ߒߞߏ ߛߓߍߛߎ߲ ߛߌ߲ߘߌ ߛߊ߲߬ ߇߇ ߢߊ߰ߢߊ߮ ߓߍ߲߬ߒ߬ߛߋ߲߬ߡߊ ߞߏߛߐ߲߬߸ ߖߌ߬ߣߍ߫ ߞߎ߲߬ߠߊ߬ߛߌ߮ ߟߎ߫ ߞߵߊ߬ߟߎ߬ ߟߊ߫ ߥߊ߬ߞߊߟߌ ߦߌ߬ߘߊ߫ ߝߊ߬ߛߏ߬ ߞߊ߲ ߠߎ߬ ߞߐߡߊߓߌ߲ߓߌ߲ ߓߊ߯ߙߊ ߘߐ߫߸ ߊ߬ߟߎ߬ ߓߘߴߏ߬ ߟߎ߬ ߡߍ߲ ߠߎ߬ ߟߊߘߏ߲߬ ߛߌ߰ߞߊ߲ ߞߣߐ߫ ߞߊ߬ߣߌ߲߬، ߟߊ߬ߞߎ߲߬ߠߊ߬ߛߌ߰ߦߊ߬ߟߌ ߏ߬ ߞߍߣߍ߲߫ ߞߏߓߊ߫ ߟߋ߬ ߘߌ߫.

߂߀߂߆ ߞߏ߲ߞߏߘߓߌ ߕߟߋ߬ ߁߄ ߠߋ߬ ߡߊ߬߸ ߞߐߣߊߞߙߌ߫ ߡߌ߬ߙߌ߲߬ߘߌ ߟߊ߫ ߞߎߓߋ ߞߊ߬ ߡߐ߰ߘߐ߬ߜߍ߬ ߛߌߦߊߡߊ߲߫ ߠߋ߬ ߟߊߞߢߐ߬ߡߊ߬߸ ߝߊ߰ߡߊ ߟߎ߬߸ ߡߊ߬ߞߟߐ ߟߎ߬߸ ߟߐ߲ߠߌ߲ߦߊ ߛߍ߬ߘߏ߲߬ߠߊ ߟߎ߬߸ ߒߞߏ ߛߍ߬ߘߏ߲߬ߠߊ ߟߎ߬ ߞߊ߬ ߝߘߊ߫ ߛߏ߫ ߛߌߦߊߡߊ߲߫ ߣߌ߫ ߖߡߊ߬ߣߊ߬ ߛߌߦߊߡߊ߲߫ ߠߊ߫، ߏ߬ ߟߎ߬ ߓߍ߯ ߟߋ߬ ߞߵߊ߬ߟߎ߬ ߟߊߘߍ߬ ߒߞߏ ߛߓߍߛߎ߲ ߛߌ߲ߘߌ ߛߊ߲߬ ߇߇ ߢߊ߰ߢߊ߮ ߞߍ߫ ߞߊ߲ߡߊ߬߸ ߊ߬ߟߋ ߡߍ߲ ߛߌ߲ߘߌ߫ ߘߊ߫ ߁߉߄߉ ߟߊ߫ ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫ ߓߟߏ߫.

 ߖߌ߬ߣߍ߬ ߞߏߕߌ߯ ߝߟߐ ߣߌ߫ ߞߎ߲߬ߠߊ߬ߛߌ߮ ߞߎ߲߬ߕߌ߮ ߦߋ߫ ߊߡߊߘߎ߫ ߎ߯ߙߌ߬ ߓߊ ߡߍ߲ ߘߌ߫߸ ߏ߬ ߞߊ߬ ߕߊ߲߬ߘߏ߬ߟߌ ߞߍ߫ ߊ߬ ߟߊ߫ ߛߙߊ߬ߣߎ߲ ߘߐ߫߸ ߞߊ߬ ߒߞߏ ߛߍ߬ߘߏ߲߬ߠߊ ߟߎ߬ ߝߏ߬ ߊ߬ߟߎ߬ ߟߊ߫ <<ߛߌߟߊ߫ ߖߊ߲ ߣߌ߫ ߛߌߟߊ߫ ߜߍߟߍ߲>> ߕߊ߯ߡߊ ߟߊ߫߸ ߞߊ߬ ߒߞߏ ߕߏ߫ ߊ߬ߟߎ߫ ߞߐ߲߬ߞߐ߬ ߘߐ߫، ߊ߬ ߞߵߊ߬ ߦߌ߬ߘߊ߬ ߞߏ߫ ߒߞߏ ߛߍ߬ߘߏ߲߬ߠߊ ߟߎ߬ ߦߋ߫ ߡߐ߰ ߟߎ߫ ߟߋ߬ ߘߌ߫߸ ߜߟߍ߬ߦߊ߬ ߛߌߦߊߡߊ߲߫ ߓߘߊ߫ ߡߍ߲ ߠߎ߬ ߛߐ߬ߘߐ߲߬߸ ߓߊߏ߬ ߓߍ߯ ߦߴߊ߬ ߖߌ߰ ߟߊ߫ ߞߏ߫ ߊ߬ߟߎ߬ ߦߋ߫ ߞߏ߫ ߘߐߞߏߟߏ߲ ߠߋ߬ ߞߎ߲߬ߠߊ߬، ߞߏߕߌ߯ ߝߟߐ ߞߊ߬ ߡߐ߱ ߟߎ߬ ߦߟߌߓߌ߬ߟߊ߫ ߏ߬ ߟߋ ߘߐ߫߸ ߞߏ <<ߘߏ߫ ߟߎ߫ ߦߴߊ߬ ߖߌ߰ ߟߊ߫ ߞߏ߫ ߊߟߎ߫ ߦߋ߫ ߓߊ߯ߙߊ߫ ߘߐߞߏߟߏ߲ ߠߋ߬ ߞߊ߲߬.>> ߊ߬ ߞߊ߬ ߝߏ߬ߟߌ ߟߊߛߋ߫ ߒߞߏ ߡߞߊߘߊ߲ߓߊ߮ ߓߍ߯ ߡߊ߬߸ ߊ߬ߟߎ߬ ߟߊ߫ ߕߡߌߣߊ߲ߘߌߦߊ ߟߊ߫.

