ߊ߲ ߧߋ߫ ߞߊߙߏ ߡߍ߲ ߘߐ߫ ߕߋ߲߬߸ ߏ߬ ߟߋ ߛߌ߬ߟߊ߬ߡߊ ߟߎ߬ ߟߊ߫ ߛߊ߲߬ ߦߟߍ߬ߡߊ߲߬ ߞߊߙߏ ߘߌ߫߸ ߞߋߟߊ ߟߊ߫ ߝߎ߲ߘߌ ߛߊ߲߬ ߁߄߄߇، ߒ߬ߓߊ߬߸ ߛߊ߲߬ ߦߟߍߡߊ߲ ߏ߬ ߢߊ߰ߢߊ߮ ߓߟߏߘߐߓߍ߲ ߠߎ߬ ߦߴߌߘߐ߫ ߛߌ߬ߟߡߊ߬ߦߊ ߦߋߟߋ߲ (ߣߎߙߑߘߌߣ ߌߛߑߟߊߡ) ߓߟߏ߫߸ ߞߊ߬ ߓߍ߲߬ ߖߐ߲߭ߓߍ߲߬ߘߍ ߕߟߋ߬ ߁߀ ߡߊ߬، ߏ߬ ߟߋ ߓߊ߯ߙߊ ߟߎ߬ ߘߊߡߌ߬ߣߊ߬ߣߍ߲߫ ߞߊ߬ߙߊ߲߬ߡߐ߯ ߛߎ߬ߟߋ߬ߡߊߣ ߛߘߌ߬ߓߋ߬ ߓߘߊ߸ ߊ߬ߟߋ ߡߍ߲ ߦߋ߫ ߣߎߙߑߘߌߣ ߢߍߡߐ߮ ߘߌ߫.

ߞߊ߬ ߞߐ߲߰ ߖߊ߲߬ߞߊ߰ߣߊ߫ ߖߡߊ߬ ߟߊ߬ߘߍ߬ߓߊ߫ ߓߟߋ߬ߓߟߋ ߢߍ߫ ߥߊ߬ߛߌ߬ߥߙߊ ߕߋ߬ߟߋ߫ ߂߅ ߡߊ߬߸ ߣߎߙߑߘߌߣ ߞߊ߬ߣߌ߲߬ߓߊ߮ ߟߎ߬߸ ߊ߬ߟߎ߬ ߟߊ߫ ߘߍ߬ߞߙߎ ߞߏߟߊߕߍ߮ ߟߎ߬ ߖߡߊ߬ߣߊ ߞߣߐߟߊ ߘߐ߫߸ ߏ߬ ߟߎ߬ ߛߌߦߊߡߊ߲߫ ߠߋ߬ ߣߊ߬ߣߍ߲߫߸ ߘߏ߫ ߟߎ߫ ߖߍ߬ߘߍ ߓߐߣߍ߲߫ ߛߌ߰ߢߐ߲߰ ߖߡߊߣߊ ߘߏ߫ ߟߎ߫ ߘߐ߫߸ ߦߏ߫ ߡߊ߬ߟߌ߸ ߞߊ߬ ߣߊ߬ ߛߐ߬ߘߐ߲߫ ߘߎ߬ߥߊ߬ߥߎ߬ ߢߌߣߌ߲ ߟߏ߲ߓߊ ߣߌ߲߬ ߘߐ߫߸ ߞߊ߬، ߛߐ߰ ߞߍߣߍ߲߫ ߘߍ߰ ߛߎߛߎ ߟߋ߬ ߡߊ߬ ߡߎߣߎ߲߬߸ ߞߵߏ߬ ߞߍ߫ ߞߋߟߊ ߛߌ߲ߞߐ߲ ߘߌ߫߸ ߞߵߏ߬ ߞߍ߫ ߛߍߥߊ ߕߐ߰ߡߊ߬ߛߙߋ ߘߌ߫߸ ߊ߬ ߣߌ߫ ߓߍ߲߭߸ ߊ߬ ߛߌ߲߬ߝߏ߲߬ߧߊ߬ߓߊ߮ ߟߎ߬ ߟߊ߫ ߝߐߟߌ߫ ߘߐ߫ ߞߊ߬ߣߌ߲߬.

