ߊ߬ ߓߘߊ߫ ߕߟߋ߬ ߘߊ߲ߘߐ߫ ߓߐ߫߸ ߣߎߙߑߘߌߣ ߌߛߑߟߊߡ ߢߍߓߊ߮ ߞߊ߬ߙߊ߲߬ߡߐ߯ ߛߎ߬ߟߋ߬ߡߊߣ ߛߘߌ߬ߓߋ߫ ߞߊ߬ ߓߊߘߋ߲ ߘߏ߫ ߟߊ߫ ߡߞߊ߫ ߕߊ߮ ߡߊ߬ߓߎ߬ߙߎ߲߬ߕߌ߬ߟߌ ߞߍ߫، ߞߵߊ߬ ߦߌ߬ߘߊ߫ ߏ߬ ߕߌ߱ ߟߊ߫ ߞߏ ߘߐ߫߸ ߞߏ߫ <<ߌ ߦߋ߫ ߝߌ߬ߟߌ ߓߏ߲ ߠߊ߫߸ ߤߊߟߌ߬ ߣߴߌ ߟߊ߫ ߞߊ߬ߘߊ߲ ߘߏ߲߬ ߢߊ ߓߍ߲߬ߣߍ߲߬ ߞߍ߫ ߘߊ߫ ߍ߲ߕߍߙߑߣߍߕ ߞߊ߲߬.>> ߊ߬ ߞߵߊ߬ ߦߌ߬ߘߊ߬ ߞߏ߫ ߞߎߡߊ ߡߍ߲ ߝߐߣߍ߲߫߸ ߏ߬ <<ߡߊ߫ ߘߌߦߊ߫>> ߊ߬ ߦߋ߫ ߢߊ߫ ߛߌ߫ ߡߊ߬، ߊ߬ ߞߵߊ߬ ߝߐ߫ ߊ߬ߟߋ߬ ߞߎߡߊ߫ ߞߋߟߋ߲ ߠߋ߬ ߘߐ߫ ߌߞߐ߫߸ ߞߏ߫ <<ߊߟߊ߫ ߡߐߣߍߣߍ߲߫߸ ߞߋߟߊ ߡߐߣߍߣߍ߲߫߸ ߖߌߣߊ߫ ߡߎ߯ߡߌߣߌ߲ ߠߎ߬ ߡߐߣߍߣߍ߲߫.>> ߌߞߏߡߌ߲߬ ߞߎߡߊ ߝߐߓߊ߯ ߡߊ߫ ߝߐ߫߸ ߊ߬ ߞߏ ߞߎߛߎ߲ ߕߏ߫ ߘߊ߫ ߓߍ߯ ߟߊ߫.

 ߟߊ߬ߞߙߐ߬ߛߌ߬ߟߌ ߟߎ߬ ߥߊ߫ ߘߴߊ߬ ߦߋ߫ ߛߊ߫߸ ߞߏ߫ ߞߊ߬ߙߊ߲߬ߝߊ߬ ߡߏߙߌ߫ ߞߡߊ߬ߙߊ߫ ߖߐ߲߬ߡߊ߬ߛߌߣߌ߲ߟߐ߲߫ ߠߋ߬ ߕߏ߫ ߘߊ߫ ߡߞߊ߫߸ ߞߊ߬ ߞߎߡߊ߫ ߞߐ߬ߣߐ߲߬ߘߐ߬ ߝߐ߫ ߡߞߊ߫ ߞߏ ߞߊ߲߬߸ ߡߍ߲ ߠߎ߬ ߦߋ߫ ߝߐ߫ ߟߊ߫ ߡߐ߱ ߟߎ߬ ߓߟߏ߫ ߞߵߊ߬ ߛߐ߬ߘߐ߲߬ ߕߎ߬ߢߊ߬ ߕߴߊ߬ߟߎ߬ ߘߐ߫߸ ߊ߬ߟߋ ߟߊ߫ ߢߊߢߌߣߌ߲ߠߌ߲ ߠߎ߬ ߞߐ ߘߐ߫. ߏ߬ ߟߋ ߞߵߊ߬ ߦߌ߬ߘߊ߬߸ ߞߏ߫ ߞߊ߬ߙߊ߲߬ߡߐ߯ ߛߏ߬ߟߏ ߟߊ߫ ߞߎߡߊ ߣߐ߬ ߊ߬ߟߋ ߟߋ߬ ߛߎߡߊ߲߫ ߠߊ߫.

