ߟߊ߬ߕߍ߰ߦߊ ߡߍ߲ ߠߊߓߐ߫ ߘߊ߫ ߂߀߂߆ ߞߏ߲ߞߏߘߓߌ ߕߟߋ߬ ߁߇ ߡߊ߬߸ ߞߊ߲ߓߍ߲ ߞߊ߲ߕߌ߯ߘߊ ߞߵߊ߬ ߖߘߍ߬ ߦߋ߫ ߟߋ߬ ߕߋ߲߬߸ ߊ߬ ߓߘߊ߫ ߞߍ߫ ߊ߬ ߡߊ߬ ߛߋ߲ߛߋߘߋ߲ ߘߌ߫ ߞߊ߬ ߝߛߏ߬ ߞߊ߲ ߠߎ߬ ߣߌ߫ ߝߘߊ߬ߝߌ߲߬ ߛߓߍߟߌ ߟߎ߬ ߛߊ߲ߞߘߐߕߊ߬، ߒߞߏ ߣߌ߫ ߊߘߑߟߊߡ ߝߣߊ߫ ߘߏ߲߬ ߘߊ߫ ߞߎ߲߬ߠߊ߬ߛߌ߮ ߟߊ߫ ߘߐ߲߭ ߘߐ߫ ߦߋ߲߬ ߠߋ߬.

ߖߌ߬ߣߍ߬ ߞߊ߲߫ ߞߏ ߘߐ߬ߝߐ ߞߣߐ߫߸ ߊ߬ ߛߋ߲߬ߢߊ߬ ߝߟߐߝߟߐ ߟߋ߬ ߞߍ߫ ߘߊ߫ ߣߌ߲߬ ߘߌ߫߸ ߞߊ߲ߕߌ߯ߘߊ ߦߋ߫ ߟߊ߬ߕߍ߰ߦߊ ߟߊߓߐ߫߸ ߟߊ߬ߕߍ߰ߦߊ ߡߍ߲ ߦߋ߫ ߞߊ߲ߕߌ߯ߘߊ ߟߊ߬ߟߐ߲߬ߠߌ߲߬ߠߌ߲ ߗߋߕߌ߯ߘߊ ߟߊ߫ ߞߍߕߊ ߣߴߊ߬ ߟߊ߫ ߝߐߕߊ ߟߎ߬ ߘߊ߲߬ߠߊߕߍ߰ ߟߊ߫߸ ߞߊ߬ ߝߊ߬ߛߏ߬ ߞߊ߲ ߠߎ߬ ߣߌ߫ ߝߘߊ߬ߝߌ߲߬ ߛߓߍߟߌ ߟߎ߬ ߘߊ߲ߞߎ߲߫ ߟߊ߬ߕߍ߰ߦߊ߬ ߞߋߟߋ߲ ߏ߬ ߞߣߐ߫.

ߟߊ߬ߕߍ߰ߦߊ ߣߌ߲߬ ߞߊ߬ ߡߎ߲߬ ߝߐ߫؟

ߕߐ߲ߛߋ߲ ߘߏ߫ ߟߎ߫ ߟߋ߬ ߊ߬ ߞߣߐ߫߸ ߡߍ߲ ߦߋ߫ ߗߋߕߌ߯ߘߊ߫ ߞߎߘߊ ߟߊ߫ ߞߍߕߊ ߟߎ߬ ߝߐ߫ ߟߊ߫߸ ߗߋߦߊߟߌ߫ ߞߎ߲ߓߊ߫ ߛߓߊ߬ ߦߴߏ߬ ߡߍ߲ ߘߐ߫ ߕߊ߲߬:

߁߭. ߞߊ߬ ߞߊ߲ߕߌ߮ ߟߊ߫ ߗߋߛߓߍ ߟߎ߬ ߟߊߛߋ߫ ߝߊ߬ߛߏ߬ ߞߊ߲ ߠߎ߬ ߘߐ߫: ߝߎߟߊ߫ ߞߊ߲߸ ߡߊ߬ߣߌ߲߬ߞߊ߬ ߞߊ߲߸ ߛߏ߬ߛߏ߬ ߞߊ߲߸ ߊ߬ ߣߌ߫... ߥߊߟߌ߫ ߞߊ߲ ߠߎ߬ ߝߣߊ߫ ߦߴߏ߬ ߘߟߊ߫߸ ߦߏ߫ ߊ߲߬ߜ߭ߌߟߋ ߣߌ߫ ߊߙߊߓߎ.

