊ߬.>>

ߞߊ߬ ߓߍ߲߬ ߞߎߡߊ߫ ߝߐߣߍ߲ ߢߌ߲߬ ߠߎ߬ ߟߊ߫ ߖߎ߯ߦߊ ߡߊ߬ ߛߊ߫߸ ߡߊ߲߬ߖߊ߲߬ߠߊ߫ ߞߕߌߘߊ ߦߌߟߡߊ߫ ߝߟߐ ߞߕߌߞߊ߲ߘߊ ߞߵߊ߬ ߦߌ߬ߘߊ߬ ߞߏ߫ ߊ߬ ߕߍ߫ ߞߏ߫ ߛߎ߮ ߣߌ߲߬ ߕߏߟߏ߲߫ ߘߐ߫߸ ߊ߬ ߘߏ߲߬ ߘߴߊ߬ ߞߟߍ߬ ߢߊ ߓߍ߯ ߘߏ߫ ߡߊ߬، ߊ߬ ߞߊ߲߫ ߞߏ߫ ߛߊ߬ߙߌ߬ߦߊ߬ ߘߌ߫ ߟߊߕߊ߯ߡߊ߫ ߢߌ߲߬ ߠߎ߫ ߞߊ߲߬߸ ߡߍ߲ ߘߌ߫ ߞߍ߫ ߟߊߒߡߊ ߘߌ߫ ߓߍ߯ ߟߊߘߍ߬ߣߍ߲ ߦߋ߫.

ߢߊߢߌߣߌ߲ߠߌ߲ ߞߏ߬ߣߌ߲ ߦߴߌߘߐ߫߸ ߛߊ߫ ߓߟߏ߫ ߘߌ߫ ߞߍ߫ ߊ߬ߟߎ߬ ߟߏ߯ߟߎߣߊ߲ ߘߐ߫߸ ߊ߬ ߣߌ߫ ߞߊ߬ ߕߍ߮ ߟߊ߫ ߘߏ߫ ߜߘߍ߫ ߟߎ߫ ߝߣߊ߫ ߘߐ߫߸ ߡߍ߲ ߠߎ߬ ߛߐ߲߬ ߦߴߊ߬ ߘߐ߫، ߡߐ߰ ߣߊ߯ߣߌ߲ ߡߍ߲ ߠߎ߬ ߝߟߐ߫ ߡߌ߬ߣߊ߬ߣߍ߲߫߸ ߏ߬ ߟߎ߫ ߞߵߊ߬ߟߎ߫ ߟߐ߬ ߊ߬ ߟߊ߫ ߞߏ߫ ߊ߬ߟߎ߫ ߛߐ߲߭ ߠߋ߬ ߝߛߊߦߌ߫.