ߞߎߣߎ߲߬ ߓߌߟߏ߲ ߂߀߂߆ ߥߊ߬ߛߌ߬ߥߙߊ ߕߋ߬ߟߋ߫ ߂߅߸ ߖߊ߲߬ߞߊ߰ߣߊ߬ ߝߊ߫ ߘߊ߫ ߟߋ߬ ߞߵߊ߬ ߘߡߊߛߙߊߓߊ ߟߊ߫، ߞߊ߬ߕߎ߲߯߸ ߛߌ߬ߟߡߊ߬ ߛߌߦߊߡߊ߲߫ ߠߋ߬ ߕߍ߬ߘߍ߫ ߦߋ߲߬߸ ߞߊ߬ ߓߍ߲߬ ߖߐ߲߬ߓߍ߲߬ߘߍ߲߬ ߛߊߟߌ ߡߊ߬߸ ߏ߬ ߡߍ߲ ߦߋ߫ ߛߌ߬ߟߡߊ߬ ߞߊߙߏ ߛߊ߲߬ ߞߎߘߊ ߘߌ߫، ߒ߬ߓߊ߬߸ ߣߎߙߑߘߌߣ ߞߊ߬ߣߌ߲߬ߓߊ߮ ߟߎ߬ ߓߐ߫ ߘߊ߫ ߝߊ߲߬ ߛߌߦߊߡߊ߲߫ ߠߋ߬ ߘߐ߫ ߖߌ߬ߣߍ߬ ߞߣߐ߫߸ ߡߊ߬ߟߌ ߟߊ߫߸ ߞߊ߬ ߣߊ߬ ߛߐ߬ߘߐ߲߫ ߖߊ߲߬ߖߏ߲߬ߓߊ ߣߌ߲߬ ߘߐ߫ ߥߊߟߖߌ߫ ߟߊ߱ߖߌ߬ ߛߎ߬ߟߋ߬ߡߊߣ ߛߘߌ߬ߓߋ߬ ߞߐߝߍ߬߸ ߞߊ߬ߙߊ߲߬ߡߐ߯ ߛߏ߬ߟߏ.

ߢߐ߲߯ߓߍ߲ߓߊ ߣߌ߲߬ ߡߍ߲ ߞߏ ߟߎ߬ ߘߊߡߌ߬ߣߊ߬ ߘߊ߫ ߞߊ߬ߦߌ߯ ߞߐ߬ߟߏ߲ ߞߊ߲ߞߊ߲߫߸ ߞߊ߬ߙߊ߲߬ߡߐ߯ ߛߏ߬ߟߏ ߖߍ߬ߘߍ ߟߊ߫ ߟߎ ߡߊ߬߸ ߣߌ߫ ߘߍ߰ ߛߎߛߎ ߟߎ߬ ߣߌ߫ ߘߍ߰ ߘߐ߬ߕߟߊ ߟߎ߬ ߞߍ߫ ߘߊ߫، ߒ߬ߓߊ߬߸ ߖߊ߬ߡߊ߫ ߘߍ߬ߜߍ ߟߋ߬ ߕߍ߬ߘߍ߫ ߖߊ߲߬ߞߊ߰ߣߊ߬ ߞߎߣߎ߲߬߸ ߡߛߏ߬ߞߘߐ ߟߎ߬ ߣߴߊ߬ߟߎ߬ ߟߊ߫ ߞߌ߬ߡߊ߬ߙߏ߬ ߜߍߡߊ߲ ߠߎ߬߸ ߣߎߙߑߘߌߣ ߕߐ߰ߡߊ߬ߛߙߋ ߦߴߊ߬ ߞߊ߲߬߸ ߗߍ߭ ߟߎ߬߸ ߘߋ߲ߡߌߛߍ߲ ߠߎ߬߸ ߡߐ߰ߓߊ ߟߎ߬߸ ߗߋߘߋ߲߫ ߣߊ߬ߣߍ߲ ߠߎ߬ ߞߊ߬ ߝߘߊ߫ ߖߡߊ߬ߣߊ ߞߣߐߟߊ ߟߊ߫߸ ߊ߬ ߣߌ߫ ߛߌ߰ߢߐ߲߰ ߖߡߊߣߊ ߟߎ߬ ߘߐ߫߸ ߓߍ߯ ߟߋ߬ ߟߊߘߍ߬ߣߍ߲߫ ߕߍ߬ߘߍ߫ ߘߎ߬ߥߊ߬ߥߎ߬ ߢߌ߬ߣߌ߲߬ ߞߊ߲ߡߊ߬.

