ߡߊ߬ߛߎ߬ߓߊ߬ߞߏ߫ ߟߋ߬ ߕߍ߰ߣߍ߲߫ ߞߛߌ߬ߘߎ߯ ߞߍ߲ߘߍߟߏ߲ ߣߌ߲߬ ߡߊ߬ ߂߀߂߆ ߘߓߊ߬ߕߊ ߕߋ߬ߟߋ߫ ߂߃، ߘߋ߲ߣߍ߲߫ ߛߐ߬ߘߐ߲ ߕߟߋ߬ ߥߐߙߐ߲ߝߌ߬ߟߊ ߘߏ߫߸ ߏ߬ ߟߋ ߛߎ߭ ߦߋߣߍ߲߫ ߟߎߡߊ߫ ߞߊߓߌߣߍ ߘߏ߫ ߞߣߐ߫߸ ߊ߬ ߕߎߣߎ߲߫ ߞߏ ߟߊߛߋ ߞߐߝߍ߬ ߊ߬ ߣߊ߫ ߓߟߏ߫ ߕߎ߬ߡߊ߬ߙߋ߲߬ ߘߊ߲ߘߐ߫ ߟߊ߫.

ߊ߬ ߣߊ߫ ߟߊ߫ ߟߊ߬ߛߙߋ߬ߦߊ߬ߟߌ߬ ߞߊ߲ ߘߐ߫߸ ߊ߬ߟߋ ߡߍ߲ ߕߐ߯ ߞߏ߫ ߛߙߊߕߊ߫ ߞߋߙߊ߫߸ ߣߴߊ߬ ߡߊߖߌ߰ߣߍ߲߫ ߦߛߊߝߍߞߙߐ߫ ߞߌ߲߬ߘߊ ߟߊ߫߸ ߞߏߢߊ ߣߌ߲߬ ߥߟߌ߬ ߘߊ߫ ߝߌ߬ߕߙߌ߬ ߛߊ߬ߟߌ߬ ߞߐ ߟߋ߬ ߘߐ߫߸ ߞߵߊ߬ ߛߐ߬ߘߐ߲߬ ߛߊ߲ ߦߋ߫ ߣߊ߭ ߟߊ߫، ߛߊ߲ ߡߊߕߍ߱ ߞߐ ߟߋ߬ ߘߐ߫߸ ߡߏ߬ߛߏ ߞߵߊ߬ ߥߌ߬ߟߌ߫ ߞߊ߬ ߥߊ߫ ߘߋ߲ ߟߊߟߊ߫ ߞߊ߲ߡߊ߬ ߓߏ߲ ߠߊ߫.

<<ߒ ߞߊ߬ ߘߋ߲ ߕߊ߬ ߛߍߣߍ߲߬ ߞߊ߬ ߥߴߊ߬ ߟߊߟߊ߫ ߓߏ߲ ߠߊ߫߸ ߒ ߞߏ߫ ߝߌ߬ߕߙߌ ߓߘߊ߫ ߛߋ߫، ߒ ߓߐ߫ ߘߊ߫ ߞߣߍߡߊ߬ ߞߊ߬ ߣߊ߬ ߒ ߛߌ߰߸ ߞߵߊ߬ ߛߐ߬ߘߐ߲߬ ߒ ߧߋ߫ ߘߋ߲ߣߍ߲ ߘߏ߫ ߞߎ߲߬ߘߊ߲ ߠߊ߫.>> ߊ߬ ߞߵߏ߬ ߦߌ߬ߘߊ߫ ߞߵߊ߬ ߟߴߊ߬ ߞߊ߲߬߸ ߞߏ߫ ߊ߬ߟߋ߫ ߛߌ߰ߣߍ߲ ߕߏ߫ ߘߊ߫ ߢߊ ߏ߬ ߟߋ ߡߊ߬߸ ߊ߬ߟߎ߬ ߟߊ߫ ߟߎߕߌ߮ ߟߊ߫ ߘߋ߲ߣߍ߲ ߣߊ߬ ߘߊ߫ ߘߏ߲߬ ߓߏ߲ ߞߣߐ߫ ߛߋ߲߬ߢߊ߫ ߝߌ߬ߟߊ߬߸ ߊ߬ ߡߍ߲߫ ߘߊ߫ ߘߏߣߍ߲߫ ߞߊ߬ ߓߊ߲߫ ߞߊ߬ ߓߐ߫߸ ߘߋ߲ ߟߊߣߍ߲߫ ߕߘߍ߬ ߓߏ߲ ߡߍ߲ ߠߊ߫ ߞߊ߬ߣߌ߲߬.