߂߲. ߞߊ߬ ߝߊ߬ߛߏ߬ ߞߊ߲ ߠߎ߬ ߟߊߓߊ߯ߙߊ ߛߊ߲ߞߘߐߕߊ߬߸ ߊ߬ ߣߌ߫ ߝߘߊ߬ߝߌ߲߬ߠߊ߫ ߛߓߍߟߌ߫ ߞߊ߲ ߠߎ߬: ߒߞߏ ߣߌ߫ ߊߘߑߟߊߡ ߞߏߝߐߣߴߏ߬ ߘߐ߫ ߟߋ߬ ߝߋߝߋ߫߸ ߞߊ߬ <<ߘߏ߫ ߜߘߍ߫ ߟߎ߫>> ߝߣߊ߫ ߟߊ߫ ߏ߬ ߘߟߊ߫߸ ߡߍ߲ ߦߋ߫ ߛߌߟߊ ߟߊߞߊ߬ ߟߊ߫ (ߖߘߍ߬) ߛߓߍߟߌ߫ ߜߘߍ ߕߐ߭ ߟߎ߬ ߝߣߊ߫ ߦߋ߫.

߃߲. ߞߊ߬ ߓߌ߬ߟߊ߬ߢߐ߲߰ߡߊ ߞߍ߫ ߓߍ߯ ߘߍ߭ ߘߌ߫: ߞߊ߬ ߓߏߓߏ߫ ߛߓߍߟߌ ߟߎ߬ ߣߌ߫ ߝߎߦߋ߲߫ ߛߓߍߟߌ ߟߊߘߏ߲߬ ߊ߬ ߘߐ߫߸ ߞߊ߬ ߟߌ߬ߤߟߊ ߞߍ߫ ߓߍ߯ ߘߍ߭ ߘߌ߫ ߢߊ߫ ߛߌߦߊߡߊ߲߫ ߡߊ߬: ߦߋߟߌ ߘߐ߫߸ ߡߊ߲߬ߞߊ߲ ߘߐ߫߸ ߡߊ߰ߒ߬ߠߊ ߘߐ߫.

ߡߎ߲߬ ߞߊ߬ ߕߐ߬ߣߐ ߞߍ߫ ߊ߬ ߟߊ߫؟

ߒߞߏ ߛߓߍߟߌ ߛߌ߲ߘߌ߫ ߘߊ߫ ߁߉߄߉ ߟߋ߬ ߟߊ߫߸ ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫ ߓߟߏ߫߸ ߊ߬ߟߋ ߡߍ߲ ߛߐ߬ߘߐ߲߬ ߘߊ߫ ߁߉߂߂ ߟߊ߫߸ ߞߊ߬ ߝߊߕߏ߫ ߁߉߈߇ ߟߊ߫، ߊߘߑߟߊߡ ߡߍ߲ ߝߣߊ߫ ߦߋ߫ ߕߋ߲߬߸ ߏ߬ ߛߌ߲ߘߌ߫ ߘߊ߫ ߓߊߙߌߟߞߊ ߟߎ߫ ߟߋ߬ ߓߟߏ߫ ߁߉߈߉ ߟߊ߫ ߝߎߟߊ߫ ߞߊ߲ ߛߓߍ߫ ߞߊ߲ߡߊ߬، ߛߓߍߟߌ߫ ߝߌ߬ߟߊ ߏ߬ ߟߎ߬ ߓߍ߯ ߕߎ߲߬ ߦߋ߫ ߟߊߓߊ߯ߙߊ߫ ߟߊ߫ ߡߐ߰ ߞߎ߲߬ߞߋߟߋ߲ ߠߎ߬ ߣߌ߫ ߘߍ߬ߞߙߎ ߟߎ߫ ߟߋ߬ ߘߐߙߐ߲߫ ߓߟߏ߫߸ ߊ߬ ߣߴߊ߬ߟߎ߬ ߦߋ߫ ߞߊ߬ߙߊ߲߬ ߠߊ߫ ߟߊ߬ߞߐ߰ߟߌ߬ ߕߊ߲ߓߍ߲ ߠߎ߬ ߣߌ߫ ߞߊ߬ߙߊ߲߬ߕߊ߬ ߖߙߎߡߎߒߕߊ߲ ߠߎ߬ ߟߋ߬ ߘߐ߫ (ߡߍ߲ ߠߎ߬ ߕߍ߫ ߞߎ߲߬ߠߊ߬ߛߌ߮ ߕߊ߫ ߓߟߏ߫ ߞߊ߲߬)، ߒ߬ߓߊ߬߸ ߟߊ߬ߕߍ߰ߦߊ ߣߌ߲߬ ߓߘߊ߫ ߣߊ߬ ߓߊ߬ߟߊ߲ ߣߌ߫ ߢߊ߬ߡߊ߲ ߏ߬ ߓߍ߯ ߟߊߥߟߌ߬߸ ߞߊ߬ ߛߌߟߊ ߟߊߞߊ߬ ߛߓߍߟߌ ߢߌ߲߬ ߠߎ߬ ߦߋ߫߸ ߊ߬ߟߎ߬ ߘߌ߫ ߛߋ߫ ߟߊߓߊ߯ߙߊ߫ ߞߊ߲ߕߌ߯ߘߊ ߟߊ߫ ߟߊ߬ߛߋ߬ߟߌ ߟߎ߬ ߘߐ߫: ߟߊ߬ߛߋ߬ߟߌ߬ ߛߓߍ ߟߎ߬߸ ߖߌ߬ߦߊ߬ߖߟߎ ߟߎ߬ ߞߘߐߛߓߍߟߌ߸ ߞߊ߲ߕߌ߯ߘߊ ߟߊ߫ ߞߐߜߍ ߟߎ߬ ߣߴߊ߬ ߟߊ߫ ߞߍߦߙߐ ߟߎ߬.