ߣߎߙߑߘߌߣ ߌߛߑߟߊߡ ߦߋ߫ ߖߡߊ߬ߓߊ߫ ߟߋ߬ ߟߊߘߍ߬ ߟߊ߫ ߛߊ߲߭ ߓߍ߯ ߟߊ߫ ߛߐ߲߬߸ ߞߊ߬ ߓߍ߲߬ ߘߌ߯ߣߊ ߛߌߡߊߟߌ߫ ߘߐ߫ ߞߏ ߟߎ߫ ߡߊ߬، ߛߊ߲߬ ߞߎ߬ߘߊ߬ ߢߊ߯ߢߊ߮ ߣߌ߲߬ ߦߋ߫ ߞߍ߫ ߟߊ߫ ߟߵߊ߬ߟߎ߬ ߓߟߏ߫ ߞߘߊߎ߫߸ ߞߊ߬ ߖߊ߬ߡߊ ߟߊߘߍ߬߸ ߞߵߵߊ߬ߟߎ߫ ߛߏ߬ߓߌ߬ߟߊ߬ߞߎߣߎ߲߫߸ ߖߛߎ߬ߛߎߡߊ ߘߌ߫ ߛߓߊ߬ߕߌ߬ ߢߊ ߡߍ߲ ߡߊ߬߸ ߞߵߏ߬ ߢߊߝߐ߫، ߟߊ߲ߖߌ߬ ߞߊ߬ߓߊ߫ ߞߏ߬ߣߊ߬ߕߍ߫ ߡߍ߲ ߦߋ߫ ߘߍ߬ߞߙߎ ߣߌ߲߬ ߡߊ߬ߡߙߊ߬ߟߌ߬ߟߊ ߘߌ߫ ߞߊ߬ߦߌ߯ ߊ߬ ߛߌ߲ߘߌ߫ ߕߎߡߊ ߟߊ߫ ߂߀߀߉ ߟߊ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ߫ ߞߎ߲߬ߠߊ߬ߦߋߙߋ߲ߣߍ߲߫ ߠߋ߬ ߛߊ߲߭ ߺ ߊ ߺ ߛߊ߲߬߸ ߞߊ߬ ߓߍ߲߬ ߖߊ߬ߡߊ ߟߊ߫ ߓߐߟߌ߫ ߞߐߟߌߞߐߟߌ ߡߊ߬.

<<ߛߊ߲߭ ߺ ߊ ߺ ߛߊ߲߬߸ ߡߐ߱ ߟߎ߬ ߕߍ߫ ߛߍ߰ ߟߊ߫ ߣߊ߬ߟߌ ߘߐ߫ ߦߊ߲߬، ߖߊ߬ߡߊ ߦߋ߫ ߕߊ߬ߡߌ߲߬ ߠߊ߫ ߛߌߦߊߦߊ߫ ߟߊ߫ ߟߋ߬ ߞߘߊߎ߫، ߣߴߌ ߞߊ߬ ߖߊ߬ߡߊ ߣߌ߲߬ ߦߋ߫ ߥߙߊ߬ ߟߊ߫ ߛߊ߲߭ ߺ ߊ ߺ ߛߊ߲߬߸ ߊ߬ߝߐ߫ ߊ߬ߟߎ߬ ߕߍ߫ ߕߐ߬ߣߐ߫ ߟߋ߬ ߛߐ߬ߘߐ߲߬ ߠߴߊ߬ ߟߊ߫ ߥߊ߬؟ ߣߴߌ ߕߍ߫ ߕߐ߬ߣߐ߫ ߛߐ߬ߘߐ߲߬ ߠߊ߫߸ ߊ߬ߝߐ߫ ߌ ߓߌߣߊ߬ ߥߊ߬؟ ߓߊߏ߬ ߊ߲ ߧߋ߫ ߥߊ߫ ߟߴߊ߬ ߛߊ߲߭ ߡߎ߬ߥߊ߲ ߠߋ߬ ߘߐ߫ ߕߋ߲߬ ߝߊߦߌߘߊ߫߸ ߛߊ߲߭ ߺ ߊ ߺ ߛߊ߲߬߸ ߌ ߘߴߊ߬ ߝߐ߫ ߞߏ߫ ߢߌ߬ߣߊ߲߬ ߞߊ߫ ߜߍ߬ߟߍ߲߬ ߛߊߙߏ߲߬ ߘߌ߫.>> ߊ߬ ߞߵߏ߬ ߦߌ߬ߘߊ߬، ߊ߬ߟߋ ߟߊ߫ ߝߐߟߌ߫ ߘߐ߫߸ ߣߎߙߑߘߌߣ ߘߍ߬ߞߙߎ ߛߌ߰ߣߍ߲߫ ߓߍ߲߭ ߣߌ߫ ߖߛߎ߬ߛߎߡߊ ߢߊߢߌߣߌ߲ ߠߋ߬ ߡߊ߬، <<ߞߊ߬ߦߌ߯ ߘߍ߬ߞߙߎ ߣߌ߲߬ ߛߌ߲ߘߌ߫ ߘߊ߫ ߤߊ߲߯ ߞߵߊ߬ ߛߌ߰ ߓߌ߬ ߡߊ߬߸ ߛߍ߬ߘߏ߲ ߺ ߛߍ߲߬ߘߏ߲߬ ߦߴߌߘߐ߫߸ ߏ߬ ߟߋ ߦߋ߫ ߓߍ߲߭ ߘߌ߫، ߣߴߌ ߞߊ߬ ߖߡߊ߬ߣߊ߫ ߺ ߖߡߊ߬ߣߊ߬ ߦߋ߫ ߞߏ߫ ߊ߬ ߓߘߊ߫ ߥߊ߫ ߢߍߝߍ߬߸ ߓߍ߲߭ ߠߋ߬ ߦߴߊ߬ ߞߍ߫ ߟߊ߫، ߏ߬ ߘߐ߫߸ ߊ߲ ߧߋ߫ ߤߊ߲ߞߟߌߡߊ ߡߍ߲ ߞߐߝߍ߬߸ ߣߴߊ߬ ߦߋ߫ ߟߊ߱ߖߌ߬ ߛ߭ߍߞ ߛߎ߬ߟߋ߬ߡߣߊ ߛߘߌ߬ߓߋ߬ ߘߌ߫߸ ߊ߬ ߟߊ߫ ߞߏ ߓߍ߯ ߓߎ߲ߓߎ߲ߣߍ߲߫ ߓߍ߲߭ ߏ߬ ߟߋ ߟߊߘߏ߲߭ ߡߊ߬ ߖߡߊ߬ߣߊ ߣߌ߲߬ ߞߣߐ߫.>> ߊ߬ ߞߵߏ߬ ߝߙߊ߬ ߞߎߡߊ ߞߊ߲߬.