ߞߎߡߊ ߏ߬ ߟߋ ߞߐ ߛߌߦߊߦߊߣߍ߲߫ ߓߟߐߟߐ ߞߊ߲߬߸ ߝߏ߫ ߡߐ߰ ߛߌߦߊߡߊ߲߫ ߘߏ߲߬ ߘߊ߫ ߣߌ ߘߐ߫ ߊ߬ ߞߎߡߊ ߞߏߛߐ߲߬، ߓߊ߬ߙߌ߬߸ ߞߏ ߦߋ߫ ߖߐ߲߬ߡߊߛߌߣߌ߲ߟߐ߲߫ ߡߍ߲ ߞߎ߲߭ ߞߊ߲߬߸ ߏ߬ ߡߊ߫ ߘߊ ߢߊ߫ ߞߋߟߋ߲߫ ߝߐ߫ ߊ߬ ߞߊ߲߬.

ߖߐ߲߬ߡߊߛߌߣߌ߲ߟߐ߲߫ ߞߐߛߊ߬ߦߌ߲ ߛߊߡߊ߲ߞߎߟߎ߲ ߞߣߐ߫ ߞߊ߬ߦߋ߫߸ ߊ߬ ߟߊ߫ ߓߊ߯ߙߊ߫ ߝߟߐ ߞߍ߫ ߘߊ߫ ߖߌ߬ߦߊ߬ߓߍ ߘߏ߫ ߟߋ߬ ߟߊߖߍ߲ߛߍ߲ ߘߌ߫ ߊ߬ ߟߊ߫ ߖߊ߬ߕߋ߬ߘߊ ߟߊ߫߸ ߖߌ߬ߦߊ߬ߓߍ߬ ߜߘߍ߫ ߕߍ߫߸ ߊ߬ ߣߐ߬ ߟߍߙߊ ߡߍ߲ ߛߓߍ߫ ߟߊ߫߸ ߣߴߊ߬ ߦߋ߫ ߓߍ߲߬ ߠߊ߫ ߞߝߊ߬ ߛߋߦߌ߲߫ ߢߐ߲߰ ߡߊ߬߸ ߊ߬ ߕߐ߯ ߞߏ߫ ߛߎߞߏ ߣߌ߫ ߞߣߍߓߐ߸ ߏ߬ ߓߊ߯ߙߊ ߞߍ߫ ߛߊ߲ ߠߋ߬ ߕߋ߲߬߸ ߊ߬ ߞߵߏ߬ ߟߋ ߖߌ߬ߦߊ߬ߓߍ ߟߊߖߍ߲ߛߍ߲߫ ߊ߬ ߟߊ߫ ߞߐߜߍ ߞߊ߲߬.

ߛߌߟߊߓߐߛߐ߯ߣߊ߫ ߞߵߊ߬ ߟߊߢߌߣߌ߲߫ ߊ߬ ߝߍ߬ ߏ߬ ߟߋ ߘߐ߫߸ ߞߏ߫ ߞߎߡߊ߫ ߓߘߊ߫ ߞߍ߫ ߊ߬ ߡߊ߬߸ ߞߵߊ߬ ߦߌ߬ߘߊ߬ ߞߏ߫ ߊ߬ ߟߊ߫ ߞߎߡߊ߫ ߝߐߣߍ߲ ߕߍ߫ ߕߎ߬ߢߊ߬ ߘߌ߫ ߡߞߊ߫ ߞߏ ߣߌ߫ ߞߊ߯ߓߊ߫ ߞߏ ߞߊ߲߬߸ ߊ߬ ߣߌ߫ ߞߋߟߊ ߟߊ߫ ߓߌ߬ߘߌ߲߬ߣߍ߲߬ ߞߏ، ߊ߬ ߘߌ߫ ߛߋ߫ ߡߎ߲߬ ߝߐ߫ ߟߊ߫ ߞߎߡߊ ߏ߬ ߖߋ߬ߓߌ ߘߐ߫، ߖߐ߲߬ߡߊ߬ߛߌߣߌ߲ߟߐ߲߫ ߞߊ߬ ߡߍ߲ ߛߐ߬ߘߐ߲߫ ߞߵߊ߬ ߝߐ߫߸ ߏ߬ ߝߟߍ߫:

