ߞߊ߲ߞߊ߲߫ ߘߐ߲߬ߞߌ߲߬ ߛߊߟߌ ߝߍ߬ ߢߌ߬ߣߊ߲߬߸ ߞߊ߲ߓߍ߲ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߊ߬ ߛߊߟߌ ߞߍ߫ ߊ߬ ߝߊ߬ߛߏ ߟߋ߬ ߟߊ߫ ߞߎߣߎ߲ߟߏ߲ ߣߌ߲߬ ߡߊ߬ ߂߀߂߆ ߘߓߊ߬ߕߊ ߕߋ߬ߟߋ߫ ߂߇.

ߦߏ߫ ߛߊ߲߭ ߕߊ߬ߡߌ߲߬ߣߍ߲ ߠߎ߬ ߞߍ߫ ߘߊ߫ ߢߊ ߡߍ߲߸ ߞߊ߬ߝߏ߬ ߞߎ߲ߕߌ߮ ߕߊ߯ ߘߊ߫ ߛߊߟߌߝߎߥߊ ߟߊ߫ ߞߊ߲ߞߊ߲߫ ߕߌ߲ߓߌߘߌ߲ߘߓߊ ߟߋ߬ ߟߊ߫߸ ߕߌ߲߬ߓߏ߲߫ ߞߌ߲߬ߘߊ ߟߊ߫߸ ߊ߬ ߣߌ߫ ߘߍ߲߬ߞߣߍ߬ߦߊ߬ߓߊ߮ ߛߌߦߊߡߊ߲߫ ߞߊ߬ ߛߊߟߌߝߎߥߊ ߛߊߟߌ ߣߴߊ߬ ߓߋߟߋ߲ߠߊ ߟߎ߬ ߞߍ߫ ߢߐ߲߯ ߝߍ߬ ߡߍ߲ ߞߣߍ ߞߊ߲߬߸ ߘߌ߯ߣߊ ߡߐ߰ߓߊ ߟߎ߬ ߣߌ߫ ߛߏ ߝߊ߰ߡߊ ߛߌߦߊߡߊ߲߫ ߕߘߍ߬ ߞߣߍ ߞߊ߲߬.

ߦߊ߬ߣߌ߫ ߛߊߟߌߝߎߥߊ ߕߍ߫߸ ߞߊ߲ߕߌ߮ ߕߊ߯ ߘߴߊ߬ ߛߐ߬ߘߐ߲߬ ߣߊ ߟߋ߬ ߝߏ߬ ߡߎߣߎ߲߬߸ ߏ߬ ߞߊ߬ ߡߐ߱ ߟߎ߬ ߢߊߥߏ ߝߊ߫ ߦߋ߲߬ ߓߌ߬ ߞߏߛߓߍ߫߸ ߞߵߊ߬ ߦߌ߬ߘߊ߬ ߞߏ߫ ߊ߬ ߟߊ߫ ߞߊ߲ߕߌ߯ߦߊ ߣߴߊ߬ ߕߊ߫߸ ߊ߬ ߕߴߊ߬ ߕߏߟߏ߲߫ ߠߊ߫ ߟߊ߲߬ߓߋ ߟߊ߫.

ߞߊ߲ߞߊ߲߫ ߕߌ߲ߓߌߘߌ߲ߓߘߊ ߢߍߓߊ߮ ߟߊ߫ ߓߋߟߋ߲ߠߊ ߘߐ߫߸ ߊ߬ ߞߵߊ߬ ߞߊ߲ߠߊߘߌ߫ ߖߌ߬ߣߍ߬ߞߊ ߟߎ߫ ߡߊ߬ ߓߍ߲߭ ߠߋ߬ ߟߊ߫߸ ߊ߬ ߣߌ߫ ߓߟߏ߫ ߘߌ߫ ߢߐ߲߰ ߡߊ ߣߌ߫ ߦߊ߬ߝߊ߫ ߢߐ߲߰ ߡߊ ߣߌ߫ ߞߋ߬ߟߋ߲߬ߧߊ.

