ߡߊ߬ߟߌ ߘߐ߬ߕߊߡߌ߲ ߞߎ߲߬ߠߊ߬ߛߌ߮ ߓߘߊ߫ ߛߊ߬ߝߌߝߌ ߞߟߍ߬ߕߌ߮ ߛߊ߯ߖߐ߬ ߞߡߊ߬ߙߊ߫ ߛߦߊ߬ ߞߏ ߝߐ߫ ߞߵߊ߬ ߟߊߕߍ߰ ߞߊ߯ߙߌ ߣߌ߲߬ ߡߊ߬ ߂߀߂߆ ߞߏ߲ߞߏߘߓߌ ߕߋ߬ߟߋ߫ ߂߆߸ ߊ߬ߟߋ ߡߍ߲ ߕߎ߲߬ ߦߋ߫ ߞߊ߬ߝߏ ߞߏߕߌ߯ ߘߌ߫߸ ߡߍ߲ ߢߎ߲ߣߍ߲߫ ߡߊ߬ߞߊ߲߬ߞߊ߲߬ߠߌ߲ ߣߌ߫ ߞߟߍ߬ߞߍ߬ߟߊ߬ ߞߘߐ ߟߎ߬ ߟߊ߫ ߞߏ ߟߊ߫، ߓߊ߰ߓߊ߰ߟߌ߬ߟߊ ߟߎ߫ ߞߊ߬ ߡߙߊ߬ߒ߬ߡߊ߬ߟߌ ߡߍ߲ ߞߍ߫ ߊ߬ ߡߊߞߍ߫ ߦߙߐ ߞߊ߲߬ ߞߊ߬ߕߌ߫ ߞߏ߲ߞߏߘߓߌ ߕߋ߬ߟߋ߫ ߂߅ ߡߊ߬ ߓߡߊ߬ߞߐ߬ ߡߊߛߎ߬ߘߎ߲߬ߧߊ ߘߐ߫߸ ߊ߬ߟߋ ߕߏ߫ ߘߊ߫ ߡߙߊ߬ߒ߬ߡߊ߬ߟߌ ߏ߬ ߟߋ ߘߐ߫.

ߞߎ߲߬ߠߊ߬ߛߌ߮ ߟߊ߫ ߟߊ߬ߛߋ߬ߟߌ߬ ߞߟߊߒߞߋ ߣߌ߲߬ ߘߐ߫߸ ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߘߎ߰ߞߎߟߎ߲ ߘߏ߫ ߟߋ߬ ߖߛߐߣߍ߲߫ ߕߘߍ߬ ߝߏߘߏ߲ߕߊ ߟߎ߬ ߟߊ߫߸ ߞߵߏ߬ ߞߍ߫ ߜߛߏ ߘߌ߫ ߞߵߊ߬ ߘߏ߲߬ ߖߘߍ߬ߝߊ߰ߛߎ ߘߏ߫ ߓߟߏ߫߸ ߏ߬ ߞߵߊ߬ ߓߏ߬ߙߌ߫ ߞߊ߬ ߕߊ߯ ߞߏߕߌ߮ ߡߊߞߍߦߙߐ ߛߎߡߊ߲߫ ߖߐ߲ߖߐ߲ ߞߍ߫، ߏ߬ ߞߍ߫ ߘߊ߫ ߕߙߎ߬ ߘߌ߫ ߘߌ߫ ߝߣߊ߫ ߞߊ߬ ߝߏߘߏ߲ߢߐ߲߯ߠߊ ߟߊߥߟߌ߬߸ ߞߍߒߞߊ߲ߓߊ߮ ߛߌߦߊߡߊ߲߫ ߞߎ߲߭ ߕߏ߫ ߘߊ߫ ߡߍ߲ ߘߐ߫، ߒ߬ߓߊ߬߸ ߞߏߕߌ߯ ߛߊ߯ߖߐ߬ ߞߡߊ߬ߙߊ߬ ߖߐߞߌ߫ ߘߊ߫ ߦߋ߲߬ ߠߋ߬߸ ߊ߬ ߕߊ߬ ߘߊ߫ ߞߊ߬ ߥߴߊ߬ ߘߌ߫ ߘߊ߲ߘߊߛߏ ߟߊ߫߸ ߊ߬ ߛߊ߬ ߘߊ߫ ߦߋ߲߬ ߛߊ߫ ߖߐߞߟߌ ߞߏߛߐ߲߬.

