ߡߊ߬ߟߌ ߣߊ߲߬ߕߌ߮ ߟߎ߬ ߓߘߊ߫ ߟߊߛߋ߫ ߟߊ߬ߛߋ߬ߟߌ߬ ߞߎߘߊ߫ ߘߐ߫ ߕߎ߲߯߸ ߞߏ߫ ߡߙߊ߬ ߞߍ߫ ߘߴߊ߬ߟߎ߬ ߟߊ߫ ߘߎ߱ ߘߏ߫ ߟߎ߫ ߡߊ߬ ߞߍ߲ߘߍߟߏ߲ ߣߌ߲߬ ߡߊ߬߸ ߊ߬ߟߎ߬ ߓߘߊ߫ ߡߙߊ߬ߒ߬ߡߊ߬ߟߌ ߏ߬ ߟߎ߫ ߕߎ߲߬ߕߎ߲߬، ߝߣߊ߫߸ <<ߞߏ ߟߎ߬ ߓߘߊ߫ ߛߋ߫ ߡߊߣߐ߬ ߟߊ߫>>، ߏ߬ ߝߐߣߍ߲߫ ߣߊ߲߬ߕߌ߰ ߘߊ߯ߘߐ ߟߊ߫ ߟߊ߬ߛߋ߬ߟߌ߬ ߞߎߘߊ ߟߋ߬ ߘߐ߫ ߞߊ߬ ߓߍ߲߬ ߞߏ ߟߎ߬ ߥߊ߫ ߢߊ ߡߊ߬.

ߟߊ߬ߛߋ߬ߟߌ߬ ߛߓߍ ߣߌ߲߬ ߞߣߐ߫߸ ߊ߬ ߝߐߣߍ߲߫ ߞߏ߫: <<ߓߊ߰ߓߊ߰ߟߌ߬ߟߊ߫ ߡߙߊ߬ߒ߬ߡߊ߬ߝߋ߲߬ߕߌ߰ ߞߙߎ ߘߏ߫ ߟߎ߫ ߟߊ߬ ߞߵߊ߬ߟߎ߬ ߛߎߡߊ߲߫ ߡߙߊ߬ߒ߬ߡߊ߬ߟߌ߬ ߞߏ ߘߐ߫ ߖߡߊ߬ߣߊ ߘߎ߱ ߘߏ߫ ߟߎ߫ ߞߣߐ߫.>> ߓߊ߬ߙߌ߬ <<ߡߊ߬ߟߌ ߣߊ߲߬ߕߌ߮ ߟߎ߬ ߟߊ߫ ߞߎ߬ߛߊ߲߬ߧߊ ߣߌ߫ ߢߊߟߐ߲ ߞߊ߬ ߖߌ ߞߍ߫ ߊ߬ߟߎ߬ ߟߊ߫ ߡߎ߮ ߘߐ߫߸ ߞߵߊ߬ߟߎ߫ ߕߎ߲߬ߕߎ߲߫ ߜߊ߰ߢߊ߬ߜߊ߯ߢߊ ߘߝߊߣߍ߲ ߘߐ߫.>> ߣߊ߲߬ߕߌ߮ ߟߎ߫ ߞߵߊ߬ ߦߌ߬ߘߊ߬ ߝߣߊ߫ ߞߏ߫ <<ߓߊ߰ߓߊ߰ߟߌ߬ߟߊ߬ ߛߌߦߊߡߊ߲߫ ߠߋ߬ ߞߍ߫ ߘߊ߫ ߛߎ߭ ߘߌ߫߸ ߞߵߊ߬ߟߎ߬ ߓߟߏߝߋ߲߫ ߛߌߦߊߡߊ߲߫ ߝߣߊ߫ ߘߐߕߌߢߍ߫.>>