ߡߊ߬ߞߏ ߦߋ߫ ߡߎ߲߬ ߠߊ߫ ߡߎ߬ߕߎ߲߬ ߕߌ߯ߕߌ߯؟

ߝߊ߬ߛߏ߬ ߞߊ߲ ߠߎ߬ ߞߐߡߊߓߌ߲ߓߌ߲ߓߊ߮ ߟߎ߬ ߟߊ߫ ߦߟߍ߬ߘߐ߬ߞߍ߬ ߦߙߌߞߊ ߓߊ߯ߙߊ ߓߘߊ߫ ߓߐ߫ ߜߍߟߊ߫، ߣߝߊ߬ߖߌ߫ ߛߏ߬ߙߌ߬ ߡߍ߲ ߞߊ߬ ߟߌ߬ߤߟߊ ߢߌ߲߬ ߠߊߖߍ߲ߛߍ߲߫߸ ߏ߬ ߞߵߊ߬ ߦߋ߫ ߟߋ߬ ߞߏ߫ "ߊ߬ ߞߍ߫ ߘߊ߫ ߟߌ߬ߤߟߊ߬ ߘߌߡߊ߲ߘߌߡߊ߲߫ ߠߋ߬ ߘߌ߫ ߖߌ߬ߣߍ߬ ߞߊ߲ ߠߎ߬ ߣߴߊ߬ ߛߓߍߟߌ ߟߎ߬ ߕߟߏ߫ ߟߊ߫." ߒߞߏ ߘߎ߲ߓߎ ߕߊ߬ߣߍ߲ ߞߵߊ߬ ߟߊ߫ ߊߘߑߟߊߡ ߘߍ߬ߞߙߎ ߞߊ߲߬߸ ߏ߬ ߟߎ߬ ߞߊ߫ ߞߊ߲߫ ߞߵߊ߬ߟߎ߬ ߓߟߏߟߞߊߟߌߦߊ ߟߋ߬ ߡߎ߬ߕߎ߲߬ ߌߞߘߐ߫߸ ߞߊ߬ ߛߋ߫ ߞߊ߲ߕߌ߯ߘߊ ߡߊߜߍ߲߫ ߠߊ߫ ߞߟߊ߬ߡߊ߬ߓߊ߮ ߟߎ߬ ߟߊ߫ ߝߊ߬ߛߏ߬ ߞߊ߲ ߠߎ߬ ߓߊߓߋ߭ ߘߐ߫߸ ߞߵߏ߬ ߛߋߒߞߏߟߊ ߟߎ߬ ߦߌ߬ߘߊ߬ ߞߊ߲ߕߌ߯ߘߊ ߟߊ߫ ߞߊߟߌߦߊ߫ ߘߐ߫.