ߏ߬ ߞߐߝߍ߬ ߡߌ߬ߛߍ߲߬ ߘߊ߲ߘߐ߫߸ ߡߏ߬ߛߏ ߞߊ߬ ߡߐ߲߬ߛߐ߲ ߘߴߊ߬ ߘߋ߲ߞߍߣߍ߲ ߡߊ߬ ߞߏ߫ ߊ߬ ߦߋ߫ ߥߊ߫ ߕߊ ߟߊߡߍߣߍ߲߫ ߊ߬ ߘߐ߯ߣߍ߲ ߞߎ߲߬ߠߊ߬ ߓߏ߲ ߠߊ߫. <<ߒ ߘߋ߲ߞߍߣߍ߲ ߞߐߛߊߦߌ߲ ߣߊ߬ ߘߴߊ߬ ߝߐ߫ ߒ ߧߋ߫߸ ߞߏ߫ ߋ߹ ߒ ߣߊ߬߸ ߒ ߘߐ߯ߣߍ߲ ߕߍ߫ ߓߏ߲ ߠߊ߫ ߘߋ߬.>> ߡߏ߬ߛߏ ߢߊߖߌߞߎߘߎ߲ߕߐ ߟߋ߬ ߞߊ߬ ߣߌ߲߬ ߢߊߝߐ߫، ߊ߬ߟߋ ߖߛߎ߬ߓߐ߬ߡߍ߬ߣߍ߲߬ߕߐ ߥߟߌ߬ ߢߊ ߟߋ߬ ߞߍߣߴߏ߬ ߘߌ߫߸ ߞߊ߬ ߡߐ߲߬ߛߐ߲ ߝߊ߬ߙߏ߲߫ ߊ߬ ߘߋ߲ߞߍߣߍ߲ ߠߊ߫ ߞߊ߬ ߘߏ߲߬ ߓߏ߲ ߠߊ߫. ߊ߬ ߞߊ߲߫ ߞߏ߫ <<ߒ ߡߊ߫ ߒ ߘߋ߲ ߦߋ߫ ߓߏ߲ ߠߊ߫ ߦߋ߲߬.>>

ߞߐߙߍ ߕߐ߭ ߟߎ߬ ߟߊߟߐ߲ߠߌ߲߫ ߢߊ ߟߋ߬ ߞߍߣߴߏ߬ ߘߌ߫߸ ߓߍ߯ ߞߵߊ߬ ߟߐ߬ ߊ߬ ߛߋ߲߭ ߞߎ߲߬ߘߐ߫ ߘߋ߲ ߢߌߣߌ߲߫ ߞߊ߲ߡߊ߬߸ ߞߵߏ߬ ߟߊ߫ ߞߌ߲߬ߘߊ ߞߏߟߊߕߍ߮ ߟߎ߫ ߞߊ߲߬، ߡߐ߰ ߝߌ߬ߟߊ߬ ߝߟߐ ߡߍ߲ ߠߎ߬ ߣߊ߬ ߘߊ߫ ߞߌ߲߬ߘߊ ߞߏߟߊߕߍ߮ ߟߎ߬ ߘߐ߫߸ ߏ߬ ߟߎ߬ ߓߍ߯ ߛߐ߬ߘߐ߲߬ ߘߊ߫ ߢߌߣߌ߲ߠߌ߲ ߘߐ߫߸ ߘߋ߲ ߡߊ߫ ߦߋ߫، ߝߏ߫ ߞߙߎ߫ ߛߓߊߣߊ߲ ߠߊ߫ ߣߊ߬ߟߌ ߟߋ߬ ߝߍ߬߸ ߏ߬ ߟߎ߫ ߞߊ߬ ߘߋ߲ ߦߋ߫ ߞߊ߬ߓߌߣߍ ߞߣߐ߫.