ߊ߬ ߓߘߊ߫ ߟߊߞߙߐ߬ߛߌ߬߸ ߞߏ߫ ߞߊ߲ߕߌ߮ ߛߊ߲߬ ߦߙߌߞߊ ߟߋ߬ ߕߋ߲߬߸ ߡߊ߬ߡߊ߬ߘߌ߬ ߘߎ߲ߓߎߦߊ߫ ߦߋ߫ ߣߊ߬ ߟߊ߫ ߘߐ߲߬ߞߌ߲ ߛߊߟߌ߫ ߟߊ߫ ߞߊ߲ߞߊ߲߫ ߠߋ߬߸ ߊ߬ ߝߊ߬ߛߏ ߟߊ߫، ߢߌ߬ߣߊ߲߬ ߕߊ ߣߌ߲߬ ߖߍ߬ߘߍ ߘߐ߫߸ ߊ߬ ߣߊ߬ ߘߊ߫ ߞߊ߬ ߕߋ߬ߟߋ߫ ߝߌ߬ߟߊ߫ ߟߋ߬ ߕߏ߫ ߛߊߟߌ ߟߊ߫، ߊ߬ ߦߋ߫ ߛߐ߬ߘߐ߲߬ ߠߊ߫ ߡߊߡߦߊ ߘߐ߫ ߊ߬ ߟߊ߫ ߣߊ߬ߟߌ ߣߌ߲߬ ߓߍ߯ ߘߐ߫ ߟߋ߬߸ ߣߴߊ߬ ߡߊ߫ ߢߊ߬ ߞߏ߫ ߊ߬ߟߎ߬ ߟߊ߫ ߛߘߍ ߟߋ߬ ߓߙߊ ߘߐ߫߸ ߏ߬ ߟߎ߬ ߡߍ߲ ߠߎ߬ ߛߊ߲߬ ߠߊ߬ߓߊ߲ ߦߋ߫ ߢߌ߬ߣߊ߲߬ ߘߌ߫، ߊ߬ ߖߍ߬ߘߍ߸ ߞߊ߲ߕߌ߮ ߞߊ߬ ߡߊߡߦߊ ߕߎ߬ߙߎ߲߫ ߠߋ߬ ߘߐ߲߬ߞߌ߲߬ ߕߊ߬ߡߌ߲߬ߣߍ߲ ߝߍ߬ ߞߏߛߓߍ߫.

ߣߊ߲߬ߝߏ߯ ߌߛߎ߬ߡߊ߬ߌ߯ߟߊ߫ ߖߊ߰ߓߌ߫ ߞߊ߬ ߞߕߎ߬ߓߊ ߡߍ߲ ߞߍ߫ ߊ߬ ߟߊ߫ ߕߌ߲ߓߌߘߌ߲ߘߊ ߟߊ߫ ߓߐ߬ߙߑߘߏ߫ ߞߌ߲߬ߘߊ ߟߊ߫߸ ߏ߬ ߞߊ߬ ߞߊ߲ߕߌ߮ ߝߏ߬ ߊ߬ ߝߊ߬ ߓߘߊ ߟߊߡߍ߬ߙߍ߲ ߘߐ߫ ߊ߬ ߓߟߏ߫: <<ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߦߋ߫ ߝߊ߬ ߓߘߊ߬ ߞߊ߬ߣߌ߲߬ߠߊ ߟߋ߬ ߘߌ߫ [...] ߊ߬ ߓߘߊ߫ ߡߐ߬ߟߐ߲ ߖߍ߬ߘߍߖߍ߬ߘߍ ߘߌ߫ ߞߊ߲ߞߊ߲߫ ߡߊ߬،  ߛߊߟߌ ߓߊ߯ ߛߋ߫߸ ߊ߬ ߘߌ߫ ߣߊ߬ ߞߊ߲ߞߊ߲߫، ߣߌ߫ ߞߊ߲ߕߌ߮ ߘߏ߲߬ ߝߊ߬ ߓߘߊ ߘߌߦߊ߫ ߘߴߊ߬ ߦߋ߫߸ ߏ߬ ߦߋ߫ ߕߐ߰ߡߊ߬ߛߙߋ߫ ߟߋ߬ ߘߌ߫ ߞߵߊ߬ ߦߌ߬ߘߊ߬ ߞߏ߫ ߘߎ߰ߘߋ߲ ߓߍ߯ ߝߣߊ߫ ߞߊ߫ ߞߊ߲߫ ߞߵߊ߬ ߝߊ߬ ߓߘߊ ߟߊߘߌߦߊߢߍ߫.>> ߊ߬ ߞߵߏ߬ ߦߌ߬ߘߊ߬.

ߞߊ߬ ߓߐ߫ ߟߎ ߡߊ߬߸ ߞߊ߬ ߛߋ߫ ߕߌ߲ߓߌߘߌ߲ߘߓߊ ߟߊ߫߸ ߞߊ߲ߕߌ߮ ߞߎ߲߬ߓߐ ߓߊ߯ ߦߋ߫ ߝߊ߲߭ ߡߍ߲ ߠߎ߬ ߘߐ߫߸ ߊ߬ ߟߊ߫ ߕߐ߲߬ߕߐ߲ ߦߋ߫ ߟߊߓߍ߲߬ ߠߊ߫ ߖߡߊ߬ߣߊ߬ߘߋ߲ ߠߎ߬ ߓߟߏ߫ ߛߍߥߊ ߟߋ߬ ߟߊ߫߸ ߞߊ߬ ߓߐ߫ ߞߵߊ߬ ߝߏ߬߸ ߊ߬ ߞߍ ߘߐ߫ ߞߊ߬ ߣߊ߬ ߛߊߟߌ ߞߍ߫ ߊ߬ߟߎ߫ ߝߍ߬.