ߏ߬ ߞߐߝߍ߬ ߘߏ߲߬؟

ߕߏ߬ߟߊ߲ ߓߘߊ߫ ߛߋ߫ ߓߌ߬ߟߊ߬ߢߐ߲߰ߡߊ ߗߋߕߌ߯ߘߊ ߟߊ߫ ߞߊߡߊ߲ ߞߣߐ߫، (ߡߙߌߘߐ ߓߘߊ߫ ߕߊ߬߸ ߊ߬ߟߎ ߟߋ߬ ߞߊ߫ ߞߊ߲߫ ߞߵߊ߬ߟߎ߬ ߞߍߕߊ ߞߍ߫ ߡߎ߬ߕߎ߲߬)، ߝߙߋߞߋ ߟߎ߬ ߟߐ߲ߣߍ߲߫ ߞߘߐ ߟߋ߬߸ ߜߟߍ߬ߦߊ ߡߍ߲ ߠߎ߬ ߘߊ߲ߘߕߊ ߦߋ߫ ߞߊ߬ߣߌ߲߬، ߦߏ߫: ߓߊ߯ߙߟߊ ߟߎ߬ ߟߊߞߐ߮߸ ߛߓߍߛߋ߲߫ ߢߣߊߡߊ߫ ߞߏ߸ ߊ߬ ߣߌ߫ ߕߟߋ߬ߓߊ߰ߦߊ ߖߐ߯ߙߊ߲ ߠߎ߬߸ ߡߊ߬ߞߏ ߦߋ߫ ߡߍ߲ ߠߎ߬ ߟߊ߫ ߘߊߞߎ߲ ߣߌ߲߬ ߘߐ߫، ߏ߬ ߘߐ߫߸ ߛߊ߬ߙߌ߬ߦߊ߬ ߓߟߏ ߡߊ߬߸ ߞߏ ߟߎ߬ ߓߘߊ߫ ߟߊߜߍ߫، ߊ߬ ߕߐ߭ ߕߏߣߍ߲߫ ߥߊ߬ߣߌ߲߬ߞߋ߬ ߦߌߘߊ ߟߋ߬ ߡߊ߬ ߛߍߣߍ߲߬߸ ߛߊ߫ ߢߝߍߟߊ ߘߌ߫ ߟߊߛߐ߬ߘߐ߲߬.

 ߂߀߂߆ ߞߏ߲ߞߏߘߓߌ ߕߟߋ߬ ߁߇ ߟߊ߬ߕߍ߰ߦߊ ߣߌ߲߬ ߞߍߣߍ߲߫ ߕߟߋ߬ ߞߎߘߊ߫ ߟߋ߬ ߓߐߣߍ߲ ߘߌ߫߸ ߝߊ߬ߛߏ߬ ߞߊ߲ ߠߎ߬ ߝߐߟߌ ߕߋ߬ߟߋ߸ ߝߊ߬ߛߏ߬ ߞߊ߲ ߠߎ߬ ߛߓߍߟߌ ߕߋ߬ߟߋ߸ ߏ߬ ߟߎ߬ ߓߍ߯ ߓߘߊ߫ ߞߍ߫ ߛߊ߬ߙߌ߬ߦߊ߬ߡߊ ߘߌ߫ ߖߌ߬ߣߍ߬ ߞߣߐ߫ ߡߎ߬ߕߎ߲߬߸ ߞߎ߲߬ߠߊ߬ߛߌ߮ ߓߘߊ߫ ߘߏ߲߬ ߘߐ߲߭ ߘߐ߫.

ߓߐߛߎ߲: ߟߊ߬ߕߍ߰ߦߊ ߟ/߂߀߂߆/߀߁߂߂/ߖߞߞ/ߞߝߞ ߂߀߂߆ ߞߏ߲ߞߏߘߓߌ ߕߟߋ߬ ߁߇ ߡߊ߬߸ ߣߝߊ߬ߖߌ߫ ߛߏ߬ߙߌ߬ ߞߐ߲ߘߍ߫ ߓߟߏ߫.