ߖߊ߬ߡߊ߫ ߝߌ߬ߙߌ߲ߞߐ߲߬ߞߐ߲ ߣߌ߲߬ ߢߊߞߘߐ߫߸ ߟߊ߲ߖߌ߬ ߛߎ߬ߟߋ߬ߡߊߣ ߛߘߌ߬ߓߋ߫ ߞߊ߬ ߘߎ߬ߥߊ߬ߥߎ ߖߍ߬ߘߍߖߍ߬ߘߍ ߞߍ߫߸ ߞߊ߬ ߘߎߓߊ߫ ߡߐ߰ߓߊ ߟߎ߬ ߦߋ߫߸ ߞߊ߬ ߘߎߓߊ߫ ߖߡߊ߬ߣߊ ߦߋ߫ ߖߛߎ߬ߛߎߡߊ ߟߊ߫߸ ߓߊߛߌ߮ ߟߊ߫، ߊ߬ ߞߎߡߊ߫ ߘߊ߫ ߓߊߕߍ߫ ߣߌ߫ ߖߊ߲߬ߞߊ߰ߣߊ߫ ߝߍ߬߸ ߡߐ߰ߓߊ ߡߍ߲ ߠߎ߬ ߕߘߍ߬ ߞߣߍ ߞߊ߲߬߸ ߞߵߏ߬ ߟߎ߫ ߝߏ߬ ߞߏߛߓߍ߫.

ߊ߬ ߞߊ߲߫ ߞߏ߫: <<ߡߐ߰ߓߊ߬ ߛߌߦߊߡߊ߲߫ ߠߋ߬ ߦߊ߲߬ ߘߎ߱ ߞߘߐ߫߸ ߊ߬ ߡߏ߬ߛߏ ߣߴߊ߬ ߗߍ߭ ߟߎ߬߸ ߡߍ߲ ߠߎ߬ ߣߌ߫ ߛߟߊ߬ߕߎ ߞߊ߫ ߞߊ߲߫ ߏ߬ ߟߎ߬ ߘߐ߫߸ ߊߟߊߡߊ߬ ߘߌ߬ߢߍ߬ ߞߍ߫ ߘߊ߫ ߏ߬ ߟߎ߫ ߡߊ߬߸ ߞߊ߬ ߜߊ߲ߒߞߎ߲ߠߊ߫ ߞߍ߫ ߊ߬ߟߎ߬ ߦߋ߫.>> ߊ߬ ߞߵߏ߬ ߟߊߛߋ߫.

ߊ߬ ߟߊ߫ ߛߙߊ߬ߣߎ߲ ߘߐ߫߸ ߊ߬ ߞߊ߬ ߓߍ߯ ߞߟߌ߫ ߘߍ߲߬ߞߣߍ߬ߦߊ ߡߊ߬߸ ߡߎ߬ߢߎ߲ ߣߌ߫ ߛߓߊߙߌ ߡߊ߬߸ ߊ߬ ߣߌ߫ ߖߘߍ߬ߘߐ߬ߡߌߣߊ ߡߊ߬، <<ߊߟߎ߫ ߞߣߊ߫ ߊߟߎ߫ ߓߏ߬ߙߌ߫ ߊߘߡߊ ߟߎ߬ ߟߊ߫ ߖߙߊ߬ߞߌ߬ߟߌ ߞߘߐ߫߸ ߞߊ߬ ߥߊ߫ ߌ ߟߐ߬ ߊߟߊ߫ ߕߊ ߞߘߐ߫߸ ߊߟߎ߫ ߦߴߊߟߎ߫ ߓߏ߬ߙߌ߫ ߊߟߊ߫ ߟߊ߫ ߖߙߊ߬ߞߌ߬ߟߌ ߟߋ߬ ߞߘߐ߫߸ ߞߊ߬ ߥߊ߫ ߌ ߟߐ߬ ߡߐ߱ ߟߎ߬ ߟߊ߫ ߖߙߊ߬ߞߌ߬ߟߌ ߞߘߐ߫.>> ߊ߬ ߞߵߏ߬ ߟߊ߬ߟߌ߬ߟߌ ߞߍ߫.