ߥߊߟߖߌ ߟߊ߫ ߟߎ ߡߊ߬߸ ߓߟߏߘߐߓߍ߲ ߦߴߌߘߐ߫ ߊ߬ߟߎ߬ ߓߟߏ߫ ߊ߬ ߢߊ ߖߍ߬ߘߍߖߍ߬ߘߍ ߡߊ߬߸ ߊ߬ߟߎ߫ ߞߊ߬ ߘߍ߬ ߛߎߛߎ ߟߎ߬ ߞߍ߫߸ ߏ߬ ߡߍ߲ ߦߋ߫ ߓߊ߯ߙߊ߫ ߞߎ߲߬ߝߟߐ ߘߌ߫ ߞߊ߬ ߞߐ߲߲߰ ߖߊ߲߬ߞߊ߰ߣߊ߬ ߕߊ߯ߟߌ ߢߍ߫. <<ߘߍ߭ ߡߍ߲߬ ߛߎ߬ߛߎ߬ ߞߎ߲ ߡߎ߲߬ ߘߌ߫߸ ߏ߬ ߦߋ߫ ߞߍ߫ ߟߊ߫ ߞߋߟߊ ߞߊ߬ߣߌ߲ ߠߋ߬ ߞߏߛߐ߲߬߸ ߊ߲ ߓߍ߯ ߟߊߘߍ߬ߣߍ߲ ߦߋ߫ ߗߍ߬ߓߊ ߏ߬ ߡߍ߲ ߞߐ߫߸ ߝߏ߫ ߊ߲ ߧߴߊ߲ ߤߊ߲ߞߟߌ ߟߊߖߌ߰ ߏ߬ ߞߐ߫، ߊ߬ ߞߎ߲߭ ߕߍ߫ ߝߏߦߌ߬ ߘߌ߫߸ ߝߏ߫ ߛߍߥߊ߸ ߊ߬ ߣߌ߫ ߓߍ߲߭.>> ߟߊ߱ߖߌ߬ ߞߊ߬ߓߊ߫ ߞߏ߬ߣߊ߬ߕߍ߫ ߞߵߏ߬ ߦߌ߬ߘߊ߬.

ߘߍ߬ߞߙߎ ߣߌ߲߬ ߞߏߟߊߕߍ߮ ߟߎ߬ ߞߊ߲߫߸ ߞߏ߫ ߛߊ߲߬ ߞߎ߬ߘߊ߬ ߛߊߟߌ ߣߌ߲߬ ߕߍ߫ ߞߍ߫ ߟߴߊ߬ߟߎ߬ ߓߟߏ߫ ߦߋ߲߬ ߕߋ߲߬ ߜߊ߲ߛߊ߲߫ ߘߋ߬߸ ߊ߬ ߦߋ߫ ߞߏ߫ ߞߘߐ ߟߋ߬ ߘߌ߫߸ ߊ߬ߟߎ߬ ߦߴߊ߬ ߞߊ߲߬ ߞߊ߬ ߡߍ߲ ߢߊߞߎߘߦߊ߫، ߊ߬ߟߎ߬ ߜߎ ߦߴߏ߬ ߞߍ߫ ߟߊ߫߸ ߛߊ߫ ߘߋ߲ߡߌߛߍ߲߫ ߥߟߌ߬ߕߐ߬ߟߊ ߟߎ߬ ߝߣߊ߫ ߘߴߊ߬ߟߎ߬ ߖߞߊ߫ ߊ߬ߟߎ߫ ߡߊ߬ ߛߌߟߊ߫ ߓߘߍ ߏ߬ ߕߊ߯ߡߊ ߘߐ߫ ߢߊ ߡߍ߲ ߡߊ߬.