ߓߌ߬ ߢߐ߲߰ ߟߏ߲߫߸ ߥߊ߯ߕߌ ߓߘߊ߫ ߦߟߍ߬ߡߊ߲߬߸ ߞߏ ߟߎ߬ ߓߘߊ߫ ߓߐ߫ ߢߐ߲߮ ߡߊ߬، ߞߎ߲߬ߠߊ߬ߛߌ߮ ߞߎ߲߬ߕߌ߮ ߞߵߊ߬ ߘߊߣߐ ߕߏ߫ ߒߞߏ ߟߊ߫ ߢߝߍߕߊ߮ ߡߊ߬ ߓߌ߬ߟߊ߬ߢߐ߲߰ߡߊ ߘߊߞߎ߲ ߘߐ߫ ߞߎ߲߬ߊߠ߬ߛߌ߮ ߟߊ߫ ߞߎ߲߬ߠߊ߫، ߊ߬ ߕߌ߯ߕߌ߯ ߞߏߕߌ߯ ߝߟߐߘߊ ߟߊ߫߸ ߏ߬ ߟߎ߬ ߡߍ߲ ߠߎ߬ ߓߘߊ߫ ߒߞߏ ߓߌ߬ߟߴߊ߬ߟߎ߬ ߟߊ߫ ߞߍߦߙߐ ߞߊ߲߬߸ ߞߵߊ߬ߟߎ߬ ߟߊ߫ ߝߐ߰ߓߍ߬ߝߐ߯ߓߍ ߝߣߊ߫ ߟߊߓߐ߫ ߊ߬ ߘߐ߫، <<ߡߐ߰ ߛߌߦߊߡߊ߲߫ ߠߋ߬ ߦߋ߲߬߸ ߡߍ߲ ߠߎ߬ ߦߋ߫ ߒߞߏ ߞߊ߬ߙߊ߲߬ ߠߊ߫ ߞߊ߬ ߟߐ߲ߠߌ߲ ߛߐ߬ߘߐ߲߫ ߊ߬ ߘߐ߫.>> ߊ߬ ߓߊ߲߫ ߘߊ߫ ߞߵߊ߬ ߦߌ߬ߘߊ߬ ߞߏ߫ ߒߞߏ ߟߋ߬ ߘߐߙߐ߲߫ ߌ߫ ߛߋ߫ ߡߊ߬ߘߋ߲߬ ߞߊ߲ ߠߎ߬ ߛߓߍ߫ ߟߊ߫߸ ߛߓߍߟߌ߫ ߜߘߍ߫ ߛߌ߫ ߕߍ߫ ߛߴߊ߬ ߛߎߡߊ߲߫ ߠߊ߫ ߡߍ߲ ߘߐ߫.

ߞߏߕߌ߯ ߝߟߐ ߞߵߊ߬ ߦߌ߬ߘߊ߬ ߞߏ߫ ߖߌ߬ߣߍ߬ ߞߊ߲ ߠߎ߬ ߕߍ߫ ߟߎ߫ ߞߣߐ߫ ߞߎߡߊ ߣߌ߫ ߘߊ߲߬ߞߎ߲߬ ߘߐ߬ ߞߎߡߊ ߘߐߙߐ߲߫ ߞߊ߲ߡߊ߬ ߏ߬ ߞߐ߫ ߘߋ߬߸ ߊ߬ߟߎ߬ ߓߘߊ߫ ߓߌ߬ߟߊ߫ ߖߡߊ߬ߣߊ ߛߌ߰ߞߊ߲ ߘߐ߫،  ߏ߬ ߦߋ߫ ߢߍߕߊ߯ ߟߋ߬ ߘߌ߫߸ ߞߏߕߌ߯ ߝߟߐ ߞߊ߬ ߡߍ߲ ߘߊ߲ߞߎ߲߫ <<ߤߊ߲ߞߟߌ ߟߎ߬ ߟߊߞߎߣߎ߲ ߥߎ߬ߦߊ߲߬ߞߌ߬ߟߌ ߘߌ߫>>߸ ߞߊ߬ ߖߡߊ߬ߣߊ߬ߘߋ߲ ߠߎ߬ ߞߍ߫ ߊ߬ߟߎ߬ ߘߌߦߊ߫ ߖߡߊ߬ߣߊ ߡߊ߬ߡߙߊ߬ߟߌ߬ ߓߏ߲ߘߊ ߟߎ߬ ߟߊ߫.