ߡߊ߬ߟߌ ߞߎ߲߬ߠߊ߬ߛߌ߮ ߟߎ߬ ߞߊ߲߫ ߞߏ߫ ߊ߬ ߡߊߞߍ߫ ߦߌߟߊ ߝߊ߲߬ ߞߋߟߋ߲ ߠߊߥߎ߬ߦߊ ߡߍ߲ ߞߍߣߴߏ߬ ߘߌ߫߸ ߏ߬ ߞߍ߫ ߘߊ߫ ߕߙߎ߬ ߘߌ߫ ߞߊ߬ ߞߏ߫ ߟߊߛߋ߫ ߡߐ߰ ߜߘߍ߫ ߟߎ߫ ߡߊ߬ ߟߎ ߞߣߐ߫߸ ߊ߬ ߣߌ߫ ߕߌ߲ߓߌߘߌ߲ߘߊ ߘߏ߫ ߝߣߊ߫ ߕߍ߬ߘߍ߫ ߊ߬ ߞߍ߬ߙߍߝߍ߬߸ ߏ߬ ߟߊߥߎ߬ߦߊ߬ ߘߊ߫ ߟߋ߬ ߞߵߊ߬ ߛߐ߬ߘߐ߲߬ ߛߊߟߌߟߊ ߘߏ߫ ߟߎ߫ ߕߍ߬ߘߍ߫ ߊ߬ ߞߣߐ߫ ߦߋ߲߬߸ ߝߏ߫ ߘߏ߫ ߟߎ߫ ߓߣߐ߬ ߘߴߊ߬ߟߎ߬ ߣߌ ߘߐ߫.

ߡߙߊ߬ ߞߍ߫ ߘߊ߫ ߦߙߐ߫ ߛߌߦߊߡߊ߲߫ ߠߋ߬ ߡߊ߬ ߟߏ߲߫ ߞߋߟߋ߲ ߣߌ߲߬ ߘߐ߫ ߡߊ߬ߟߌ ߖߡߊ߬ߣߊ ߞߣߐ߫.

ߟߊ߬ߛߋ߬ߟߌ ߣߌ߲߬ ߘߐ߫߸ ߞߊ߲ߕߌ߯ ߊߛߡߌ߫ ߜ߭ߏ߬ߦߌ߬ߕߊ߫ ߞߊ߬ ߛߊߖߐ߬ ߕߊ߲߬ߘߏ߬߸ ߞߵߊ߬ ߦߌ߬ߘߊ߬ ߞߏ߫ ߊ߬ ߞߍ߫ ߘߊ߫ ߣߊ߲߬ߕߌ߯ ߟߋ߬ ߘߌ߫ <<ߞߟߍ߬ߟߊ߲߬ߘߌ߫ ߘߌ߫߸ ߊ߬ ߝߊߘߌߡߊ߲߫ ߕߘߍ߬߸ ߡߐ߰ߦߊ ߞߊ߬ߣߌ߲ ߕߎ߲߬ ߦߴߊ߬ ߛߣߐ߬ߡߍ ߘߐ߫߸ ߞߵߏ߬ ߟߊ߫ ߞߎ߬ߛߊ߲߬ߧߊ ߞߊ߲߬.>> ߊ߬ ߞߵߊ߬ ߟߊ߫ ߞߟߊߓߎ ߝߣߊ߫ ߝߐ߫߸ <<ߤߊ߲߯ ߞߵߊ߬ ߣߌ ߡߌ߬ߣߊ߬>> ߊ߬ ߡߊ߫ ߕߐ߰ߘߐߝߊ߰.