<<ߊ߲ ߧߋ߫ ߡߎ߲߬ ߝߍ߬߸ ߘߋ߲ߣߍ߲ ߡߍ߲ ߠߎ߬ ߥߟߌ߬ߕߐ߫߫ ߊ߲ ߞߐߝߍ߬߸ ߊ߬ߟߎ߬ ߦߴߊ߬ ߢߊߦߋ߫߸ ߞߊ߬ ߝߐ߫ ߊ߲ ߡߊ߬ߞߏ ߦߴߊ߲ ߠߊ߫ ߛߊ߲߬ ߞߎߘߊ ߟߊ߫، ߓߊ߸ ߏ߬ ߟߋ ߊ߲ ߕߊ ߘߌ߫.>> ߏ߬ ߢߊߝߐ߫ ߘߊ߫ ߟߊ߱ߖߌ߬ ߞߊ߬ߓߊ߫ ߞߏ߬ߣߊ߬ߕߍ߫ ߟߋ߬ ߓߟߏ߫، ߊ߬ߟߋ ߟߊ߫ ߖߊ߬ߕߋ߬ ߘߐ߫߸ ߛߊ߲߬ ߞߎߘߊ ߣߌ߲߬ ߕߍ߫ ߞߏ߫ ߘߋ߲ߣߍ߲߫ ߘߌ߫߸ ߊ߬ ߞߊ߫ ߞߊ߲߫ ߞߊ߬ ߞߍ߫ ߓߍ߯ ߟߊ߫ ߞߏ ߟߋ߬ ߘߌ߫.

<<ߕߟߋ߬߃߁ ߠߋ߬ ߞߍ߫ ߟߊ߫ ߓߊ߯ߙߓߊߟߌߦߊ߫ ߟߏ߲ ߘߌ߫߸ ߕߟߋ߬ ߁߭ ߟߋ߬ ߓߊ߯ߙߓߊߟߌߦߊ߫ ߟߏ߲ ߘߌ߫، ߊ߲ ߕߊ ߣߌ߲߬ ߕߍ߫ ߞߍ߫ ߟߊ߫ ߓߊ߯ߙߓߊߟߌߦߊ߫ ߟߏ߲߫ ߘߌ߫߸ ߏ߬ ߞߎ߲߭ ߠߋ߬ ߊ߲ ߡߊ߬ߞߏ߫ ߟߋ߬ ߕߴߊ߬ ߟߊ߫، ߓߊ߬ߙߌ߬߸ ߣߌ߫ ߖߊ߬ߡߊ ߥߟߌ߬ ߘߊ߫ ߞߵߌ ߟߐ߬߸ ߛߏ ߓߍ߯ ߦߋ߫ ߥߌ߬ߟߌ߫ ߞߵߊ߬ ߢߊ߰ߢߊ߮ ߞߍ߫߸ ߊ߬ ߘߌ߫ ߞߍ߫ ߓߊ߯ߙߓߊߟߌߦߊ߫ ߟߏ߲ ߘߌ߫، ߊ߲ ߠߊ߫ ߟߊ߬ߢߌߣߌ߲ ߘߏ߲߬ ߦߴߏ߬ ߟߋ ߘߌ߫.>> ߊ߬ ߞߵߏ߬ ߦߙߐ ߝߐ߫ ߞߵߊ߬ ߡߊߜߟߍ߬ߦߊ߬.

ߖߡߊ߬ ߟߊ߬ߓߐ ߡߊ߫ ߘߊ߲߬ ߞߊ߲ߞߊ߲߫ ߞߋߟߋ߲߫ ߘߐ߫ ߘߋ߬، ߗߋߘߋ߲ ߠߎ߬ ߝߘߊ߫ ߘߊ߫ ߟߋ߬ ߖߡߊ߬ߣߊ ߞߣߐߟߊ ߘߐ߫߸ ߞߊ߬ ߣߊ߬ ߞߊ߬ߙߊ߲߬ߡߐ߯ ߛߏ߬ߟߏ ߟߊ߫ ߞߟߌߟߌ ߖߋ߬ߓߌ߬، ߏ߬ ߘߏ߫ ߟߋ߬ ߝߙߊߣߊ߫ ߘߌ߫ߟ ߣߎߙߑߘߌߣ ߘߍ߬ߞߙߎ ߞߐߦߌߘߊ ߡߍ߲ ߦߋ߫ ߦߋ߲߬߸ ߣߴߊ߬ߟߎ߬ ߟߊ߫ ߛߌߟߊ߫ ߢߍߟߐ ߕߎ߲߬ ߦߋ߫ ߊߟߌߝߊ߫ ߊߡߊߘߎ߬ ߓߊߙߌ߫ ߘߌ߫߸ ߏ߬ ߛߙߊ߬ߣߎ߲߬ ߘߊ߫، ߊ߬ߟߋ ߕߊ߫ ߡߙߌ߫ ߘߐ߫߸ ߖߊ߬ߡߊ ߢߌ߲߬ ߠߎ߬ ߟߊ߫ ߣߊ߬ߟߌ ߦߴߊ߬ ߦߌ߬ߘߊ߬ ߟߊ߫ ߟߋ߬߸ ߞߏ߫ ߊ߬ߟߎ߬ ߟߊߣߍ߲߫ ߞߊ߬ߙߊ߲߬ߡߐ߯ ߛߏ߬ߟߏ ߟߊ߫߸ ߊ߬ ߟߊ߫ ߞߎߡߊ ߘߏ߲߬ ߦߋ߫ ߘߏ߲߬ ߠߴߊ߬ߟߎ߫ ߡߊ߬ ߝߣߊ߫.