ߦߛߊߝߍߞߎߙߊ߫ ߞߌ߲߬ߕߌ߮߸ ߞߊ߬ߙߌ߲߬ߞߊ߲߬ ߓߙߋߕߋ߫ ߞߊ߬ ߣߌ߲߬ ߞߏ ߟߊߛߙߋߦߊ߫߸ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ ߟߊߟߐ߲ߠߌ߲߫ ߘߊ߫ ߝߌ߬ߕߙߌ߬ ߛߊ߬ߟߌ߬ ߕߎߡߊ ߟߋ߬ ߟߊ߫، <<ߒ ߠߊ߫ ߞߎ߲߬ߘߊ߬ߕߌ߮ ߞߊ߬ ߒ ߞߟߌ߫ ߞߵߊ߬ ߝߐ߫ ߒ ߧߋ߫ ߞߏ߫ ߛߌ߲ߡߌ߲߫ ߘߋ߲ ߘߏ߫ ߓߘߊ߫ ߕߎߣߎ߲߫߸ ߊ߬ ߦߋߣߍ߲߫ ߕߍ߫ ߡߎߣߎ߲߬.>> ߊ߬ ߞߵߏ߬ ߦߌ߬ߘߊ߬.

ߌߞߘߐ߫߸ ߞߌ߲߬ߕߌ߮ ߞߊ߬ ߟߊ߬ߞߊ߲߬ߘߊ߬ߟߌ ߝߊ߰ߡߊ ߟߎ߬ ߟߊߟߐ߲ߠߌ߲߫߸ ߕߐ߲ߓߟߏߡߊ ߟߎ߬߸ ߞߟߍ߬ߡߐ߮߮ ߟߎ߬߸ ߊ߬ ߣߌ߫ ߞߕߌ ߝߊ߰ߡߊ ߟߎ߬، <<ߒ ߓߊ߲ ߛߊߟߌ ߟߊ߫߸ ߒ ߞߊ߬ ߟߊ߬ߞߊ߲߬ߘߊ߬ߟߌ ߓߟߏߡߊ ߟߎ߬ ߟߊߟߐ߲ߠߌ߲߫߸ ߊ߬ ߣߌ߫ ߒ ߛߊ߲ߝߍ߫ ߡߐ߮ ߟߎ߬.>> ߊ߬ ߞߵߏ߬ ߟߊߛߙߋߦߊ߫، ߏ߬ ߟߋ ߞߍ߫ ߘߊ߫ ߛߏ ߕߐ߲ߓߟߏߡߊ ߟߎ߬ ߣߌ߫ ߞߌ߲߬ߕߌ߮ ߥߟߌ߬ ߢߊ ߘߌ߫ ߞߊ߬ ߥߊ߫ ߛߋ߫ ߟߎ ߞߣߐ߫߸ ߞߊ߬ ߢߊߢߌߣߌ߲ߠߌ߲߫ ߞߎ߲߬ߝߟߐ ߟߎ߬ ߞߍ߫.