ߞߊ߬ߙߊ߲߬ߝߊ ߦߴߊߟߎ߫ ߝߏ߬ ߟߊ߫߸ ߊߟߎ߬ ߒߞߏ ߞߊߙߊ߲ߘߋ߲ ߠߎ߬߸ ߊ߬ ߦߴߊߟߎ߫ ߝߏ߬ ߟߊ߫ ߊߟߎ߫ ߡߊ߲߬ߘߋ߲߬ߞߊ ߟߎ߬ ߸ ߞߎߡߊߕߍ߫ ߓߊߘߋ߲߫ ߓߘߍ ߡߍ߲ ߠߎ߫ ߞߵߊ߬ߟߎ߫ ߕߏ߲߬ߘߊ ߕߊ߬ ߞߊ߬ ߣߊ߬ ߒ߬ ߠߊߓߍ߲߬ ߓߡߊ߬ߞߐ߬ ߣߌ߫ ߞߐߣߊߞߙߌ߫ ߣߌ߫ ߞߊ߲ߞߊ߲߫ ߸ ߊ߬ ߣߌ߫ ߡߍ߲ ߠߎ߬ ߥߊ߫ ߘߊ߫ ߒ߬ ߡߊߟߐ߬ ߛߏ߫ ߞߊ߬ ߥߊ߫ ߡߐ߰ߓߊ ߟߎ߫ ߝߏ߬.

ߒ ߛߍߥߊ߫ ߘߊ߫ ߊߟߎ߫ ߢߊߞߘߐ ߟߊ߫ ߸ ߒ ߛߍߥߊ߫ ߘߊ߫ ߊߟߎ߫ ߞߍߕߊ ߟߊ߫ ߸ ߒ ߛߍߥߊ߫ ߘߊ߫ ߊߟߎ߫ ߝߐߕߊ ߟߊ߫ ߟߐ߲ߠߌ߲߫ ߞߊ߲ ߞߐߡߊߓߌ߲ߓߌ߲ ߣߌ߫ ߕߎ߬ߧߊ ߟߊߛߙߋߦߊ ߘߐ߫ ߥߊ߬ߞߊߟߌ ߘߝߊߣߍ߲ ߘߐ߫.

ߒߞߏ ߟߋ߬ ߓߐߒߘߊ ߘߌ߫ ߸ ߊ߬ߟߋ ߟߋ߬ ߡߎ߬ߙߊ߲߬ ߘߌ߫ ߒ߬ ߠߊ߫ ߟߐ߲ߠߌ߲ߦߊ ߟߎ߬ ߟߊߡߊ߲߬ߘߌ ߘߐ߫ ߸ ߊ߬ߟߋ ߟߋ߬ ߞߍߟߊ߲߫ ߘߌ߫ ߥߊߟߌ߫ ߟߐ߲ߠߌ߲ߦߊ ߟߎ߬ ߟߊߦߌ߬ߙߌ߲߬ߘߌ ߘߐ߫ ߒ߬ ߞߎ߲߬، ߏ߬ ߘߐ߫ ߤߊߟߓߌ߫ ߸ ߒ߬ ߧߴߊ߲ ߓߟߏߞߍ߫ ߒߞߏ ߟߊ߫ ߞߊ߬ ߒ߬ ߛߍ߲߬ߓߍ߫ ߊ߬ ߟߊ߫ ߸ ߓߊߏ߬ ߟߐ߲ߠߌ߲߫ ߠߋ߬، ߥߎߦߊ ߘߏ߲߬ ߕߍ߫ ߟߐ߲ߠߌ߲ ߘߐ߫ ߝߋߎ߫، ߡߍ߲ ߝߣߊ߫ ߓߴߊ߬ ߝߐ߫ ߞߴߊ߬ ߦߋ߫ ߟߐ߲ߠߌ߲ ߞߍ߫ ߟߊ߫ ߥߎߦߊ ߘߌ߫ ߸ ߏ߬ ߖߍ߬ߘߍ ߟߋ߬ ߞߍߕߐ߫ ߥߎߦߊ ߘߌ߫ ߸ ߣߴߏ߬ ߕߍ߫ ߟߐ߲ߠߌ߲ ߕߍ߫.