ߡߊ߬ߟߌ߬ߞߊ ߡߍ߲ ߠߎ߬ ߣߊ߬ߣߍ߲߫߸ ߊ߬ ߞߵߏ߬ ߟߎ߫ ߝߏ߬ ߝߏ߬ߟߌ߬ ߞߐߟߌߞߐߟߌ ߟߊ߫، ߓߊߏ߬߸ ߊ߬ ߛߊ߲߬ ߦߙߌߞߊ ߟߋ߬ ߕߋ߲߬߸ ߏ߬ ߟߎ߬ ߦߋ߫ ߣߊ߬ ߟߊ߫ ߞߊ߬ ߓߐ߫ ߡߊ߬ߟߌ ߟߊ߫߸ ߞߊ߬ ߣߊ߬ ߛߐ߬ߘߐ߲߬ ߣߎߙߑߘߌߣ ߠߊ߫ ߖߊ߲߬ߖߏ߲ ߠߎ߬ ߘߐ߫ ߞߊ߲ߞߊ߲߫ ߞߣߐ߫߸ ߊ߬ ߣߌ߫ ߖߊ߲߬ߞߊ߰ߣߊ߬، ߞߊ߬ߙߊ߲߬ߡߐ߯ ߛߏ߬ߟߏ ߞߵߏ߬ ߟߎ߫ ߝߏ߬ ߞߵߊ߬ߟߎ߬ ߥߊߟߢߌߡߊߟߐ߲߫.

<<ߡߊߟߌߦߍ߲ ߠߎ߬ ߓߊߙߌߞߊ߫߸ ߊߟߎ߬ ߟߋ߬ ߞߊ߲߫ ߒߠߋ ߦߋ߫ ߡߊ߬ߟߌ ߟߊ߫߸ ߞߏ߫ ߊߟߎ߫ ߘߌ߫ ߛߊ߬ ߒߠߋ ߝߍ߬߸ ߒ ߕߘߍ߬ ߦߋ߫ ߞߎߡߊ ߏ߬ ߖߊ߬ߕߋ߬ ߟߊ߫ ߓߊ߬ߘߏ߬ ߞߊ߲ ߠߋ߬ ߘߐߙߐ߲߫ ߘߌ߫.>> ߊ߬ ߞߵߏ߬ ߦߌ߬ߘߊ߫߸ ߞߵߊ߬ߟߎ߫ ߕߊ߲߬ߘߏ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߓߴߊ߬ߟߎ߬ ߞߐߛߊ߬ߦߌ߲߫ ߊ߬ߟߎ߬ ߓߘߊ ߢߌ߬ߣߊ߲߬߸ ߊ߬ߟߎ߬ ߘߌ߫ ߞߎߘߊ߫ ߜߘߍ߫ ߦߴߊ߬ߟߎ߬ ߟߊ߫ ߞߏ ߘߐ߫، ߊ߬ ߞߵߏ߬ ߓߍ߲߬ߒ߬ߛߋ߲߬ߡߊ߬ ߞߋߟߋ߲ ߠߋ߬ ߕߣߐ߬ߓߐ߫ ߞߊ߬ ߕߊ߲߬ߘߏ߬ߟߌ ߟߊߛߋ߫ ߖߌ߬ߣߍ߫ ߝߊ߬ߡߊ ߟߎ߬ ߡߊ߬߸ ߡߍ߲ ߠߎ߬ ߛߌߟߊ ߟߊ߫ ߓߊ߬ߟߌ ߓߐߕߏ߲ ߠߊ߫، ߊ߬ ߞߊ߲߫ ߞߏ߫: <<ߟߊ߬ߖߌߣߍ߫ ߝߊ߰ߡߊ ߟߎ߬ ߛߊ߬ߙߊ ߦߋ߫ ߊߟߊ߫ ߓߟߏ߫߸ ߡߊߟߌߦߍ߲ ߡߍ߲ ߠߎ߬ ߣߊ߬ߣߍ߲߫ ߕߋ߲߬߸ ߞߊ߬ ߓߐ߫ ߝߐߙߐ߲ߕߍߙ ߟߊ߫ ߞߊ߬ ߘߏ߲߬ ߞߊ߲ߞߊ߲߫߸ ߜߟߍ߬ߦߊ ߞߋߟߋ߲ ߡߴߊ߬ߟߎ߫ ߛߐ߬ߘߐ߲߬ ߛߌߟߊ ߟߊ߫.>> ߊ߬ ߞߵߏ߬ ߝߐ߫.