ߕߎ߬ߡߊ߬ ߖߏߣߊ ߟߊ߫߸ ߘߋ߲ߣߍ߲ ߡߊ߫ ߦߋ߫߸ ߊ߬ ߜߊ߲߬ߜߊ߲߬ ߠߊ߬ߜߊߛߌ߫ ߡߊ߫ ߦߋ߫، ߓߊ߬ߙߌ߬߸ ߓߊߞ ߡߐ߱ ߟߎ߬ ߣߊ߭ ߡߍ߲ ߞߍ߫ ߘߊ߫ (ߞߏߙߏ߲ߧߊ ߞߍ߬ߟߍ ߓߙߌ߬ߝߐߝߐ ߝߙߍߕߍ߫ ߂߅)߸ ߏ߬ ߞߊ߬ ߦߟߍ߬ߡߊ߲ ߘߏ߲߬ ߞߏ ߟߎ߬ ߘߐ߫، <<ߊ߬ߟߎ߬ ߘߏ߫ ߘߐ߫ ߞߋߟߋ߲߫ ߞߊ߬ ߡߐ߲߬ߛߐ߲ ߟߐ߬ ߞߊ߬ߓߌߣߍ ߞߣߐߟߊ ߘߐ߫߸ ߞߊ߬ ߛߎ߭ ߘߏ߫ ߟߊߣߍ߲ ߦߋ߫.>> ߞߌ߲߬ߕߌ߮ ߞߵߏ߬ ߦߌ߬ߘߊ߬.

ߘߋ߲ ߛߎ߭ ߟߊߓߐ߫ ߘߊ߫ ߜߟߍ߬ߦߊ߬ߓߊ߫ ߟߋ߬ ߘߐ߫߸ ߣߍ߱ ߟߋ߬ ߘߐߞߙߎ߬ ߘߊ߫ ߞߵߊ߬ ߞߍ߫ ߦߏ߫ ߛߎ߲߬ߜߟߊ، <<ߊ߬ߟߎ߫ ߣߐ߬ ߏ߬ ߟߊߖߌ߰ ߟߊ߸ ߘߋ߲ ߝߊ߲߬ ߞߋߟߋ߲ ߡߎ߰ߡߍ ߕߘߍ߬ ߖߌ ߟߋ߬ ߘߐ߫.>> ߊ߬ ߞߵߊ߬ ߦߋ߫ ߢߊ ߏ߬ ߦߌ߬ߘߊ߬. ߓߊߙߊ߲ߕߏ߲߫ ߥߎߟߋ߲ ߘߏ߲߬ߞߏ ߟߎ߫ ߕߎ߲߬ ߓߘߊ߫ ߛߋ߫ ߞߣߍ ߞߊ߲߬߸ ߌߞߏߡߌ߲߬ ߏ߬ ߟߎ߬ ߟߊ߫ ߓߊ߯ߙߊ ߟߋ߬ ߞߏ߫ ߛߎ߮ ߏ߬ ߟߎ߬ ߘߌ߫߸ ߏ߬ ߟߎ߬ ߛߋ߫ ߘߴߊ߬ ߟߊߓߐ߫ ߟߊ߫ ߞߊ߬ ߢߊ߬.

ߘߋ߲ߣߍ߲ ߠߊߦߟߍ߬ߣߍ߲߸ ߞߌ߲߬ߕߌ߮ ߞߊ߲߫ ߞߏ߫: <<ߕߎ߲߬ߓߎ ߕߍ߬ߘߍ߫ ߊ߬ ߝߊ߲߭ ߓߍ߯ ߟߋ߬ ߡߊ߬، ߊ߬ߟߎ߫ ߞߵߊ߬ ߛߊߣߌ߲ߧߊ߫ ߡߎߣߎ߲߬ ߞߣߊ߬ߕߏ߫ ߊ߬ ߟߊߕߊ߯ ߟߊ߫ ߘߊ߲ߘߊߛߏ ߟߊ߫.>> ߊ߬ ߞߵߏ߬ ߦߌ߬ߘߊ߬. ߓߊߏ߬߸ ߕߎ߬ߡߊ ߏ߬ ߞߵߊ߬ ߛߐ߬ߘߐ߲߫ ߠߋ߬ ߛߋ߲߬ߘߐ߬ߞߎߟߎ߲ ߦߋ߫ ߦߋ߲߬߸ ߊ߬ ߓߌ߬ߟߊ߬ ߘߴߏ߬ ߟߋ ߞߣߐ߫ ߞߊ߬ ߥߴߊ߬ ߘߌ߫ ߘߊ߲ߘߊߛߏ ߟߊ߫߸ ߞߵߊ߬ ߓߌ߬ߟߊ߫ ߛߎ߬ߓߏ߲ ߠߊ߫ ߦߋ߲߬.