ߛߊ߯ߖߐ߬ ߞߡߊ߬ߙߊ߫ ߛߐ߬ߘߐ߲߬ ߘߊ߫ ߁߉߇߉ ߕߙߊߓߊ ߕߋ߬ߟߋ߫ ߂߂ ߟߋ߬ ߡߊ߬ ߞߊ߬ߕߌ߬߸ ߊ߬ ߞߍ߫ ߘߊ߫ ߡߊ߬ߟߌ ߣߊ߲߬ߕߌ߮ ߟߎ߬ ߟߊ߫ ߝߊ߲߬ߞߊ߬ ߕߊ ߣߌ߲߬ ߡߐ߰ ߞߟߏߡߊ ߟߋ߬ ߘߌ߫، ߊ߬ ߞߊ߬ ߣߊ߲߬ߕߌ߰ߦߊ ߞߊ߬ߙߊ߲ ߞߍ߫ ߞߐߞߊ߲߫ ߖߡߊߣߊ߫ ߛߌߦߊߡߊ߲߫ ߞߊ߲߬، ߊ߬ ߕߎ߲߬ ߦߋ߫ ߣߊ߲߬ߕߌ߰ ߞߎ߲߬ߕߌ߰ߦߊ ߘߊߞߎ߲ ߘߏ߫ ߟߎ߫ ߘߐ߫ ߞߊ߬ ߞߐ߲߰ ߝߊ߲߬ߞߊ ߕߊ߬ߟߌ ߢߍ߫ ߊ߬ߟߎ߬ ߓߟߏ߫ ߂߀߂߀ ߠߊ߫߸ ߊ߬ ߣߌ߫ ߂߀߂߁ ߠߊ߫.

ߊ߬ ߞߍ߫ ߘߊ߫ ߡߊ߬ߞߊ߲߬ߞߊ߲߬ߠߌ߲ ߞߏߕߌ߮ ߘߌ߫ ߂߀߂߀ ߠߊ߫߸ ߞߊ߬ ߞߍ߫ ߊ߬ ߘߌ߫ ߞߏߞߎߘߊ߫ ߂߀߂߁ ߠߊ߫߸ ߞߵߊ߬ ߕߊ߬ ߏ߬ ߡߊ߬ ߤߊ߲߯ ߕߋ߲߬߸ ߊ߬ ߦߋ߫ ߟߐ߬ߘߎ߮ ߏ߬ ߟߊ߫، ߓߍ߯ ߕߍ߬ߘߍ߫ ߊ߬ ߖߌ߰ ߟߊ߫ ߡߊ߬ߟߌ ߣߊ߲߬ߕߌ߰ ߝߊ߲ߞߊ ߡߐ߰ߓߊ ߘߏ߫ ߟߋ߬ ߘߌ߫߸ ߝߊߦߌߘߊ߫߸ ߊ߬ ߗߍ߬ߞߎ߲ ߝߌߟߊߣߊ߲.

ߞߎ߲߬ߠߊ߬ߛߌ߮ ߞߵߊ߬ ߦߌ߬ߘߊ߬ ߞߏ߫ ߗߍ߬ߓߊ߬ ߞߋߟߋ߲ ߛߎ߬ߞߏ ߓߍߣߊ߬ ߞߍ߫ ߊ߬ߟߎ߬ ߓߟߏ߫ ߖߡߊ߬ߣߊ ߓߊߘߍ߫ ߞߍߢߊ ߟߋ߬ ߡߊ߬߸ ߡߍ߲ ߞߍߢߊ ߟߎ߬ ߓߍߣߊ߬ ߘߊ߲߭ߕߍ߰ ߟߊ߬ߛߋ߬ߟߌ߬ ߜߘߍ߫ ߟߎ߫ ߘߐ߫.