<<ߊ߲ ߣߴߊ߲ ߠߊ߫ ߖߊ߬ߡߊ ߣߊ߬ߣߍ߲߫ ߠߋ߬ ߞߊ߲ߞߊ߲߫߸ ߞߊ߬ ߣߵߊ߲ ߠߊ߫ ߥߊߟߖߌ ߟߊ߫ ߞߟߌߟߌ ߟߊߡߌ߬ߣߊ߬، ߓߊߏ߬߸ ߡߐ߱ ߡߍ߲ ߦߴߊ߬ ߘߌ߫߸ ߊ߬ ߦߋ߫ ߡߐ߰ߓߊ ߟߋ߬ ߘߌ߫߸ ߡߍ߲ ߦߋ߫ ߘߎߢߊ߫ ߓߍ߯ ߞߎ߲߬ߠߊ߬ߦߋߙߋ߲ ߘߌ߫، ߖߌ߬ߣߍ߬ ߞߋߟߋ߲߫ ߕߍ߫ ߘߋ߬߸ ߘߎߢߊ߫ ߡߎ߰ߡߍ ߟߋ߬.>> ߊߟߌߝߊ߫ ߊߡߊߘߎ߬ ߓߊߙߌ߫ ߞߵߏ߬ ߦߌ߬ߘߊ߬، ߞߏ߫ ߞߊ߬ߙߊ߲߬ߡߐ߯ ߛߏ߬ߟߏ ߛߊ߲߭ ߡߎ߬ߥߊ߲߬ ߣߌ߫ ߞߐ ߟߋ߬ ߕߋ߲߬߸ ߊ߬ ߟߊ߫ ߛߍ߬ߘߏ߲ ߕߍ߫ ߘߏ߫ ߜߘߍ߫ ߘߌ߫ ߖߏ߬ ߞߏ ߞߍ߬ߟߍ ߞߐ߫߸ ߊ߬ ߣߌ߫ ߛߎߓߊ߯ߦߊ ߣߴߏ߬ ߢߐ߲߰ ߘߐ ߟߎ߬، ߊ߬ ߣߴߊ߬ ߓߘߊ߫ ߞߍ߫ ߛߊߓߎ߫ ߘߌ߫ ߞߊ߬ ߘߋ߲ ߠߎ߬ ߞߟߏ߫ ߊ߬ߟߎ߫ ߛߐ߬ߘߐ߲߬ߓߊ߮ ߟߎ߫ ߡߊ߬߸ ߞߊ߬ ߡߏ߬ߛߏ ߟߎ߬ ߞߟߎ߫ ߊ߬ߟߎ߫ ߗߍ߬ ߟߎ߫ ߡߊ߬، ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ ߝߙߊߣߞߊ ߟߎ߫ ߛߊ߲߬ ߦߙߌߞߊ ߟߋ߬ ߕߋ߲߬߸ ߊ߬ߟߎ߬ ߦߋ߫ ߓߐ߫ ߟߊ߫ ߦߋ߲߬ ߞߵߊ߬ߟߎ߫ ߞߎ߲߬ߛߌ߲߬ ߞߊ߲ߞߊ߲߫ ߠߊ߫߸ ߞߊ߬ ߣߊ߬ ߛߐ߬ߘߐ߲߫ ߛߊ߲߬ ߞߎ߬ߘߊ߬ ߢߊ߯ߢߊ߮ ߣߌ߲߬ ߘߐ߫. <<ߓߍ߯ ߞߊ߬ ߊߛ߭ߎߙߊ ߕߐ߬ߣߐ ߟߐ߲߫، ߊߛ߭ߎߙߊ ߦߋ߫ ߛߊ߲߬ ߦߟߍߡߊ߲ ߠߋ߬ ߘߌ߫ ߊ߲ ߓߘߊ߸ ߞߏ߫ ߛߌߦߊߡߊ߲߫ ߦߋ߫ ߟߊߕߍ߰ ߟߊ߫ ߏ߬ ߟߏ߲ ߠߋ߬، ߡߐ߱ ߡߍ߲ ߘߏ߲߬ ߣߊ߬ߕߐ߫ ߘߎ߬ߥߊ߬ߥߎ ߞߍ߫ ߟߴߊ߲ ߧߋ߫߸ ߊ߲ ߟߊߣߴߊ߬ ߟߊ߫߸ ߞߊ߬ ߝߐ߫ ߞߏ߫ ߘߎ߬ߥߊ߬ߥߎ ߏ߬ ߡߌ߬ߣߊ߬ߕߐ߫ ߟߋ߬، ߏ߬ ߟߋ ߞߏߛߐ߲߬߸ ߊ߬ ߓߊ߯ ߝߐ߫ ߞߏ߫ ߞߊ߬ ߣߊ߬ ߞߊ߲ߞߊ߲߫߸ ߝߙߊߣߞߊ ߝߋ߲߫ ߕߍ߫ ߕߏ߫ ߟߊ߫ ߛߌ߰ ߘߐ߫߸ ߓߍ߯ ߟߋ߬ ߓߌ߬ߟߊ߬ ߟߊ߬ ߢߐ߲߮ ߞߐߝߍ߬ ߞߊ߬ ߣߊ߬، ߣߴߌ ߞߊ߬ ߡߐ߰ ߦߴߌ ߛߋ߲߬ߢߊ߫ ߝߌ߬ߟߊ߬ ߟߊ߫ ߥߟߎ߬ ߞߟߍ ߘߐ߫߸ ߝߟߐߡߊ ߟߋ߬ ߘߌߦߊߣߴߌ ߟߊ߫߸ ߊ߲ߠߎ߬ ߕߊ ߣߌ߲߬ ߘߌߦߊߣߴߊ߲ ߠߊ߫ ߟߋ߬، ߏ߬ ߟߋ ߞߏߛߐ߲߬߸ ߞߊ߬ߙߊ߲߬ߡߐ߰ ߓߊ߯ ߊ߲ ߞߟߌ߫ ߛߋ߲߬ߢߊ߫ ߡߎ߬ߥߊ߫ ߛߊ߲߭ ߞߘߐ߫߸ ߊ߲ ߘߴߊ߬ ߟߊ߫ ߞߟߌߟߌ ߟߊߡߌ߬ߣߊ߬. ߓߊߏ߬߸ ߊ߲ ߣߊ߬ߕߐ߬ߟߊ ߤߙߍ߫߸ ߊ߲ ߛߊ߬ߦߌ߲߬ߕߐ߬ߟߊ ߤߙߍ߫.>> ߊ߬ ߞߵߏ߬ ߝߙߊ߬ ߞߎߡߊ ߞߊ߲߬.

ߣߎߙߑߘߌߣ ߢߍߡߐ߮ ߟߎ߬ ߟߊ߫ ߞߎߡߊ ߏ߬ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߊ߬ ߞߊ߬ߣߌ߲߬ߓߊ߮ ߘߏ߫ ߟߎ߫ ߓߐ߫ ߘߊ߫ ߦߙߐ߫ ߜߘߍ߫ ߟߎ߫ ߘߐ߫ ߞߊ߬ ߣߊ߬߸ ߡߍ߲ ߠߎ߬ ߓߘߊ߫ ߣߊ߬ߟߌ ߕߐ߬ߣߐ ߦߴߊ߬ߟߎ߬ ߟߊ߫ ߞߏ߫ ߛߌߦߊߡߊ߲߫ ߘߐ߫، ߒߡߊ߭ߥߊ߬ ߞߐ߲ߘߍ߫ ߦߴߏ߬ ߘߏ߫ ߟߋ߬ ߘߌ߫߸ ߊ߬ߟߋ ߡߍ߲ ߦߋ߫ ߓߐ߫ ߟߊ߫ ߝߙߎߓߊ߲߫، ߊ߬ߟߋ ߛߐ߰ ߘߊ߫ ߟߊ߬ߛߙߋ߬ߦߊ߬ߟߌ ߟߋ߬ ߝߟߐ߫ ߡߊ߬ ߡߎߣߎ߲߬߸ ߞߵߊ߬ ߦߌ߬ߘߊ߬ ߞߏ߫ ߘߍ߰ ߞߏ ߣߌ߲߬ ߕߍ߬ߘߍ߫ ߡߐ߰ߓߊ ߟߎ߬ ߟߊ߫ ߛߌߟߊ߫ ߞߘߐ ߟߋ߬ ߘߌ߫.