ߘߋ߲ ߣߌ߲߬ ߦߋ߫ ߡߛߏ߬ߡߊ߲߬ߣߍ߲ ߠߋ߬ ߘߌ߫.

ߘߌ߲߬ߞߌߙߊ ߝߊ߰ߡߊ ߟߎ߬ ߟߊ߫ ߝߐߟߌ߫ ߘߐ߫߸ ߘߋ߲ ߢߌ߲߬ ߠߊ߫ ߛߊ߬ߦߊ ߞߍߢߊ ߘߐߝߌ߲߬ߣߍ߲߫߸ ߡߍ߲ ߕߴߛߋ߫ ߢߊߝߐ߫ ߟߊ߫ ߡߎߣߎ߲߬ ߝߊߦߌߘߊ߫، <<ߞߊ߬ߕߎ߲߯߸ ߘߋ߲ߣߍ߲߬ ߛߋߕߐ߫ ߓߐ߫ ߟߊ߫ ߓߏ߲ ߠߊ߫ ߘߌ߬߸ ߞߊ߬ ߥߴߊ߬ ߦߋ߫ ߞߊ߬ߓߌߣߍ ߞߣߐ߫، ߏ߬ ߡߊߞߓߊߣߍ߲߫߸ ߊ߬ ߢߊߦߋ߫ ߜߏߡߊ߲߫.>> ߞߊ߬ߙߌ߲߬ߞߊ߲߬ ߓߙߋߕߋ߫ ߟߋ߬ ߞߊ߲߫ ߊ߬ ߖߘߍ߬ ߡߊߢߌ߬ߣߌ߲߬ߞߊ߬ ߟߴߏ߬ ߘߌ߫.

ߛߊ߬ߙߌ߬ߦߊ߫ ߘߏ߲߬ߞߏ ߟߎ߬ ߓߘߊ߫ ߢߊߢߌߣߌ߲ߠߌ߲߫ ߛߌ߰ ߛߋ߲߬ߠߊ߫߸ ߞߵߊ߬ߟߎ߬ ߢߊ ߕߏ߫ ߊ߬ ߞߏ ߝߍ߬ ߞߏߛߓߍ߫، ߞߐߙߍ ߡߎ߰ߡߍ ߟߋ߬ ߕߊ߬ ߘߊ߫ ߝߊ߰ߡߊ ߟߎ߬ ߓߟߏ߫ ߞߏ ߞߍ߫ ߛߊ߲ ߏ߬ ߡߊ߬߸ ߞߊ߬ ߥߴߊ߬ߟߎ߬ ߓߍ߯ ߘߌ߫ ߛߊ߬ߙߌ߬ߦߊ߬ ߟߊ߫߸ ߞߊ߬ ߕߟߏߡߊߟߐ߫ ߞߍ߫ ߊ߬ߟߎ߬ ߟߊ߫، ߞߌ߲߬ߕߌ߮ ߞߏ߬ߣߌ߲ ߞߵߊ߬ ߦߌ߬ߘߊ߬ ߞߏ߫ <<ߊ߲ ߡߊ߫ ߛߋ߫ ߊ߬ ߞߍߓߊ߯ ߟߐ߲߫ ߠߊ߫ ߡߎߣߎ߲߬.>> ߞߵߊ߬ ߟߴߊ߬ ߞߊ߲߬߸ ߊ߬ߟߎ߫ ߞߵߊ߬ ߕߊ߬ ߟߋ߬ ߊ߬ ߞߏ ߢߊߢߌߣߌ߲ ߠߊ߫ ߤߊ߲߯ ߛߎ ߦߋߙߋ߲ߦߋߙߋ߲.