ߊ߬ ߞߵߊ߬ ߦߌ߬ߘߊ߬ ߞߏ߫ ߡߙߌߦߊ ߏ߬ ߦߋ߫ ߖߡߊ߬ߣ ߊߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߡߙߌߦߊ߫ ߛߊߣߌ߲ ߠߋ߬ ߘߌ߫߸ ߡߍ߲ ߠߊ߫ ߓߘߍ߬ߓߘߍ߬ߟߌ ߕߍ߫ ߘߏ߫ ߜߘߍ߫ ߘߌ߫ ߝߊ߬ߛߏ߬ ߞߊ߲ ߠߎ߬ ߟߊ߫ ߞߍߞߋߟߋ߲ߘߌ ߞߐ߫߸ ߊ߬ ߣߌ߫ ߞߊ߬ ߝߊ߬ ߓߘߊ ߟߐ߲ߠߌ߲ߦߊ ߟߎ߬ ߛߊ߲ߞߘߐߕߊ߬.

ߟߊ߬ߓߊ߲ ߘߐ߫߸ ߊߡߊߘߎ߫ ߎ߯ߙߌ߬ ߓߊ ߞߵߊ߬ ߢߌߣߌ߲߫ ߖߌ߬ߣߍ߫ ߛߌ߲߬ߝߏ߲߬ߘߊ ߟߎ߫ ߝߍ߬߸ ߊ߬ ߕߌ߯ߕߌ߯ ߘߐ߬ߕߊߡߌ߲ ߞߏߟߊߕߍ߯ߘߊ߫ ߝߊ߬ߛߏ߬ߟߊ߬ߞߊ߸ ߞߏ߫ ߊ߬ߟߎ߬ ߦߋ߫ ߓߐ߫ ߛߌߟߊ߫ ߘߌ߫߸ ߖߌ߬ߣߍ߬ ߝߣߊ߫ ߦߋ߫ ߛߋ߫ ߓߌ߬ߟߊ߬ ߟߊ߫ ߝߘߊ߬ߝߌ߲߬ߠߊ߫ ߞߋ߬ߟߋ߲߬ߧߊ ߣߌ߫ ߝߕߞߡߘ ߟߊ߫ ߛߌߟߊߖߟߎ ߞߊ߲߬߸ ߖߌ߬ߣߍ߬ ߞߊ߲ ߠߎ߬ ߣߴߊ߬ ߛߓߍߟߌ ߟߎ߬ ߦߋ߫ ߛߋ߫ ߟߊߘߏ߲߬ ߠߊ߫ ߦߋ߲߬߸ ߞߵߊ߬ߟߎ߫ ߓߌ߬ߟߊ߫ ߝߘߊ߬ߝߌ߲߬ߠߊ߫ ߞߊ߲ ߠߎ߬ ߛߙߍߘߍ ߘߐ߫.

ߒߞߏ ߛߓߍߛߌ ߞߏ߬ߣߌ߲ ߓߘߴߊ߬ ߟߐ߬ ߊ߬ ߖߘߍ߬ ߟߊ߫ ߓߌ߬ ߢߐ߲߰ ߟߏ߲߫߸ ߞߎ߲߬ߠߊ߬ߛߌ߮ ߝߣߊ߫ ߦߴߊ߬߬ ߞߊ߲߬ ߞߊ߬ ߓߊ߬ߙߏ߲߬ߡߊ ߟߎ߬ ߕߘߎ߫ ߊ߬ ߞߘߐ߫، ߛߌߞߊ߫ ߕߴߊ߬ ߘߐ߫߸ ߊ߬ ߓߘߊ߫ ߦߋ߫ ߞߏ߫ ߟߐ߲ߠߌ߲ ߠߠߊߕߊ߬ߡߌ߲߬ ߛߌߟߊ ߓߍ߯ ߘߐ߫ ߢߍߕߊ ߦߋ߫ ߒߞߏ ߛߓߍߟߌ ߟߋ߬ ߘߌ߫ ߖߌ߬ߣߍ߬ ߞߣߐ߫ ߕߋ߲߬.