<<ߘߍ߰ ߞߏ ߡߍ߲ ߣߌ߲߬߸ ߊ߲ ߠߊ߫ ߡߐ߰ߓߊ ߟߎ߫ ߟߋ߬ ߕߍ߬ߘߍ߫ ߣߌ߲߬ ߞߍ߫ ߟߊ߫ ߝߟߐ߫، ߓߊߕߍ߫ ߣߊ߲߬ߒ߬ߞߊ߲߬ߡߊ߬ ߘߋ߲ ߠߋ߬ ߣߊ߬ߣߍ߲߫ ߞߊ߬ ߣߊ߬ ߏ߬ ߦߌ߬ߘߊ߫ ߒ߬ ߠߊ߫߸ ߞߏ߫ ߊ߲ ߧߴߊ߲ ߞߐߛߊ߬ߦߌ߲߫ ߊ߲ ߣߐ߬ ߞߘߐ ߡߊ߬، ߝߟߐ߫ ߕߘߍ߬߸ ߊ߲ ߠߊ߫ ߡߐ߰ߓߊ߬ߞߘߐ ߟߎ߫ ߕߍ߬ߘߍ߫ ߡߍ߲߬ ߠߋ߬ ߞߍ߫ ߟߊ߫߸ ߖߐ߲߬ߓߍ߲߬ߘߍ߬ ߛߊߟߌ ߝߍ߬߸ ߞߵߊ߬ ߘߐߝߘߊ߫ ߞߊ߬ ߓߘߊߟߝߊ ߞߍ߫.>> ߊ߬ ߞߵߏ߬ ߟߊߛߙߋߦߊ߫. ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ ߓߘߊ߫ ߕߣߐ߬ ߛߌߦߊߡߊ߲߫ ߠߋ߬ ߛߐ߬ߘߐ߲߫ ߞߊ߬ߙߊ߲߬ߡߐ߯ ߛߏ߬ߟߏ ߟߊ߫ ߞߏ ߘߐ߫، ߓߊߏ߬߸ ߜߟߍ߬ߦߊ ߡߍ߲ ߠߎ߬ ߕߍ߬ߘߍ߫ ߊ߬ ߞߊ߲߬߸ ߏ߬ ߛߌߦߊߡߊ߲߫ ߓߘߊ߫ ߟߊߥߟߌ߬. ߞߊ߬ߙߊ߲߬ߡߐ߯ ߛߏ߬ߟߏ ߟߊ߫ ߞߏ ߓߘߊ߫ ߡߛߏ߬ ߖߊߡߊ߲ߣߍ߲ ߛߌߦߊߡߊ߲߫ ߝߊ߲ߡߊߖߌ߰߸ ߞߊ߬ ߘߋ߲߫ ߝߢߊߣߍ߲ ߛߌߦߊߡߊ߲߫ ߞߟߏ߫، ߊ߬ ߞߊ߲߫ ߏ߬ ߟߋ ߘߐ߫ ߞߏ߫: <<ߒߠߋ ߡߍ߲ ߖߍ߬ߘߍ ߣߌ߲߬߸ ߒ ߣߌ ߓߏ߲߬ߓߊ߬ ߓߊߟߋ߬ ߕߘߍ߬، ߞߏ߬ߣߌ߲߸ ߌ ߘߌ߫ ߥߊ߫ ߒߠߋ ߣߊ߬ߣߌ߲߬ ߒ ߠߊ߫ ߓߏ߲ ߠߊ߫ ߓߌ߬߸ ߒ ߕߴߌ ߖߋ߬ߓߌ߬.>> ߊ߬ ߞߵߏ߬ ߦߌ߬ߘߊ߬.

ߢߐ߲߯ߓߍ߲ߓߊ ߣߌ߲߬ ߘߐ߫߸ ߘߏ߫ ߟߎ߫ ߝߣߊ߫ ߣߊ߬ ߘߊ߫ ߞߊ߬ ߓߐ߫ ߡߊ߲߬ߘߋ߲߫ ߡߊ߬ߟߌ ߟߊ߫߸ ߞߊ߯ߓߊ߫ ߣߎ߬ߜ߭ߊ߫ ߖߎ߬ߟߊ߬ߝߏ߲ߘߏ߫، ߊߡߊߘߎ߬ ߓߍߙߑߘߋ߫ ߦߴߏ߬ ߘߏ߫ ߟߋ߬ ߘߌ߫، ߊ߬ߟߋ ߞߊ߲߫ ߞߏ߫ ߊ߬ߟߎ߫ ߛߊ߲߬ ߕߊ߲߫ ߣߌ߫ ߞߐ ߟߋ߬ ߕߋ߲߬߸ ߊ߬ߟߎ߬ ߦߋ߫ ߓߐ߫ ߟߊ߫ ߡߊ߬ߟߌߌ ߞߣߐ߫ ߞߊ߬ ߣߊ߬ ߥߊߟߖߌ ߟߊ߫ ߖߊ߲߬ߖߏ߲ ߠߎ߬ ߘߐ߫.