ߏ߬ ߞߐ߫ ߸ ߊ߲ ߧߋ߫ ߒ߬ ߛߍ߬ߓߍߘߏ߲߬ ߒߞߏ ߞߊ߬ߙߊ߲ ߣߴߊ߬ ߞߐߡߊߓߌ߲ߓߌ߲ ߡߊ߬ ߛߏߣߍ߲ ߣߌ߫ ߛߏߓߊ ߟߎ߬ ߘߐ߫.

ߊߟߊߡߴߊߟߊ߫ ߤߌߣߊ߫ ߘߊ߫ ߞߊ߲ߕߍ߫ ߛߟߏ߬ߡߣߊ߬ ߟߊ߫ ߸ ߊߟߊߡߊ߫ ߞߌ߬ߢߍ ߛߎߡߊ߫ ߘߴߊ߬ ߞߘߐ߫.

ߘߐ߬ߝߐ ߞߣߐ߫ ߞߟߊ߬ߘߏ߲ߛߏ ߟߎ߬ ߘߐ߫ ߓߏ߲߬ߓߊ ߛߙߊ߬ߣߎ߲߬ ߞߊ߲ ߠߋ߬ ߝߟߍ߫ ߏ߬ ߘߌ߫، ߕߋ߲߭ߕߋ߲߭ ߣߌ߲߬ ߘߐ߫߸ ߊ߬ߟߋ ߟߋ߬ ߞߋߟߋ߲߫ ߛߋߣߍ߲߫ ߞߊ߬ߝߊ߫ ߂߀߀ ߛߓߍ߫ ߟߊ߫ ߛߊ߲߬ ߛߋߦߌ߲߫ ߞߣߐ߫ ߝߘߊ߬ߝߌ߲߬ߠߊ߫ ߘߐ߬ߝߐ ߞߎ߲߬ߕߊ߮ ߞߣߐ߫ ߡߎߣߎ߲߬، ߊ߬ ߦߋ߫ ߘߌ߯ߣߊ ߞߟߊ߬ߡߊ߬ߓߊ߮ ߟߋ߬ ߘߌ߫߸ ߡߍ߲ ߓߘߊ߫ ߓߎ߬ߞߊ߬ߙߌ ߡߎ߰ߡߍ ߣߌ߫ ߡߎ߬ߛߟߌ߬ߡߎ߲ ߣߌ߫ ߞߝߊ߬ ߛߌߦߊߡߊ߲߫ ߜߘߍ߫ ߟߎ߫.

ߊ߬ ߘߏ߲߬ ߠߊ߫ ߤߖߌ ߕߊ߯ߡߊ߫ ߟߊߘߏ߲ ߝߍ߬ ߊ߬ ߝߊ߬ߛߏ ߟߊ߫ ߞߎߣߊߘߎ߯ ߖߊߟߏ߲߫߸ ߊ߬ ߞߵߊ߬ ߦߌ߬ߘߊ߫ ߦߋ߲߬ ߞߏ߫ ߣߊ߬ߕߊ ߡߍ߲ ߦߴߊ߬ ߟߊ߫ ߛߓߍߟߌ ߘߐ߫߸ ߊ߬ ߡߊ߫ ߛߴߏ߬ ߕߟߊ ߘߐ߫ ߡߎߣߎ߲߬، ߊ߬ ߦߋ߫ ߡߐ߰ ߘߌ߫߸ ߡߍ߲ ߜߟߌߦߊߣߍ߲߫ ߒߞߏ ߘߏ߲߬ߞߏ߬ ߛߌߦߊߡߊ߲߫ ߓߟߏ߫߸ ߊ߬ ߟߊ߫ ߓߊ߯ߙߊ߫ ߞߟߊ߬ߥߟߎ ߟߎ߬ ߞߏߛߐ߲߬، ߓߊߏ߬߸ ߊ߬ߟߋ ߟߋ߬ ߞߵߊ߬ ߝߐ߫ ߞߊ߬ߦߌ߯ ߂߀߁߅ ߣߌ߫ ߁߈ ߕߍߟߊ ߘߐ߫߸ ߞߏ߫ "ߒ ߓߘߊ߫ ߒ ߠߊ߫ ߟߊߟߌ ߕߏ߫ ߞߊߓߙߎ ߟߊ߫"