ߟߌ߬ߤߟߊ߬ ߝߟߐ ߡߍ߲ ߠߎ߬ ߟߊߛߋ߫ ߘߊ߫ ߞߊ߬ ߓߍ߲߬ ߝߏߘߏ߲ ߘߏ߫ ߥߟߌ߬ ߞߏ ߡߊ߬ ߞߊ߬ߕߌ߬ ߘߊ߮ ߞߣߐ߫߸ ߟߊ߬ߛߋ߬ߟߌ ߣߌ߲߬ ߦߴߏ߬ ߟߋ ߓߟߏߟߊߕߎ߲߰ߠߊ߫ ߞߊ߬ ߓߍ߲߬ ߞߏ ߟߎ߬ ߥߊ߫ ߢߊ ߡߊ߬߸ ߏ߬ ߡߍ߲ ߟߊ߬ߛߋ߬ߟߌ߬ ߝߟߐ ߞߵߊ߬ ߦߌ߬ߘߊ߬ ߞߏ߫ ߞߍ߬ߟߍ ߦߴߌߘߐ߫، ߝߌߟߊߣߊ߲ ߣߌ߲߬ ߓߘߴߊ߬ ߦߌ߬ߘߊ߬ ߞߏ߫ ߊ߬ߟߎ߬ ߓߘߊ߫ ߛߋ߫ ߡߙߊ߬ߒ߬ߡߊ߬ߟߌ߬ߟߊ ߟߎ߬ ߟߊߛߊ߬ߦߌ߲߬ ߠߴߊ߬ߟߎ߬ ߕߏ߲ߕߏߟߌ߲ ߡߊ߬، ߒ߬ߓߊ߬߸ ߟߌ߬ߤߟߊ߬ ߞߎߘߊ ߣߌ߲߬ ߘߐ߫ ߏ߬ ߘߐ߫߸ ߣߊ߲߬ߕߌ߮ ߟߎ߬ ߞߊ߲߫ ߞߏ߫: <<ߓߍߛߍ߲ߞߍߟߌ߫ ߦߙߍߞߍߟߌ ߦߋ߫ ߛߋ߲߬ߠߊ߫ ߤߊߟߌ߬ߛߊ߫>> ߞߵߊ߬ ߦߌ߬ߘߊ߬ ߞߏ߫ ߟߊ߬ߞߊ߲߬ߘߊ߬ߟߌ ߦߴߌߘߐ߫ ߊ߬ߟߎ߬ ߓߟߏ߫ ߊ߬ ߢߊ ߡߊ߬߸ ߞߊ߬ ߖߎ߮ ߟߎ߬ ߕߎ߲߬ߕߎ߲߫ ߊ߬ߟߎ߬ ߟߊߓߋ߬ ߞߊ߲ߡߊ߬ ߓߙߌ߫.

ߡߊ߬ߟߌ ߝߊ߰ߡߊ ߟߎ߬ ߞߊ߲߫ ߞߏ߫ ߊ߬ߟߎ߬ ߦߋ߫ ߖߡߊ߬ߣߊ߬ߘߋ߲ ߠߎ߬ ߞߟߌ߫ ߟߊ߫ ߡߊ߬ߝߊ ߣߌ߫ ߢߡߊߟߐ ߟߋ߬ ߡߊ߬، ߣߊ߲߬ߕߌ߰ ߘߊ߯ߘߐ ߞߊ߲߫ ߞߏ߫ ߡߌ߬ߙߌ߲߬ߘߌ ߦߴߊ߬ ߞߊߘߊ߲߫߸ ߊ߬ߟߎ߬ <<ߞߊߣߊ߬ ߖߌ߬ߦߊ߬ߖߟߎ߬ ߝߏߦߌ߬ ߟߊߖߍ߲ߛߍ߲߫߸ ߡߍ߲ ߠߎ߬ ߘߌ߫ ߞߍ߫ ߕߙߎ߬ ߘߌ߫ ߞߊ߬ ߡߐ߱ ߟߎ߬ ߖߊ߭ߥߟߌ߬.>> ߊ߬ ߣߌ߫ ߞߏ߫ ߓߍ߯ ߦߴߊ߬ ߞߊߘߊ߲߫߸ ߡߐ߰ ߞߊߣߊ߬ ߟߊ߫ ߟߌ߬ߤߟߊ߬ ߜߘߍ߫ ߛߌ߫ ߟߊ߫߸ ߝߏ߫ ߣߌ߫ ߡߍ߲ ߓߐ߫ ߘߊ߫ ߡߊ߬ߟߌ ߞߎ߲߬ߠߊ߬ߛߌ߮ ߖߍ߬ߘߍ ߘߊ߫߸ ߏ߬ ߟߋ ߛߥߊ߬ߓߊ ߘߌ߫.

ߏ߬ ߘߐ߫߸ ߣߌ߲߬ ߦߋ߫ ߞߎ߲߬ߠߊ߬ߛߌ߮ ߞߊ߲ ߠߋ߬ ߘߌ߫߸ ߞߵߊ߬ ߕߊ߬ ߞߍ߬ߟߍ ߘߊߡߌ߬ߣߊ ߡߊ߬߸ ߞߵߊ߬ ߛߌ߰ ߊ߬ߟߎ߬ ߟߊ߫ ߛߋ߫ ߛߐߘߐ߲ ߠߊ߫ ߖߎ߮ ߟߎ߬ ߡߊ߬.