ߊ߬ ߟߊ߫ ߛߙߊ߬ߣߎ߲ ߘߐ߫߸ ߥߊߟߖߌ ߞߵߊ߬ ߞߊ߲ߠߊߘߌ߫ ߣߊ߬ߓߊ߰ߕߐ ߟߎ߫ ߡߊ߬߸ ߞߏ߫ ߊ߬ߟߎ߬ ߦߋ߫ ߘߎ߬ߥߊ߬ߥߎ ߞߍ߫ ߖߌ߬ߣߍ߬ ߦߋ߫߸ ߖߛߎ߬ߛߎߡߊ ߟߊ߫߸ ߖߡߊ߬ߣߊ ߓߊߛߌ߮ ߟߊ߫، ߊ߬ ߞߊ߬ ߘߎ߬ߥߊ߬ߥߎ߬ ߞߋߟߋ߲ ߏ߬ ߢߐ߲߰ ߞߍ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߦߋ߫߸ ߞߊ߬ ߓߊ߲߫ ߞߊ߬ ߖߡߊ߬ߣߊ߬ߘߋ߲ ߠߎ߬ ߞߟߌ߫߸ ߞߏ߫ ߡߐ߰ ߞߊߣߊ߬ ߞߊ߲ߕߌ߮ ߖߎ߯ߦߊ߫߸ ߡߐ߰ ߞߊߣߊ߬ ߞߏ߫ ߞߍ߫߸ ߡߍ߲ ߘߌ߫ ߖߡߊ߬ߣߊ ߘߐߞߟߦߊ߫.

ߊ߬ ߞߊ߬ ߟߊ߬ߟߌ߬ߟߌ ߞߍ߫ ߞߊ߬ ߓߍ߲߬ ߞߊ߲ߕߌ߮ ߟߊ߫ ߞߏ ߡߌ߬ߣߊ߬ ߢߊ ߡߊ߬، <<ߊߟߎ߫ ߓߊ߯ ߞߍ߫ ߝߊ߲߬ ߛߌ߫߸ ߒ ߓߍ߫ ߦߋ߲߬߸ ߒ ߕߍ߫ ߦߋ߲߬߸ ߦߊ߬ߣߌ߫ ߒ ߧߋ߫ ߛߊ߬߸ ߦߊ߬ߣߌ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߛߊ߬ߕߐ߫߸ ߊߟߎ߫ ߓߊ߯ ߞߍ߫ ߘߎߢߊ߫ ߝߊ߲߬ ߛߌ߫߸ ߊߟߎ߫ ߞߊߣߊ߬ ߟߊ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߖߎ߮ ߟߎ߫ ߞߊ߲߬߸ ߊߟߎ߫ ߟߊ߫ ߕߣߐ߬ ߛߌ߫ ߕߴߏ߬ ߘߐ߫.>> ߊ߬ ߞߵߏ߬ ߟߊߛߋ߫.

ߞߊ߬ ߓߍ߲߬ ߖߡߊ߬ߣߊ ߝߊ߰ߡߊ ߟߎ߬ ߟߊ߫ ߓߊ߯ߙߊ ߞߏߝߐ ߡߊ߬߸ ߞߊ߬ߙߊ߲߬ߡߐ߯ ߛߏ߬ߟߏ ߞߵߊ߬ ߦߌ߬ߘߊ߬ ߞߏ߫ ߖߌ߬ߣߍ߫ ߡߊ߬ߙߊ ߦߋ߫ ߞߏ߫ ߜߍߟߍ߲ߓߊ߫ ߟߋ߬ ߘߌ߫، <<ߝߘߊ߬ߝߌ߲߬ߠߊ߫ ߓߍ߯ ߘߐ߫߸ ߟߊ߬ߖߌߣߍ߫ ߟߋ߬ ߡߙߊ߬ ߜߏߡߊ߲߫ ߝߘߊ߬ߝߌ߲߬ ߖߡߊߣߊ ߓߍ߯ ߘߌ߫߸ ߣߴߌ ߞߍ߫ ߘߊ߫ ߟߊ߬ߖߌߣߍ߫ ߞߊ߲ߕߌ߮ ߘߌ߫߸ ߌߟߋ ߦߋ߫ ߛߍߥߊ߫ ߌ ߖߘߍ߬ ߟߊ߫߸ ߡߐ߱ ߟߎ߬ ߦߋ߫ ߛߍߥߊ߫ ߞߊ߲߬ ߌ ߟߊ߫߸ ߌߟߋ ߦߴߊ߬ ߝߐ߫ ߌ ߞߣߐߘߐ߫ ߞߏ߫ ߌ ߓߘߊ߫ ߛߐ߫ ߟߊ߬ߖߙߊ߬ߓߌ߬ߟߌ ߘߐ߫.>> ߊ߬ ߞߵߏ߬ ߝߐ߫.

