ߛߌߞߊ ߕߍ߬ߘߍ߫ ߡߐ߰߰ ߛߌߦߊߡߊ߲߫ ߘߐ߫߸ ߞߏ߫ ߊ߬ߝߐ߫ ߞߏ߫ ߞߍߣߍ߲߫ ߠߋ߬ ߕߍ߫ ߊߛߡߌ߫ ߟߊ߫ ߓߊ߬؟ ߒ߬ߓߊ߬߸ ߢߌ߬ߣߌ߲߬ߞߊ߬ߟߌ ߏ߬ ߓߘߊ߫ ߖߋ߬ߓߌ߬، ߓߊߏ߬߸ ߡߊ߬ߟߌ ߘߐ߬ߕߊߡߌ߲ ߞߊ߲ߕߌ߮߸ ߞߟߍ߬ߕߌ߰ ߊߛߡߌ߫ ߜ߭ߏ߬ߦߌ߬ߕߊ߬ ߦߋߣߍ߲߫ ߠߋ߬ ߞߟߎ߬ߓߊ߬ ߞߎߓߋ ߞߣߐ߫ ߓߌ߬ ߞߏ߬ߟߏ߲ ߣߌ߲߬ ߡߊ߬߸ ߂߀߂߆ ߞߏ߲ߞߏߘߓߌ ߕߋ߬ߟߋ߫ ߂߈ ߡߊ߬ ߓߡߊ߬ߞߐ߫، ߞߊ߬ ߘߊ߲߭ߛߌ߰ ߥߎ߬ߣߎ߲߬ߥߎ߬ߣߎ߲߬ ߞߎߡߊ ߟߎ߬ ߟߊ߫߸ ߞߊ߬ ߓߍ߲߬ ߊ߬ ߕߎߣߎ߲߫ ߞߏ߫ ߞߎߡߊ ߡߊ߬ ߞߍ߲ߘߍߟߏ߲ ߡߙߊ߬ߒ߬ߡߊ߬ߟߌ ߡߊ߲߬ߞߊ߲ ߛߋ߲߭ߝߍ߬.

ߟߊ߬ߛߋ߬ߟߌ߬ ߞߟߊߒߞߋ߫ ߟߋ߬ ߞߍ߫ ߘߊ߫ ߞߎ߲߬ߠߊ߬ߛߌ߮ ߓߟߏ߫߸ ߞߏ߫ ߙߎ߬ߛߌ߬ ߞߙߎߝߊ ߟߊ߬ߛߌ߰ߘߋ߲ ߡߍ߲ ߦߋ߫ ߡߊ߬ߟߌ ߟߊ߫߸ ߏ߬ ߣߌ߫ ߞߊ߬ߝߏ߬ ߞߎ߲ߕߌ߮ ߓߘߊ߫ ߢߐ߲߯ߦߋ߫߸ ߟߊ߬ߛߌ߰ߘߋ߲ ߏ߬ ߡߍ߲ ߕߐ߯ ߞߏ߫ ߌߜ߭ߐߙ ߜ߭ߙߏߡߌߞߏ߫، ߢߐ߲߯ߦߋ ߏ߬ ߟߋ ߞߍߣߍ߲߫ ߊߛߡߌ߫ ߜ߭ߏ߬ߦߌ߬ߕߊ߬ ߦߋߞߏ߫ ߝߟߐ ߘߌ߫ ߜߍ ߘߐ߫߸ ߞߊ߬ߦߌ߯ ߓߊ߰ߓߊ߰ߟߌ߬ ߞߙߎ߫ ߛߛߞߞ ߣߌ߫ ߊߞߞ ߟߊ߫ ߓߋ߬ߒ߬ߞߊ߲߬ߠߌ߲߬ ߖߎ߮ ߞߍ߫ ߘߊ߫߸ ߡߍ߲ ߞߊ߬ ߖߡߊ߬ߣߊ ߥߊ߬ߟߏ߲߫ ߞߏ߲ߞߏߘߓߌ ߂߅ ߡߊ߬.

ߡߙߊ߬ߒ߬ߡߊ߬ߟߌ ߏ߬ ߟߋ ߞߐ ߘߐ߫߸ ߞߎߡߊ߫ ߡߌߛߍ߲ ߛߌߦߊߦߊ߫ ߘߊ߫ ߘߍ߬߬ߞߙߏߝߏ ߟߎ߫ ߞߊ߲߬߸ ߊ߬ ߣߌ߫ ߞߐߞߊ߲߫ ߞߌߓߊߙߏߘߊ ߟߎ߬ ߓߟߏ߫߸ ߞߏ߫ ߊߛߡߌ߫ ߣߐ߬ ߘߌ߫ ߞߍ߫ ߊ߬ ߓߏ߬ߙߌ߬ ߟߊ߫߸ ߥߟߴߊ߬ ߓߘߊ߫ ߞߍ߫ ߦߋߓߊߟߌߣߍ߲ ߘߌ߫، ߒ߬ߓߊ߬߸ ߊߛߡߌ߫ ߖߌ߬ߦߊ߬ߓߍ߬ ߣߊ߯ߣߌ߲߫ ߠߊߖߍ߲ߛߍ߲ ߞߎ߲߬ߠߊ߬ߛߌ߮ ߟߊ߫ ߞߐߜߍ ߞߊ߲߬ ߓߌ߬ ߏ߬ ߘߐ߫߸ ߏ߬ ߟߋ ߞߍߣߍ߲߫ ߕߐ߰ߡߊ߬ߛߙߋ߫ ߘߌ߫߸ ߞߵߊ߬ ߦߌ߬ߘߊ߬ ߞߏ߫ ߝߏߦߌ߬ ߕߍ߫ ߊߛߡߌ߫ ߟߊ߫ ߡߊ߬ߟߌ ߡߊ߬ߙߊ ߞߣߐ߫ ߡߎߣߎ߲߬.