<<ߞߊ߬ߙߊ߲߬ߡߐ߯ ߛߏ߬ߟߏ ߓߊ߯ ߥߋ߯ߟߋ ߓߌ߬ߟߴߊ߲ ߡߊ߬ ߥߊ߯ߕߌ ߺ ߌ ߺ ߥߊ߯ߕߌ߫߸ ߊ߲ ߓߍ߫ ߣߵߊ߬ ߟߊ߫ ߥߋ߯ߟߋ ߖߋ߬ߓߌ߬، ߞߊ߬ߦߌ߯ ߊ߲ ߞߊ߬ ߓߊ߯ߙߊ ߘߊߡߌ߬ߣߊ߫ ߞߊ߬ߛߋ߫ ߓߌ߬ ߡߊ߬߸ ߊ߲ ߡߊ߫ ߕߍ߰ ߢߐ߲߯ ߘߐ߫߸ ߟߊߒߠߦߊ ߟߋ߬ ߦߴߊ߲ ߕߍ߫.>> ߊ߬ ߞߵߏ߬ ߦߌ߬ߘߊ߬، ߊ߬ߟߋ ߟߊ߫ ߝߐߟߌ߫ ߘߐ߫߸ ߞߊ߬ߙߊ߲߬ߡߐ߯ ߛߏ߬ߟߏ ߓߘߊ߫ ߕߐ߬ߣߐ ߡߍ߲ ߠߊߛߋ߫ ߡߊ߬ߟߌ߬ߞߊ ߟߎ߫ ߡߊ߬߸ ߊ߬ ߕߍ߫ ߓߊ߲߫ ߝߐ߫ ߟߊ߫، <<ߊ߬ ߓߘߊ߫ ߕߐ߬ߣߐ ߡߍ߲ ߠߊߛߋ߫ ߡߊ߬ߟߌ߬ߞߊ ߟߎ߬ ߡߊ߬߸ ߊ߬ ߞߊ߫ ߛߌߦߊ߫ ߞߏߖߎ߯ߦߊ߫، ߊߟߊߡߵߊ߬ ߛߌ߭ ߞߊ߲ߘߊ߫ ߘߴߊ߲ ߓߟߏ߫.>> ߊ߬ ߞߵߏ߬ ߝߙߊ߬ ߞߎߡߊ ߞߊ߲߬.

ߛߋ߲߬ߕߊ߬ ߝߟߐ ߢߌ߲߬ ߠߎ߬ ߓߊ߯ ߓߊ߲߫ ߞߊ߲ߞߊ߲߫ ߞߣߐ߫߸ ߣߎߙߑߘߌߣ ߞߊ߬ߣߌ߲߬ߓߊ߮ ߟߎ߬ ߓߍߣߵߊ߬ߟߎ߫ ߞߎ߲߬ߛߌ߲߫ ߖߊ߲߬ߞߊ߰ߣߊ߫ ߟߋ߬ ߟߊ߫ ߂߀߂߆ ߥߊ߬ߛߌ߬ߥߙߊ ߕߋ߬ߟߋ߫ ߂߅ ߡߊ߬߸ ߞߊ߬ ߥߊ߫ ߛߊ߲߬ ߞߎ߬ߘߊ߬ ߢߊ߯ߢߊ߮ ߕߐ߭ ߞߍ߫ ߞߊ߲ߡߊ߬ ߦߋ߲߬، ߟߊ߬ߢߌߣߌ߲߬ ߞߋߟߋ߲߫ ߔߋ߫ ߟߋ߬ ߣߎߙߑߘߌߣ ߠߊ߫ ߛߊ߲߬ ߞߎ߬ߘߊ߬ ߛߌߟߊ ߢߌ߲߬ ߘߐ߫߸ ߏ߬ ߟߋ ߓߊߘߋ߲ߧߊ ߟߊߛߓߊ߬ߕߌ ߘߌ߫߸ ߞߊ߬ ߖߛߎ߬ߛߎߡߊ ߟߊߘߏ߲߬ ߦߙߐ ߓߍ߯ ߘߐ߫، ߏ߬ ߞߏߛߐ߲߬߸ ߟߊ߲ߖߌ߬ ߞߊ߬ߓߊ߫ ߞߏ߬ߣߊ߬ߕߍ߫ ߞߵߊ߬ ߦߌ߬ߘߊ߬߸ ߞߏ߫: <<ߡߐ߱ ߥߊ߯ ߗߡߍ߬ ߦߙߌߞߊ߫.>> ߟߋ߬ ߡߊߞߐ߬ߣߐ߲߬ߣߍ߲߫ ߘߎ߬ߥߊ߬ߥߎ ߞߎ߲߬ߘߏ߲ ߘߐ߫ ߖߊ߲߬ߞߊ߰ߣߊ߬.