ߞߊ߬ߙߊ߲߬ߡߐ߯ ߛߏ߬ߟߏ ߞߵߊ߬ ߟߊ߫ ߞߎߡߊ ߞߎ߲߬ߝߊ߮ ߞߍ߫ ߕߋߟߋ߲  ߣߌ߫ ߕߐ߬ߢߍ߮ ߡߊߕߊ߲߬ߞߊ ߟߋ߬ ߞߊ߲߬߸ ߊ߬ ߞߊ߲߫ ߞߏ߫ ߖߛߎ߬ߛߎߡߊ ߛߓߊ߬ߕߌ߬ ߢߊ߫ ߕߴߦߋ߲߬߸ ߣߌ߫ ߕߋߟߋ߲ ߕߍ߫߸ ߣߌ߫ ߕߐ߬ߢߍ߮ ߡߊߕߊ߲߬ߞߊ ߕߍ߫. <<ߊ߲ ߓߍ߯ ߦߴߊ߲ ߘߐߖߊ߬ ߞߊ߬ ߛߌߟߊ߲߫ ߕߐ߬ߢߍ ߢߍ߫߸ ߕߐ߬ߢߍ ߓߊ߯ ߓߏ߲ ߡߍ߲ ߟߐ߬߸ ߤߊߞߍ ߟߴߏ߬ ߕߋ߬ ߟߊ߫ ߞߵߊ߬ ߓߊ߲߫.>> ߊ߬ ߞߵߏ߬ ߝߐ߫ ߊ߬ ߞߊ߬ߣߌ߲߬ߓߊ߮ ߟߎ߬ ߢߊߞߘߐ߫.

ߖߊ߲߬ߞߊ߰ߣߊ߫ ߘߎ߬ߥߊ߬ߥߎ߬ ߢߌߣߌ߲ ߣߌ߲߬ ߞߍ߫ ߘߊ߫ ߕߎ߬ߡߊ߬ ߜߍ߬ߟߍ߲߬ߓߊ߫ ߟߋ߬ ߘߌ߫߸ ߣߎߙߑߘߌߣ ߞߊ߬ ߖߊ߬ߡߊ߫ ߘߍ߬ߜߍ ߟߊߓߐ߫ ߡߍ߲ ߘߐ߫߸ ߏ߬ ߡߍ߲ ߦߴߊ߬ߟߎ߫ ߘߋ߬ߙߌ߬ߣߊ߲߬ ߞߏ߬ ߞߘߐ ߘߌ߫، ߡߍ߲ ߠߎ߬ ߣߊ߬ ߘߊ߫ ߖߐ߲߭ߓߍ߲߬ߘߍ ߕߟߋ߬ ߁߀ ߣߌ߲߬ ߘߐ߫߸ ߏ߬ ߟߎ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߛߍߥߊߣߍ߲ ߠߋ߬ ߞߍߕߐ߫ ߊ߬ߟߎ߬ ߞߐߛߊ߬ߦߌ߲߬ ߠߊ߫ ߛߍߥߊ ߟߋ߬ ߞߣߐ߫߸ ߊ߬ ߟߌ߫ ߟߊ߬ߥߛߊ، ߞߵߏ߬ ߞߎ߲߭ ߞߍ߫߸ ߘߎ߬ߥߊ߬ߥߎ߬ ߛߊߣߌ߲ߡߊ߲ ߡߍ߲ ߠߎ߬ ߞߍߣߍ߲߫ ߊ߬ߟߎ߬ ߦߋ߫߸ ߏ߬ ߞߵߊ߬ߟߎ߬ ߝߊ߫.