ߖߌ߬ߦߊ߬ߓߍ ߏ߬ ߟߊߖߍ߲ߛߍ߲ ߞߐ ߘߐ߫߸ ߊ߬ߟߋ߬ ߝߊ߬ߙߊ߲߬ߛߌ߫ ߞߌ߬ߓߊ߬ߙߏ߬ߘߊ ߟߎ߬ ߛߋ߫ ߘߊ߫ ߡߍ߲ ߛߐ߬ߘߐ߲߬ ߠߊ߫ ߞߵߊ߬ ߝߐ߫߸ ߞߏ߫ ߊ߬ߟߎ߬ ߡߊ߫ ߖߌ߬ߦߊ߬ߓߍ ߏ߬ ߛߍ߲ߛߍ߲߫ ߡߎߣߎ߲߬ ߞߵߊ߬ ߟߐ߲߫ ߣߌ߫ ߖߌ߬ߦߊ߬ߓߍ߬ ߞߎߘߊ ߟߋ߬، ߊ߬ ߞߏ߬ߣߌ߲ ߞߏ߫߸ ߊߛߡߌ߫ ߖߌ߬ߦߊ߬ߓߍ ߘߏ߫ ߓߘߊ߫ ߦߋ߫ ߓߌ߬....

ߊߟߎ߫ ߦߴߊ߬ ߟߐ߲߫߸ ߊߛߡߌ߫ ߣߌ߫ ߙߎ߬ߛߌ߫ ߟߊ߬ߛߌ߰ߘߋ߲ ߠߊ߫ ߢߐ߲߯ߦߋ ߣߌ߲߬ ߞߣߐ߫߸ ߊ߬ߟߎ߬ ߞߎߡߊ߫ ߘߊ߫ ߖߡߊ߬ߣߊ ߟߊߞߊ߲ߘߊ ߞߏߢߊ ߟߎ߫ ߞߊ߲߬ ߡߊ߬ߟߌ ߣߌ߫ ߙߎ߬ߛߌ߬ ߕߍ߫ ߓߊ߯ߙߊߢߐ߲߯ߦߊ߫ ߓߟߏ ߡߊ߬، ߟߊ߬ߛߌ߰ߘߋ߲߫ ߌߜ߭ߐߙ ߜ߭ߙߏߡߌߞߏ߫ ߞߵߊ߬ ߦߌ߬ߘߊ߬ ߞߏ߫ ߙߎ߬ߛߌ߬ <<ߓߌߣߍ߲߫ ߊ߬ ߢߊ ߖߍ߬ߘߍߖߍ߬ߘߍ ߡߊ߬>> ߞߵߊ߬ ߟߐ߬ ߡߊ߬ߟߌ ߝߍ߬ ߓߊ߰ߓߊ߰ߟߌ ߞߍ߬ߟߍ ߘߐ߫، ߞߵߊ߬ ߦߌ߬ߘߊ߬ ߞߏ߫ ߙߎ߬ߛߌ߫ ߣߊ߲߬ߕߌ߮ ߟߎ߬ ߣߌ߫ ߡߊ߬ߟߌ ߣߊ߲߬ߕߌ߰ ߝߊ߲ߞߊ ߓߍߣߊ߬ ߓߊ߯ߙߊߢߐ߲߯ߦߊ ߟߊߘߍ߬.

ߕߍߓߊ߯ߦߟߊ ߞߊ߬ <<ߕߌ߲ߞߌ ߣߌ߫ ߘߎߓߊ>> ߞߍ߫ ߡߊ߬ߟߌ ߣߊ߲߬ߕߌ߮ ߟߎ߬ ߦߋ߫߸ ߞߊ߬ ߓߍ߲߬ ߊ߬ߟߎ߬ ߟߊ߫ ߞߟߊߓߎ ߡߊ߬ ߞߟߍ߬ߘߊ ߘߐ߫، ߊ߬ ߞߊ߬ ߕߡߊ߬ߖߌ ߓߐ߫ ߡߊ߬ߟߌ ߘߐ߫߸ ߞߏ߫ ߙߎ߬ߛߌ߬ ߦߋ߫ ߡߊ߬ߟߌ <<ߕߋߙߌ>> ߟߋ߬ ߘߌ߫ ߓߌ߬߸ ߏ߬ ߘߏ߲߬ ߕߍߣߊ߬ ߡߊߝߊ߬ߟߋ߲߬ ߠߊ߫ ߤߊߟߌ߬ ߛߌߣߌ߲߫.