ߞߕߌߞߊ߲ߘߊ ߖߍ߬ߘߍ ߥߟߌ߬ ߘߊ߫ ߞߊ߯ߙߌ ߣߌ߲߬ ߡߊ߬߸ ߞߊ߬ ߥߊ߫ ߛߋ߫ ߘߊ߲ߘߊߛߏ ߟߊ߫߸ ߞߊ߬ ߞߏ ߟߎ߬ ߢߊߢߌߣߌ߲߫߸ ߞߊ߬ ߓߊ߲߫ ߞߊ߬ ߖߊ߬ߡߊߙߌ ߘߌ߫ ߘߊ߲ߘߊߟߌߟߊ ߟߎ߫ ߡߊ߬߸ ߞߏ߫ ߊ߬ߟߎ߬ ߦߋ߫ ߘߋ߲ ߡߊߝߟߍ߫ ߊ߬ ߢߌ߬ߡߊ ߟߊ߫߸ ߞߊ߬ ߛߊ߬ߦߊ ߞߍߢߊ߫ ߖߐ߲ߖߐ߲ ߟߐ߲߫.

ߡߐ߰ߦߊ ߛߌߟߊ ߝߍ߬߸ ߘߋ߲߫ ߣߊ ߝߊ߬ߘߌ ߟߊ߲߰ߝߏ߬ߣߍ߲߫ ߕߘߍ߬ ߞߏߛߓߍ߫߸ ߊ߬ ߕߊ߬ ߘߊ߫ ߞߊ߬ ߥߴߊ߬ ߘߌ߫ ߘߊ߲ߘߊߛߏ ߟߊ߫، ߞߌ߲߬ߕߌ߮ ߖߍ߬ߘߍ ߞߵߊ߬ ߝߐ߫ ߞߏ߫ <<ߊ߬ ߞߊ߬ ߛߎ ߓߊ߲߫ ߠߋ߬߸ ߊ߬ ߕߍ߫ ߝߊ߬ߘߌ߬ ߢߌߡߊ߫ ߘߐ߫، ߊ߬ ߕߎ߲߬ ߕߴߊ߬ ߝߊ߬ߘߌ߬ ߘߐ߫ ߓߊߞߍ߫.>> ߞߌ߲߬ߕߌ߮ ߟߋ߬ ߞߊ߲߫ ߕߋ߲߬، ߓߊߛߌ߫ ߛߓߍ ߡߍ߲ ߝߐ߫ ߘߊ߫ ߘߊ߲ߘߊߛߏ ߟߊ߫߸ ߣߴߊ߬ ߕߘߍ߬ ߃߂߀ ߀߀߀ ߢߐ߲߰ ߘߌ߫߸ ߏ߬ ߛߙߊ߬ ߘߊ߫ ߞߐߙߍ ߓߟߏ߫.

ߞߏߢߊ ߣߌ߲߬ ߞߏ߬ߣߌ߲ ߞߍߣߍ߲߫ ߞߓߊߞߏ ߟߋ߬ ߘߌ߫ ߞߌ߲߬ߘߊ ߞߣߐ߫ ߦߋ߲߬߸ ߓߍ߯ ߦߋ߫ ߝߊ߰ߡߊ ߟߎ߬ ߟߊ߫ ߢߊߢߌߣߌ߲ߠߌ߲ ߞߐߝߟߌ ߟߋ߬ ߡߊߞߐ߬ߣߐ߲ ߛߌ߱ ߘߐ߫ ߛߍߣߍ߲߬.